20 හැදුවේ තමා නිසා එය හැදුවේ කවුදැයි සොයමින් කාලය නාස්ති නොකරන හැටියට ජනාධිපති ගෝඨාභය රාජපක්‍ෂ ඇමති මණ්ඩලයට අවධාරණය කළ බව මාධ්‍ය වාර්තා කෙළේ ය. ජනතාව තමාට ජනවරමක් ලබා දී ඇති බවත්, ඒ අනුව වැඩ කිරීමට 20 ගෙනෙන බවත්, ඊට අකමැති කිසිවෙක් සිටිත් නම්, 19 දිගටම තබා ගන්නා ලෙසත්, ජනාධිපතිවරයා දැඩි ස්වරයකින් ඇමති මණ්ඩලයට කියා ඇති බව තවදුරටත් දැන ගන්නට තිබේ. ඒ අනුව, විනාශකාරී 20වැනි සංශෝධනයේ නිර්මාතෘවරයා ජනාධිපතිවරයා බව පැහැදිලි ය.
ජනාධිපතිවරයා එලෙස පිළිගන්නා විට, ඒ පිළිගැනීම මත ම, පහත පිළිගැනීම් කරන්නට ද අපට හැකි ය.
රට ඒකාධිපතිවාදී ස්වරූපයකින් පාලනය කරන්නට වුවමනාව ඇත්තේ ජනාධිපතිවරයාට ය. (අන් කිසිවකුට එවැනි වුවමනාවක් නැති බව මෙයින් අදහස් නොවේ.)
පාර්ලිමේන්තුව විධායකයේ රූකඩයක් කරන්නට වුවමනාව ඇත්තේ ජනාධිපතිවරයාට ය. රටේ ජනතාව, තම ව්‍යවස්ථාදායක බලය නියෝජනය කිරීම සඳහා කෝවිඞ් ව්‍යසන අවදානම ද නොතකා ගොස් ඡන්දය දී පත්කර ගත් පාර්ලිමේන්තුව, හිතුණු වේලාවක විසුරුවා හැරීමේ වුවමනාව ඇත්තේ ජනාධිපතිවරයාට ය.
තමාට වඩා හැත්තෑදහසක පමණක් ඡන්ද අඩුවෙන් ලබා, එනම් ලක්‍ෂ 68ක ඡන්ද ලබා, තුනෙන් දෙකේ බලයකට ආසන්න ව තේරී පත්වී පාර්ලිමේන්තුවේ බහුතරයකගේ කැමැත්ත දිනාගත් අගමැති මහින්ද රාජපක්‍ෂ හිතූ මොහොතක කිසිම හේතුවක් නොදක්වා අගමැතිකමෙන් ඉවත් කිරීමේ වුවමනාව ඇත්තේ ජනාධිපතිවරයාට ය.
ඒ අගමැතිවරයාගේ කැමැත්ත අකමැත්ත කිසිවක් නොවිමසා, ඇමැති මණ්ඩලයට අදාළ විෂයන් තනිව ම තීරණය කිරීමටත්, එම විෂයන්ට ඇමතිවරුන් රාජ්‍ය ඇමතිවරුන් පත්කිරීමටත්, හිතූ වේලාවක ඔවුන් ඉවත් කිරීමටත්, ඇමතිකම් මාරු කිරීමටත් වුවමනාව ඇත්තේ ජනාධිපතිවරයාට ය.
ලංකාවට මෙන් ම වෙනත් රටකටත් ආත්මීය වශයෙන් හා නීතිමය වශයෙන් බැඳී සිටින, එම අනෙක් රට හා ලංකාව අතර ගැටුමක් ඇති වුවහොත්, එම අනෙක් රට වෙනුවෙන් ලංකාවට එරෙහි ව ආයුධ දැරීමට දිවුරා සිටින, කෙනකු ජනාධිපති ධුරයට හෝ පාර්ලිමේන්තු මන්තී ධුරයකට පත් කර ගැනීමට වුවමනාව ඇත්තේ ජනාධිපතිවරයාට ය.
ඇමති මණ්ඩලය වැඩි යැයි පක්‍ෂ පාට භේදයකින් තොර ව රටේ බදු ගෙවන මහජනතාව විරෝධය පළ කරද්දී, සීමාවක් නැති ඇමති මණ්ඩලයක් පත් කිරීමේ වුවමනාව ඇත්තේ ජනාධිපතිවරයාට ය.
රටේ රාජ්‍ය නිලධාරීන්, දේශපාලන වශයෙන් තමන්ට වුවමනා විදියට හැසිරෙන පිරිසක් බවට පත් කර ගැනීමේ වුවමනාව තිබෙන්නේ ජනාධිපතිවරයාට ය.
අගවිනිසුරු ඇතුළු ඉහළ අධිකරණවල විනිසුරුවරුන් තමන්ට වුවමනා අය අතුරෙන් පත් කර, අධිකරණය තමාට වුවමනා පරිදි හැසිරෙන රූකඩයක් බවට පත් කර ගැනීමේ වුවමනාව තිබෙන්නේ ජනාධිපතිවරයාට ය.
නීතිපතිවරයා, තමාට වුවමනා පරිදි පාලනය කිරීමට ද, අවුරුදු 58න් පසු ඔහු සේවා දිගු ඉල්ලා තමා පසුපස එන තත්වයක් නිර්මාණය කර ගැනීමට ද, වුවමනාව තිබෙන්නේ ජනාධිපතිවරයාට ය.
මානව හිමිකම් කොමිසමට, තමා ම කොමසාරිස්වරුන් පත් කර, එහි ස්වාධීනත්වය බාල්දු කර, එක්සත් ජාතීන්ගේ සංවිධානය ඇතුළු ජාත්‍යන්තර වේදිකාවේ දී ලංකාවේ මානව හිමිකම් කොමිසම යළිත් අවශ්‍රේණිගත කරගැනීමේ වුවමනාව තිබෙන්නේ ජනාධිපතිවරයාට ය. පොලිස්පතිවරයා ඇතුළු මුළු පොලිසිය ම, තමාගේ අතේ නැටවෙන රූකඩයක් බවට පත්කර ගැනීමේ වුවමනාව තිබෙන්නේ ජනාධිපතිවරයාට ය.
කෙටියෙන් කිවහොත්, 20 හරහා රටේ යටත්වැසියන් පිරිසක් බිහි කර ගැනීමට වුවමනාව තිබෙන්නේ ජනාධිපතිවරයාටය. ඒ බව අප දැන සිටි නමුත් එය තහවුරු කිරීම ගැන ජනාධිපතිවරයාට අපේ ස්තුතිය හිමි වේ.■
