මිනිස්සුන්ගෙන් ඉල්ලන්නේ වියරු විධායකයට එරෙහි වෙන්න කියලා

නීතිඥ නිසාම් කාරියප්පර්

මුස්ලිම් කොංග්‍රසයේ ලේකම්

ගෙන ඒමට සුදානම්වන 20 වන ව්‍යවස්ථා සංශෝධන කෙටුම්පත පිළිබඳ මුස්ලිම් කොංග්‍රසයේ අදහස කුමක්ද?

පවතින ආණ්ඩුව ගෙන ඒමට සුදානම් වන  20 වන ව්‍යවස්ථා සංශෝධනය  සම්පූර්ණ ප්‍රජාතන්ත්‍රවාදයට විරුද්ධ ආණ්ඩුක්‍රම ව්‍යවස්ථාවක් හැටියටයි අපි දකින්නේ. ජනතාවගේ සහය ඇතිව 2015 අවුරුද්දට කලින් තිබුණු ඒකාධිපති පාලනය පරදවලා, ඒ දිනවල තිබුණු ඒකාධිපති 18 වන ව්‍යවස්ථා සංශෝධනය අහෝසි කරලා අපි 19 වන ව්‍යවස්ථා සංශෝධනය ගෙනාවා. ගෝඨාභය රාජපක්ෂ ජනාධිපතිවරයා සම්මත කරගන්න යන  20 වන ව්‍යවස්ථා සංශෝධනය දිහා බැලුවාම අපිට පේන්නේ කිසිම සීමාවක් නැති  ඒකාධිපති ජනාධිපතිවරයෙක් විදිහට ඉදිරියේදී කටයුතු කිරීමට ඉඩ තියෙන බව. අවාසනාවට බහුතරයක්  ජනතාව මෙම ක්‍රියාව දකින්නේ විශාල ජනවරමක් ලබා ගත්ත  ජනාධිපතිවරයා තමන්ගේ බලය ලබා ගැනීමක් විදිහට. ඒත් අපි  ජනතාවගෙන් ඉතා බැගෑපත්ව ඉල්ලා සිටින්නේ මෙම ව්‍යවස්ථා සංශෝධනය ඔබ පත් කරගත් ගෝඨාභය ජනාධිපතිවරයාට බලය දීමක් ලෙස දකින්න එපා කියලා. මේ විදියට බලය ලබා දීම හරිම භයානකයි. මෙම ක්‍රියාවලිය ඉදිරියේදී පත්වෙන  ඕනෑම විධායක ජනාධිපතිවරයෙකුට ලබා දෙන අසීමිත බලයක්.

ගෝඨාභය රාජපක්ෂට බලය දීමක් ලෙස බැගෑපත්ව සිතන්න එපායැයි ඔබ කරපු ඉල්ලීම විශේෂයි. ඒ ගැන වැඩිදුර සඳහන් කළොත්..

මෙහෙමයි, ඇත්තම කියනවා නම් ගෝඨාභය රාජපක්ෂ ජනාධිපතිවරයාට නව ව්‍යවස්ථාවක් ගෙන ඒමට අවශ්‍යතාවයක් නැතිව ඇති. අගමැතිවරයා ඔහුගේ අයියා. විධායක ජනාධිපතිකම තියෙන්නේ එතුමා ගාව. පාර්ලිමේන්තුවේ තුනෙන් දෙකක  බලතලයක් ඔවුන්ට තියෙනවා. පවුලේ අයට ඇමතිධුර ගණනාවක් තියෙනවා. කථානායකවරයා ඔවුන්ගේ කෙනෙක්. ඉතිං කිසිම බලපෑමක් නැතිව ගෝඨාභය මහත්තයාට තමන්ගේ විධායක ජනාධිපතිධුරයේ ඉදිමින් රටේ වැඩ කටයුතු කරගෙන යන්න පුළුවන්. ඒ කියන්නේ, පුදුමාකාර බලයක් දැනටත් ඔහුට තියෙනවා. ව්‍යවස්ථාදායකය පවා ඔහුට බාධා කරන්නේ නැහැ. ලොකු ජනවරමකුත් තියෙනවානේ. තව මොනවාද ඕනෑ.

ඒ විදියට කටයුතු කරන්න පුලුවන්කම තියෙද්දි ජනාධිපතිධුරයේ බලතල අසීමිත ලෙස  වැඩි කිරීම හරහා  ඉදිරියට පත්වෙන ඕනෑම ජනාධිපතිවරයෙකුට දූෂිත පාලනයක් සිදු කරගෙන යන්න ඉඩකඩ එතුමාම සකස් කරලා දීමක් තමයි සිදු වෙන්නේ. මේක පෙර නිමිත්තක් විතරයි. මේ ජනාධිපතිවරයාට ලොකු ජනවරමක් තියෙන බව හිතමුකෝ. මින් ඉදිරියට කවුරුහරි ජනාධිපතිවරයෙක්, යාන්තමට ජනාධිපතිවරණයක් ජයගත්තොත්, ලොකු ජනප්‍රියත්වයකුත් නැතිව මේ බලතල ඔක්කෝම පාවිච්චි කළොත් ලොකු ප්‍රශ්නයක්නේ.

නැවත 1978 ආණ්ඩුක්‍රම ව්‍යවස්ථාව එක් බල කේන්ද්‍රයක් සහිතව ස්ථාපනය කිරීමක් විදියට මේක හඳුන්වනවා නේද?

හරියට කීවොත් 1978 ව්‍යවස්ථාව විකාර, ප්‍රජාතන්ත්‍රවිරෝධි ව්‍යවස්ථාවක්. ජේ.ආර් ජයවර්ධන ගෙනාපු ව්‍යවස්ථාවෙත් මේ ආකාරයෙන්ම එක් පුද්ගලයෙකුට පමණක් බලතල ලබා දිමේ ක්‍රියාවලියක් සිදු වුණා. ඒ ක්‍රියාවලිය නිසා රටේ ජනතාව තවමත් පීඩාවට පත්වෙලා තිබුණා. අපි කියන්නේ යෝජිත ව්‍යවස්ථා සංශෝධනයෙනුත් වෙන්න යන්නේ රටේ ජනතාව අර්බුදයක් කරා ගෙන යාමයි. සිංහල, දෙමළ සහ මුස්ලිම් කියලා වෙනසක් නැතිව ශ්‍රී ලාංකිකයන් විදියට ප්‍රජාතන්ත්‍රවාදී රාමුවක් තුළ අපේ එදිනෙදා වැඩ කර ගැනීමට  අපි හදාගත්ත 19 වන සංශෝධනයේ අඩංගු යහපත් දේවල් ඉවත් කරන්න එපා කියලා අපි ඉල්ලනවා. අපි අනිවාර්යයෙන්ම මේකට විරුද්ධ වෙනවා.

19 වන ව්‍යවස්ථා සංශෝධනයෙන් අගමැතිවරයාට ලබා දුන් සියලු බලතල ඉවත් කරලා  අගමැතිවරයාව රූකඩයක් බවට පත් කරලා නේද?

අපි කල්පනා කරන්න ඕනෑ කොවිඞ්-19  වසංගතය රටේ තිබෙන කාලයක රටේ ජනතාවගේ බදු මුදල්  බිලියන 10 කට ආසන්න මුදලක් වියදම් කරලා ප්‍රජාතන්ත්‍රවාදය සහ පාර්ලිමේන්තුවේ ස්වරීභාවය රැක ගන්න කියලා පාර්ලිමේන්තුවට පත් වුණු මන්ත්‍රීවරුන් තමන්ගේ බලතල සතපහකට ගණන් නොගෙන, තවත් කෙනෙකුට අසීමිත බලතල භාරදෙන්න යන්නේ මොකටද කියලා. වත්මන් අගමැතිවරයා වයසයි කියන එක වෙනම ප්‍රශ්නයක්. යම් විදියකින් ඒකාධිපති ජනාධිපතිවරයෙක් පත් වුණොත් ඉන්පසුව රටේ අගමැතිවරයා අනිවාර්යයෙන්ම රූකඩයක් වෙනවා තමයි. වත්මන් ආණ්ඩුවේ නම් අගමැතිවරයා රූකඩයක් කරන්න ඕනෑ නැහැ. පවුලේ අයියලා මල්ලිලා සහයෝගයෙන් සිටිය යුතුයි.

පාර්ලිමේන්තු මන්ත්‍රීවරුන්ට දැන් තීන්දුවක් ගන්න අවස්ථාව තියෙනවා නේද?

පාර්ලිමේන්තුවේ ඉන්න මන්ත්‍රීවරුන් සහ ඇමතිවරුන් කල්පනා කරන්න ඕනෑ. තමන් බොහොම අමාරුවෙන් පාර්ලිමේන්තුවට පත්වෙලා ආවේ. ඒ නිසා ජනතාව වෙනුවෙන්  රටේ ව්‍යවස්ථාධායකය පිළිබඳව තීන්දු තීරණ ගන්න අවස්ථාවක් ආවාම රටේ ජනතාව තමන්ට දීලා තියෙන බලතල විධායක ජනාධිපතිධුරයට යට කරලා වහල් වෙන්න  වුවමනා නැහැ.

රාජපක්ෂ පවුලේ සාමාජිකයන්ට රටේ නායකත්වයේ සිටින්නට සුදුසු  ආකාරයෙන්ම ව්‍යවස්ථාව සකස් කර ඇති බව පේනවා නේද?

මම හිතන්නේ ඒක බොලඳ වැඩක්. ඊලඟ ජනාධිපතිවරයා තෝරා පත්වීමේ සුදුසු වයස අඩු කිරීමක් සිදු කරලා තියෙනවා. මෙම ව්‍යවස්ථාවේදී මේ විදියට වයස් සීමාව අඩු කරලා තියෙන්නේ මිනිස්සු මුලා කරන්න.  කොහොමත් නාමල් රාජපක්ෂ මහත්මයාත් ජනාධිපතිවරණයට  ඉල්ලයි. අපි ඒ ගැන කල්පනා කරන්න ඕනෑ නැහැ දැන්ම.

විධායක ජනාධිපතිවරයාට පාර්ලිමේන්තුව  තමන්ගේ අභිමතයට විසුරුවන්න පුළුවන් නේද?

ඇත්තමට අපි කල්පනා කළ යුත්තේ මේ ගැනයි.  මේක ඉතා භයානය ක්‍රියාවලියක්. විධායක ජනාධිපතිවරයාට පාර්ලිමේන්තුව අවුරුද්දක් තුළ තමන්ගේ අභිමතය පරිදි විසුරුවන්න සහ තමන්ගේ අභිමත පරිදි කැබිනට් මණ්ඩලයක් පත් කරගන්න පුලුවන් විදියට තමයි මේ ව්‍යවස්ථාව සකස් කරලා තියෙන්නේ. අනෙක් එක සීමාවක් නැතිව අමාත්‍යධුර ජනාධිපතිවරයාට තියාගන්න පුලුවන්. පත් කරපු ඕනෑම අමාත්‍යධුරයක් තමන් හිතු පරිදි නැවත අරගෙන වෙනත් කෙනෙක් ඒ තනතුර වෙනුවෙන් පත් කරගන්න පුලුවන්. තමන් පත්කරගන්නා ලද නිකංම නිකං පාර්ලිමේන්තු සභාවකින් තමන් ඉදිරිපත් කළ නිර්දේශයක්  අරගෙන රටේ සියලුම වැදගත් තනතුරු ජනාධිපතිවරයාගේ අභිමතය පරිදි පත් කරගන්න පුලුවන් නම් මීලඟට අපිට ජීවත් වෙන්න සිදු වෙන්නේ තනි පුද්ගල රාජ්‍යයක. ඒකයි අපිට තියෙන ප්‍රශ්නය.

ද්විත්ව දුරවැසිභාවය ඉවත් කිරීම සම්බන්ධයෙන් අදහස කුමක්ද?

ඇත්තටම ඒක ප්‍රශ්නකාරියි. පාර්ලිමේන්තුවේ සිටින සියලු දෙනාමට වඩා රාජපක්ෂවරු තමයි දේශප්‍රේමීත්වය පිළිබඳව කතා කළේ. එසේ ඔවුන් කතා කරද්දී තවත් රටකට අවනතවන , වෙනත් රටක පුරවැසිභාවය අරගෙන ඒ රටට, රජයට පක්ෂපාති පුද්ගලයෙකු අපේ රටේ පාර්ලිමේන්තුවට සහ ජනාධිපති  හෝ අනෙකුත් නිල දරණ එක රාජපක්ෂවරුන්ටම තමයි හොඳ නැත්තේ. කෙනෙක් අවංකවම තමන්ගේ රටට ආදරෙයි නම් ද්විත්ව පුරවැසිභාවව ඉවත් කරගෙන තමන්ගේ රටට සේවය කරන්න එන්න පුළුවන්. එහෙත් මා හිතන හැටියට මෙම ව්‍යවස්ථා සංශෝධනයේ තියෙන කාරණා අතරින් ද්විත්ව පුරවැසිභාවය ඉවත් කිරීම සුළු ප්‍රශ්නයක්.

එතකොට ප්‍රශ්නය මොකක්ද?

ගෝඨාභය ජනාධිපතිවරයාගේ බලයට පත්වුණේ රටේ ප්‍රශ්න විසඳනවා කියලා. ඒ නිසා ජනතාව ජනාධිපතිවරයාට ජන්ද ලබා දිලා පත්කරලා තියෙන්නේ. ඉතිං තව මොනවාද ඕනෑ කරන්නේ, ප්‍රශ්න විසඳන්න. ගෝඨභය රාජපක්ෂ ජනාධිපතිවරයා  පොඞ්ඩක් කල්පනා කරලා බලන්න ඕනෑ. එතුමා  පිළිබඳව ජනතාව තුළ පැහැදීමක් තියෙන නිසා ඡන්දයෙන් පත් කරගත්තා මිසක් ඔහුට අසිමීත බලයක් ලබාදී, තමන්ගේ නිදහස නැති  කරගන්න නෙවෙයි ජනතාව තමන්ගේ ජන්දය පාවිච්චි කළේ කියලා. අපට පසුගිය ආණ්ඩුව සමයේ මෛත්‍රීපාල සිරිසේන ජනාධිපතිවරයා කළ දේවල් පිලිබඳව බොහෝ අමිහිරි අත්දැකීම් තියෙනවා. එතුමාට බලතල නොමැතිව  ඔහු කළ ව්‍යවස්ථා විරෝධී වැඩ පිළිබඳව අපිට අත්දැකීම් තියෙනවා. ජනතාවගේ ප්‍රජාතන්ත්‍රවාදී ඡන්දයෙන් පත් කරගත්ත පාර්ලිමේන්තුව එක් මනුස්සයෙකුට අවශ්‍ය වෙලාවට විසුරුවා හැරීමට කටයුතු කිරීම ප්‍රජාතන්ත්‍රවිරෝධී වැඩක්.

ජනාධිපති පත්වීම් ලබාදීමත් ගැටළුවක්..

රටේ යම් කිසි පුද්ගලයෙක් වැරුද්දක් කරනවා නම් ඒ වැරදි මෙල්ල කරලා තබා ගත් මැතිවරණ කොමිසම, පොලිස් දෙපාර්තමේන්තුව, විගණන කොමිෂන් සභාව, මානව හිමිකම් කොමිෂන් සභාව සහ අධිකරණය පාලනය කරන්නට උත්සාහ කරනවා. තනතුරු සදහා කරන පත්වීම් එක් පුද්ගලයෙක්ගේ වුවමනාව අනුව වීම වැරදි උදාහරණයක් ලබා දෙන කාරණාවක්.  ඒ පත්වීම් කරන්න සුදුසු පුද්ගලයන් පත් කරගත යුතුයි. සෝභිත හාමුදුරුවෝ 2015 ට කලින් වියරු විධායකයට එරෙහි වෙන්න කියලා රටේ ජනතාවගෙන් ඉල්ලුවා වගේ, රට ගැන කැක්කුමක් තියෙන මිනිස්සුන්ගෙන් අපි ඉල්ලන්නේ මේ වියරු විධායකයට එරෙහි වෙන්න කියලා.

පාර්ලිමේන්තුව තුළ සිටින බොහෝ මහජන නියෝජිතයන් සෑම ව්‍යවස්ථාවකට කැමැත්ත පළ කරලා සම්මත කරගෙන තියෙනවා…

ඔව්, බොහෝ අය හැම ව්‍යවස්ථාවකට තමන්ගේ කැමැත්ත පළ කරලා ව්‍යවස්ථා සම්මත කරගන්න එකඟ වෙලා තියෙනවා. ඒ වගේම 19 වන සංශෝධනය අපි සම්මත කර ගන්න අවස්ථාවේදී පවා මහින්ද රාජපක්ෂ අගමැතිවරයාගේ කණ්ඩායම කැමැත්ත පළ කළා. අද ඒ අයට තමන් කැමැත්ත පළ බව අමතක වෙලා ගිහින්. 19 වන සංශෝධනය සම්මත කරගත් අවස්ථාවේදී එක්සත් ජාතික පක්ෂයට පාර්ලිමේන්තුවේ බහුතරය තිබුණේ නැහැ. 19 වන ව්‍යවස්ථා සංශෝධනය කියන්නේ ඒ අයම සම්මත කරන්න උදව් කරපු පනතක්.

අඩු පාඩු තිබුණත් 20 වන සංශෝධනයටත් ඒ අය කැමැත්ත පළ කරයි නේද?

ආණ්ඩුවේ යම් යම් ඇමතිවරුන් මෙම ව්‍යවස්ථා සංශෝධනය පිළිබඳව විවිධ කතා කියලා තියෙනවා. අපිට හිතාගන්න බැහැ ඒ අය මොනවා කරයිද කියලා.  මේ ව්‍යවස්ථා සංශෝධනය හදිසියේ සම්මත කර ගැනීමට තියෙන තියෙන වුවමනාව මොකක්ද කියන එක තවත් ප්‍රශ්නයක්. සමහරවිට ඒ කණ්ඩායමේ ඉන්න අය එකතු කරලා තියාගන්න පුළුවන් වෙලාව මේ වෙලාව නිසා වෙන්න ඇති.■