මෙවර මහ මැති වරණයේදී දෙමළ ජාතික සන්ධානයට, ආසන 10ක් පමණක් හිමි විය. 2015 අගෝස්තු මහ මැතිවරණයේදී ඔවුන් ලබාගත් ආසන සංඛ්යාව අනුව බලන කල එය ආසන 6කින් අඩු සංඛ්යාවකි.
මේ පසුබෑම ගැන සිතා කාලකණ්ණි සතුටක් ලබන පිරිසක්ද, ටීඑන්ඒට හොඳ වැඬේයැයි ඔච්චම් කරන පිරිසක්ද සිටින බව පෙනේ.
ඇත්ත වශයෙන්ම සිදුවී ඇත්තේ කුමක්ද?
ටීඑන්ඒ යනු දෙමළ ජනතාවගේ අයිතිවාසිකම් පිළිබඳ ප්රශ්නවලට ප්රජාතන්ත්රවාදී ක්රමවේදයක් තුළ පිළිතුරු සොයන්නට බලවත් ලෙස වෙහෙස වුණු වන පක්ෂයකි. හැමදාම ඔවුන්ගේ ඉල්ලීම වුණේ එකකි. ඒ පිළිගත හැකි බලය බෙදීමක් දෙමළ ජනතාවට ලබාදෙන්න යන්නයි. අවසාන වරට, කෝවිඞ් වසංගතය ගැන හිටපු පාර්ලිමේන්තු මන්ත්රීවරුන් කැඳවා අගමැති මහින්ද රාජපක්ෂ පැවැත්වූ සාකච්ඡාවේදීද ටිඑන්ඒ නායක සම්බන්ධන් හා එම්ඒ සුමන්තිරන්, අගමැතිවරයාට බාරදුන් ආයාචනය දක්වාම ඒ ඉල්ලීම ඒ විදියටම තිබේ.
ටීඑන්ඒහි ප්රයත්නය ජනවාර්ගික ගැටලුවට සිංහල ජනතාවටත් දෙමළ ජනතාවටත් පිළිගත හැකි ප්රජාතන්ත්රවාදී විසඳුමක් සොයාගැනීමයි. එහි නායක සම්පන්දන්, ඒ බව යළි යළිත් අවධාරණය කර ඇත්තේ වරක් දෙවරක් නොවේ.
එහෙත්, ටීඑන්ඒ ආණ්ඩු සමග කටයුතු කරන මධ්යස්ථ ආකාරය නොඉවසන, ආන්තික අදහස් දරන පිරිසක්ද ක්රමයෙන් උතුරේ වර්ධනය වන්නට පටන්ගෙන තිබුණු බව පැහැදිලිය. විශේෂයෙන්, ටීඑන්ඒ පක්ෂයෙන් උතුරු පළාත් සභාවට තරග කොට, ටීඑන්ඒ වෙතින් ඉවත්ව තමන්ගේම දැඩි ජාතිකවාදී අලුත් පක්ෂයක් පිහිටුවා ගත් උතුරු හිටපු මහඇමති සීවී විග්නේශ්වරන් ඉන් කෙනෙකි. කලකට ඉහත ඝාතනය වුණු කුමාර් පොන්නම්බලම්ගේ පුත් ගජේන්ද්ර කුමාර් පොන්නම්බලම් තවත් දැඩි මතධාරියෙකි. මේ මහ මැතිවරණයෙන් ඔවුන් දෙදෙනාටම පාර්ලිමේන්තුවට තේරී පත්වන්නට හැකියාව ලැබී තිබේ.
මෙතෙක් කල්, උතුරේ සටන් කළ මේ දෙදෙනාට දැන් පාර්ලිමේන්තුව තුළ සටන් කිරීමට හැකියාව ලැබී ඇතත්, ඔවුන් ඉන්නේ ටීඑන්ඒට වඩා ආන්තික ස්ථාවරයක, ටීඑන්ඒහි මධ්යස්ථ ප්රවේශය ප්රතික්ෂෙප කරන ස්ථාවරයක බව පැහැදිලිය.
කෙටියෙන් කිවහොත් දැන් සිදුවී තිබෙන්නේ කුමක්ද? දෙමළ ජනතාව තමන්ගේ මධ්යස්ථ මතධාරී නියෝජිතයන් වෙනුවට දැඩි මතධාරීන් පාර්ලිමේන්තුවට එවන්නට පටන් ගෙන තිබීමයි. එය ටීඑන්ඒ දෙස බලා, හොඳ වැඬේ යැයි ළාමක සතුටක් ලබන්නට සුදුසු දෙයක්ද? නැතිනම්, දෙමළ ජනතාව අතරින් මධ්යස්ථ මතධාරීන් ක්රමයෙන් විතැන්ව දැඩි අදහස් දරන්නන්ට ඉඩක් ලැබීමේ තත්වය ගැන ගැඹුරින් සලකා බැලිය යුතුද?
ටීඑන්ඒ කිසියම් පසුබෑමක සිටින බව සැබෑය. ඒ පසුබෑම දිගින් දිගටම රටේ ආණ්ඩුව විසින් (යහපාලනයද ඇතුළුව) දෙමළ ජනතාව නොසලකා හැරීම නිසා නිර්මාණය වූවකි. එහෙත්, තවමත් දෙමළ ජනතාවගේ ප්රධාන නියෝජිතයා ටීඑන්ඒ ය.
‘දෙමළ මිනිසුන්ගේ ප්රශ්නවලට පිළිතුරු නොසපයා ටීඑන්ඒ නායකයන් කොළඹට වෙලා සුරසැප වින්ද නිසා දෙමළ ජනතාව ඔවුන් ප්රතික්ෂෙප කරලා’ යනුවෙන් නැගෙනහිර ආණ්ඩුකාරවරිය ටීඑන්ඒ ගැන පසුගියදා මාධ්ය වෙත අදහස් දක්වා තිබිණ. ටීඑන්ඒහි කොළඹ සිටින නායකයන් විඳින සුරසැප ගැන ඔවුන් වසන අතිශය සාමාන්ය නිවෙස්වලට එක් වරක් හෝ ගිය අය දනිති. ඒ වාගේම දෙමළ ජනතාව වෙනුවෙන් මහපොළවේ ඔවුන් කරමින් සිටින දේත් බොහෝ අය දනිති. ඒ ඇත්ත ආණ්ඩුකාරවරියකගේ අදූරදර්ශී කතාවලින් වසන්නට බැරිය.
එහෙත් ටීඑන්ඒ වෙනුවට පාර්ලිමේන්තුවට පැමිණ සිටින විග්නේශ්වරන්, මහ ඇමතිවරයාව සිටි කාලයේදී කළ කී දේ ගැන විවේචනයක් තිබුණේ කාටද? ආණ්ඩුකාරවරියද ඇතුළත් වන සිංහල ස්වෝත්තමවාදීන්ටමය. ඒ අයගේම ක්රියාකාරිත්වයට පින්සිද්ද වෙන්නට, අද, උතුරේ දෙමළ ජනතාව, මධ්යස්ථ නියෝජිතයන්ගේ ආසන සංඛ්යාව අඩුකොට, දැඩි අදහස් දරන්නන් පාර්ලිමේන්තුවේදී හමුවන්නට එවා තිබේ.
ඉතිහාසය ප්රති නිර්මාණය වෙමින් තිබේද? අවුරුදු තිහක යුද්ධයකට පැටලෙන්නට සිදුවුණේ, දෙමළ ජනතාවගේ දුක් ගැනවිලි සාමකාමීව විසඳා ගන්නට තිබුණු හැම අවස්ථාවක්ම නොසලකා හැරීම නිසා, සාමකාමී දෙමළ නායකයන් ප්රතික්ෂෙප කරනසුලු දේශපාලනයක් උතුරෙන්ම පැනනැගීම නිසා නොවේද?■
