මුස්ලිම් කොංග්‍රසය ඉදිරියේදී කරන්නට බලාපොරොත්තු වෙන්නේ කුමක්ද?
මුලින් කියන්න ඕනෑ, මැතිවරණය සාමකාමී බව. විශේෂයෙන්ම මේ වතාවේ උතුරු නැගෙනහිර පැතිවල සෑහෙන සාමකාමී මැතිවරණයක් පැවතුණා. මැතිවරණ කොමිසම සෑහෙන්න වෙහෙස මහන්සිවෙලා, මැතිවරණ වෙනුවෙන් විශාල මුදලක් වියදම් කරලා මැතිවරණය සාර්ථකව පැවැත්වුවා. අපි ඒ පිළිබඳව මැතිවරණ කොමිසමට ප්‍රසංශා කළ යුතුයි. ඒ තමයි ස්වාධීන කොමිෂන් සභාවල යහපත් තත්වය. ජනතාවත් මැතිවරණය පිළිබඳව හොඳ ප්‍රතිචාරයක් දැක්වුවා. මුස්ලිම් කොංග්‍රසය වෙනුවන් යම් ආසන සංඛාවක් ලැබිලා තියෙනවා. ආණ්ඩුව පිහිටුවීම සම්බන්ධයෙන් මතුවෙන ගැටලුවලදී පක්ෂයක් හැටියට අපි තීන්දුවක් ගත යුතුයි. ඊට අමතරව අපේ ප්‍රධානම වගකීම තමයි පාස්කු ඉරිදා ත්‍රස්ත ප්‍රහාරයෙන් පසුව මුස්ලිම් ජනතාවට සිදුවුණු නොයෙකුත් අකරතැබ්බවලට සහ ඔවුන්ගේ ආරක්ෂාව සම්බන්ධයෙන් නොයෙකුත් ප්‍රශ්නවලට මුහුණ දෙන්න සිදුවීම. ඒ වගේම පවතින ආණ්ඩුවේ පුද්ගලයන් පිරිසක් මුස්ලිම් සමාජයට විරුද්ධව තදබල ලෙස වැරදි චෝදනා එල්ල කළා. මුස්ලිම් ජනතාව පිළිබඳව වැරදි මතයක් සමාජයේ පතුරුවා හරින්න උත්සහ කළා. අපි බලාපොරොත්තු වෙන්නේ රටේ මුස්ලිම් ජනතාව පිළිබඳව රටේ ව්‍යාප්ත කරලා තියෙන වැරදි අවබෝධය නැතිකර දැමීමට මැදිහත් වී කටයුතු කිරීම. ඒ වෙනුවෙන්, වැරදි තොරතුරු සහ වැරදි අදහස් වෙනුවට සත්‍යය සමාජගත කිරීම තමයි අපේ මූලික යුතුකම විදියට අපි සලකන්නේ. අපට වැරදි තොරතුරුවලට එරෙහිව සටනක් කරන්න සිද්ධවෙලා තියෙනවා. පාර්ලිමේන්තුවේදී එය කරන්න හැකිවෙනු ඇතැයි බලාපොරොත්තු වෙනවා.
වත්මන් ආණ්ඩුව සමඟ එකතු වීමට බලාපොරොත්තුවක් තිබෙනවාද?
අපිට රටේ ජනතාවගේ තීරණයට ගරු කරන්න වෙනවා. ආණ්ඩුවට දැන් වැඩකටයුතු කරන්න පුළුවන්. යම් කිසි අවස්ථාවක ජාතික ආණ්ඩුවක් හදන්න අපට ආරාධනාවක් කළොත් අපි ඒ ගැන සිතා බලනවා. අපේ ප්‍රධාන අරමුණ තමයි ඕනෑම ආණ්ඩුවකට සහය දීම. ඒ නිසා අපිට දැන්ම ඒ ගැන මතයක් ප්‍රකාශ කරන්න බැහැ. එකතුවීමට ඉල්ලීමක් ආවොත්, අපි ඒ ගැන සලකා බලනවා.
ප්‍රකාශිත ඡන්ද ප්‍රතිශතය පිළිබඳව ඔබේ මතය කුමක්ද?
සියලුම මහා මැතිවරණවලදී සාමාන්‍යයෙන් 70% ක් වගේ ප්‍රමාණයක් තමයි ඡන්දය ප්‍රකාශ කරන්නේ. අනෙක් එක කොවිඞ් 19 වසංගතය හමුවේ රටේ ජනතාව මේ ආකාරයෙන් ඡන්දය ප්‍රකාශ කිරීම පිළිබඳව අපි සතුටුවිය යුතුයි. උතුරු නැගෙනහිර ජනතාව අතර මේ පාර්ලිමේන්තු මැතිවරණය සදහා ඡන්දය ප්‍රකාශ කිරීමට පුදුම උද්යෝගයක් තිබුණා. මෙවර විවිධ මතවාද තිබෙන පක්ෂ ගණනාවක් තරඟ කරන්න ඉදිරිපත් වෙලා තිබුණා. විවිධාකාර පක්ෂවලට නියෝජනයක් ලැබුණා. එතෙක් පැවති මැතිවරණ සිතියම වෙනස්වෙන තත්වයක් තිබුණා. අවුරුදු ගාණක් එක පක්ෂයක් පමණක් මත ඡන්දය ප්‍රකාශ කළ ජනතාවට මෙම මැතිවරණයේදී තෝරාගැනීම් වැඩිපුර තිබුණා. ඡන්ද ප්‍රතිශතයක් වැඩිවෙන්න ඒ කාරණය බලපාන්න ඇති කියලයි අපේ අදහස. උතුරු නැගෙනහිර ජනතාවගෙන් 75% ක් පමණ ඡන්දය ප්‍රකාශ කරලා ඇති බවයි අපේ නිරීක්ෂණය. ඉස්සර තිබුණේ පැවති තනි පක්ෂය හෝ දෙක තමන්ගේ මතවාදයට ගැළපෙනවා නම් ඡන්දය දීම හා, නොගැළපේනම් ඡන්දය නොදීම. අවාසනාවට බදුල්ල දිස්ත්‍රික්කයේ පැවති කාලගුණය ඡන්දය ප්‍රකාශ කිරීමට බාධාවක් වුණා. සති ගාණකට කලින් ජනතාව තුළ මැතිවරණ පිළිබඳව අප්‍රසාදයක් තිබුණත් මැතිවරණ ක්‍රියාවලිය පිළිබඳ ජනතාවට දැක්මක් තිබෙන බව පෙනුණා. තමන් සතු ඡන්ද අයිතිය පිළිබඳ අවබෝධයක් තිබුණු බව පෙනුණා. එහෙත් ඔවුන් ඒ ප්‍රජාතන්ත්‍රවාදී දැක්ම හරියාකාරව පාවිච්චි කර තිබෙනවාද කියා මම දන්නේ නැහැ.
රාජපක්ෂ ආණ්ඩුව 19 වැනි ව්‍යවස්ථා සංශෝධනය වෙනස් කර නව ව්‍යවස්ථාවක් ගෙන එන බව පවසනවා, ඔබ එයට සහයෝගය දෙනවාද?
මුලින්ම අපි කියන්නේ, රාජපක්ෂ ආණ්ඩුවට තුනෙන් දෙකක බලයක් ලබා ගන්න පුළුවන් වේවි යැයි අපි හිතුවේ නැහැ. එහෙත් මේ වනවිට ඊට ආසන්න ආසන ප්‍රමාණයක් ඔවුන්ට ලැබී තිබෙනවා.
ඔවුන් ව්‍යවස්ථා සංශෝධනයක් ඉදිරිපත් කොට, ඊට විපක්ෂයේ මන්ත්‍රීවරුන් කිහිපදෙනෙකුගෙන් ඡන්ද කිහිපයක් බලාපොරොත්තු වේවි..
19 වැනි සංශෝධනය අයින් කරනවා කියලයි ඔවුන් බලය ඉල්ලුවේ. ඔවුන් මේ විදියට බලය ඉල්ලුවේ, 19 වැනි සංශෝධනයේ මොනවා ඉවත් කරන්නද කියලා අපිට ප්‍රශ්නයක් මතුවෙලා තියෙනවා. 19 වෙනි සංශෝධනයෙන් යම් තරම් දුරට ස්ථාපිත කරගත් නීතිය පාලනය, විධායකය සහ ව්‍යවස්ථාදායකය තුළ කිබෙන සමතුලිතභාවය ඉවත් කරන්න අපි කවදාවත් ඉඩදෙන්නේ නැහැ. මුස්ලිම් කොංග්‍රසය සංඛ්‍යාවෙන් කුඩා පක්ෂයක් වුණත් මට වගකීමෙන් කියන්න පුළුවන් පක්ෂයේ ලේකම් හැටියට පක්ෂයේ නායකත්වය සහ අපේ පක්ෂයේ සාමාජිකයන් ආණ්ඩුක්‍රම ව්‍යවස්ථාව ගැන පැහැදිලි අදහසක ඉන්න බව. රටේ බලය නැවත විධායකයට කේන්ද්‍රගත කරගන්න අපේ කණ්ඩායම ඉඩ දෙන්නේ නැති බව විශ්වාසයි. එහෙම නැතිව යම් පවුලක අනාගත දේශපාලනය වෙනුවෙන් රටේ ව්‍යවස්ථාව හදාගැනීමට සුදානම් වෙනවා නම් අපි කිසිම ආකාරයකින් ඒ පුද්ගලයන්ට සහයෝගය ලබා දෙන්නේ නැහැ. හැබැයි යම් කිසි විදියකින් නීතීයේ පාලනය ස්ථාපිත කරගන්න ව්‍යවස්ථා සංශෝධනයක් ගෙන එනවා නම් හෝ 19 වෙනි සංශෝධනයේ තිබුණු ප්‍රධාන දුර්වලකම් සකස්කරන්න අපගේ සහයෝගය ඉල්ලුවහොත් අපි අනිවාර්යයෙන්ම ඒ සඳහා සහයෝගය ලබා දෙනවා. එහෙම නැතිව අයියලා මල්ලිලාගේ ප්‍රශ්න විසඳගන්න අපි සහයෝගය දෙන්නේ නැහැ.
නව සංශෝධන සම්මත වුණොත් ආණ්ඩුක්‍රම ව්‍යවස්ථා සභාව හා ස්වාධීන කොමිෂන් සභා නැති වීමට විශාල ඉඩකඩක් තිබෙනවා නේද?
දැනට පවතින ස්වාධීන කොමිෂන් සභාවලට පත් කර ඇති පුද්ගලයන්ගේ සේවා කාලය අවසන් වී තිබෙනවා. ඔවුන් සේවය අවසන් කළ පමණින් ස්වාධීන කොමිෂන් සභා අහෝසි වෙන්නේ නැහැ. ව්‍යවස්ථා සංශෝධනයකින් එය වෙනස් කරනවා නම්, එයට අප එරෙහි වුණත් එය වෙනම තත්වයක්. එහෙත් ව්‍යවස්ථාවේ සංශෝධනයක් සිදු නොකරම, පුරප්පාඩු සම්පූර්ණ නොකර ගැටලුවක් ඇතිකළොත් මුස්ලිම් කොංග්‍රසය එම ක්‍රියාවට විරුද්ධව අනිවාර්යයෙන් පෙනී සිටිනවා. පසුගිය අවුරුදු 5 ක කාලය තුළ ලංකාව තුළ තිබුණු ස්වාධීන කොමිෂන් සභාවල යම් යම් අඩුපාඩු තිබුණත්, කොමිෂන් සභා යම්තාක් දුරට තමන්ගේ ස්වාධීනත්වය බේරාගෙන වැඩ කටයුතු කරලා තියෙනවා. ඒකට හොඳම උදාහරණය මැතිවරණ කොමිසම. අනෙක මානව හිමිකම් කොමිසම. ඇත්තටම මානව හිමිකම් කොමිසමට ලෝකයේ සමහර රටවලට සාපේක්ෂව ලොකු බලයක් ලබා දී තිබුණේ නැහැ. ඒත් ශ්‍රේෂ්ඨාධිකරණයට ගොස් මූලික අයිතිවාසිකම් පෙත්සමක් දමන්න මුදල් නොමැති සාමාන්‍ය මනුස්සයෙකුට මානව හිමිකම් කොමිසමෙන් සැලකිය යුතු සේවයක් වුණා. ස්වාධීන කොමිෂන් සභා නැති කරන්න හෝ ඒවා මැඩ පැවැත්වීමට උත්සාහ කළහොත් අපි අනිවාර්යයෙන්ම ඒ ක්‍රියාවන්ට විරුද්ධ වෙනවා. අපිට ලොකු බලාපොරොත්තුවක් තියෙනවා ප්‍රජාතන්ත්‍රවාදයට ගරු කරන සියලුම බලවේග මෙවැනි දේවල්වලට විරුද්ධ වේවි කියලා. එහෙම විරුද්ධ නොවී රට එක් පවුලකට පාලනය කරන්න භාර දෙන්න අපි ඉඩ දෙන්නේ නැහැ.
ජනාධිපතිවරයා ගැන අදහස මොකක්ද?
ජනාධිපතිතුමා පිළිබඳව අපේ ලොකු බලාපොරොත්තුවක් තියෙනවා. පාර්ලිමේන්තු මැතිවරණයට තරග කරන්න හමුදා නිලධාරීන් ගෙන ආවත්, පොදුවේ ඔහු පවුල්වාදී නොවන චරිතයක් කියලයි අපි හිතන්නේ.
මැතිවරණයේ ප්‍රතිඵල එක්ක, සුළුතර ජනවර්ගවල අනාගතය ගැන බියක් තියෙනවාද?
ඔව්, ඒ පිළිබඳ ලොකු බියක් ජනතාව තුළ තිබෙනවා. එහෙත් ඒ පිළිබඳ මගේ පෞද්ගලික මතය තමයි මෙවර මැතිවරණයට ඉදිරිපත් වෙලා සිටි හමුදා නිලධාරීන් පවා දැන සිටියා යුද්ධය සඳහා විශාල සහයෝගයක් මුස්ලිම් ජනතාව ලබා දුන් බව. ආණ්ඩුවත් ඒ බව දන්නවා. එලෙස සහයෝගය දුන් නිසයි එදා එල්ටීටීඊ සංවිධානය උතුරේ හිටපු මුස්ලිම් ජනතාව පැය විසිහතරක් ඇතුළත උතුරු පළාතෙන් ඉවත් කළේ. හමුදා නායකයන් හැමෝම ඒ බව දන්නවා. ඒ අය හිතනවා නම්, ශ්‍රී ලංකිකයින් විදියට අපි හැමෝම එකට සිටිය යුතුයි කියලා, ඒ සඳහා මුස්ලිම් ජනතාවගේ සහයෝගය ලබා ගත යුතුයි. මා හිතන විදියට ඒ බව ඔවුන් දන්නවා. අපි විශ්වාස කරනවා හැත්තෑව දශකයේ දෙමළ ජනතාවට සිදු වුණ දේවල් අපිට සිදු නොවේවි කියලා. ගෝඨාභය රාජපක්ෂ මහතා හමුදා සේවයේ හිටපු නිලධාරියෙක් නිසා ඔහුට විනයක් ඇති බව අපි විශ්වාස කරනවා. ඒ විනය ඔහුට ලැබුණේ ඔහු හමුදාවේ සිටි නිසා බව මිනිස්සු විශ්වාස කරනවා, ඒ විනයම හමුදාවේ සිටි අනෙක් නිලධාරීන්ටත් ඇති බවත් අපි විශ්වාස කරනවා. මිනිස්සු ඔවුන්ට ඡන්දය ලබා දෙන්න ඇත්තේ ඒ ගැන විශ්වාසය තබලා. මා හිතන්නේ නැහැ, ලංකාවේ ජනතාව සුළුතර ජනවර්ග පාගා දැමීමට ජනවරමක් දුන්නා කියලා. තව ජනවර්ගයක් හිංසාවට පත් කරන්න බහුතර ජනතාවට ඕනෑ නැහැ. නැවත හිංසනය රාජ්‍ය යාන්ත්‍රණයට මුසු කරන්න බහුතරය කැමති නෑ. ඔවුන්ට ඕනෑ තමන්ගේ ආර්ථික, සමාජීය ප්‍රශ්න විසඳනවා දකින්න. ආණ්ඩුව ඒ විශ්වාසය රකින්න ඕනෑ.■
