එක්සත් ජාතික පක්ෂයේ නායකත්වය සඳහා යෝජනා වී ඇති නම් අතරින් රුවන් විජයවර්ධනට නායකත්වය ලබාදීම පිළිබඳ වැඩි පිරිසක් කැමැත්ත දක්වා ඇති බවත් එජාප නායක රනිල් වික්‍රමසිංහට හිතවත් හිටපු පාර්ලිමේන්තු මන්ත්‍රීවරයෙක් පැවසීය.
නායකත්වය පිළිබඳ එම පක්ෂයෙන් මැතිවරණයට ඉදිරිපත් වූ දිස්ත්‍රික් කණ්ඩායම්වල සිටි නායකයන් සහ එජාපයට අනුබද්ධිත සංවිධානවල නායකයන් ගෙන්වා සාකච්ඡා පවත්වා ඇති බවත්, එම සාකච්ඡාවලදී වැඩි පිරිසක් රුවන් විජයවර්ධනට කැමැත්ත දක්වා ඇති බවත් ඔහු කීය. ඒ අනුව අගෝස්තු 19 වැනිදා රත්නපුර දිස්ත්‍රික්කයෙන් සහ අගෝස්තු 18 වැනිදා නුවරඑළිය දිස්ත්‍රික්කයෙන් නායකයන් පැමිණ අදහස් දක්වා තිබුණු බව ඔහු කීය. පක්ෂයට අනුබද්ධිත වෘත්තීය සමිති, නීතිඥ සංගම් ආදි සංවිධානවල නායකයන්ද තමන්ගේ අදහස් ඉදිරිපත් කර ඇති බව ඔහු කීය.
ඉදිරි සති දෙක ඇතුළත නායකත්වය පිළිබඳ අවසන් තීන්දුවක් ගන්නා බවද ඔහු කීවේය.
එම පක්ෂයේ නායකත්වයෙන් රනිල් වික්‍රමසිංහ මහතා ඉවත් විය යුතු බව එම සාකච්ඡාවලදී අදහස් දැක්වූ වැඩි පිරිසකගේ අදහස වී ඇතැයිද ඔහු කීය. කෙසේ වෙතත් කරු ජයසූරිය එම තනතුර සඳහා පත් කිරීමට ඉදිරිපත් කර ඇති යෝජනාවලටද එම නායකයන්ගේ කැමැත්තක් නැතැයි ඔහු කීය. කරු ජයසූරිය මහතා එක්සත් ජාතික පක්ෂය හා සමගි ජන බලවේගය එකතු කිරීම පිළිබඳ වැඩි අවධානයක් යොමු කරන බවත්, එම යෝජනාවට පෞද්ගලිකව තමන්ද අකමැති බවත් ඔහු කීය. මේ වන විට සමගි ජන බලවේගයට මන්ත්‍රීධුර විශාල ප්‍රමාණයක් තිබීමත්, එජාපයට එක් මන්ත්‍රීධුරයක් පමණක් තිබීමත් නිසා කණ්ඩායම් දෙක අතර සාකච්ඡා කිරීමේදී එක්සත් ජාතික පක්ෂයට කේවල් කිරීමේ බලයක් නොමැති බව ඔහු එයට හේතුව ලෙස කීය.
ඊට අමතරව කරු ජයසූරිය මහතා මහමැතිවරණයේදී සමගි ජන බලවේගයේ අපේක්ෂක එරංග වැලිඅංගේට සහයෝගය ලබා දුන්නේයැයි පක්ෂය අභ්‍යන්තරයෙන් චෝදනාවක් එල්ල වී ඇති බවත්, කරු ජයසූරිය මහතා නායකත්වයට පත් කිරීම පිළිබඳ රවී කරුණානායක ප්‍රමුඛ කණ්ඩායමක් විරුද්ධ වී ඇති බවත් ඔහු වැඩිදුරටත් පැවසීය.■
