ලියුම්කරු ඇඳිරි නීතිය පැනවූ කොළඹ දිස්ත්‍රික් සීමාවේ පදිංචිකරුවෙකි. ඇඳිරි නීතිය පැනවීමෙන් පසු මේ දක්වා භාණ්ඩ බෙදාහැරීම සඳහා කිසිදු ජංගම රථයක් පැමිණියේ නැත. සුපිරි වෙළඳසැල් කිහිපයකින් පමණක් භාණ්ඩ බෙදාහැරීම් සේවා ගැන දැන්වීම් දක්නට ලැබුණි. එහෙත්, සම්පූර්ණ අවශ්‍යතාව සැපිරීමේ හැකියාව සුපිරි වෙළඳසැල් කිහිපයකට නැත.
ඇඳිරි නීතිය පැනවීමට දිනකට පෙර හදිසියේ පොල් ගෙඩි කිහිපයක් සහ සතියකට අවශ්‍ය භාණ්ඩ මිලදී ගත් නිසා දැන් හාමත් වෙන්නට සිදු වී නැතත්, හදිසියේ අන්තිම මොහොතේ එය නොකළා නම්, ඇඳිරි නීතිය දින තුනක එකක් පමණක් වනු ඇතැයි ආණ්ඩුව කී කතාව විශ්වාස කළා නම්, මේ වන විට මහා අමාරුවක වැටීමට සිදුවනු ඇත.
දැන් ලියුම්කරු සමඟ කතාබහ කළ හිතමිතුරන් සැලකිය යුතු පිරිසක් කීවේ භාණ්ඩ මිලදී ගැනීමේ හැකියාවක් නොමැති බවය. ජංගම රථ නොමැති බවත්, දන්නා කියන වෙළඳසැලකට ඇමතුවත් භාණ්ඩ විකිණී අවසන් යැයි කියන බවත් ය. එළවළු පවා මිල අධික වී තිබේ. බස්නාහිර පළාතෙන් පිට තොග වෙළෙන්දන්ට භාණ්ඩ රැගෙන ඒම සඳහා ‘විශේෂ ක්‍රමවේදයක්’ සකසා ඇති බව පොලිස් මාධ්‍ය ප්‍රකාශකවරයා කීවත්, තවම එවැන්නක් ගැන දැනගන්නට නැත.
බස්නාහිර පළාතේ ඇඳිරි නීතිය නිසා තොග වෙළඳුන් නොපැමිණීම හේතුවෙන් කැප්පෙටිපොළ ආර්ථික මධ්‍යස්ථානය තුළ නොවැම්බර් 02 වැනිදා දහවල් වන විට එළවළු කිලෝ ලක්ෂ 15ත්, 20ත් අතර ප්‍රමාණයක් ගොඩ ගැසී ඇතැයි ප්‍රාදේශීය මාධ්‍යවේදීන් පුවත්පත්වලට වාර්තා කර තිබුණි.
එළවළු තොග අලෙවි නොවීම නිසා එළවළු මිල ගණන්ද විශාල ලෙස පහත වැටී ඇතැයි ආර්ථික මධ්‍යස්ථානවලින් සඳහන් කර තිබුණි.
අරුණ පුවත්පතේ වාර්තාවකට අනුව භාණ්ඩ කිලෝවක මිල මෙසේය. බෝංචි රු. 70-80, බටු රු. 30-40, ගෝවා රු. 40-50, මාළු මිරිස් 180, කැරට් රු. 60, අමුමිරිස් රු. 150, නෝකෝල් රු. 60, ලීක්ස් රු. 30 වශයෙනි.
කැප්පෙටිපොළ ආර්ථික මධ්‍යස්ථානයේ වෙළඳ සංගමයේ ලේකම් මහින්ද ප්‍රේමසිරි අරුණ පුවත්පතට කියා තිබුණේ බස්නාහිර පළාතේ වෙළඳ මධ්‍යස්ථාන වෙත රැගෙන ගිය එළවළු ඇඳිරි නීතිය පැනවීමෙන් පසු නැවත වෙළඳ මධ්‍යස්ථානයට රැගෙන ආ බවය.
නුවරඑළිය ආර්ථික මධ්‍යස්ථානයේ දිනකට බෙදාහැරි එළවළු කිලෝ ලක්ෂ දෙකහමාරක් මේ වන විට කිලෝ පණස්දහස දක්වා පහළ බැස ඇති බව නුවරඑළිය ආර්ථික මධ්‍යස්ථානයේ වෙළඳ සංගමයේ ලේකම් අරුණ ශාන්ත පවසා තිබුණි. ආර්ථික මධ්‍යස්ථාන ගණනාවක් සහ සුපිරි වෙළඳසල් ගණනාවක් වසා දමා ඇති නිසා එළවළු සඳහා පවතින ඉල්ලුම අඩු වීම මීට හේතුව වී ඇතැයි කියා තිබේ. ඔවුන් කියා ඇත්තේ අවස්ථාවක් දුන්නොත් එළවළු ඇඳිරි නීතිය පවතින ප්‍රදේශවලට බෙදා හැරීමට හැකි බවය.
එලෙස ආර්ථික මධ්‍යස්ථානවල මිල පහත බසිද්දී, ඇඳිරි නීති ප්‍රදේශවල මිල ගිනි ගණන් වී තිබේ.
මේවායින් පෙනෙන්නට ඇත්තේ ආණ්ඩුවට ඇඳිරි නීති කාලසීමාවක් සඳහා මුහුණදීමට කිසිදු සැලසුමක් තිබී නොමැති බවය. නොවැම්බර් 02 වැනිදා අප ප්‍රාදේශීය ලේකම්වරුන් කිහිපදෙනෙකුගෙන් කළ විමසීම්වලදී ප්‍රකාශ කළේ භාණ්ඩ බෙදාහැරීම සඳහා අවසරපත්‍ර ලබාදීමට අදාල සාකච්ඡා නොවැම්බර් 02 වැනිදා පැවැත්වීමට නියමිත බවය. ඒ අනුව ඇඳිරි නීතිය පැනවීමට කිසිදු පූර්ව සැලසුමක් තිබී ඇතැයි පෙනෙන්නට නැත. ඇඳිරි නීතිය පනවන්නට සිදු වුණොත්, මෙවැනි කටයුතු සඳහා පූර්ව සූදානමක් තිබුණානම්, නොවැම්බර් 02 වැනිදාත් සාකච්ඡා පවත්වන්නට සිදු වන්නේ නැත.
කොවිඞ්-19 රෝගීන් වැඩි වැඩියෙන් හමුවෙන්නට පටන්ගැනීමත්, ඒ සමඟ ඇඳිරි නීතිය පැනවීමේ අවශ්‍යතාව මතුවීමත් සමග රජය දිගින් දිගටම නිවේදනය කළේ ඇඳිරි නීතිය පැනවීම අවශ්‍ය නොවන බවය. ඔක්තෝබර් 29 වැනිදා ඇඳිරි නීතිය පැනවීමට දින කිහිපයකට පෙර ජනාධිපතිවරයාගේ ප්‍රකාශ උපුටා දක්වමින්ද කියා තිබුණේ ඇඳිරි නීතිය පැනවීම අවශ්‍ය නොවන බවත්, කොටස් වශයෙන් ඇඳිරි නීතිය පනවමින් එදිනෙදා කටයුතු පවත්වාගෙන යන බවත්ය.
එලෙස කියමින් කල් දැම්මා මිස, මේ තත්වය ඇති වුවහොත් මුහුණදීමට සැලසුමක් තිබුණේ නැත. මාර්තු මාසයෙන් පසු කොවිඞ්-19 පරාජය කළා යැයි කයිවාරු ගැසුවා මිස, නැවත අවදානම් තත්වයක් ඇති වුණොත් එයට මුහුණ දීම සඳහා පෙර තත්වයෙන් පාඩම් ඉගෙනගෙන සැලසුම් හැදුවේ නැත.
බොහෝ සාමාන්‍ය පුරවැසියන් ඇඳිරි නීතිය පනවන තැනට ආණ්ඩුව තල්ලු වනු ඇතැයි මුල සිටම දැන සිටියේය. ඒ නිසා ඇඳිරි නීතිය පැනවීමට පෙර දින කිහිපයේ සුපිරි වෙළඳසැල්වල සහල් රාක්ක, පරිප්පු රාක්ක හිස් විය.
මෙලෙස හදිසියේ භාණ්ඩ තොග ගණන් මිලදී ගැනීම හොඳ තත්වයක් නොවේ. එහෙත්, මේ ආණ්ඩුව ඊළඟට කුමක් කරනු ඇතිදැයි කිසිම විශ්වාසයක් නැති නිසා එසේ කිරීමට බෙහෝ වගකීම් සහගත පුරවැසියන්ට පවා සිදු වෙයි.
මේ සියල්ල පසුපස පෙනෙන්නේ පවතින තත්වයන්ට මුහුණදෙනවා මිස ආණ්ඩුවට නිසි සැලසුම් නොමැති බවය. එමෙන්ම, දැන් ආණ්ඩුව කියන දේවල් පිළිබඳ පුරවැසියන්ටත් විශ්වාසයක් නොමැති බවය.
ඇඳිරි නීතිය පනවන බව ප්‍රකාශ කිරීමෙන් පසු බස්නාහිර පළාතෙන් පිට වීමට සැලකිය යුතු පිරිසක් උත්සාහ කිරීම පසුපස ඇත්තේද ඒ අවිශ්වාසය බව අපේ හැඟීමය. ඇඳිරි නීතිය පැනවීමට පෙර දිනයේ හැන්දෑවේ කොට්ටාව සහ අතුරුගිරිය අධිවේගී මාර්ග ප්‍රවේශ අසලින් ගිය ලියුම්කරු දුටුවේ පිට වීමට දිගු පෝළිම්ය. ඒ සියළුදෙනා පසුගිය දිනෙක ජනාධිපතිවරයා කී ලෙස ගාලු කොටුවට හෝ ඇල්ලට චාරිකා ගිය පුද්ගලයන් යැයි සිතිය නොහැක.
ආණ්ඩුවේ සැලසුම් නැතිකම නිසා ඇඳිරි නීති සීමාවේ කොටු වී පීඩා විඳින්නට සිදු වේදැයි බියක් ඇති පුද්ගලයන්ය.
මේ වන විට අන්තර්ජාලයේ වැඩිපුරම හාස්‍යජනක ලෙස හුවමාරු වෙන්නේ ‘ලෝකයේ හොඳටම (කොවිඞ් පාලනය) කළේ’ තමන් බව ජනාධිපතිවරයා ආවේගයෙන් ප්‍රකාශ කරන අන්දම රැගත් වීඩියෝවකි. සමාජමාධ්‍යවල වරුවක් ගත කරන පුද්ගලයෙකුට එම වීඩියෝව කිහිප වතාවක් දකින්නට ලැබෙන තත්වයක් දැන් උදා වී ඇත.
කතාබහ එසේ වෙද්දී, සැබෑ ලෙසම පෙනෙන්නට ඇත්තේ ආණ්ඩුවට සැලසුමක් නැතිකම නිසා ජනතාව පීඩා විඳින අන්දමය. අතේ මුදල් තිබූ පුද්ගලයන් භාණ්ඩ මිලදී ගෙන පූර්ව සූදානමක් වූ බව සිතිය හැක. එහෙත්, මුදල් නොතිබූ පුද්ගලයන් දැන් ඉන්නේ මහා අමාරුවකය.
Relief program is too much centralized and actors in the center are not suitable persons.