සෞඛ්‍ය සේවා අධ්‍යක්ෂ ජෙනරාල් ලෙස නිලධාරියෙකු තෝරා පත් කරගැනීම සඳහා උපදෙස් ලබාදීමට කැබිනට් මණ්ඩලය කමිටුවක් පත් කර ඇතැයි අනිද්දා වෙත අදහස් දැක්වූ කැබිනට් මණ්ඩල සාමාජිකයෙක් පැවසීය.
එම කමිටුව සඳහා සෞඛ්‍ය අමාත්‍යාංශයේ ලේකම් සහ මුදල් අමාත්‍යාංශයේ ලේකම් ඇතුළු පිරිසක් පත්කර ඇතැයි ඔහු කීය.
වෛද්‍ය සේවා ව්‍යවස්ථාව අනුව සෞඛ්‍ය සේවා අධ්‍යක්ෂ ජෙනරාල්වරයෙකු පත් කිරීමට පෙර සෞඛ්‍ය අමාත්‍යාංශය එම තනතුරට සුදුස්සන් තෝරාගැනීම සඳහා දැන්වීමක් පළ කළ යුතු අතර ඒ සඳහා අයදුම්පත් ඉදිරිපත් කරන පුද්ගලයන් සම්මුඛ පරීක්ෂණයට ලක් කොට තෝරාගත යුතුය.
කෙසේ වෙතත් සෞඛ්‍ය සේවා අධ්‍යක්ෂ ජෙනරාල් තනතුරට වැඩබැලීමේ නිලධාරියෙකු පත් කිරීමේ බලය කැබිනට් මණ්ඩලයට ඇත. මේ වනවිට නියෝජ්‍ය සෞඛ්‍ය සේවා අධ්‍යක්ෂ ජෙනරාල්වරයෙකු වන එස්. ශ්‍රීධරන් එම තනතුරේ වැඩ ආවරණය කරමින් සිටී.
ඒ පිළිබඳ අදහස් දක්වමින් රජයේ වෛද්‍ය නිලධාරීන්ගේ සංසදයේ ලේකම් වෛද්‍ය නිරෝෂන් ප්‍රේමරත්න මෙසේ පැවසීය.
‘විධිමත් ලෙස සෞඛ්‍ය අමාත්‍යාංශ ලේකම්වරයෙකු පත් කරගැනීමේ ක්‍රියාවලියට මාස තුනක් පමණ ගතවෙනවා. මුරුත්තෙට්ටුවේ ආනන්ද හිමි ඇතුළු සෞඛ්‍ය සේවයේ වෘත්තිය සමිති නායකයන් සියලුදෙනාම පාහේ ඉල්ලන්නේ විධිමත් ලෙස අධ්‍යක්ෂ ජෙනරාල්වරයෙකු තෝරාගන්නා තුරු දැනට සිටින ජ්‍යෙෂ්ඨම සහ සුදුසුකම් සහිත නිලධාරියා තනතුරේ වැඩබැලීම සඳහා පත් කරන ලෙස. වැඩබලන සෞඛ්‍ය සේවා අධ්‍යක්ෂ ජෙනරාල්වරයෙකු කැබිනට් මණ්ඩලයෙන් පත් කරන්න ඕනෑ. දැනට වැඩ ආවරණය කිරීම සඳහා සෞඛ්‍ය අමාත්‍යාංශයේ ලේකම්වරයා කෙනෙක්ව පත් කරලා ඉන්නවා. එහෙත් ඔහුගේ බල රහිතයි. වැඩබලන නිලධාරියෙකු පත් කිරීම සහ, වෙනත් තනතුරක් දරන නිලධාරියෙකු තාවකාලිකව වැඩ ආවරණය කිරීම කියන්නේ දෙකක්. දැන් සෞඛ්‍ය සේවා අධ්‍යක්ෂ ජෙනරාල්වරයෙකු හෝ වැඩබලන නිලධාරියෙකු නැහැ. ඊට පහළ නිලයක් තියෙන කෙනෙක් වැඩ ආවරණය කරමින් ඉන්නවා. සෞඛ්‍ය විෂයට අයත් ආඥාපනත් විශාල ප්‍රමාණයක් ආවරණය කරන නිලධාරියා සෞඛ්‍ය සේවා අධ්‍යක්ෂ ජෙනරාල්වරයා. කොවිඞ්-19 වසංගතය අවසන් වී නොමැති පසුබිමක එම තනතුර පුරප්පාඩු වී තිබීම බරපතළ කාරණයක්.’■
