වසරක කාලයකින් අහෝසිවී යෑමේ ප්‍රතිපාදන ඇතුළත් යැයි කියන 20 වන ආණ්ඩුක්‍රම ව්‍යවස්ථා සංශෝධනය තුනෙන් දෙකකට වැඩි ඡන්දයෙන් ආණ්ඩුව දැන් සම්මත කරගෙන ඇත. වසරක කාලයකින් ගෙන එන අලුත් ව්‍යවස්ථාවකින් සංශෝධනය කරනවා යැයි කියන 20 වන සංශෝධනයේ ඇති ප්‍රධානම සංශෝධනය වන්නේ ද්විත්ව පුරවැසියන්ට ජනාධිපතිවරණයට හා පාර්ලිමේන්තු මැතිවරණයට ඉදිරිපත් විය හැකි ලෙස ඇති ප්‍රතිපාදනය අහෝසි කිරීමය.
ඊට හේතුව එම ප්‍රතිපාදනය 20 වන සංශෝධනයට ඇතුළත් කිරීම සම්බන්ධයෙන් ආණ්ඩුවට විරුද්ධ පාර්ශ්වවල විරෝධයටත් වඩා ආණ්ඩු පක්ෂයේ, ආණ්ඩුවට හිතවාදී සංවිධානවල හා විශේෂයෙන්ම භික්ෂූන්ගේ විරෝධය එල්ලවීමය. ඔවුන් කීවේ ද්විත්ව පුරවැසියනට මේ රටේ ජනාධිපතිධුරය දැරීමට හෝ පාර්ලිමේන්තුව නියෝජනය කිරීමට ඉඩදිය නොහැකි බවය.
මෙම ද්විත්ව පුරවැසි ප්‍රතිපාදනයට විරුද්ධ වී පසුව ඊට පක්ෂව ඡන්දය දුන් විමල් වීරවංශ ඇතුළු පිරිස කීවේ ඒ පිළිබඳ ජනාධිපතිවරයා සමඟ පැවති සාකච්ඡාවේදී කරන ලද පැහැදිලි කිරීම හා පොරොන්දුව මත ඊට ඡන්දය දුන් බවය. ජනාධිපතිවරයාගේ පොරොන්දුව වී ඇත්තේ ඉහත සඳහන් කළ ලෙස අලුත් ආණ්ඩුක්‍රම ව්‍යවස්ථාවකදී ද්විත්ව පුරවැසි ප්‍රතිපාදනය ඉවත් කරන බවය. වසරකින් ඉවත් කරන ප්‍රතිපාදනයක් මෙතරම් විරෝධයක් හමුවේ ආපස්සට නොගෙන සම්මත කළ යුතුම යැයි ජනාධිපතිවරයා ඉල්ලුවේ ඇයි? ඒ සඳහා ජනාධිපතිවරයාගේ පැහැදිලි කිරිම වී ඇත්තේ මේ ද්විත්ව පුරවැසි ප්‍රතිපාදනය තමා අරමුණු කර ගනිමින්ම ගෙන එන ලද්දක් බැවින් එය තමාට සංවේදී කරුණක් බවය. අලුත් ආණ්ඩුක්‍රම ව්‍යවස්ථාවක් ගෙන එන තෙක් ඊට ඉඩ දෙන ලෙසය.
ජනාධිපතිවරයාගේ මේ පැහැදිලි කිරීම කෙසේවත් පිළිගත හැක්කක් නොවේ. ඊට හේතුව 19 වැනි ආණ්ඩුක්‍රම ව්‍යවස්ථා සංශෝධනය ගෙන එන විට ගෝඨාභය රාජපක්ෂ ඊළඟ ජනාධිපතිවරණයකට ඉදිරිපත් වන බවට කිසිදු සලකුණක් නොතිබූ නිසාය. 2015 ජනවාරි පරාජයෙන් පසු බැසිල් රාජපක්ෂ සිටියේ රට හැර ගොස් ඇමරිකාවේය. මැදමුලනට පසුබැස ගොස් සිටි මහින්ද රාජපක්ෂ මහා මැතිවරණයට කැඳවාගනු ලැබුයේ ඔහු වටේ සිටි පිරිසගේ බලවත් ඉල්ලීම මතය. ගෝඨාභය රාජපක්ෂ එම පවුලේ ජනාධිපති අපේක්ෂකයා ලෙස ඉදිරියට ආවේ අවසාන අවුරුදු දෙකක පමණ කාලයේදීය. එහෙත් අපේක්ෂකත්වය ඔහුට ලැබෙන බවට ස්ථීරත්වයක් තිබුණේ නැත.
අවසාන මොහොතේ ඔහු අපේක්ෂකත්වය ලබාගත්තේ බලහත්කාරයෙන් මෙන්ය. මෙම ද්විත්ව පුරවැසි ප්‍රතිපාදනය නිසා දිනාගත් පාර්ලිමේන්තු අසුන අහිමි වූයේ ගීතා කුමාරසිංහට පමණය. ජනාධිපතිවරණයට ඉල්ලීම සඳහා ගෝඨාභය රාජපක්ෂට අහිමි කර ගන්නට සිදුවුයේ ඇමරිකානු පුරවැසිභාවය පමණය. ගෝඨාභය රාජපක්ෂගේ මේ සිත් වේදනාව ඒ නිසා විය යුතුය. මේ මොහොතේ ඔහුට යළි ඇමරිකානු පුරවැසිභාවය ගත නොහැකිය. ජනාධිපතිධුරයෙන් බැස ගිය පසු ඒ සඳහා යළි උත්සාහයක් ඔහුට ගත හැකිය. එහිදි පළමුවෙන්ම ශ්‍රී ලංකා පුරවැසිභාවය ඔහු අතහැරිය යුතුය. ඉන්පසු ශ්‍රී ලංකා ද්විත්ව පුරවැසිභාවය ඔහු ඉල්ලුම් කළ යුතුය.
කවුරුත් දකිනා ආකාරයට මේ මොහොතේ ද්විත්ව පුරවැසිභාවයෙන් යම් ප්‍රයෝජනයක් තිබෙන්නේ බැසිල් රාජපක්ෂට පමණය. ඒ ඔහුට පාර්ලිමේන්තුවට ඒම සඳහාය. පාර්ලිමේන්තුවට ආවත් නාවත් බැසිල් රාජපක්ෂ අද ආණ්ඩුවේ අමාත්‍යාංශ රාශියක් නිල නොවන ආකාරයෙන් මෙහෙයවන නිල පුද්ගලයෙකි. මන්ද ආර්ථික පුනර්ජීවනය සඳහා වන ජනාධිපති කාර්ය සාධක බලකායේ ප්‍රධානියා ඔහු වන නිසාය. අමාත්‍යාංශ සඳහා විෂයන් වෙන් කිරීමේ ජනාධිපතිවරයාගේ ගැසට් පත්‍රයෙන්ම එම කාර්ය සාධක බලකායට නිල වශයෙන්ම අමාත්‍යාංශ හා අමාත්‍යාංශ කාර්යන් රැසක් යටත් කර ඇති නිසාය.
බැසිල් රාජපක්ෂ පාර්ලිමේන්තුවට නොඑන්නේ නම් හෝ ආවත් වසරක කාලයකදී එය වෙනස් කිරීම මගින් බැසිල් රාජපක්ෂට පාර්ලිමේන්තු අසුන අහිමි වේ නම් වසරක කාලයක් තබාගත්තා කියා එම ප්‍රතිපාදනයෙන් වැඩක් නැත. එසේ නම් වසරක කාලයක මෙම ද්විත්ව පුරවැසි ප්‍රතිපාදනය කුමක් සඳහාද? ගෝඨාභය රාජපකෂ පමණක් දන්නා අප නොදන්නා උත්තර සෙවිය යුතු ප්‍රශ්නය එයය.
පුරවැසියා
This is not the most dangerous thing in this amendment. As The Hindu says there are nearly 300000 Chinese in Sri Lanka who has different educational levels. If they want, they can apply for the dual citizenship and the government cannot refuse because there are different properties belong to China in Sri Lanka. Even after 10 or more years, with the growth of the Chinese population in Sri Lanka and request they need a chance to appoint one from Chinese to the parliament what will the Sri Lankan government can do? They may file a human rights case in International Court.