විසිවන ව්යස්ථා සංශෝධනය සමාලෝචනය කිරීම සඳහා අගමැති මහින්ද රාජපක්ෂ පත් කරන ලද කමිටුවේ වාර්තාව සැප්තැම්බර් 16 වැනිදා පැවති කැබිනට් මණ්ඩල රැස්වීමට ඉදිරිපත් කරනවා යැයි කීවද එයට ඉදිරිපත් කර නැත.
20 වන සංශෝධනයේ වගකීම තමා බාරගන්නා බවත් ගැසට් මගින් ප්රකාශයට පත් කර ඇති එම සංශෝධනය පාර්ලිමේන්තුවට ඉදිරිපත් කරන ලෙසටත් ජනාධිපති ගෝඨාභය රාජපක්ෂ කැබිනට් මණ්ඩලයට දැනුම් දීම එම වාර්තාව ඉදිරිපත් නොකිරීමට හේතු වී ඇත.
20 වන සංශෝධනය සමාලෝචනය කිරීමේ අගමැතිවරයාගේ කමිටුව පත් කරනු ලැබුයේ ආණ්ඩු පක්ෂයේ පක්ෂ නායකයන්ගේ රැස්වීමකදීය. ඊට හේතු වූයේ 20 නව සංශෝධනය සම්බන්ධයෙන් විපක්ෂයට අමතරව විවිධ විවේචන ආණ්ඩු පක්ෂය තුළින් මෙන්ම ආණ්ඩුව බලයට පත් කරන්නට කැපවූ සංවිධානවලින්ද එල්ල වීමය.
එම ආණ්ඩු පක්ෂ රැස්වීමෙන් පසු විමල් වීරවංශ. ගෙවිඳු කුමාරතුංග හා අනෙකුත් පක්ෂ නායකයන්ද කීවේ 20 වන සංශෝධනය සම්බන්ධයෙන් සංශෝධිත අලුත් ගැසට් පත්රයක් නිකුත් කරන බවය. එම සංශෝධිත යෝජනා 16 වනිදා පැවැත්වෙන කැබිනට් මණ්ඩලයට ඉදිරිපත් කරන බවය.
එම කයිවාරු සියල්ල විධායක ජනාධිපතිවරයා හමුවේ නිකමුන් ලෙස පක්ෂ නායකයින් හකුලාගෙන ඇත. ආණ්ඩු පක්ෂයේ කුඩා පක්ෂ නායකයන් නිසා කළ හැක්කක් නොමැතිව ඔවුන් පසුබෑවා යැයි මොහොතකට අප සිතුවත්, ආණ්ඩුව පිහිටුවා ඇති පකිෂයේ නායකයා වන අගමැති මහින්ද රාජපක්ෂටත් ඔහු විසින් පත් කළ කමිටුවේ වාර්තාව කියූ ලෙස කැබිනට් මණ්ඩලයට ඉදිරිපත් නොකර ජනාධිපතිවරයා හමුවේ පසුබාන්නට සිදුවී ඇත. මිනිසුන් වන්දනාමාන කරන මෙතරම් මහේසාක්ය නායකුට සිදුවී ඇති දෙය දුක්යදායකය. විධායක ජනාධිපතිට ඒකාධිපතියෙකු වීමට තවදුරටත් බලතල දියයුතු යැයි කියන්නන්ට අලුතින් සිතන්නට එය අවස්ථාව උදාකර දී තිබේ.
මෙය අගමැති මහින්ද රාජපක්ෂ විධායක ජනාධිපති මල්ලී යටතේ පැරදුනු පළමු අවස්ථාව නොවේ. දේශපාලන පලිගැනීම් සෙවීමට පත්කළ හා ආර්ථික කටයුතු සොයා බැලීමට පත්කළ අගමැතිවරයාගේ කමිටු ජනාධිපතිවරයාගේ කාර්යසාධක බලකා හමුවේ අහෝසි කරගන්නට පසුගිය කාලයේ සිදුවූ බව අප මතකයට නඟාගත යුතුය.
19 වැනි සංශෝධනය යටතේ බලය අහිමි ජනාධිපතිවරයෙකුගේ බලය එයාකාර නම් 20 වන සංශෝධනය යටතේ බලය තවදුරටත් සියතට ගන්නා ජනාධිපතිවරයෙකුගේ තත්වය කෙසේ වනු ඇත්ද? එසේම එවැනි ජනාධිපතිවරයකු යටතේ මහා බලසම්පන්න අගමැති මහින්ද රාජපක්ෂගේ තත්වය තවදුරටත් කෙබඳු වනු ඇත්ද?■
