එක්සත් ජාතික පක්ෂ කෘත්‍යාධිකාරී මණ්ඩලය සැප්තැම්බර් පළමු සතියේදී රැස්වී එහි නායකත්වයට පුද්ගලයෙකු පත් කර ගැනීමට තීරණය කර තිබේ. එම තීරණය ගෙන ඇත්තේ අගෝස්තු 25 වැනිදා පැවති කෘත්‍යාධිකාරී මණ්ඩල රැස්වීමේදීය.
එමෙන්ම එහිදී පත්වෙන නායකයාට එජාප ජාතික ලැයිස්තු මන්ත්‍රීධුරය සම්බන්ධයෙන් තීරණයක් ගැනීමේ බලයද ලබාදීමට එම රැස්වීමේදී තීරණය කර ඇත.
අලුතින් පත්වන එජාප නායකයාට විශාල වැඩ කොටසක් ඇති බැවින් ජාතික ලැයිස්තු මන්ත්‍රීවරයා වශයෙන් නායකයා නොවන පුද්ගලයෙකු පත්කළ යුතු බවටද එහිදී යෝජනාවක් ඉදිරිපත් වී ඇත.
එජාප නායකත්වය සඳහා මේ වනවිට රුවන් විජේවර්ධන, රවී කරුණානායක, වජිර අබේවර්ධන ඉදිරිපත්වීමට බලාපොරොත්තු වන බව වාර්තා වන අතර මීට පෙර ඒ සඳහා ඉදිරිපත් වන බව ප්‍රකාශ කළ අකිල විරාජ් කාරියවසම්, දයා ගමගේ හා නවීන් දිසානායක යන අය එම තරගයෙන් ඉවත් වී ඇති බවද වාර්තා වේ.
සාමාජිකයන් 92ක් දක්වා යා හැකි එජාප කෘත්‍යාධිකාරී මණ්ඩලයේ මේ වනවිට සිටින්නේ සාමාජිකයන් 41 දෙනෙකු පමණය. සමගි ජන බලවේගය සඳහා ගිය කෘත්‍යාධිකාරී මණ්ඩල සාමාජිකයන්ගේ සාමාජිකත්වය අහෝසිවීම නිසා සාමාජික සංඛ්‍යාව අඩු වීම සිදුවී තිබේ.
වැඩිදුරටත් වාර්තා වන්නේ තරගයකින් තොරව එකඟතාවකින් එජාප නායකයා තෝරාගැනීම සඳහා එම පක්ෂයේ පිරිසක් උත්සාහ කරමින් සිටින බවය.■
ඉඳුවර බණ්ඩාර
