ප්‍රතිරක්ෂණයේ ප්‍රතිරක්ෂණය නම් වූ අලුත් සෙල්ලම

රක්ෂණභාර අරමුදලට මුදල් නෑ,

ප්‍රතිරක්ෂණ නැවත ප්‍රතිරක්ෂණ කරලා

ගනුදෙනු දෙකේ වටිනාකම රුපියල් මිලියන 1101.89ක්

සමාගම ඉන්දියාවේ අසාදු ලේඛනගත වූ පසු, සිංගප්පූරුවට ගිය එකක්

ජාතික රක්ෂණභාර අරමුදල පසුගිය මහින්ද රාජපක්ෂ පාලන යුගයේදී ඇතිකරනු ලැබුයේ රක්ෂණ කර්මාන්තයේ ප්‍රතිරක්ෂණය වෙනුවෙන් පිටරට ඇදෙන විශාල මුදලක් රට තුළ ඉතිරි කරගැනීමේ අරමුණෙනි.

ඒ අනුව රක්ෂණ භාර අරමුදල නම් වූ ආයතනයට කරුණු දෙකක් නිශ්චිත විය. එකක් වූයේ ප්‍රතිරක්ෂණ ගනුදෙනුවල ප්‍රතිශතයෙන් සීයට 30ක් එම අරමුදලේ අනිවාර්යයෙන් ප්‍රතිරක්ෂණය කළ යුතු වීමය. අනෙක වූයේ කැරලි කෝලාහල, මහජන කැළඹීම් හා ත්‍රස්තවාදී අරමුදල නම් වූ රක්ෂණ ප්‍රභේදය සියයට සීයක්ම එහි ප්‍රතිරක්ෂණය කළ යුතු වීමය.

එම මූලික අරමුණෙන් බැහැරව පසුකාලයේදී ජාතික රක්ෂණ භාර අරමුදල රාජ්‍ය සේවකයෙන්ගේ අග්‍රහාර රක්ෂණය ඇතුළු රජයේ කටයුතු රැසක් සිදුකරන සාමාන්‍ය රක්ෂණ සමාගමක් බවටද පත්විය.

අප පසුගිය සතියේදී හෙළිදරව් කළ කැබිනට් මණ්ඩලය අනුමත කළ ප්‍රතිරක්ෂණය නැවත ප්‍රතිරක්ෂණ කිරීමේ කොන්ත්‍රාත් ජේ.බී. බෝදා ඇන්ඞ් කම්පැණි (එස්) සමාගමට ලබාදීම පෙන්වාදෙන්නේ එම මූලික අරමුණට පටහැණිව ක්‍රියා කිරීමේ නිදසුනක්ය.

විදේශයකට මුදල් යෑම නතර කිරීම හෝ පාලනය කිරීම සඳහා ඇතිකරන ලද අරමුදලක ප්‍රතිරක්ෂණය කළ ප්‍රතිරක්ෂණයක් නැවත ප්‍රතිරක්ෂණ කිරීමෙන් ඉහත කී මූලික අරමුණ ඉටුවන්නේ නැත. එහිදීත් සිදුවන්නේ එම මුදල් විදේශයකට ඇදී යෑමය. යම් රක්ෂණ සමාගමක් ජාතික රක්ෂණ භාර අරමුදලේ ප්‍රතිරක්ෂණ කරන රක්ෂණයක් නැවත ප්‍රතිරක්ෂණ කිරීමට ජාතික රක්ෂණ භාර අරමුදලක් අවශ්‍ය වන්නේ නැත. ඒ රක්ෂණ සමාගම්වලටම ඔවුන්, ජාතික රක්ෂණ භාර අරමුදල පිහිටුවීමට පෙර කළ ලෙසම ඔවුන් ලබාගන්නා රක්ෂණයන්හි අවදානම සීයට සීයක්ම ප්‍රතිරක්ෂණ කළ හැකිය. කටුනායක ගුවන් තොටුපළෙන් විදේශගත වීමට අවශ්‍ය අයෙකු මත්තල ගුවන්තොටුපලට ගොස් එතැනින් කටුනායකට පැමිණ කටුනායක සිට විදේශයකට ගුවන්ගත වීම අවශ්‍ය වන්නේ නැත.

ඉහත ගුවන්ගත වීමේ ආකාරයට ජාතික රක්ෂණ භාර අරමුදලට කටයුතු කිරීමට සිදුවී ඇත්තේ ඇයිදැයි අපි සොයා බැලුවෙමු. එහිදී ලැබුණ පිළිතුර වූයේ එම ආයතනයේ නමින්ම ඇති රක්ෂණ භාර අරමුදලක් ඇති කිරීම මේ දක්වා සාර්ථකව සිදුවී නැති බවය. එම නිසා යම් ප්‍රතිරක්ෂණයක් දරාගැනීමේ හැකියාවක් එම අරමුදල සතුව තිබී නැත. ඒ නිසා පසුගිය කාලය පුරාම සිදුකර ඇත්තේ ලබාගන්නා ප්‍රතිරක්ෂණයක් නැවත ප්‍රතිරක්ෂණ කිරීමය.

ජාතික රක්ෂණ භාර අරමුදලක් ඇති කිරීම වෙනුවට පසුගිය ආණ්ඩු දෙකේම කාලය තුළදී කර ඇත්තේ ප්‍රතිරක්ෂණයෙන් එම ආයතන ලබන ලාභ භාණ්ඩාගාරයෙන් හූරා ලබාගැනීමය. ඒ නිසාම රක්ෂණභාර අරමුදල සමහර අවස්ථාවල මූල්‍යමය වශයෙන් ඉතා අවදානම් තත්වයකටද පත්වී තිබේ. රක්ෂණභාර අරමුදලේ කටයුතු නිවැරදිව සිදුවූයේ නම් එකී භාර අරමුදල තුළ මේ වනවිට රුපියල් බිලියන 60ක පමණ අරමුදලක් තිබිය යුතු බව එහි නිලධාරීන්ගේ මතයය.

අප පසුගිය සතියේ සඳහන් කළ ජේ.බී. බෝදා සමාගමට එරෙහි ස්ට්‍රැටජික් ඉන්ෂුවරන්ස් සමාගමේ නඩුවද ප්‍රතිරක්ෂණයක් නැවත ප්‍රතිරක්ෂණ කිරීමේ කොන්ත්‍රාත් නොලැබීමේ ආරවුලක ප්‍රතිඵලයකි. අප පසුගිය කලාපයේ පළකළ පරිදි සුරක්ෂා රක්ෂණය ප්‍රතිරක්ෂණය කිරීම නම් වූ කේවල ප්‍රතිරක්ෂණ ගනුදෙනුව පිළිබඳ නීතිමය ආරවුලක් නොවේ.

වැඩිදුරටත් කරන ලද කරුණු සොයා බැලීම්වලදී දැනගන්නට ලැබුණේ ස්ට්‍රැටජික් ඉන්ෂුවරන්ස් සමාගම බෝදා සමාගමට එරෙහිව කොළඹ දිසා අධිකරණයේ ලබාගත් වාරණ නියෝගයට අදාළ නඩුව මෙන්ම ඊට එරෙහිව බෝදා සමාගම අභියාචනාධිකරණයේ පවරා ඇති නඩුවද තවම විභාගවෙමින් පවතින බවයි.

ඒ අනුව එම අධිකරණ කටයුතු යනු ප්‍රතිරක්ෂණය නැවත ප්‍රතිරක්ෂණ කිරීමේ කොන්ත්‍රාත් ලබාගැනීමේ ආරවුල් මත ඇතිවූ නඩු මිස ජාතික රක්ෂණභාර අරමුදලේ මූලික අරමුණ වූ ප්‍රතිරක්ෂණ මුදල් පිටරට යෑම වැළැක්වීම සඳහා ගත් උත්සාහයක් නොවේ.

පසුගිය සතියේ අනාවරණය කළ කැබිනට් මණ්ඩල අනුමැතිය හිමිවූ ප්‍රතිරක්ෂණ ගනුදෙනු දෙකේ වටිනාකම රුපියල් මිලියන 1101.89කි. ඒ සාමාන්‍ය රක්ෂණයේ ප්‍රතිරක්ෂණය නැවත ප්‍රතිරක්ෂණ කිරීමේ රුපියල් මිලියන 985.5ක් හා කැරළි කෝලාහල, මහජන කැළඹීම් හා ත්‍රස්තවාදී අරමුදල ප්‍රතිරක්ෂණය නැවත ප්‍රතිරක්ෂණ කිරීම වෙනුවෙන් රුපියල් මිලියන 1116.39ක් වශයෙන්ය. මේ ප්‍රතිරක්ෂණ ගනුදෙනුවේ කාලය මාස 18ක් හෙවත් අවුරුදු එකහමාරකි.

එය රුපියල් බිලිනයකට වඩා හෙවත් රුපියල් කෝටි 100කට වඩා රටින් එළියට මුදල් යවන විශාල ගනුදෙනුවකි. ඊට හේතුව පාසල් ළමුන්ගේ සුරක්ෂා රක්ෂණය ආරම්භ කිරීමෙන් පසු එම රක්ෂණයේ සීයට 90ක වටිනාකමක් යැයි කියූ රුපියල් මිලියන 1500ක මුදලක් ශ්‍රී ලංකා රක්ෂණ සංස්ථාව මේ කියන ජේ.බී. බෝදා සමාගම මගින් ප්‍රතිරක්ෂණ කිරීම එක් රක්ෂණ ගනුදෙනුවක් වෙනුවෙන් සිදුකෙරෙන විශාලම ගනුදෙනුව වශයෙන් එදා චෝදනාවට ලක් වූ හෙයින්ය.

යහපාලන ආණ්ඩු සමයේදී සිදුවූ විශාල හොරකමක් ලෙස එම ප්‍රතිරක්ෂණ ගනුදෙනුව එදා විපක්ෂයේ සිට අද ආණ්ඩු පක්ෂයේ සිටින අයගේ චෝදනාවට ලක් විය. එම චෝදනාවට හේතු කිහිපයක් මුල් විය. එකක් එම ප්‍රතිරක්ෂණයේ කොමිස් වශයෙන් රුපියල් මිලියන 100 ක මුදලක් අධ්‍යාපන අමාත්‍යාංශයේ ඇතිකරන අරමුදලකට ලැබෙන බවටත්, එම ප්‍රමාණය මදි නිසා රුපියල් මිලියන 500ක මුදලක් කොමිස් වශයෙන් ලබාදෙන ලෙසට තමා ඉල්ලීමක් කර ඇති බවත් එවක අධ්‍යාපන අමාත්‍ය අකිල විරාජ් කාරියවසම් කළ ප්‍රකාශයයි.

දෙවැන්න මෙම ප්‍රතිරක්ෂණ ගනුදෙනුවේ විශාල අක්‍රමිකතා සිදුවී ඇති බව පවසමින් රක්ෂණ සේවක සංගමය රාජ්‍ය ආයතනවල සිදුවී ඇතැයි කියන වංචා දූෂණ සොයා බැලීමේ ජනාධිපති කොමිෂන් සභාවට කළ පැමිණිල්ලයි. එම කොමිෂන් සභාවේ වාර්තා හිටපු ජනාධිපති මෛත්‍රීපාල සිරිසේනට ලබාදුන්නද ඔහු එය ප්‍රසිද්ධියට පත් නොකළ අතර වත්මන් ජනාධිපතිවරයාද එය ප්‍රසිද්ධියට පත්කළේ නැත.

එම පැමිණිල්ලේදී රක්ෂණ සේවක සංගමය මතුරකන ප්‍රධාන කාරණයක් තිබේ. ඒ දෙපාර්ශ්වයටම සාධාරණ වන සේ ප්‍රතිරක්ෂණ ගිවිසුම්වලට සාමාන්‍යයෙන් ඇතුළත් කරන ලාභය බෙදාගැනීමේ වගන්තිය :චරදසෙඑ ිය්රසබට* සුරක්ෂා රක්ෂණ ප්‍රතිරක්ෂණ ගිවිසුමට ඇතුළත් නොකළේ මන්ද යන්නය.

මේ ප්‍රතිරක්ෂණ ගනුදෙනුවට සම්බන්ධ වූ ශ්‍රී ලංකා රක්ෂණ සංස්ථාවේ අයත් බෝදා සමාගමත් දැනුවත්ව කළ එකක් බවට සැක නැත. නැතිනම් අකිල විරාජ් කාරියවසම් මහතා කියූ ආකාරයේ රුපියල් මිලියන 100ක කොමිස් හා එය මදි නිසා වැඩිකිරීමේ ඉල්ලීම් සිදුවන්නේ කෙසේද යන ප්‍රශ්නය පැනනගින නිසාවෙනි.

මේ ප්‍රතිරක්ෂණ ගනුදෙනු ඒවාට සම්බන්ධ වන අයට ඉල්ලම පාදන ඒවා බව ලියුම්කරු හෙළිදරව් කරනු ලැබුවේ පසුගිය රාජපක්ෂ පාලන සමයේදීය. එහිදී ශ්‍රී ලංකාවේ විශාලතම දේපල රක්ෂණය වන ලංකා ඛණිජතෙල් නීතිගත සංස්ථාවේ තෙල් ටැංකි සංකීර්ණ තෙල් තොග හා අනෙකුත් දේපල පිළිබඳ ශ්‍රී ලංකා රක්ෂණ සංස්ථාවේ තිබූ රක්ෂණය ප්‍රතිරක්ෂණය කරනු ලැබුයේ ඩුබායිහි ට්‍රාන්ස් ඒෂියා මැනේජ්මන්ට්  ඇඞ්වයිසර්ස් නම් සමාගම මගින්ය. එහි රක්ෂණ බ්‍රෝකර්වරයා ලෙස කටයුතු කළේ සුරේෂ් බාලක්‍රිෂ්ණන් නමැත්තාය.

ඔහු ඉන්දියාව තුළ රක්ෂණ කටයුතු සම්බන්ධයෙන් අසාදු ලේඛනගත අයෙක් විය. ඩුබායිහි සිට රක්ෂණ කටයුතු ඔහු ආරම්භ කර ඇත්තේද ඉන්පසුවය. ශ්‍රී ලංකා රක්ෂණ සංස්ථාවේ කාර්යාල කටයුත්තක් සඳහා එහි අංශයක් කළ සොයා බැලීමකදී හෙළිවී තිබුණේ එම ප්‍රතිරක්ෂණය සිදුකරනවායැයි කියූ ජාත්‍යන්තරව පිළිගත් ප්‍රතිරක්ෂණ සමාගම් දෙකෙහිම බ්‍රෝකර්වරයා එම ප්‍රතිරක්ෂණ කිරීම සිදුකර නොමැති බවයි.

සිදුවී තිබුණේ බ්‍රෝකර්වරයෙකු මාර්ගයෙන් ප්‍රතිරක්ෂණ මුවාවෙන් මුදල් පිටරට යවා කාගේ හෝ සාක්කුවට මුදල් දමා ගැනීමය. එම ප්‍රතිරක්ෂණ ගනුදෙනු හොරකමේ හෙළිදරව්ව පළවීම වළක්වාගැනීමට එවක ශ්‍රී ලංකා රක්ෂණ සංස්ථාවේ සභාපති ගාමිණී සෙනරත් හා තවත් පිරිසක් ලියුම්කරුටත්, එදා ලියුම්කරු සේවය කළ ආයතනයේ විවිධ පුද්ගලයන්ටත් කළ බලපෑම සුළුපටු නොවේ.

ජේබී බෝදාද එම වකවානුවේම ඉන්දියාවේ රක්ෂණ කටයුතු සම්බන්ධයෙන් අසාදු ලේඛනගත වූවෙකි. එම සමාගමද ඉන්දියාවේ අසාධු ලේඛනගත වූවාට පසු ජේ.බී. බෝදා එස් හෙවත් සිංගප්පූරු සමාගම ලෙස සිංගප්පූරුවට ගොස් කටයුතු ආරම්භ කරන්නේ ඉන්පසුය. ප්‍රතිරක්ෂණ කටයුතු සඳහා දැන් ජාතික රක්ෂණභාර අරමුදල කටයුතු කරන්නේ එසේ ඉන්දියාවේදී අසාදු ලේඛනගත වීම නිසා සිංගප්පූරුවට ගොස් කටයුතු කරන ආයතනය සමඟය.

රාජ්‍ය රක්ෂණ සමාගමක ප්‍රතිරක්ෂණ ගනුදෙනුවල කෙරුවාව එසේ නම් රාජ්‍යයේ රක්ෂණභාර අරමුදලේ ප්‍රතිරක්ෂණයේ ප්‍රතිරක්ෂණ ගනුදෙනුවල ස්වභාවය කෙසේ විය හැකිද යන්න අමුතුවෙන් කිව යුතු නැත.■