විසිවැනි ආණ්ඩුක්‍රම ව්‍යවස්ථා සංශෝධනයෙහි තිබෙන කරුණු පිළිබඳ ආණ්ඩුවේ සාමාජික පක්ෂ සහ ආණ්ඩුවට හිතවත් සංවිධානවල විරෝධයක් එල්ල වී ඇති බවත් ආණ්ඩුවේ අභ්‍යන්තර සාකච්ඡාවලදී සහ ප්‍රසිද්ධ අදහස් දැක්වීම්වලදී එම විරෝධතා දක්වා ඇති බවත් වාර්තා වේ.
එම සංශෝධනය කැබිනට් මණ්ඩලයට ඉදිරිපත් කළ අවස්ථාවේදී සහ නොවැම්බර් 08 වැනිදා පැවති ආණ්ඩු පක්ෂයේ පාර්ලිමේන්තු කණ්ඩායම් රැස්වීමේදී එම විරෝධතා මතු වී තිබේ. ඊට අමතරව ආණ්ඩුව සමඟ කටයුතු කරන ජාතික සංවිධාන එකමුතුව, ජාතික ඒකාබද්ධ කමිටුව, දේශ හිතෛෂී ජාතික ව්‍යාපාරය, යුතුකම සංවාද කවය ආදි සංවිධාන විසිවැනි ව්‍යවස්ථා සංශෝධනයෙහි ඇති කරුණු පිළිබඳ ලිඛිත හා වාචික විරෝධය දක්වා තිබේ.
අනිද්දා සමඟ අදහස් දැක්වූ කැබිනට් මණ්ඩල සාමාජිකයෙකු ප්‍රකාශ කළේ ආණ්ඩුව සමඟ කටයුතු කරන කුඩා දේශපාලන පක්ෂ නායකයන්, සිංහල ජාතිකවාදී සංවිධාන සහ ශ්‍රී ලංකා පොදුජන පෙරමුණේ තරුණ මන්ත්‍රීවරුන් පිරිසක් විසිවැනි සංශෝධනයෙහි තිබෙන කරුණුවලට විරෝධයක් දක්වන කණ්ඩායම් අතර සිටින බවයි. ද්විත්ව පුරවැසියන්ට පාර්ලිමේන්තු මන්ත්‍රීවරුන් ලෙස තේරී පත්වීමට ඇති අවස්ථාව ලබාදීම වෙනුවෙන් විසිවැනි සංශෝධනයට එකතු කර ඇති කොටස් එම කණ්ඩායම්වල විරෝධයට හේතු වී තිබෙන ප්‍රධාන කාරණයක් බව වාර්තා වේ. ඊට අමතරව විගණන කොමිසම අහෝසි කිරීම හා විගණකාධිපතිවරයාගේ බලතල අඩු කිරීම, රාජ්‍ය සමාගම් විගණනය කිරීමට ඇති හැකියාව ඉවත් කිරීම, පාර්ලිමේන්තු සභාවට ඇති බලතල ප්‍රමාණවත් නොවීම ආදි කරුණුවලට විවිධ කණ්ඩායම් විරෝධය පළ කර තිබේ.
සැප්තැම්බර් 03 වැනිදා කැබිනට් මණ්ඩල රැස්වීමට විසිවැනි ආණ්ඩුක්‍රම ව්‍යවස්ථා සංශෝධනය ඉදිරිපත් කළ අවස්ථාවේ දිනේෂ් ගුණවර්ධන, වාසුදේව නානායක්කාර, විමල් වීරවංශ හා උදය ගම්මන්පිළ ඒ පිළිබඳ අදහස් දක්වමින් ඇතැම් කරුණුවලට විරෝධය දක්වා තිබුණි. කෙසේ වෙතත් කැබිනට් මණ්ඩලයේ අනෙකුත් සාමාජිකයන්ගේ විරෝධයක් තිබී නොමැති නිසා බහුතර සහයෝගය ඇති බව සලකමින් විසිවැනි සංශෝධනයට කැබිනට් අනුමැතිය ලැබුණු බව ප්‍රකාශ කර ඇත.
සැප්තැම්බර් 08 වැනිදා පැවති පාර්ලිමේන්තු කණ්ඩායම් රැස්වීමේදී යුතුකම සංවාද කවයේ සාමාජිකත්වය දරන පාර්ලිමේන්තු මන්ත්‍රී ගෙවිඳු කුමාරතුංග විසිවැනි සංශෝධනය පිළිබඳ ආණ්ඩුවේ අනෙකුත් කණ්ඩායම්වල අදහස්වලට ඇහුම්කන් දිය යුතු බව කියා තිබේ. ඒ අනුව විසිවැනි සංශෝධනය පිළිබඳ ආණ්ඩුවේ සාමාජික පක්ෂවල අදහස් ඉදිරිපත් කිරීම සඳහා සාකච්ඡාවක් ලබාදෙන බව ආණ්ඩුවේ නායකයන් කියා ඇත.
විසිවැනි ආණ්ඩුක්‍රම ව්‍යවස්ථා සංශෝධනයෙහි ඇති කරුණු පිළිබඳ විරෝධය පළ කොට ජාතික සංවිධාන එකමුතුව සැප්තැම්බර් 09 වැනිදා එහි කැඳවුම්කරු ගුණදාස අමරසේකරගේ අත්සනින් යුතුව ජනාධිපතිවරයාට ලිපියක් යවා ඇත.
එහි පහත යෝජනා සඳහන් කර ඇත.‘නව පනත් කෙටුම්පතක් ගැසට් කිරිමෙන් පසුව මහජන සංවාදය සඳහා ලක් කිරීම සඳහා තිබුණු දින 14ක කාලය දින 7 දක්වා අඩු කිරීමේ වරද නිවැරදි කිරීම, මහජන සංවාදයට ඉඩ අහුරමින් ‘හදිසි පනත්’ සම්මත කිරීමට ඉඩ සලසන ප්‍රජාතන්ත්‍ර විරෝධී ප්‍රතිපාදනය ඉවත් කිරීම, 53 වන වගන්තිය සංශෝධනය කිරීමේදී 7 වැනි උපලේඛනය ඉවත්වීම මගින් නිර්මාණය වී ඇති බෙදුම්වාදයට පක්ෂපාතී ප්‍රතිපාදනය නිවැරදි කිරීම, ද්විත්ව පුරවැසියන් පාර්ලිමේන්තු මන්ත්‍රීධුර දැරීම වැළැක්වීම සඳහා පනවා තිබූ බාධකය මහබැංකු අධිපති, නීතිපති, පොලිස්පති, විගණකාධිපති, හමුදාපතිවරුන්, ශ්‍රේෂ්ඨාධිකරණ විනිසුරුවරුන් හා අමාත්‍යාංශ ලේකම්වරුන් ඇතුලත් වන ලෙස නැවත පැනවීම, විගණන කොමිසම අහෝසි කිරීමේ වරද සහ යම් රාජ්‍ය ආයතන විගණනයෙන් නිදහස් කිරීමේ වරද නිවැරදි කිරීම.’
වත්මන් ආණ්ඩුවට සහයෝගය දක්වන ජාතික ඒකාබද්ධ කමිටුව නම් සංවිධානය 2020 සැප්තැම්බර් 06 වැනිදා මාධ්‍ය නිවේදනයක් නිකුත් කරමින් විසිවැනි සංශෝධනයෙහි ඇති ඇතැම් කරුණුවලට විරෝධය දක්වා තිබුණි. හිටපු ජ්‍යෙෂ්ඨ නියෝජ්‍ය පොලිස්පති කේ.එම්.බී. කොටකදෙණිය සහ විශ්‍රාමික ලුතිනන් කර්නල් අනිල් අමරසේකර එම නිවේදනයට අත්සන් කර ඇත. ආණ්ඩුක්‍රම ව්‍යවස්ථාවේ 53 වැනි ව්‍යවස්ථාව සංශෝධනය කිරීම හා ද්විත්ව පුරවැසියන්ට පාර්ලිමේන්තුවට පැමිණීමට හැකිවන ලෙස ව්‍යවස්ථාව සංශෝධනය කිරීම පිළිබඳ එම සංවිධානය විරෝධය දක්වා ඇත. සංවරණ හා තුලණ ක්‍රමවේද නොමැතිව 18 වැනි සංශෝධනයෙන් හා 20 වැනි සංශෝධන කෙටුම්පතෙන් පත්කිරීම් සහ ඉවත් කිරීම් සඳහා ජනාධිපතිවරයාට ලබාදී ඇති අභිමත බලය නුසුදුසු බව එම සංවිධානය පෙන්වාදී ඇත.■
