මෙම වසරේ ඉදිරි මාස හතරක කාලය සඳහා රුපියල් බිලියන 2050ක හෙවත් රුපියල් කෝටි දෙලක්ෂ පන්දාහක ණය ගැනීම සඳහා ආණ්ඩුව පාර්ලිමේන්තුවේ අවසර ඉල්ලා ඇත.
මුදල්, බුද්ධශාසන, ආගමික හා සංස්කෘතික කටයුතු සහ නාගරික සංවර්ධන හා නිවාස ඇමතිවරයා ලෙස අගමැති මහින්ද රාජපක්ෂ මෙම ණය ගැනීමේ අවසරය අගෝස්තු 27 දින පාර්ලිමේන්තුවට ඉදිරිපත් කර ඇත.
සැප්තැම්බර් සිට දෙසැම්බර් මාසය දක්වා වූ වියදමට අදාළ අතුරු සම්මත ගිණුමෙන් රුපියල් බිලියන 1300ක හෙවත් රුපියල් කෝටි එක්ලක්ෂ තිස්දහසක ණය ගැනීමට අවසර ඉල්ලා ඇති අතර ඊට අමතරව අගමැතිවරයා දේශීය භාණ්ඩාගාර බිල්පත් ආඥා පනත යටතේ එදිනම ඉදිරිපත් කර ඇති තවත් යෝජනාවකින් ඉල්ලා ඇත්තේ රුපියල් බිලියන 750ක් හෙවත් රුපියල් කෝටි හැත්තෑපන්දහසක ශ්‍රී ලංකා ආණ්ඩුවේ භාණ්ඩාගාර බිල්පත් නිකුත් කිරීමෙන් ණයට ගැනීමට අවසර ලබාදෙන ලෙසය.
මෙහිදී විශේෂත්වය වන්නේ සැප්තැම්බර් සිට දෙසැම්බර් දක්වා මාස 4ක කාලය සඳහා රජයේ වියදම රුපියල් බිලියන 949ක් වෙද්දී අතුරු සම්මත ගිණුමෙන් ඊට වැඩි රුපියල් බිලියන 1300ක ණය මුදලක් ලබාගැනීමට අවසර ඉල්ලා තිබීමය. අමතරව භාණ්ඩාගාර බිල්පත් මගින් තවත් රුපියල් බිලියන 750ක ණයක් ලබාගැනීමට අවසර ඉල්ලීම මගින් රජයේ වියදමට වඩා දෙගුණයක ණය ලබාගැනීමට නියමිතය.
මෙලෙස විශාල ණය මුදලක් ලබාගැනීම පිළිබඳ ආර්ථික විශේෂඥයන් වන ආචාර්ය ඩබ්ලිව්.ඒ. විජේවර්ධන හා මහාචාර්ය සිරිමල් අබේරත්නගෙන් කළ විමසීම්වලදී ඔවුන් ප්‍රකාශ කළේ අතුරු සම්මත ගිණුමෙන් වියදම ඉක්මවා ණය ගැනීමට අවසර ඉල්ලීමෙන් පෙනීයන්නේ මීට පෙර ලබාගෙන ඇති ණය ගෙවීම සඳහා එම ඉල්ලීම කර ඇති බවයි. ආචාර්ය ඩබ්ලිව්.ඒ. විජේවර්ධන ප්‍රකාශ කළේ වියදම ඉක්මවා වැඩි වශයෙන් ණය ලබාගැනීම දැන් ශ්‍රී ලංකාවේ සාමාන්‍ය තත්වයක් වී ඇති නමුත්, එය භයානක තත්වයක් බවය. මෙය ණය උගුලක ශ්‍රී ලංකාව තවත් සිරවීමක් බව ඔහු කීය. මෙම ණය ප්‍රමාණය අඩු කරගැනීම සඳහා ඇත්තේ දුෂ්කර මාවතක් බවත්, ඒ සඳහා රජයේ වියදම් අවම කරගෙන, ආදායම් වැඩි කරගත යුතු බවත් ඔහු පැහැදිලි කළේය. එහෙත් රාජ්‍ය සේවයෙහි වියදම් තවත් වැඩි කරමින් උපාධිධාරීන් සහ අඩු ආදායම්ලාභීන් රජයේ රැකියා සඳහා බඳවාගැනීමෙන් එලෙස වියදම් අවම කරගන්නා බවක් පෙනෙන්නට නැති බව ඔහු පෙන්වාදුන්නේය. මෙම නව බඳවාගැනීම්වලට අදාල වැටුප් ගෙවීම, කාර්යාල පහසුකම් ආදිය ලබාදීමට විශාල මුදලක් වියදම් කරන්නට සිදුවන බවත්, මෙවැනි වියදම් නිසා ණය උගුලෙහි ශ්‍රී ලංකාව තවත් සිරෙවමින් පවතින බවත් ඔහු කීය.■
ලසන්ත රුහුණගේ/තරිඳු උඩුවරගෙදර
