■ පුරවැසියා
‘දේශපාලන පක්ෂවල හා ඒවාහි නායකයන්ගේ වුවමනා එපාකම් සහ පෞද්ගලික අභිලාෂයන් වෙනුවෙන් ශ්‍රී ලංකාවේ ආණ්ඩුක්‍රම ව්‍යවස්ථාව භාවිත කළ යුගය අවසන් කර අපේ ආණ්ඩුක්‍රම ව්‍යවස්ථාවේ සිදුකර තිබෙන ව්‍යාකූලත්වය පිටුදකිමින් ජනතාවගේ පරමාධිපත්‍ය බලය ප්‍රමුඛත්වයේ තබා ක්‍රියා කරන නව ව්‍යවස්ථා ප්‍රතිසංස්කරණයක් අපි නොපමාව ඉදිරිපත් කරන්නෙමු.’
එම පැහැදිලි කිරීම ඇත්තේ ජනාධිපති ගෝඨාභය රාජපක්ෂගේ සෞභාග්‍යයේ දැක්ම නම් වූ ප්‍රතිපත්ති ප්‍රකාශනයේ දස වැදැරුම් ප්‍රතිපත්ති මාලාවේ හතරවන ප්‍රතිපත්තිය වන ජනතාවට වගකියන ව්‍යවස්ථා ප්‍රතිසංස්කරණයක් යන මාතෘකාවට අදාළවය.
ජනාධිපති ගෝඨාභය රාජපක්ෂ 20 වන ආණ්ඩුක්‍රම ව්‍යවස්ථා සංශෝධනය ගෙනවිත් ඇත්තේ එම පැහැදිලි කිරීමට අනුවද යන්න එම දැක්මට අනුව ඡන්දය භාවිත කළ කිසිවෙකු අවධානයට නොගන්නා කරුණකි. එහෙත් එම දැක්මට ඡන්දය භාවිත කරන්න යැයි ජනතාවට ආයාචනා කළ දේශපාලන පක්ෂ නායකයන් මෙන්ම ජාතික බලවේග යැයි කියූ සංවිධානවල නායකයෝද ජනාධිපතිවරයාගේ 20 වන ව්‍යවස්ථා සංශෝධනය ගැන දැන් චෝදනා එල්ල කරමින් සිටිති.
එහිදී සෞභාග්‍යයේ දැක්ම ප්‍රතිපත්ති ප්‍රකාශනය අනුව ජනාධිපතිවරයා කටයුතු නොකරන්නේ යැයි ඔවුන් සෘජු ලෙස නොකීවද නොකියා කියන්නේද එයමය. 20 වන සංශෝධනයෙන් සිදුකරන්නට යන්නේද දේශපාලන පක්ෂ නායකයන්ගේ වුවමනා එපාකම් ඉටුකරගැනීම යන්න පැහැදිලිය. කොටින්ම ජනාධිපති ගෝඨාභය රාජපක්ෂ ඇතුළු රාජපක්ෂ පවුලේ වුවමනා එපාකම් ඉටුකර ගැනීමට සැරසෙන බව පැහැදිලිය.
මේ විවේචන ඉදිරිපත් කරන්නන් කියන්නේ 19 වන ව්‍යවස්ථා සංශෝධනයෙන් ආණ්ඩුක්‍රම ව්‍යවස්ථාවට ඇතුළත් කරන ලද ඔවුන් සිතන යහපත් සංශෝධන රැකගත යුතු බවයි. අප සිතන්නේ එම මුළු සංශෝධනයම යහපත් බවයි. එහි යම් තාක්ෂණික හෝ වෙනයම් අඩුපාඩුවක් ඇතිවුනේ එම අවස්ථාවේ එයට තුනෙන් දෙකක ඡන්දය ලබාදීම සඳහා කේවල් කළ වාසුදේව නානයක්කාර හා විමල් වීරවංශ වැනි අයගේ ක්‍රියාවන් නිසාය. ආණ්ඩුක්‍රම ව්‍යවස්ථා සභාවේ සිවිල් සමාජ සාමාජිකයන් සංඛ්‍යාව තුන දක්වා අඩු කරන්නට සිදුවුයේත් ඉහත කී පිරිසගේ අතාර්තික හා අනවශ්‍ය කේවල් කිරීම් නිසාය.
20 වන සංශෝධනය සම්බන්ධයෙන් නැග එන විරෝධතා හමුවේ ජනාධිපති ගෝඨාභය රාජපක්ෂ මෙන්ම ඔහුට ඒ සඳහා සහාය දක්වන ආණ්ඩුවේ පාර්ශ්ව කියන්නේ 19 වන ආණ්ඩුක්‍රම ව්‍යවස්ථා සංශෝධනය අහෝසි කරන්නට ජනතාව ඔවුන්ට ඡන්දය ලබාදුන් බවය. ඉහත උපුටා දැක්වූ සෞභාග්‍යයේ දැක්මේ ඇති සටහන අනුව ජනතාවගෙන් ඔවුන් ඡන්දය ඉල්ලා ඇත්තේ හා ජනතාව ඔවුන්ට ඡන්දය දී ඇත්තේ දේශපාලන නායකයන්ගේ පෞද්ගලික අභිලාෂයන් මුදුන්පත් කර නොගන්නා නව ව්‍යවස්ථා ප්‍රතිසංස්කරණයක් සඳහාය.
20 වන ආණ්ඩුක්‍රම ව්‍යවස්ථා සංශෝධනය එම ප්‍රතිපත්තිය සඳහා නොවන බව පැහැදිලිය.
19 වන සංශෝධනයේ හොඳ ලක්ෂණ ඇතැයි කියන්නට, එය අහෝසියට ඡන්දය ලැබුණා යැයි කියන පාර්ශ්වවලටම කියන්නට සිදුවී තිබීමෙන් පෙනෙන්නේ ඔවුන් කියූ තරම් 19 වැනි සංශෝධනය නරක නැති බවය. 20 වැනි සංශෝධනය 19 ට වඩා හොඳ නැති බවය.
19 වැනි සංශෝධනයේ ඇති එම හොඳ ජනතාව අතරට ගෙන යෑමට නොහැකිවීම අද විපක්ෂයේ සිටින එදා ආණ්ඩුව කළ අයගේ වැරැද්දකි. දැනුත් ඔවුන් එය කරන්නේ නැත. කියන්නේ 19 ප්ලස් කියාය. ප්ලස් යනු මොනාදැයි අප මෙන්ම ඔවුන්ද දන්නේ නැත.■
