හැමෝම අන්දමන්ද වී..

ආණ්ඩුවටත් පුදුමයි

ශ්‍රී ලංකා පොදුජන පෙරමුණට මහා මැතිවරණයෙන් තුනෙන් දෙකේ බලයක් ලැබී නැතත්, එම පෙරමුණට සහයෝගය දක්වන අනෙකුත් පක්ෂවලට ලැබී ඇති ආසන සංඛ්‍යාවත් එකතු වූ කළ තුනෙන් දෙකක බලයක් පොදුජන පෙරමුණ ප්‍රමුඛ ආණ්ඩුවට ලැබී හමාරය. පොදුජන පෙරමුණට ආසන 145ක්, ඩග්ලස් දේවානන්දා මහතාගේ ඊපීඩීපීයට ආසන 2ක්, පිල්ලෙයාන්ගේ ටීඑම්වීපීයට ආසන 2ක්, අතාවුල්ලා මහතාගේ නායකත්වයෙන් යුත් ජාතික කොංග්‍රසයට ආසනයක් වශයෙන් ලැබී ඇති අතර ශ්‍රීලනිපය නියෝජනය කරමින් යාපනය දිස්ත්‍රික්කයෙන් ඉදිරිපත් වූ අංගජන් රාමනාදන් තේරී පත්වී ඇත. ඊටත් අමතරව රතන හිමි හා ගලගොඩඅත්තේ ඥාණසාර හිමි නියෝජනය කරන අපේ ජනබල පක්ෂයට ජාතික ලැයිස්තුවෙන් මන්ත්‍රීධුරයක් හිමිය. ඒ අනුව ආණ්ඩුව ඉල්ලා සිටි තුනෙන් දෙකක බලය ලැබී ඇත.

‘ශ්‍රී ලංකා පොදුජන පෙරමුණ තවත් විශිෂ්ට විජයග්‍රහණයක් අභියස සිටින බව 2020 මහා මැතිවරණයේ මේ වන විට නිකුත් වී ඇති නිල ඡන්ද ප්‍රතිඵලවලින් තහවුරු වෙයි. මේ රටේ සාතිශය බහුතර දේශප්‍රේමී ජනතාව රට වෙනුවෙන් නිවැරදි තීන්දුවක් ලබා දී තිබේ. හෙට දින බලාපොරොත්තුවේ උදා අරුණලු අපේ මාතෘභූමිය මත පතිත වනු ඇත්තේ එම විජයග්‍රහණයේ ප්‍රභාතය ද සමග බව සක්සුදක් සේ පැහැදිලිය.’ මේ ජාතික මට්ටමේ මැතිවරණ ප්‍රතිඵල අනුව ශ්‍රී ලංකා පොදුජන පෙරමුණ ජයගැනීමෙන් පසු මහින්ද රාජපක්ෂ මහතාගේ නිල ෆේස්බුක් පිටුවේ තැබූ සටහනකි.

‘මේ වනවිට ප්‍රකාශිත නිල ඡන්ද ප්‍රතිඵල අනුව ශ්‍රී ලංකා පොදුජන පෙරමුණ විශිෂ්ඨ ජයග්‍රහණයක් ලබාගන ඇත. සෞභාග්‍යයේ දැක්ම ප්‍රතිපත්ති ප්‍රකාශනය බලගැන්වීමට අවශ්‍ය පාර්ලිමේන්තුවක් සෑදීමේ බලාපොරොත්තුව හෙට දිනයේ සාක්ෂාත් කරගත හැකි බව මාගේ විශ්වාසයයි.’ ගෝඨාභය රාජපක්ෂගේ ෆේස්බුක් පිටුවේ එසේ තිබුණි.

ශ්‍රී ලංකා පොදුජන පෙරමුණ හා එම පක්ෂය සමඟ කටයුතු කරන පක්ෂවලට මෙතරම් දැවැන්ත ජයක් ලැබීම ගැන ශ්‍රී ලංකා පොදුජන පෙරමුණේ නායකයන් සතුටින් මෙන්ම පුදුමයටත් පත්ව සිටී. මැතිවරණයට පෙර පක්ෂ අභ්‍යන්තරයේ සිදුකළ සමීක්ෂණවලින් මැතිවරණ ජයක් ලැබෙන බව පැහැදිලි වුණත්, මෙතරම් විශාල ආසන ප්‍රමාණයක් ලැබෙනු ඇතැයි අනුමාන කළේ නැත.

ලැබුණු ඡන්ද ප්‍රතිඵලය ගැන රාජපක්ෂ පවුලේ සාමාජිකයන් ඉතා සතුටින් සිටින බව අනිද්දා හා අදහස් දැක්වූ බලවතෙකු කීය.

ශ්‍රී ලංකා පොදුජන පෙරමුණේ ජාතික සංවිධායක (පොදුජන පෙරමුණේ සාමාජිකයන්ගේ භාෂාවෙන් කීවොත් නිර්මාතෘ) බැසිල් රාජපක්ෂට ප්‍රතිඵල ලැබෙන අතර සුභපැතුම් පණිවුඩ රැසක් ලැබී ඇත. බොහෝ අය සිහිපත් කර තිබුණේ ඡන්දයට පෙර බැසිල් රාජපක්ෂ මැතිවරණ ප්‍රතිඵලය ගැන අනුමානයක් කර තිබුණු නමුත් මේ තරම් ඉහළ ප්‍රතිඵලයක් ඔහු අනුමාන කර තිබුණේ නැති බවය.

‘මමත් බයෙන් තමයි ඡන්දෙට කලින් 130ක් ලැබෙන බව කීවේ. දිනනවා කියලා දැනගෙන හිටියා ඊට වඩා ලැබෙනවා කීවොත් විහිළුවක් කියලා හිතයි. ඒ නිසයි 130ක් කීවේ.’ බැසිල් රාජපක්ෂ එලෙස කතාකළ අයට එසේ කියා තිබුණි.

ඡන්දයේදී පොදුජන පෙරමුණේ උපක්‍රමය වී තිබුණේ තම පක්ෂයට ලැබෙන බවට විශ්වාස කළ හැකි සෑම ඡන්දයක්ම පාවිච්චි කරන තැනට වගබලාගැනීම බව අනිද්දා සමඟ අදහස් දැක්වූ ආණ්ඩුවේ ඉහළ නායකයෙකු කීය. ඒ සඳහා තම පක්ෂයේ ග්‍රාමීය මට්ටමේ පාක්ෂිකයන් වෑන්, බස් ආදී වාහන යොදවා ඡන්දපොළට රැගෙන යෑමට ඔවුන් කටයුතු කර තිබුණි.

සියල්ලට වඩා ඔවුන් පුදුමයට හා සතුටට පත්ව සිටියේ උතුරු-නැගෙනහිර පළාත්වල දෙමළ ජනතාවගේ ඡන්ද වැඩිපුර ලැබීම ගැනය. ඇතැම් ප්‍රදේශවල දෙමළ ජනතාව අතර මුස්ලිම් විරෝධයක් යම් දුරකට ඇත. එම විරෝධයත්, ආණ්ඩුව මුස්ලිම් ජනතාව කෙරෙහි දක්වන බව පෙනෙන ආකල්පයත් ඔවුන්ට වැඩිපුර ඡන්ද ලැබීමට එක හේතුවක් බව ආණ්ඩුවේ නායකයන්ගේ අදහසය.

එහෙත් බැසිල් රාජපක්ෂ අමතා සුබපැතූ අයට ජයග්‍රහණය ගැන විස්තර කරමින්, මේ ජයග්‍රහණයේ වැඩි ගෞරවය දී ඇත්තේ වත්මන් විපක්ෂයටය. එනම්, හිටපු ආණ්ඩුවටය. ‘ඔවුන් ආණ්ඩුවේ හිටපු කාලයේ කරපු දේවල්වල ජනප්‍රියත්වය නැති කරගත්තා.’ බැසිල් රාජපක්ෂගෙන් ප්‍රතිඵලය ගැන විමසූ කෙනෙකුට ඔහු කියා ඇත්තේ එලෙසය.

‘චොකා මල්ලි’ දෙක, වාසු හය

පසුගිය සතියේ මහාධිකරණයෙන් මරණ දඬුවම ලැබුණු ප්‍රේමලාල් ජයසේකර හෙවත් ‘චොකා මල්ලි’ මෙවර මැතිවරණයේදී රත්නපුර දිස්ත්‍රික් පොදුජන පෙරමුණු මනාප ලැයිස්තුවේ දෙවැනි ස්ථානයට පත් වී ඇත. එම දිස්ත්‍රික්කයේ පළමු ස්ථානයට පවිත්‍රා වන්නිආරච්චි පැමිණ ඇත.

එහෙත් රත්නපුර දිස්ත්‍රික්කයේ පළමු ස්ථානයට තරඟ කළ තවත් දේශපාලනඥයෙකු වූයේ වාසුදේව නානායක්කාරය. ඔහු දිස්ත්‍රික්කයේ දෙමළ ජනතාවගේ ඡන්ද ඉලක්ක කරමින් දෙමළ භාෂාවෙන් පවා ප්‍රචාරක ව්‍යාපාරයේ නියැලී තිබුණි. ඊට අමතරව ප්‍රේමලාල් ජයසේකරට හිතවත් ඡන්දදායකයන්ගේ සහයෝගය ලැබීම පිණිස, ප්‍රේමලාල් ජයසේකරට ඡන්දය දෙන ලෙස විශේෂ ප්‍රකාශයක්ද කර තිබුණි.

අගෝස්තු 06 වැනිදා රාත්‍රියේ මනාප ගණන් කරන මුල් අවස්ථාවේ වාසුදේව නානායක්කාර සිටියේ තුන්වැනි තැනය. ඔහු බියෙන් සිටියේ සිව්වැනි තැනට වැටේවි කියාය. ‘තරඟ කළේ පළවැනියා වෙන්න. දැන් හතර නොවුණොත් ඇති.’ තමන්ගේ හිතමිත්‍රයෙක් සමඟ වාසුදේව නානායක්කාර මහතා කියා තිබුණේ එලෙසය. රාත්‍රියේ වෙහෙසකර නිසා, ඔහු නින්දට ගොස් තිබුණි.

එහෙත් ඔහු පාන්දර දැක ඇත්තේ තමන් තුන්වැනි තැන නොව, හයවැනි තැනට වැටී ඇති බවය.

ශ්‍රීලනිප ගොඩ

මෙවර මැතිවරණයේදී ශ්‍රීලනිපයට සැලකිය යුතු ආසන සංඛ්‍යාවක් ලැබී ඇත. ශ්‍රීලනිප පරාජය කළ යුතු බවට ප්‍රචාරක ව්‍යාපාරයක් ගෙනගියද මෛත්‍රීපාල සිරිසේන, නිමල් සිරිපාල ද සිල්වා, දයාසිරි ජයසේකර, දුමින්ද දිසානායක, මහින්ද අමරවීර, රංජිත් සියඹලාපිටිය, ශාන්ත බණ්ඩාර, චාමර සම්පත් දසනායක වැනි ශ්‍රීලනිප අපේක්ෂකයන් ගණනාවක් මැතිවරණය ජයගෙන ඇත. ඒ අතර පොළොන්නරුව හා බදුල්ල දිස්ත්‍රික්කවල පළමු ස්ථානයට ශ්‍රීලනිප අපේක්ෂකයන් වන මෛත්‍රීපාල සිරිසේන හා නිමල් සිරිපාල ද සිල්වා පැමිණ ඇත.

ශ්‍රීලනිප මන්ත්‍රීවරුන් ආණ්ඩුවේ ආණ්ඩුක්‍රම ව්‍යවස්ථා සංශෝධන ආදියට නිහඬ සහයෝගයක් ලබාදෙන නමුත්, එදිනෙදා පාර්ලිමේන්තුවේදී වෙනම කණ්ඩායමක් ලෙස කටයුතු කරන්නට බලාපොරොත්තු වන බව ශ්‍රීලනිප නායකයෙකු කී කතාවය. විශේෂයෙන් දයාසිරි ජයසේකර පාර්ලිමේන්තුවේදී ආණ්ඩුව ප්‍රශ්න කරමින්, විපක්ෂ මන්ත්‍රීවරයෙකුගේ චරිතයටත් යම් දුරකට පණ පෙවීමට බලාපොරොත්තු වෙයි. තමන්ගේම ස්වාධීන අනන්‍යතාවක් ගොඩනඟාගැනීම දයාසිරිගේ බලාපොරොත්තුවය. තේරී පත්වූ අපේක්ෂකයන්ට නැවත ශ්‍රීලනිප ශක්තිමත් කිරීමේ වුවමනාවක් තිබේනම්, ඊට හැකියාව ඇත. එයට කොන්දක් තිබිය යුතුය. ස්වාධීන අනන්‍යතාවක් නැතිව ශ්‍රීලනිපයට ගමනක් නැත.

යහ-ජාතිකත්වයට වෙච්ච දේ

ජවිපෙ හා එජාප මහා මැතිවරණයේදී නොසිතූ පරාජයන් ලැබූ බව ඇත්තය. එහෙත් මහා මැතිවරණයෙන් දැවැන්තම පරාජයක් ලැබූ තවත් කණ්ඩායමක් වුණේ ප්‍රධාන විපක්ෂය ලෙස පෙනී සිටි සමගි ජන බලවේගයය. ආණ්ඩු හදන බව කී ඔවුන්ට, ආණ්ඩුවට අභියෝගයක් විය හැකි මට්ටමේ මන්ත්‍රීධුර සංඛ්‍යාවක් ලබාගන්නටත් නොහැකි වූ බව සැඟවිය යුතු නැත. එක්සත් ජාතික පක්ෂයෙන් වෙන්ව ඔවුන් වෙනම ඉල්ලුවේ මන්ත්‍රීධුර සංඛ්‍යාවක් ගන්නට නොවේ.

සමගි ජන බලවේගය ජයගත්තේ ත්‍රිකුණාමල දිස්ත්‍රික්කය පමණි. ඒ එම දිස්ත්‍රික්කයට ශ්‍රී ලංකා මුස්ලිම් කොංග්‍රසය, රිෂාද් බදියුදීන් මහතාගේ පක්ෂය සමඟ එක්ව සමගි ජන බලවේගය තරඟ කළ නිසාය.

අඩු තරමේ සජිත් ප්‍රේමදාස ඉදිරිපත් වූ කොළඹ දිස්ත්‍රික්කයෙන්වත් සැලකිය යුතු ජයග්‍රහණයක් තබා ගෞරවණීය පරාජයක්වත් ලබාගැනීමට ඔවුන්ට නොහැකි විය. හිරුණිකා ප්‍රේමචන්ද්‍ර, සුජීව සේනසිංහ වැනි අපේක්ෂකයන් කොළඹ දිස්ත්‍රික්කයෙන් ඉල්ලා පරාජය විය.

‘ප්‍රජාතන්ත්‍රවාදී සෞභාග්‍ය සම්පන්න රටක් උදෙසා නොබියව සමගි ජන බලවේගයට ඡන්දය ප්‍රකාශ කළ ශ්‍රී ලංකාවාසී ඔබ සැමට ස්තුතියි.’ යනුවෙන් සමගි ජන බලවේගයේ නායක සජිත් ප්‍රේමදාස සමාජ මාධ්‍යවල සටහහනක් තබා තිබුණි. එහි ඇති ‘සෞභාග්‍ය’ යන වචනය මේ වනවිට ගෝඨාභය රාජපක්ෂ ඉදිරිපත් කර ඇති ‘සෞභාග්‍යමත් රටක්’ යන තේමා පාඨයට ගැලපෙන එකක් වීම සමගි ජන බලවේගයේම ඇතැම් අයගේ විවේචනයට ලක් වී තිබුණි.

පොදුජන පෙරමුණට හෝ ගෝඨාභය රාජපක්ෂට වෙනස් තමන්ගේම අනන්‍යතාවක් ගොඩනඟගාන්නට නොහැකි වීම සජිත් ප්‍රේමදාසගේ පරාජයට හේතු වූ බව පක්ෂයේ කේන්තියෙන් සිටින ඇතැම් පරාජිත අපේක්ෂකයන්ගේ අදහසය. ගෝඨාභය රාජපක්ෂලාගේම සංකල්ප, ඔවුන්ගේම මතවාද වෙනස් ආකාරයකට පුනරුච්ඡාරණය කිරීමෙන් ඡන්ද ජයගත නොහැකි බව ඔවුන් පවසයි. ‘යහ-ජාතිකත්වය’ වැනි සංකල්ප නොව, ආණ්ඩුවේ කේන්ද්‍රයට වදින ආකාරයේ අභියෝගයක් ඉදිරියේදීවත් එල්ලකළ යුතු බව ඔවුන්ගේ අදහසය.

මෙවැනි දියාරු වචන සජිත්ලා කීවේ ‘සිංහල-බෞද්ධ’ ඡන්ද කෝටාවෙන් කෑලි කඩාගන්නටය. එහෙත් මහනුවර, කොළඹ ආදී දිස්ත්‍රික්කවල ප්‍රතිඵලවලින් පෙනෙන ආකාරයට අන්තිමේ සිදුව ඇත්තේ ආණ්ඩුවේ ‘සිංහල-බෞද්ධ’ ලේබලයෙන් යුත් ක්‍රියාකලාපයට විවේචනයකුත් නැති නිසා ඒ මතවාදය තව තවත් ශක්තිමත් වීමය. අන්තිමේ ඉතිරිවී ඇත්තේ දෙමළ හා මුස්ලිම් ඡන්ද පමණි. සියළු ඡන්ද සෝදාගෙන ආණ්ඩුවටම ලැබීමය. මේ අදහස් පරාජය වූ අපේක්ෂකයන්ගේ අදහස්ය.

ජවිපෙ වේදනාවෙන්

මෙවර මැතිවරණයේදී පසුගිය මැතිවරණයේදී ලැබුණු ආසන ප්‍රමාණයවත් ලබාගැනීමට ජවිපෙ අසමත් විය. මෙවර ලැබුණේ ආසන තුනක් පමණි.

එහෙත්, ඔවුන් දිස්ත්‍රික්ක කිහිපයකම මන්ත්‍රීධුරයක් ලබාගැනීමේ ආසන්නයට පැමිණ තිබුණි. උදාහරණයක් ලෙස සුනිල් හඳුන්නෙත්තට තවත් ඡන්ද තුන්සීයක් තිබුණානම් මාතරින් ජයගැනීමට හැකියාව තිබුණි. මොණරාගල හා අනුරාධපුර දිස්ත්‍රික්කවල සීයට පහක ප්‍රතිශතය ආසන්නයටම පැමිණ තිබුණි. එම දිස්ත්‍රික්කවල තවත් ඡන්ද සුළු ප්‍රමාණයක් ලැබුණානම් ආසනයක් ලැබෙන්නට ඉඩ තිබුණි. කළුතර, හම්බන්තොට හා මාතර සීයට පහ ඉක්මවා ඡන්ද තිබුණත් ආසනයක් ලබාගැනීමට අසමත් විය.

අගෝස්තු 06 වැනිදා උදේ වරුවේ පවා ඔවුන් සිටියේ කොළඹ, හම්බන්තොට, ගම්පහ, මාතර, කළුතර, අනුරාධපුර හා කුරුණෑගල දිස්ත්‍රික්කවල ජයග්‍රහණ ගැන ස්ථීර විශ්වාසයෙනි. ඒ දිස්ත්‍රික් හතේ කොහොමත් එන බවත් බදුල්ලෙන්, මොණරාගලින් හා කොළඹ දිස්ත්‍රික්කයේ තවත් මන්ත්‍රීධුරයක් ලැබුණානම් හොඳ බව ඔවුන්ගේ අදහස විය. ජාතික ලැයිස්තු මන්ත්‍රීධුර දෙකකුත් ලැබී පාර්ලිමේන්තු මන්ත්‍රීවරුන් 12 දෙනෙකුගෙන් සමන්විත බලඇණියක් ගොඩනැගීම ඔවුන්ගේ බලාපොරොත්තුව විය.

‘අන්ත පරාජයක් ලැබුණානම් දුක නෑ. මෙච්චර ළඟට ඇවිල්ලත් මගහැරුණ එක ගැනයි දුක.’ තම හිතමිතුරු නීතිඥවරයෙක්ව එම නීතිඥවරයාගේ නිවසේදී මුණගැසුණු ජවිපෙ නායක අනුර කුමාර දිසානායක හා නීතිඥයා අතර කතාබහේදී එම අදහස පළ වී තිබුණි.

පරාජය වූ අය පාර්ලිමේන්තුවට ගෙනෙන්නේ නැති බව ජවිපෙ නායක අනුර කුමාර දිසානායක මීට පෙර කියා තිබුණි. ඒ අනුව කොළඹින් ජයගත් අනුර කුමාර දිසානායනක, ගම්පහින් ජයගත් විජිත හේරත් හා ජාතික ලැයිස්තුවේ ඉහළින්ම නම ඇති බිමල් රත්නායක පාර්ලිමේන්තුවට යැවීමට ඔවුන් බලාපොරොත්තු වේ.

රනිල්

ජාතික ලැයිස්තුවට

එක්සත් ජාතික පක්ෂය තමන්ට ලැබුණු ප්‍රතිඵලය ගැන වික්ෂිප්තව සිටී. එක්සත් ජාතික පක්ෂය මෙතරම් දැවැන්ත පරාජයක් ලබනු ඇතැයි කිසිවෙක් අනුමාන කළේ නැත. ආසන්න වශයෙන් මන්ත්‍රීධුර දහයක් පමණ රැගෙන නැවත ක්‍රමයෙන් නැගිටීමට හැකි පසුබිමක් නිර්මාණය වනු ඇතැයි ඔවුන් ගණන් හදා තිබුණි. එහෙත් එම ගණන් හැදීම් සුණුවිසුණු කරමින්, මනාපවලින් එකම ආසනයක්වත් නොලැබෙන තැනට ඔවුන් පත්විය.

‘සම්පූර්ණ ජාතිවාදය මත පදනම් වූ ඡන්දයක්.’ ප්‍රතිඵල ලැබීමෙන් පසු නායකයන් අතර ඇතිවූ සාකච්ඡාවකදී එවැනි අදහසක් මතු වී තිබේ. එහෙත් නායකයන් ස්වයං විවේචනාත්මකව කියා ඇත්තේ ආණ්ඩුවේ ජාතිවාදී, මිලිටරිවාදී හා අධිකාරිවාදී ප්‍රවණතාවලට ඍජු ප්‍රතිචාර දැක්වුවානම් එජාපයට මීට වඩා වැඩි අවස්ථාවක් තිබුණු බවය. ඒ වෙනුවට ආර්ථිකය සංවර්ධනය කිරීමේ ‘මැජික් එක’ රනිල් වික්‍රමසිංහ සතු බව පෙන්වමින් මැතිවරණය කිරීමට එක්සත් ජාතික පක්ෂය උත්සාහ කළේය.

‘සමගි ජන බලවේගය සහ ජාතික ජන බලවේගය කියන කණ්ඩායම් දෙකම ජාතිවාදය ගැනත්, මිලිටරිවාදය ගැනත් කෙළින් කතාකළේ නෑ. අපට තමයි ඒ හැකියාව තිබුණේ.’ එක්සත් ජාතික පක්ෂයේ ජාතික ලැයිස්තුවේ සිටි එක් අපේක්ෂකයෙකු කීවේ එසේය.

‘දැන් යෝජනා වෙලා තියෙන්නේ රනිල් වික්‍රමසිංහ ජාතික ලැයිස්තුවෙන් පාර්ලිමේන්තුවට යවන්න ඕනෑ කියලයි. එහෙත් අපි එකතුවෙලා කරන දේ තීරණය කරන්න ඕනෑ. කොහොමත් දැන් සමගි ජන බලවේගය එක්ක එකතුවෙන්න බෑ.’ එක් නායකයෙකු එසේ කීය.■

■ දේශපාලන වාර්තාකරු