අපරාධ පරීක්ෂණ දෙපාර්තමේන්තුව පාතාල සාමාජිකයන් සමඟ සමීපව ඇසුරු කර ඇති බවට නිගමනය කරමින් අත්අඩංගුවට ගැනීමට සූදානමින් සිටි පුවත්පත් මාධ්‍යවේදීන් දෙදෙනා අත්අඩංගුවට ගැනීමේ ක්‍රියාවලිය නතර වී ඇති බව වාර්තා වේ.
එයට හේතුව ලෙස සඳහන් වන්නේ එම මාධ්‍යවේදීන් දෙදෙනා සේවය කරන පුවත්පතේ හිමිකරු සෘජුව මැදිහත් වී එම මාධ්‍යවේදීන් වෙනුවෙන් පෙනී සිටීමය.
එම මාධ්‍යවේදීන් දෙදෙනා අත්අඩංගුවට ගැනීමට සූදානම් වී ඇත්තේ ඔවුන් පාතාල සාමාජිකයන් සමඟ දූරකථනයෙන් කතාබහ කිරීම, බන්ධනාගාරගත පාතාල සාමාජිකයන් හමුවීම හා එම පාතාල සාමාජිකයන්ට මරණ තර්ජන ඇති බවට වාර්තා පළ කර මුදල් ලබා ගැනීම යන චෝදනා මතය. හෝමාගම, පිටිපන ප්‍රදේශයේ පවත්වාගෙන ගිය ගිනි අවි ගබඩාවකට ගිනි අවි ප්‍රවාහනය සඳදහා ආධාර අනුබල දීමේ චෝදනාව මත මව්බිම පුවත්පතේ මාධ්‍යවේදියෙකු අගෝස්තු 17 වන දින අත්අඩංගුවට ගෙන තිබුණි. එම විමර්ශනවලින් අනාවරණය වී ඇත්තේ එම මාධ්‍යවේදියාගේ ගිණුමට ලක්ෂ දෙකහමාරක මුදලක් බැරවී ඇති බවය. ඒ පිළිබඳ කරුණු සෙවීමේදී අනෙක් මාධ්‍යවේදීන් දෙදෙනා පිළිබඳ කරුණු හෙළි වී තිබේ.■
