ප්‍රජාතන්ත්‍රවාදීව පරාජය කරනවා
විපක්ෂ නායක සජිත් ප්‍රේමදාස
විසිවැනි සංශෝධනය ප්‍රජාතන්ත්‍රවාදීව පරාජය කිරීමට අපි බලාපොරොත්තු වෙනවා. 20 වැනි ව්‍යවස්ථා සංශෝධනය ප්‍රතිගාමී ක්‍රියාවක්. මේක බලය එක තැනක, එක පුද්ගලයෙක් මත කේන්ද්‍රීයකරණයට ලක් නොකොට ජන සම්මතවාදය තුළින් ජනතා පරමාධිපත්‍යය ක්‍රියාත්මක කරන්න ඕනෑ යුගයක්. රජය උත්සාහ කරන්නේ ප්‍රජාතන්ත්‍රවාදය හකුළා තනි පුද්ගල ඒකාධිපති පාලනයක් කරා යන්න. සමගි ජන බලවේගයේ අපි මේ රටේ සියලුම ප්‍රගතිශීලි ජන කොට්ඨාශ එක්ක මේ රටට කොඩිවිනයක් වන විසිවැනි සංශෝධනය ජනබලයෙන් පරාජය කරනවා. එහෙත් අපි විසිවැනි සංශෝධනය පරාජය කිරීමෙන් නතර වෙන්නේ නැහැ. ඊට වැඩිය නූතනවාදී, ප්‍රගතිශීලී, දැවැන්ත දේශපාලන ව්‍යාපාරයක් හැටියට ඉදිරි දැක්මක් කරා යනවා. ඊට අමතරව අපි දහනවවැනි සංශෝධනය තවත් ශක්තිමත් කරමින් දහනවවැනි සංශෝධනයෙන් ඔබ්බට යෑමට කටයුතු කරනවා. දහනවය ප්ලස් නමින් ව්‍යාපෘතියක යෙදෙනවා. කොමිෂන් සභාවල ස්වාධීනත්වය තවත් තහවුරු කිරීමට බලාපොරොත්තු වෙනවා. ඇතැම් කොමිෂන් සභාවලට මානව සම්පත් සහ මුදල් තිබුණේ නැහැ. එම තත්වයන් වෙනස් කිරීමටත් බලාපොරොත්තු වෙනවා. දහනවවැනි සංශෝධනයේ අඩුපාඩු නිවැරදි කරනවා. එහෙත් පුද්ගලයෙකුගේ හෝ ඔහුගේ කොට්ඨාශයේ අනාගත උන්නතිය තකා ව්‍යවස්ථා සංශෝධන කරන්නේ නැහැ.
එකඟ වෙන්න අමාරුයි
දෙමළ ජාතික සන්ධානයේ නායක ආර්. සම්බන්ධන්
අපේ පක්ෂයෙන් විසිවැනි සංශෝධනය ගැන අවසන් තීන්දුවක් අරන් නැහැ. දැනට විසිවැනි සංශෝධනය ගැසට් කර තිබෙනවා පමණයි. එය ලබන සතියේ පාර්ලිමේන්තුවට ගෙනෙයි කියලා බලාපොරොත්තු වෙනවා. ඡන්දයකට යන්න කලින් අපි තීන්දුවක් ගන්නවා. අපි දැනට අන්තිම තීන්දුවක් අරන් නෑ. එහෙත් විසිවැනි සංශෝධනයේ තියෙන කරුණු ගණනාවක් ගැන අපට එකඟ වෙන්න අමාරුයි. දහනවවැනි සංශෝධනය ප්‍රජාතන්ත්‍රවාදය දෙසට ගමන් කිරීමක්. විසිවැනි සංශෝධනය ආපස්සට යෑමක් බව පෙනෙන්න තියෙනවා. ඒ කරුණු සාකච්ඡා කරලාතීන්දුවක් ගන්නවා.
සමතුලිතභාවය වැදගත්
ශ්‍රී ලංකා මුස්ලිම් කොංග්‍රසයේ නායක රවුෆ් හකීම්
විසිවැනි සංශෝධනය පිළිබඳව අපේ පක්ෂ අතර සාකච්ඡාවක් යනවා. ඒ පිළිබඳ ගැඹුරට සාකච්ඡා කරලා තමයි තීන්දුව ගන්නේ. විධායකයත් ව්‍යවස්ථාදායකයත් අතරේ තියෙන සමතුලිතභාවය වැදගත්. ඒ සමතුලිතභාවය රැකීම තුළ තමයි රටේ ප්‍රජාතන්ත්‍රවාදය ශක්තිමත් වෙන්නේ. එම පදනම ආරක්ෂා කරගැනීම වෙනුවෙන් අපි පෙනී සිටිනවා. ඒ පදනමේ සිට පාර්ලිමේන්තුවේ සෙසු පක්ෂ සමඟ අපි සාකච්ඡා කරනවා.
ඒකාධිපතිත්වයට පාර කැපෙනවා
ජාතික හෙළ උරුමයේ නායක චම්පික රණවක
ජනාධිපතිවරයා පාර්ලිමේන්තුව නොතකා නොසලකා කටයුතු කිරීමේ ප්‍රවණතාවක් තියෙනවා. ඒක නොදන්නාකම නිසා වෙනවාද, නැතිනම් හිතාමතා කරනවාද කියන එක ප්‍රශ්නයක්. උදාහරණයක් විදියට ගිය අවුරුද්දේ දීපු බදු සහන පාර්ලිමේන්තුවේ අනුමත කරගන්නේ නැතිව දීර්ඝ කාලයක් හිටියා. 2020 අප්‍රේල් 31 ඉඳන් සැප්තැම්බර් 01 දක්වා වියදම් පාර්ලිමේන්තු අනුමැතියක් නැතිව තනි කැමැත්තට කළා. නිලධාරීන් පත් කිරීමේදී වෘත්තිය ක්ෂේත්‍ර අමතක කරලා හමුදා නිලධාරීන් පත්කරන ප්‍රවණතාවක් තිබුණා. මීට කලින් අධිකරණයේ හා මැතිවරණ කොමිසමේ ස්වාධීනත්වය පිළිබඳ මතයක් හැදුවා. විගණන කොමිසම, ස්වාධීන රාජ්‍ය සේවා කොමිසම ආදී ආයතනවලින් රාජ්‍ය සේවය විධිමත් කිරීමේ මූලාරම්භයක් හැදුවා. එහෙත් දැන් ඒවා ආපස්සට හරවලා. පහුගිය ජනාධිපතිවරණයේදී මතයක් හැදුවා, මේ ජනාධිපතිවරයා ඍජු පුද්ගලයෙක්, කිසිවෙකුට හිතවාදීකම් දක්වන්නේ නැහැ. දක්ෂයාට තැන දෙනවා වගේ. එහෙත් දැන් ඔහුගේම ආධාරකරුවන් ඔහුගේ පත්කිරීම් ගැන, ක්‍රියාදාමය ගැන විවේචන ගේනවා. ඇතැම් පත්කිරීම් ගැන පවා ප්‍රශ්න කරනවා. මැතිවරණයේදී රටට මවා පෙන්වූ ඍජු ගුණය දැන් පෞද්ගලිකව නැහැ. දේශපාලන පළිගැනීම්වලට ආයතන යොදාගැනීම ආදී ලක්ෂණ තියෙනවා. මේ කීව නරක ගතිලක්ෂණ විසිවැනි ආණ්ඩුක්‍රම ව්‍යවස්ථා සංශෝධනය මගින් සියදහස් ගුණයකින් ශක්තිමත් වෙනවා. ව්‍යවස්ථාමය ඒකාධිපතිත්වයකට පාර කැපෙනවා.
ජනාධිපතිධුරය භයානක පැත්තකට
සමස්ත ලංකා දෙමළ කොංග්‍රසයේ නායක ගජේන්ද්‍රකුමාර් පොන්නම්බලම්
දහනවවැනි සංශෝධනයේ තියෙන අඩුපාඩුකම් වෙනස් කරන සංශෝධනයක් ගෙනල්ලා ප්‍රජාතන්ත්‍රවාදය ශක්තිමත් කරන්න ක්‍රියාවලියක් යනවානම් අපි සහයෝගය දෙනවා. තියෙන දේත් නැතිකරන්නට ආණ්ඩුව ක්‍රියාකරනකොට ඒකට සම්පූර්ණයෙන් විරුද්ධයි. ඒ අනුව විසිවැනි සංශෝධනයට එරෙහිව ඡන්දය පළ කරන්න වෙනවා. ජනාධිපතිධුරයට දැන් තියෙන බලතලවලට වඩා ශක්තිමත් කරන ක්‍රියාවලියක් හැටියට අපි විසිවැනි සංශෝධනය දකිනවා. රටක බලය බෙදීම තමයි තියෙන්න ඕනෑ. සමබරතාවය නැති කරමින් තනි පුද්ගලයෙක් බලය ලබාගැනීම හොඳ දෙයක් නෙවෙයි. එක පුද්ගලයෙකුගේ අදහස්වලින් විතරක් රට ගෙනියන්න බැහැ. දෙමළ ජනතාවගේ පැත්තෙනුත් මේක හොඳ නැහැ. ගෝඨාභය රාජපක්ෂ ජනාධිපතිවරයාගේ අදහස් අපට විශ්වාස නැහැ. ඔහු ජනාධිපතිධුරය භයානක පැත්තකට ගෙනියන බව අපි දකිනවා.
ඒකාධිපතිවාදයට පළවැනි පියවර
දෙමළ ජනතා පෙරමුණේ නායක සී.වී. විග්නේශ්වරන්
විසිවැනි සංශෝධනය කියන්නේ ඒකාධිපතිවාදයට යන ගමනක පළවැනි පියවර. ජනාධිපතිතුමා ගැන අපට මොනතරම් හොඳ අදහස් තිබුණත්, ඔහු හමුදාවේ හිටපු කෙනෙක්. හමුදාවේ හිටපු අයට ආයතන ප්‍රධානී තනතුරුත් ඔහු දීලා තියෙනවා. විසිවැනි සංශෝධනයෙන් ඔහු තමන්ගේ ජනාධිපතිධුරයට තිබුණු සංවරණ හා තුලන ක්‍රම දුර්වල කිරීම හා නැතිකිරීම කරලා තියෙනවා. ජේ.ආර්. ජයවර්ධන කීවා එම ආණ්ඩුක්‍රම ව්‍යවස්ථාවෙන් පිරිමියෙකු ගැහැණියක කිරීමත්, ගැහැණියක පිරිමියෙකු කිරීමත් හැර වෙන ඕනෑ දෙයක් කරන්න පුළුවන් කියලා. දැන් ජනාධිපති බලය ඒ තැනට ගේන්න යනවා. ඒක ප්‍රජාතන්ත්‍රවාදයට පටහැණි දෙයක්. ජනාධිපතිවරයාට බලය දෙමු කියලා කීවාට හෙට නරක ජනාධිපතිවරයෙක් ආවොත් මොකුත් කරන්න බැරිවේවි. එතකොට තුනෙන් දෙකත් නැතිව ආණ්ඩුක්‍රම ව්‍යවස්ථාව ආපහු වෙනස් කරන්නත් බැරි වේවි.
රටට හානිවෙන දේවල් බලනවා
සමස්ත ලංකා මක්කල් කොංග්‍රසයේ නායක රිෂාද් බදියුදීන්
අපි පක්ෂයක් හැටියට කිසිම තීන්දුවකට ඇවිත් නැහැ. අපේ පක්ෂයේ පාර්ලිමේන්තු මන්ත්‍රීවරුන් හතරදෙනෙක් ඉන්නවා. අපි කතාබහ කරලා තීන්දුවකට එනවා. දැන් අපි විසිවැනි සංශෝධන යෝජනාව අධ්‍යනය කරමින් ඉන්නවා. මෙම ව්‍යවස්ථා සංශෝධනයේ තියෙන රටට හානිවෙන දේවල් ගැන අපි බලනවා. කෙසේවෙතත් තව කල් තියෙන නිසා අන්තිම තීන්දුවක් ගන්නේ නැහැ. පක්ෂය ඇතුළේ විවිධ අදහස් තියෙනවා. කොමිෂන් සභා දුර්වල කිරීම ගැන විරෝධයක් තියෙනවා. ප්‍රජාතන්ත්‍රවාදය තවත් ශක්තිමත් කිරීම තමයි වඩාත් හොඳ. එහෙත්, පක්ෂය හැටියට අන්තිම තීන්දුවට එන්න ඕනෑ.
