වරාය අරගලයේ ඇතුළත කතාව

මාධ්‍යයට කියන්න එපා, ඉන්දියාව දැනගනීවි

මහින්ද – වර්ජන කරන්නේ මෙහෙම නෙවෙයි, වරෙල්ලා ගහගන්න ජෙනරාල් දයා රත්නායක

අගමැති මහින්ද රාජපක්ෂ සමඟ අගෝස්තු 02 වැනිදා කළ සාකච්ඡාවකින් පසු වරාය වෘත්තිය සමිති වැඩවර්ජනය තාවකාලිකව අවසන් කිරීම ගැන විවිධ පාර්ශ්වවලින් එල්ල වී ඇත්තේ දැඩි දෝෂ දර්ශනයකි. එසේ දොස් කියන අය අතර පෙරමුණේම සිටින්නේ ෆේස්බුක්හි අදහස් දක්වන්නන්ය.

ඔවුන්ට අනුව වරාය වෘත්තිය සමිති වර්ජනය හෝ සත්‍යග්‍රහය තාවකාලිකව අවසන් කිරීම ඊට පෙර වෘත්තිය සමිති නායකයන් කී ප්‍රකාශ සමඟ සැසඳූ කළ මහ පාවාදීමකි. මිනිසුන්ට බොරු කළ සංදර්ශනයකි.

මේ චෝදනාවල සාධාරණය අසාධාරණය ගැන අපට නිගමනයට එළැඹිය හැක්කේ අගමැතිවරයා හමුවූ දිනත්, ඊට පෙර දිනවලත්, සිදුවූ දේ පිළිබඳ අවබෝධයක් ලබාගැනීමෙනි.

දයා රත්නායක සාකච්ඡාව

අගෝස්තු 01 දින දහවල් වරාය අධිකාරියේ සභාපති වෘත්තිය සමිතිවලට සාකච්ඡාවක් කැඳවා තිබුණි. ඊට වරාය අරගලයේ යෙදෙන වෘත්තිය සමිති 23 නියෝජිතයන් සහභාගී වී තිබුණි. දයා රත්නායක එහිදී වෘත්තිය සමිති නියෝජිතයන්ගෙන් ඉල්ලා තිබුණේ වෘත්තිය ක්‍රියාමාර්ග නතර කරන ලෙසය. ශ්‍රී ලංකා වරාය අධිකාරියට වෘත්තිය ක්‍රියාමාර්ග හේතුවෙන් විශාල පාඩුවක් සිදුවන බවත් සාකච්ඡා මාර්ගයෙන් කටයුතු කළ යුතු බවත් ඔහු එහිදී කියා ඇත. ඔහුත් මෙම වෘත්තිය සමිති අරගලය පිළිබඳ වෙනත් මතයක සිටින බවත් එය ප්‍රකාශ කළ නොහැකි බවත් කියා ඇත. වර්ජනය නිසා කොළඹ වරායට පැමිණෙන වෙළඳ නැව් සමාගම් වෙනත් රටවලට යා හැකි බවත්, එමගින් වැටුප් ගෙවීමට පවා වරාය අධිකාරියට නොහැකි වනු ඇති බවත්, වර්ජනය නොකර නවීන ක්‍රම අනුගමනය කළ යුතු බවත් ඔහු කියා ඇත. එම පැහැදිලි කිරීම් ඔහු අවසන් කර ඇත්තේ ‘ගහගන්න වුණත් පුළුවන්, වරෙල්ලා ගහගන්න’ යන සුපුරුදු හමුදා භාෂාව පිටතට දමමිනි. එහිදී දැඩි ලෙස නොසන්සුන් වී ඇති වෘත්තිය සමිති නියෝජිතයන් නැගිටිමින් විවිධ අදහස් ප්‍රකාශ කරමින් ඝෝෂාවක ස්වරූපයෙන් එයට ප්‍රතිචාර දක්වා ඇත. ඒ සමඟම වරාය සභාපති ජෙනරාල් දයා රත්නායක නිරුත්තර වී ඇත. එහිදී වෘත්තිය සමිති ඔහුට පැහැදිලි කර දී ඇත්තේ ඔවුන් පැමිණියේ ගහගන්න නොවන බවත් වෘත්තිය සමිති ලෙස සාකච්ඡාවට බවත්ය. හමුදාවේ මෙන් වෘත්තිය සමිති සමඟ කටයුතු කරන්නට නොඑන ලෙසත්ය.

දේශබන්දු තෙන්නකෝන් පැමිණේ

මේ අතරවාරයේම ජ්‍යෙෂ්ඨ නියෝජ්‍ය පොලිස්පති දේශබන්දු තෙන්නකෝන් පොලීසියේ තවත් පිරිසක් සමඟ එම සාකච්ඡා කාමරයට පැමිණ ඇත. පොලීසියත් සමඟ සාකච්ඡා කරන්න සූදානම් නැතැයි එහිදී වෘත්තිය සමිති නියෝජිතයන් ප්‍රකාශ කර ඇත.

එහිදී ශ්‍රී ලංකා පොදුජන පෙරමුණේ වෘත්තිය සමිතියේ ලේකම්වරයා ප්‍රකාශ කර ඇත්තේ දේශබන්දු තෙන්නකොා්න් පැමිණෙන බව ඔවුන් දැනුවත් කර තිබූ බවයි. පසුව වරාය සභාපති ජෙනරාල් දයා රත්නායක පවසා ඇත්තේ දේශබන්දු තෙන්නකෝන්ට වෘත්තිය සමිති නියෝජිතයන් ඇමතීමට අවශ්‍ය බවයි.

ඒ අනුව වෘත්තිය සමිති නියෝජිතයන් අමතමින් දේශබන්දු තෙන්නකෝන් කතාව ආරම්භ කර ඇත්තේ වරාය වෘත්තිය සමිති හොඳයි හා විනයගරුකයි යන්න පවසමින්ය. රටට අවශ්‍ය ආහාර ද්‍රව්‍ය වරායට පැමිණ ඇති බවත් ජනාධිපතිවරයාගේ හා අගමැතිවරයාගේ උපදෙස් අනුව පැමිණි බවත්, හර්තාල් පාලම පාරෙන් ඉවත් වන ලෙසත් ඔහු ඉල්ලා ඇත. ඉවත් නොවන බව පවසමින් ඊට වෘත්තිය සමිති ප්‍රතිචාර දක්වා ඇත.

ඒ වනවිටත් නීතිපති දෙපාර්තමේන්තුව වරාය වෘත්තිය සමිතිවලට එරෙහිව උසාවි නියෝගයක් ගැනීමට සැරසෙන බවත්, වෘත්තිය සමිතිවලට වර්ජනය කිරීමට හැකි වුවත් පාර වහන්න බැහැ යැයිද දේශබන්දු තෙන්නකෝන් කියා ඇත. එමෙන්ම ගැටුමක් ඇතිකර නොගෙන එය අවසන් කිරීමට ජනාධිපතිවරයා හා අගමැතිවරයා උපදෙස් දුන් බවත් දේශබන්දු තෙන්නකෝන් පවසා ඇත.

‘අපි අයින් වෙන්නේ නැහැ, එහෙනම් ගහන්න’ යැයි වෘත්තිය සමිති නියෝජිතයෝ තවදුරටත් දේශබන්දු තෙන්නකෝන්ට කියා ඇත. පෙරටුගාමී පක්ෂයේ විරෝධතාවට පහරදුන් හැටි වෘත්තිය සමිති සිහිපත් කර ඇත. දේශබන්දු තෙන්නකෝන්ගේ පිළිතුර වී ඇත්තේ පෙරටුගාමී උද්ඝෝෂකයන් කිහිපදෙනෙකුගේ සීමාව ඉක්මවීම නිසා එසේ සිදුවූ බවයි.

සාකච්ඡාව ඉන් අවසන් වී ඇති අතර උද්ඝෝෂණකයන් රැඳී සිටි හර්තාල් පාලම අසලට දේශබන්දු තෙන්නකෝන් ඇතුළු පොලිස් නිලධාරීන් ඉන්පසු පැමිණ ඇත. ඒ එම ස්ථානයෙන් ඉවත් වන්නැයි ලබාදී තිබූ උසාවි නියෝගය දැනුම්දීම සඳහාය. ඊට ‘හූ’ හඬ මිස උද්ඝෝෂකයින්ගේ ඉඩ ලැබී තිබුණේ නැත. පසුව පොදුජන පෙරමුණේ වෘත්තිය සමිතියේ ලේකම්වරයාගේ මැදිහත්වීම මත උසාවි නියෝගය කියවන්නට දේශබන්දු තෙන්නකෝන් ප්‍රමුඛ පිරිසට හැකිවී ඇත.

මැදමුලන සාකච්ඡාව

ඉන් ටික වෙලාවකට පසු උපවාස අට්ටාලය අසලට පොදුජන පෙරමුණේ සමිතියේ ලේකම්වරයා පණිවිඩයක් රැගෙනවිත් ඇත. ඒ ඊට පසුදා උදෑසන සාකච්ඡාවක් සඳහා අගමැතිවරයා මැදමුලනට ආරාධනා කළ බවයි. ඒ අනුව වෘත්තිය සමිති නියෝජිතයන් පසුදා උදෑසන වාහනයක නැගී ඒ සඳහා පිටත් වී ඇත.

අගමැති මහින්ද රාජපක්ෂට අමතරව, වරාය අධිකාරියේ සභාපති ජෙනරාල් දයා රත්නායකත්, හිටපු වරාය අධිකාරියේ සභාපති වත්මන් නාගරික සංවර්ධන අමාත්‍යාංශයේ ලේකම් ප්‍රියත් බන්දු වික්‍රමත් එහි සිට ඇත.

මහින්ද රාජපක්ෂ කථාව ආරම්භ කර ඇත්තේ උද්ඝෝෂකයින්ට බනිමිනි. ඔහු කියා ඇත්තේ මෙම වරාය උද්ඝෝෂණය කුමන්ත්‍රණයක් බවය. පිටුපස සිට දේශපාලන හස්තයක් එය මෙහෙයවන බවය. විමල් වීරවංශ හා උදය ගම්මන්පිල වරාය උද්ඝෝෂකයින් හමුවීමට ආ විට ‘හූ’ කීමද, චම්පික රණවක, ගලගොඩඅත්තේ ඥාණසාර හිමි ආදීන් ආ විට සාදරයෙන් පිළිගැනීමද අගමැතිවරයාගේ නොරිස්සුම් සහගත බැණුම්වලට හේතුවී ඇත.

එමෙන්ම ඡන්දයක් පවතිද්දී ලෝකයේ කිසිම තැනක මෙවැනි වර්ජනයක් වරායක සිදුනොවන බවද, වරාය විෂයභාර අමාත්‍ය ජොන්ස්ටන් ප්‍රනාන්දු කැබිනට් මණ්ඩලයට ඉදිරිපත් කර ඇතැයි කියන කැබිනට් පත්‍රිකාව ව්‍යාජ එකක් බවද ඔහු කියා ඇත. ඊට පිළිතුරු දෙමින් පොදුජන පෙරමුණ වෘත්තිය සමිතියේ සභාපති සංජය කුමාර වැලිගම කියා ඇත්තේ ජොන්ස්ටන් ප්‍රනාන්දු ඇමතිවරයා ඒ ගැන තමාට පැහැදිලි කළ බවත් ජනාධිපති ලේකම් පී.බී. ජයසුන්දර සකස් කර ගෙනා එම කැබිනට් පත්‍රිකාවට අත්සන් කිරීමට ඔහුට සිදුවූ බවත් පැවසූ බවය.

එම කරුණු දැක්වීමෙන් පසු පීල්ල මාරු කරමින් අගමැතිවරයා පවසා ඇත්තේ පී.බී. ජයසුන්දර ඔය වගේ වැඩ කරන බවත්, එහෙත් එවැනි කැබිනට් පත්‍රිකාවක් කැබිනට් මණ්ඩලයට නොආ බවත්, ඔහු කැබිනට් මණ්ඩලයේ සිටින තෙක් ඒ සඳහා කිසිවිටකත් ඉඩ නොදෙන බවත්ය.

හම්බන්තොට වරාය යහපාලන ආණ්ඩුව චීනයට දුන් නිසා මේ දේ වී ඇති බවත් ඉන්දීය බලපෑම එන්නේ ඒ නිසා බවත් අගමැතිවරයා කියා ඇත. ඊට පිළිතුරු දෙමින් වෘත්තිය සමිති නියෝජිතයන් කියා ඇත්තේද හම්බන්තොට වරාය චීනයට දීමට පෙර කොළඹ දකුණු වරායේ දකුණු පර්යන්තය චීනයට දුන් බවයි. (එය ලබාදුන්නේ පසුගිය මහින්ද රාජපක්ෂ පාලන කාලයේදීය.)

එමෙන්ම යහපාලන ආණ්ඩුව හම්බන්තොට වරාය චීනයට දෙන වෙලාවේ වෘත්තිය සමිති කෑ නොගෑ බවද මහින්ද රාජපක්ෂ කියා ඇත. එහිදී වෘත්තිය සමිති කියා ඇත්තේ එම අවස්ථාවේත් ඔවුන් විරුද්ධ වූ බවය. විපක්ෂනායක ලෙස මහින්ද රාජපක්ෂ හමුවූ බවත් ‘මාස තුනක් රැකගනින්, මම ඇවිත් ඕක කරන්න දෙන්නේ නැහැ’ යැයි පැවසූ බවත්ය.

චීනයට ලබාදීමට පෙර හම්බන්තොට වරායේ වරාය අධිකාරියට අයත් සේවකයන් නොසිටි අතර සිටියේ මෑන්පවර් ක්‍රමයට දෛනික වැටුපට බඳවාගත් සේවකයන්ය. එම සේවකයන් සිය සේවා සැපයුවේ ‘මාගම්පුර පෝර්ට් මැනේජ්මන්ට් ප්‍රයිවට් ලිමිටඞ්’ නමැති සමාගමටය. එහි සේවක උද්ඝෝෂණය ඇතිවුණේ ඔවුන් වරාය අධිකාරියේ සේවකයන් ලෙස අනුයුක්ත කරන ලෙස ඉල්ලමින්ය.

වෘත්තිය සමිති මහින්ද රාජපක්ෂගෙන් ඉල්ලා ඇත්තේ කොළඹ දකුණු වරායේ නැගෙනහිර පර්යන්තය විදේශයකට නොදෙන බවට පොරොන්දුවක් ලබාදෙන ලෙසය. මහින්ද රාජපක්ෂ කියා ඇත්තේ අගමැති ලෙස ඔහුට පොරොන්දුවක් ලබාදීමට නොහැකි බවය. භාරකාර රජය, මැතිවරණය කැඳවා තිබීම ආදී හේතු ඒ සඳහා ඔහු ඉදිරිපත් කර ඇත. ඉන්පසු වෘත්තිය සමිති නියෝජිතයෝ කියා ඇත්තේ රටේ ජනප්‍රිය දේශපාලන නායකයෙකු වශයෙන් පොරොන්දුවක් ලබාදෙන ලෙසය. ‘මම කැබිනට් එකේ ඉන්නකම් මේක කරන්න දෙන්නේ නැහැ.’ මහින්ද රාජපක්ෂගේ පිළිතුර වී ඇත්තේ එයය.

එහෙත්  වෘත්තිය සමිති ඉන් සෑහීමකට පත්වී නැත. නැගෙනහිර පර්යන්තයේ කටයුතු සඳහා යොදා ගැනීමට සමගි බහලු පර්යන්තයේ සිට ගෙනැවිත් දැනට අතරමඟ නවතා ඇති කන්ටේනර් හුවමාරු කිරීමේ දොඹකර නැගෙනහිර පර්යන්තය වෙත ගෙනයෑමට වරාය සභාපතිවරයාට නියෝගයක් ලබාදෙන ලෙස ඔවුන් ඉල්ලා ඇත.

බැරිම තැන එය සිදුකරන ලෙස වරාය සභාපති දයා රත්නායකට නියෝග කර ඇත. එහෙත් එක පොරොන්දුවක් පිටය. මේ පිළිබඳ එළියේ කිසිවක් ප්‍රකාශ නොකරන ලෙස ඉල්ලමින්ය. සමාජ මාධ්‍යවල කිසිවක් පල නොකරන ලෙස ඉල්ලමින්ය. ඒ ඉන්දියාව ඒ ගැන දැන ගනීවි යන කාරණය කියමින්ය. එසේ ඉන්දියාව දැනගතහොත් බලපෑම් එන බව කියමින්ය. පසුගිය 2015 ජනාධිපතිවරණයේදී මහින්ද රාජපක්ෂ පරද්දන්නට කටයුතු කළේ ඉන්දියාව බව කියමින්ය.

සාකච්ඡා අවසානයේ වෘත්තිය සමිති නියෝජිතයන් මැදමුලන රොක්වී සිටි මාධ්‍යයට කියා ඇත්තේ සාකච්ඡාව සඳහා සියලු වෘත්තිය සමිති සහභාගී නොවුණ බැවින් කොළඹ ගොස් ඔවුන් සමඟද සාකච්ඡා කර සිය තීරණය දැනුම්දෙන බවය. ඒ අනුව කොළඹ පැමිණි වෘත්තිය සමිති නියෝජිතයන් වරාය පරිශ්‍රයේ ඇති ජවිපෙ වෘත්තිය සමිති කාර්යාලයට රැස්වී සාකච්ඡාවේ එකඟතා දැනුම්දී වෘත්තිය සමිති 23 කැමැත්ත අකැමැත්ත විමසා ඇත. උපවාසය තාවකාලිකව අවසන් කිරීමට තීන්දුව ගෙන ඇත්තේ ඉන්පසුය.

නැවත දයා රත්නායක හමුවීම

ඉන්පසුත් සියල්ල අවසන් වී නැත. ඊට හේතුව ඒ වනවිට වරාය සභාපති ජෙනරාල් දයා රත්නායක එහි අංශ ප්‍රධානීන්ට යවා තිබූ චක්‍රලේඛ දැනුම්දීමක්ය. එහි සඳහන් කර තිබී ඇත්තේ සේවය සඳහා වාර්තාකර සේවය නොකර සිටින අයට එරෙහිව කටයුතු කරන ලෙසය. ඒ ගැන සාකච්ඡා කරන්නට වරාය වෘත්තිය සමිති එදින සවස වරාය සභාපතිවරයා හමුවී ඇත.

වෘත්තිය සමිති ක්‍රියාමාර්ගයක් ඔහුට දන්වා නැති බව ජෙනරාල් දයා රත්නායක එහිදී කියා ඇත. වෘත්තිය සමිති කියා ඇත්තේ ඒ ගැන මුලින් දැනුවත් කළ බවත් පියවරක් පියවරක් පාසා ඒ ගැන දවසින් දවසට දැනුවත් කිරීමක් නොකරන බවත්ය. එමෙන්ම කම්කරු කොමසාරිස්ට පවා ඒ ගැන දැනුම්දීමක් කර ඇති බවත්ය.

එහිදී වරාය උපසභාපතිවරයා කියා ඇත්තේ මෙම වර්ජනයෙන් වරායේ සාමූහික ගිවිසුම කඩකර ඇති බවය. වෘත්තිය සමිති කියා ඇත්තේ වරාය සාමූහික ගිවිසුම ඇත්තේ වැටුප් සඳහා පමණක් බවත් මෙම අරගලය වැටුප් සඳහා කරන අරගලයක් නොවන බවත්ය.

වරාය සභාපති ජෙනරාල් දයා රත්නායක එහිදී ඔහුගේ සටන්කාමී ඉතිහාසයද කියා ඇත. වීරසූරිය ශිෂ්‍යයා (පේරාදෙණිය විශ්වවිද්‍යාලය) ඝාතනය කළ අවස්ථාවේ කුරුණෑගල මලියදේව විද්‍යාලයේ ශිෂ්‍ය නායකයෙකු ලෙස විදුහල්පතිවරයා දැනුවත් කරමින් විරෝධතා සංවිධානය කළ සැටිත්, විරෝධතා කළ යුතු ආකාරය ගැනත් කියා ඇත.

එහෙත් එම සාකච්ඡාව මුලදීම ඔහුගේ නොරිස්සුම් සහගතභාවයක් තිබී ඇත. ඒ වෘත්තිය සමිති ඔහු හරහා නොගොස් විෂයභාර අමාත්‍ය ජොන්ස්ටන් ප්‍රනාන්දු කෙළින්ම හමුවී සාකච්ඡා කිරීම ගැනය. ඔහු මඟහැර ගොස් සාකච්ඡා කර පසුව ඔහු ළඟට නොඑන ලෙස ඔහු කියා ඇත. ඒ හමුදාවක් තුළ කටයුතු කරන ආකාරය මිස වෘත්තිය සමිති ක්‍රියාමාර්ගවල සාකච්ඡා සඳහා අනුගමනය කරන පිළිවෙත නොවන බව ඔහු නොදැනීම සිවිල් පරිපාලනයට හමුදාව සුදුසු නැති බවට කදිම උදාහරණයකි.

කෙසේ වෙතත් එම සාකච්ඡාව අවසන් කරමින් වරාය ස්වාධීන සේවක සංගමයේ සභාපති ලාල් බංගමුව ඔහුට කියා ඇත්තේ ‘ඔබතුමා අපට ගහගන්න කථා කළත් මේ රටේ මැතිවරණ අවස්ථාවකදී ප්‍රජාතන්ත්‍රවාදය ආරක්ෂා කරගැනීම සඳහා කටයුතු කළ හමුදාපතිවරයෙක් ලෙස අපේ ඔබතුමාට ගෞරවයක් තිබෙනවා’ යැයි කියමින්ය.

2015 ජනාධිපතිවරණයේ ප්‍රතිඵල ප්‍රකාශයට පත්නොකර හමුදාව පාරට කැඳවීමට ගිය විට  දයා රත්නායක එදා හමුදාපතිවරයා ලෙස ඊට එකඟතාව පළකර තිබුණේ නැත.

ඒ අනුව කොළඹ දකුණු වරාය නැගෙනහිර පර්යන්තය පිළිබඳ අර්බුදය තවම අවසන් නැත. ඇත්තේ අළු යට ගිනි පුපුරුය. පූර්ව හා පශ්චාත් මැතිවරණ දින කිහිපය ඊට මඳ විරාමයක් පමණය. ඉන්පසු හුවමාරු කිරීමේ දොඹකර නැගෙනහිර පර්යන්තය දක්වා ගෙන යනවාදැයි වරාය වෘත්තිය සමිති බලා සිටිනවා ඇත. එය දැනගත් විට ඉන්දියාව යළි බලපෑම් කරනු ඇත.

මහමැතිවරණයේදී පැහැදිලි බහුතර ජයග්‍රහණයක් ලැබුණහොත් ගෝඨාභය රාජපක්ෂ, මහින්ද රාජපක්ෂ ආණ්ඩුව මීට වෙනස් ආකාරයකටත් වෘත්තිය සමිතිවලට ප්‍රතිචාර දැක්විය හැකිය. ඒ වරාය වෘත්තිය සමිති සංදේශයක් බාරදීම සඳහා ජනාධිපතිවරයා හමුවීමට ජනාධිපති ලේකම් කාර්යාලයට ගියත් ඔවුන් හමුනොවුණා ලෙස මෙන්ම ‘මම වෘත්තිය සමිතිවලට භය නැහැ’ යනුවෙන් කීවා යැයි කියන කතාවද නිසාය.■