දවසකට එක් ගමකට ගියත් යා හැක්කේ 1460කට විතරයි
මොරගහකන්ද ජලාශ ව්‍යාපෘතිය ක්‍රියාත්මක කිරීමේදී ඉඩම් අහිමිවූවන්ට ඉඩම් දී වහාම මට දන්වන්න යැයි ජනාධිපතිවරයා උපදෙස් දුන් බව ජනාධිපති කාර්යාලයේ වෙබ් අඩවිය සඳහන් කරයි. ඒ ගම සමඟ පිළිසඳරක් යටතේ ජනාධිපතිවරයා ඔක්තෝබර් දෙවැනිදා හිඹිලියාකඩ ගම්මානයට ගිය අවස්ථාවේදීය. මෙම ගම මාතලේ දිස්ත්‍රික්කයේ විල්ගමුව ප්‍රාදේශීය ලේකම් කොට්ඨාසයට අයත් ග්‍රාම නිලධාරි කොට්ඨාසයකි. එම වෙබ් අඩවිය වැඩිදුරටත් සඳහන් කරන්නේ එම වැඩ සටහන ජනාධිපතිවරයාගේ ‘ගම සමඟ පිළිසඳර’ වැඩසටහනේ දෙවැන්න බවත් එහි පළමුවැන්න සැප්තැම්බර් 25 සිකුරාදා බදුල්ල දිස්ත්‍රික්කයේ හල්දුම්මුල්ල ප්‍රාදේශීය ලේකම් කොට්ඨාසයේ වෙලන්විට ගම්මානයේදී පැවැත්වුණ බවත්ය. මේ වෙලන්විට ගම සමඟ පිළිසඳර බොහෝ දෙනෙකුට මතක ඇතිවාට සැක නැත. ජනාධිපතිවරයා දුන් උපදෙසක් හෝ නියෝගයක් ක්‍රියාත්මක කිරීම සඳහා චක්‍රලේඛයක් නිකුත් කරන ලෙසට රජයේ නිලධාරියෙකු ඉල්ලීමක් කළේත්, තමාගේ වචනය චක්‍රලේඛයක් ලෙස පිළිගන්නා ලෙස ජනාධිපතිවරයා කීවේත් එම වැඩසටහනේදීය.
මේ ආකාරයට ගමක් ගමක් ගානේ ගොස් ඒවාහි ගැටලු සාකච්ඡා කිරීමත් ඒවා විසඳන ලෙසට උපදෙස් හෝ නියෝග දීමත් ජනාධිපතිවරයකුගේ කාර්යයද යන්න ප්‍රශ්නයකි. එම උපදෙස් හෝ නියෝග මඟින් එම ගැටලුවලට විසඳුම් ලබාදිය හැකිද යන්නත් ප්‍රශ්නයකි. එමෙන්ම ජනාධිපතිවරයකුට මේ ආකාරයට ගමක් ගමක් ගානේ යෑමට කාලය තිබෙනවාද යන්නද තවත් වැදගත් ප්‍රශ්නයකි. ඊට හේතුව වසරකට ඇති දින ගණනත් ජනාධිපතිවරයාට ධුරය දැරීමට ඉදිරියට ඇති කාලයත් සමඟ රටේ ඇති ගම්මාන ගණන සමඟ සැසඳූ කල එම කාලයේදී දිනපතාම ගියත් රටේ සෑම ගමකටම ජනාධිපතිවරයාට යෑමට නොහැකි නිසාය.
එක ගමකට ජනාධිපතිවරයා එක දවසක ගියහොත් වසරකට යා හැක්කේ ගම්මාන 365කට පමණය. ජනාධිපතිවරයාට තව ඇත්තේ වසර හතරක ධුර කාලයක් නිසා උපරිමයෙන් ඔහුට යා හැක්කේ ගම්මාන 1460කට පමණය. රටේ ගම් පිළිබඳ නිවැරදි සංඛ්‍යාවක් නැතත් ග්‍රාම නිලධාරි වසම් නම් 14022ක් ඇත. සමහර විට එක ගමකට අයත් ග්‍රාම නිලධාරි වසම් කිහිපයක් දක්නට ලැබෙන අතර සමහර විට ග්‍රාම නිලධාරි වසමකට අයත් ගම් කිහිපයක් දක්නට ලැබේ. ඒ අනුව රටේ ගම් ඇත්තේ ග්‍රාම නිලධාරි වසම්වලට මඳක් වැඩියෙන් 15000ක් පමණ ප්‍රමාණයක් යැයි අපට අනුමාන කළ හැකිය. තවත් වාරයක් සඳහා ජනාධිපතිවරයා ජනාධිපති ධුරයට පත්වූවත් ඔහුට එම ධුර කාල දෙකේදීම අවුරුදු නවයක් තුළ යා හැක්කේ ග්‍රාම නිලධාරි වසම් හෝ ගම් 3285කට පමණය. ඒ අනුව ලංකාවේ සෑම ගමකටම යෑමටවත් එම ගම්මානවල ප්‍රශ්න විසඳීමටවත් ජනාධිපතිවරයාට ධුර කාල දෙකකදීවත් හැකිවන්නේ නැත. මෙහිදී මතකයට එන්නේ පසුගිය ජනාධිපතිවරණ සමයේදී වත්මන් විපක්ෂ නායක සජිත් ප්‍රේමදාස කියූ සෑම ගෙදරකටම යෑමේ කථාවය. එහිදී වත්මන් ආණ්ඩු පක්ෂ මතධාරීන් පෙන්වා දුන්නේ එය ප්‍රායෝගිකව කළ නොහැක්කක් බවයි. ඒ තර්කයම ජනාධිපතිවරයාගේ ගම්වලට ගොස් ප්‍රශ්න විසඳීමේ මේ ව්‍යාපෘතියටත් අදාළ කරගත හැකිය. එහෙත් ඔවුහු එය නොකරති.
ජනාධිපතිවරයාට ඇත්තේ වගකීම් රාශියකි. රටේ මූලික නීතිය වන ආණ්ඩුක්‍රම ව්‍යවස්ථාවෙන්ම එම බොහොමයක් වගකීම් ඔහුට පවරා ඇත. කැබිනට් මණ්ඩලයේ ප්‍රධානියා ඔහුය. ඒ නිසා සෑම සතියකම කැබිනට් මණ්ඩල රැස්වීම්වලට ඔහු සහභාගිවිය යුතුය. සන්නද්ධ හමුදාවල සේනාධිනායකයා ඔහුය. ආරක්ෂක විෂය භාර අමාත්‍යවරයෙකු පත්කර නැතත් නිල නොවන ආරක්ෂක ඇමතිවරයා ඔහුය. මේ කාරණා දෙක නිසාම ආරක්ෂක මණ්ඩල රැස්වීම්වලට ඔහු සහභාගිවිය යුතුය. ජාත්‍යන්තර කටයුතුවලට අදාළ දේ කළ යුත්තේ ජනාධිපතිවරයාය. තානාපතිවරුන් ඇතුළු මහා කොමසාරිස්වරුන් පත් කිරීමත්, පත්වී එන එම තනතුරුලාභීන් පිළිගැනීමත් ජනාධිපතිවරයා කළ යුතුය. ඉඩම් පැවරීම සඳහා මුද්‍රා තැබීමත්, ආණ්ඩුක්‍රම ව්‍යවස්ථා සභාවේ, ස්වාධින කොමිෂන් සභාවල හා අධිකරණයේ පත්කිරීම් ඇතුළු අනෙකුත් පත් කිරීමත් ඔහු කළ යුතුය.
සඳහන් නොකළ කටයුතු සමඟ ගත් කල මේ ලැයිස්තුව ඉතා දීර්ඝය. එවන් වගකීම් සහිත තනතුරක කටයුතු කරන්නකු ගම්වලට ගොස් ප්‍රශ්න හඳුනාගෙන එම එක් එක් ප්‍රශ්නය විසඳීමට ගියහොත් සිදුවිය හැක්කේ කුමක්ද? ජනාධිපතිවරයාට ආණ්ඩුක්‍රම ව්‍යවස්ථාවෙන්ම බාරදී ඇති වගකීම් පවා හරියාකාරව ඉටුකිරීමට බැරිවීමය. ප්‍රාදේශීය සභා මට්ටමේ සිට ඉහළට විහිදී ඇති දේශපාලන යාන්ත්‍රණයත්, නිලධාරි යාන්ත්‍රණයත් වැඩකට නැති එකක් බවට පත්වීමය. එම යාන්ත්‍රණ දුර්වල නම් ජනාධිපතිවරයා කළ යුත්තේ එම යාන්ත්‍රණ ශක්තිමත් කිරීම සඳහාත්, ඉහළ සිට පහළටත් පහළ සිට ඉහළටත් එම යාන්ත්‍රණ ක්‍රියාත්මක වීම සඳහාත් අවශ්‍ය මඟපෙන්වීම් ලබාදීම හා එහි ක්‍රියාකාරිත්වය සොයා බැලීමය.
ඒ දැනට අපට පෙනෙන කාරණය සම්බන්ධයෙන් විග්‍රහ කළ බැලූවිට පෙනෙන සත්‍යයය.
අනෙක් සත්‍යය හෙවත් ඊටම සම්බන්ධ බොරුව අපට හමුවන්නේ ජනාධිපතිවරණයට ජනාධිපතිවරයා ඉදිරිපත් කළ ‘රට හදන සෞභාග්‍යයේ දැක්ම’ නම් වූ ඔහුගේ ප්‍රතිපත්ති ප්‍රකාශනයේය. එහි මෙසේ දැක්වේ.
‘ඔබ ඉල්ලන රට නම් වූ ප්‍රතිපත්ති හා සැලසුම් සම්පාදනය කරනු ලැබූයේ වසරකට අධික කාලයක් පුරා මේ රටේ ගම් 25,000ක දී පවත්වනු ලැබූ ‘ගම සමඟ පිළිසඳරක්’ වැඩසටහන්වලින් ලබාගත් ජනතාවගේ යෝජනා අතරින් ය. ඒ අනුව රටේ සෑම ගමකට ම අවශ්‍ය නිවාස සංඛ්‍යාව, විදුලිය, ජලය හා පිවිසීමේ මාර්ග, අලුත්වැඩියා කළයුතු වැව් අමුණු සහ ඇළ මාර්ග ප්‍රමාණය, අලුතින් ආරම්භ කළ යුතු ව්‍යාපෘති සංඛ්‍යාව හඳුනාගෙන ඇත. ඒ අනුව අපේ ඉදිරි අයවැය සැලසුම් සකස් වන්නේ එම අවශ්‍යතා පාදකව ය.
එම ජනතා අදහස්වලට අමතරව, විවිධ මාර්ග ඔස්සේ අප වෙත ඉදිරිපත් කළ විවිධ පුද්ගල, දේශීය හා ජාත්‍යන්තර සංවිධාන ඉදිරිපත්කළ යෝජනා ද පදනම් කරගෙන මෙම ප්‍රතිපත්ති ප්‍රකාශනය සකස් කරන ලද්දේ විශ්වවිද්‍යාල ආචාර්ය මහාචාර්යවරු, එකී ක්ෂේත්‍රවලට අයත් විවිධ විද්වතුන්, වෘත්තීයවේදීන්, ජේ්‍යෂ්ඨ පරිපාලන නිලධාරීන්, නීතිඥයන්, ඉංජිනේරුවන්, ව්‍යාපාරිකයන්, කර්මාන්තකරුවන්, විවිධ දේශපාලන පක්ෂ, වෘත්තීය සමිති සහ විවිධ සිවිල් සංවිධාන නියෝජිතයන්, තරුණයන් සහ කාන්තාවන් ආදි 540 දෙනෙකුගෙන් සමන්විත ක්‍ෂේත්‍ර 28ක් ආවරණය වන විශේෂඥ කමිටු මඟින් ය.
විශේෂයෙන් ම ගම සමග පිළිසඳරක් වැඩසටහන යටතේ මු`ඵ රටම ආවරණය වන පරිදි සම්මන්ත්‍රණ, සාකච්ඡා හා වැඩමු`ඵ පවත්වමින් මහජනතාවගෙන් එකතු කර ගත් තොරතුරු මෙම ප්‍රතිපත්ති ප්‍රකාශය සකස් කිරීම සඳහා උපකාරී විය. ඊට අමතරව වියත්මඟ සංවිධානය විසින් ස්ථාපනය කළ කමිටු ඒ හා සමාන උපදේශක කමිටු 27ක් මගින් වසර තුනක පමණ කාලයක් මුළුල්ලේ සකස් කළ ක්‍රියාකාරී සැලසුම් යෝජනා ද මෙහි ඇතුළත් වේ.’
ජනාධිපතිවරයා සිය ප්‍රතිපත්ති ප්‍රකාශයේ සඳහන් කරන වසරකට අධික කාලය යන්න වසර එකහමාරක් ලෙස අප සැලකුවත් එම කාලයේදී 25000ක් තරම්වූ ගම්මාන සංඛ්‍යාවකට යෑමට අඩුම තරමේ දිනකට ගම්මාන 45කටවත් ජනාධිපතිවරයා හෝ ඔහුගේ නියෝජිතයන් යා යුතුය. (රටේ එවැනි ගම්මාන සංඛ්‍යාවක් තිබේද යන්න විවාදිතය) දිනකට එවැනි සං්‍යාවක ගම්මාන සංඛ්‍යාවකට ගියාදැයි දන්නේ ජනාධිපතිවරයාත් ඔහුගේ නියෝජිතයනුත් පමණය. එමෙන්ම ගියා යැයි කියන එම ගම්වල ජනතාවත් පමණය. දැන් ප්‍රශ්නය ඇත්තේ, ජනාධිපතිවරණයටත් පෙර ම 25000ක් තරම් විශාල ගම් සංඛ්‍යාවකට ගොස් නියම ජනතා ගැටලු හඳුනාගත් ජනාධිපතිවරයා, නැවතත් ජනතා ප්‍රශ්න හඳුනා ගැනීම සඳහා ගම්වලට යන්නේ ඇයිද යන්න ගැනය. ඔහුගේ ප්‍රතිපත්ති ප්‍රකාශයේ ඇති මීට පෙර එසේ ගම්වලට ගොස් එකතු කළ දත්තවලට සිදුවූයේ කුමක්ද? එම දත්ත මත පදනම්ව සෑදූ සැලසුම්වලට සිදුවූයේ කුමක්ද? එම සැලසුම් සැප්තැම්බර් සිට දෙසැම්බර් දක්වා ඉදිරිපත් කළ රුපියල් කෝටි 205,000ක ණය ගැනීමේ අතුරු සම්මත ගිණුම් යෝජනාවල ඇතුළත් වූයේද? නැතහොත් ඉදිරියේදී පාර්ලිමේන්තුවට ඉදිරිපත් කිරීමට නියමිත අයවැය යෝජනාවල ඇතුළත් වනු ඇතිද?
ඒ කෙසේ වෙතත් ජනාධිපතිවරණ ජයග්‍රහණය සඳහා සිය ප්‍රතිපත්ති ප්‍රකාශනය මගින් ඡන්දදායකයන් රැවටීම සඳහා ‘ගම සමඟ පිළිසඳරක්’ යටතේ බොරු සංඛ්‍යා දත්ත ජනාධිපතිවරයා ඉදිරිපත් කර ඇති බව දැන් කරන ‘ගම සමඟ පිළිසඳරක්’ නම් අලුත් වැඩසටහන් මගින් අපට පෙන්වා දෙයි.■
