අමාත්ය මණ්ඩලය අනුමත කර ඇති 2021 වසරට අදාළ විසර්ජන පනත් කෙටුම්පත අනුව එළැඹෙන වසරේ රාජ්ය වැය රුපියල් බිලියන 4906 දක්වා ඉහළ යනු ඇත.
ඔක්තෝබර් 05 දින පැවැත්වූ අමාත්ය මණ්ඩල සාකච්ඡාවේ තීරණ දැනුම් දීමේ නිවේදනය අනුව 2021 වර්ෂයට අදාළ පුනරාවර්තන වියදම රුපියල් බිලියන 2690ක් වන අතර මූලධන වියදම රුපියල් බිලියන 2216කි. එළැඹෙන වසරට අදාළ එම වියදම සැප්තැම්බර් 16 වැනිදා පැවති අමාත්ය මණ්ඩල රැස්වීමේදී අනුමත කර ඇත.
එම කැබිනට් මණ්ඩල තීරණ දැනුම්දීමේ නිවේදනයේම ඇති ලෙස මෙම වසරට අදාළ රජයේ මුළු වැය රුපියල් බිලියන 4538ක් වන අතර එම වියදම සකස් වන්නේ ජනවාරි සිට අප්රේල් දක්වා අනුමත කළ අතුරු සම්මත ගිණුම, සැප්තැම්බර් සිට දෙසැම්බර් දක්වා සම්මත කළ අතුරු සම්මත ගිණුම, මැයි සිට අගෝස්තු දක්වා ජනාධිපතිවරයා අනුමත කළ රාජ්ය වියදම් හා 2019 වර්ෂය සඳහා ගිණුම්ගත කර නැති රුපියල් බිලියන 211ක් යන වියදම්වලින්ය.■
