සමගි ජන බලවේගයේ මහලේකම් – රංජිත් මද්දුම බණ්ඩාර
සමගි ජන බලවේගයේ නායකයන්ට විනය පියවර ගන්න බව කියනවා. එයට ඔබේ පක්ෂයේ ප්‍රතිචාරය මොකක්ද?
විනය පරීක්ෂණ කරන්න එක්සත් ජාතික බලයට අයිතියක් නැහැ. අපි අයිතියක් නැති බව කියන්නේ හේතුවක් ඇතිව. එක්සත් ජාතික පක්ෂයේ කෘත්‍යාධිකාරී මණ්ඩලයේ තීන්දුවක් ඇතිවයි අපි සමගි ජන බලවේගය පිහිටවූවේ. එයින් පසුව ක්ෂණිකව තමන්ගේ අදහස් වෙනස් කරගත්තේ ඔවුන්. දැන් අපව වැරදිකාරයන් කරලා. මේ ගැන අපි ඉදිරියේදී කටයුතු කරනවා. ඒ අනුව ඔවුන්ගේ විනය පරීක්ෂණ, පොතට සහ ෆයිල් එකට සීමා වෙයි. අපි දැන් අපේ අවධානය යොමු කරන්නේ මැතිවරණය ගැන. අපි මැතිවරණය ජයගන්නවා. ඊට පස්සේ අපි බලමු මොකද කරන්නේ කියලා.
එජාපයේ නායකයා, මහලේකම්වරයා ඇතුළු කණ්ඩායම විනය පියවර ගැනීමත් කෘත්‍යාධිකාරී මණ්ඩලයේ තීන්දු නේද? ඉතින්, නැවත එජාපයට එන්න ඔබේ කණ්ඩායමට පුළුවන්ද?
අපි තවම ඉන්නේ එක්සත් ජාතික පක්ෂයේ. එජාප සාමාජිකත්වයත් තියෙනවා. ඉස්සරහට අපි තීන්දු කරනවා කරන්නේ මොනවාද කියලා.
පොදුජන පෙරමුණ හැදුවා වගේ වෙනම පක්ෂයක් හදන්න තීරණය කරයිද?
ඒක හරියටම කියන්න බැහැ. දැනට අපි එජාපයේ ඉන්නවා. අනාගත තීන්දුව අනාගතයට බාරදෙන්න ඕනෑ. අපි දැන් බලන්න ඕනෑ මැතිවරණයේ ජයග්‍රහණය ලබාග ැනීම ගැන. ඒ වගේම රටේ පවතින සෞඛ්‍ය, ආර්ථික තත්වය ගැන.
ආණ්ඩුවට සාපේක්ෂව විපක්ෂ කණ්ඩායමක් ලෙස සමගි ජන බලවේගයේ විශේෂත්වය මොකක්ද?
අපි තමයි විපක්ෂයේ ප්‍රධානම පක්ෂය. අද මේ රටේ ජනතාවට ජීවත්වෙන්න බැරි තත්වයකට පත්වෙලා. ආර්ථිකය කඩා වැටිලා. බඩු මිල ඉහළ ගිහින්. අල්ලස් හා දූෂණ චෝදනා තියෙන විශාල පිරිසක් ආණ්ඩුවේ ඉන්නවා. මිනිසුන් අනාගතය ගැන අවිනිශ්චිත හැඟීමකින් ඉන්නේ. මේ රටේ ජනතාව බලාපොරොත්තු වුණේ ඉදිරි දේශපාලන ගමනක් යන්නයි. ඔවුන් පිරිසිදු දේශපාලන ගමනක් බලාපොරොත්තු වුණා.
ගෝඨාභය රාජපක්ෂගෙන්..
එහෙම වුණාට අපේ පක්ෂය, නායකයා ඇතුළු කණ්ඩායම තමයි පිරිසිදු දේශපාලනයක ඉන්නේ. මිනිසුන් බලාපොරොත්තු වුණ නව දේශපාලන ගමන අපි යනවා. බඩු මිල අඩු කිරීම, ගොවියන්ට සහන සැලසීම, රජයේ සේවකයින්ගේ කපා දැමූ වැටුප් ඇතුළු සහන ලබාදීම, ජනතාවට හොඳ ජීවිතයක් ගත කළ හැකි රටක් නිර්මාණය කිරීම අපි කරනවා. ඒ අනුව දැන් ජනතා බලාපොරොත්තු ඉටු කළ හැක්කේ අපට. අපේ පක්ෂයේ සිටින නායකයන්ට එයට අවශ්‍ය දැනුම තියෙනවා.
ආණ්ඩුවේ මිලිටරිකරණය, 19 වැනි සංශෝධනය අහෝසි කිරීමට උත්සාහ කිරීම, ප්‍රජාතන්ත්‍රවාදය සීමා කිරීම වගේ කාරණා ගැන සමගි ජන බලවේගය කතා කරන්නේ නැති බවට චෝදනා තියෙනවා..
එහෙම එකක් නැහැ. අපේ කථිකයන් ඕනෑ තරම් ඒ ගැන කතා කරනවා. 19 වැනි සංශෝධනයෙන් තහවුරු කරපු ජනතාවගේ ප්‍රජාතන්ත්‍රවාදය නැති කරන්න ආණ්ඩුව උත්සාහ කරනවා. ඒකාධිපති ව්‍යවස්ථාවක් හදන්නට තුනෙන් දෙකක බලයක් ගන්න හදනවා. ව්‍යවස්ථාවේ තියෙන්නේ මොකක්ද කියලා කියන්නේත් නැහැ. මිනිසුන්ගේ ප්‍රජාතන්ත්‍රවාදී අයිතිය නැති කරන්න යනවා. ජනතාව අපට ඡන්දය දෙන්න ඕනෑ ඒකට විරුද්ධව තමයි.
සමගි ජන බලවේගය එළිදැක්වූ සද්-ජාතිකත්වය කියන සංකල්පය පොදුජන පෙරමුණේ ජාතිකවාදයෙන් වෙනස් වෙන්නේ කොහොමද?
සද්-ජාතිකත්වය කියන්නේ ජාතිවාදය නෙවෙයි. තමන්ගේ ජාතිය ගැන ආඩම්බර වෙමින්, අනෙකාට හානියක් නොකර ජීවත් වීම. වෛරයෙන් තොරව ජීවත් වීම. අපි හැමදාම මේ රටේ සියළු ජාතීන්ට එකට ජීවත් වීමේ අයිතිය සකස් කරලා තියෙනවා. අපේ රටේ සියළු ජාතීන්ට ජීවත් වීමේ අයිතිය දෙන්න අපි කටයුතු කරනවා. එහෙත් සමහරුන් ජාතිකත්වය කියලා කියන්නේ සිංහල ජාතිය ගැන..
අපි කතා කරන්නේ ශ්‍රී ලාංකික අනන්‍යතාවය ගැන. අපි රැකගන්න ඕනෑ ඒක. ඒ ගැන කිසිම ප්‍රශ්නයක් හෝ සැකයක් තියාගන්න ඕනෑ නැහැ.
දෙමළ හා මුස්ලිම් ජනතාවත් සමගි ජන බලවේගයෙන් බලාපොරොත්තු වෙන දේවල් තියෙනවා නේද?
සියළු දෙනාට සමගියෙන් ජීවත් වෙන්න පුළුවන් පුළුල්ම දේශපාලන බලවේගය සමගි ජන බලවේගය. අපේ පක්ෂයේ ඉන්නවා හොඳ සිංහල-බෞද්ධ කණ්ඩායම්. ඒ වගේම අනෙකුත් ජනවර්ග වලට අයත් නායකයන්. සියළුම ජාතීන් මේ පක්ෂයට එකතු වෙලා ඉන්නවා. අනෙකුත් පක්ෂ දෙකම ජාතිවාදී කණ්ඩායම්. ඔවුන්ගේ වැඩිපුර ඉන්නේ එක ජාතියක අය. ජාතිවාදය නිසා අපේ රටට අහිමි වූ දේවල් විශාලයි. ජාත්‍යන්තර අපකීර්තියට පත් වුණා. අපි බුද්ධාගමට ප්‍රමුඛස්ථානය දීලා, සියළුම ජාතීන්ට එකට ජීවත්වෙන්න පුළුවන් රටක් නිර්මාණය කරනවා.
සජිත් ප්‍රේමදාස නවීන ප්‍රජාතන්ත්‍රවාදයට ගැලපෙන්නේ නැති පරණ අදහස් තියෙන නායකයෙක් බව කියනවා නේද?
මෙතැන ඉන්න ජාතික මට්ටමේ නායකයන්ගෙන් නව පරපුරේ ඉන්න එකම නායකයා සජිත් ප්‍රේමදාස මැතිතුමා. රනිල් වික්‍රමසිංහ මැතිතුමා මොන දේ කළත් ඔහුට මේ රටේ බලය ගන්න බැරි වුණා. ඔහු විවිධ දේවල් වලට විවිධ දේවල් කරනවා. හිටපු ගමන් රවී කරුණානායක කියනවා අපේ පක්ෂයේ ජාතිවාදීන් නැහැ, සියල්ල සුද්ධ කළා කියලා. ඒත් එජාපයේ සුද්ධ වුණේ මොකක්ද කියලා ඉදිරියේදී වැටහේවි. සජිත් ප්‍රේමදාස මහතා එක අන්තයකට යන්නේ නැතිව සියළු දෙනාටම ඉන්න පුළුවන් රටක් නිර්මාණය කරන්න බලාපොරොත්තු වෙනවා.
ගෝඨාභය රාජපක්ෂ එක්ක එකට ආණ්ඩු කරන්න ඡන්දය දෙන්න කියලා සමගි ජන බලවේගය කියනවාලු..
19 වැනි සංශෝධනයෙන් ජනාධිපතිවරයාගේ බලතල අඩු කරලා අගමැතිට බලතල දිලා තියෙනවා. කැබිනට් ඇමතිකම් දරන්න ජනාධිපතිවරයාට බැහැ. අගමැතිගේ උපදෙස් ජනාධිපතිවරයාට ඕනෑ. අගමැතිවරයාව ඉවත් කරන්නත් ජනාධිපතිවරයාට බැහැ. කැබිනට් ඇමතිවරුන්ගේ සහ අගමැතිවරයාගේ බලතල සීමා කරන්න ජනාධිපතිවරයාට බැහැ. ඒ නිසා, පාර්ලිමේන්තුව සහ අගමැතිවරයා බලවත්. අගමැතිවරයා විදියට තමන්ට ඕනෑ කෙනෙක්ව තෝරාගන්න ජනාධිපතිවරයාට බැහැ. ඒ බව 2018 දී ඔප්පු වුණා. ඒ නිසා අපි මැතිවරණය ජයග්‍රහණය කළාම, සජිත් ප්‍රේමදාස මහතාව අගමැති කිරීම හැර විකල්පයක් නැහැ. ඒ නිසා සහයෝගයෙන් යනවා කියන එකෙන් අදහස් කරන්නේ ජනාධිපතිට ඕනෑ විදියට ආණ්ඩු කරන එක නෙවෙයි. අගමැතිවරයාට තමයි ආණ්ඩුව කරන්න බලය ලැබෙන්නේ. ජනාධිපතිවරයාට යහපත් දෙයකට සහයෝගය ඕනෑ වුණොත් ඒක ලබාදීම වෙන දෙයක්.
ජනාධිපතිවරයාගේ ක්‍රියා කලාපය ගැන අදහස මොකක්ද?
ජනාධිපතිවරයා දැන් අසාර්ථකයි. ඔහු වැඩිපුරම කියන්නේ කොවිඞ්-19 වසංගතය මර්දනය කළා කියලයි. ඒත් දැන් දෙවැනි රැල්ල මතුවීම එක්ක අසාර්ථක කර්තව්‍යයක ඔවුන් ඉන්නේ. දැන් සෞඛ්‍ය විශේෂඥයන්ගේ සහයෝගය වෙනුවට හමුදාවේ සහයෝගය ගන්න යනවා. ඔහු හිතුවේ හමුදාව දාලා කරන්න පුළුවන් කියලයි. ආර්ථිකය දුර්වල වෙලා. බඩු මිල වැඩිවෙලා තියෙනවා. රජයේ සේවකයන්ගේ සියළු දීමනා නවත්වලා. ගොවියන්ට පොහොර ටිකවත්, නිෂ්පාදනයට මිලක් දෙන්නවත් බැරි වෙලා. මේ රටේ ප්‍රජාතන්ත්‍රවාදය විනාශ වෙලා. කතා කරන්න බැහැ. මාධ්‍යවේදීන්ව කොළර් වලින් ඇදගෙන යනවා. අධිකරණය ඉස්සරහා කොළර් එකෙන් මාධ්‍යවේදීන්ව ඇදගෙන යනවා. සමාජ මාධ්‍ය ක්‍රියාකාරීන් 17 දෙනෙක්ව අත්අඩංගුවට අරගෙන උසාවි දැම්මා. මේක ඒකාධිපතිවාදයට යන ගමනක් බව පේනවා. මේවා වෙන්නේ ඡන්දයට කලින්. ඡන්දය ඉවරවුණාම මේ ගමන තවත් බරපතළ වේවි.
සිරිකොතේ බලය අල්ලන කතාව ආවේ කොහෙන්ද?
ඔවුන් මාධ්‍යයෙන් පොඩි ප්‍රකාශයක් උලුප්පලා පෙන්වනවා. අපට ඕනෑ පක්ෂයේ බලය ගන්න තමයි. ඒත් අපි ආණ්ඩුවේ බලය ගැනීම ගැනයි කල්පනා කරන්නේ. සිරිකොත ගැනත් අපි හිතනවා තමයි. සිරිකොත අල්ලගෙන ඉන්න අයට ජනතාවගේ ප්‍රතිචාර ඡන්දයේදී ලැබේවි. ඔවුන්ට එළියට යන්න සිදුවේවි.
ආණ්ඩුවට පඩි ගෙවාගන්න බැරි බව ඔබ කීවා. ඒක කීවේ ආණ්ඩුවේ අභ්‍යන්තර තොරතුරු මතද?
පඩි ගෙවාගන්න සල්ලි නැති නිසානේ දැනටමත් අතිකාල කපලා තියෙන්නේ. සංයුක්ත දීමනා කපලා, පඩි වැඩිවීම් නවත්වලා. මුදල් මුද්‍රණය කරනවා. විශාල වශයෙන් මුදල් මුද්‍රණය කරලා තියෙනවා. ඒවායින් තේරෙනවානේ ආණ්ඩුව අමාරුවක වැටිලා ඉන්න බව.
ආණ්ඩුවේ කොවිඞ්-19 වසංගතය මර්දනය කිරීමේ කටයුතු සිදුවුණේ මිනිසුන්ව කේන්ද්‍ර කරගෙන නෙවෙයි. මිනිසුන් ගැන හිතන්නේ නැතිව, ඇඟ බේරාගන්නයි ඔවුන් බලන්නේ. කොවිඞ්-19 මර්දනය කළා කියලා කීවාට රටේ මිනිසුන්ව හරිහැටි ආරක්ෂා කළාද. මැදපෙරදිග ඉන්නේත් ශ්‍රී ලාංකික පුරවැසියන්. ඔවුන්ව ගෙන්වන්න තිබුණා. ගෙන්වන්නේ නැති නම් ඒ රටේදී වත් පහසුකම් දෙන්න තිබුණා. ගොඩක් රටවල් තමන්ගේ රටේ මිනිසුන්ව ගෙන්වුවා. ඒත් ලංකාවේ ආණ්ඩුවට ඒවා කරගන්න ඕනෑ නැහැ. කොවිඞ්-19 රෝගය හැදුණ අයව හොය හොයා නිරෝධායන කඳවුරු වලට යවමින් ෂේප් වෙන එක තමයි ආණ්ඩුව කරන්නේ.
දේශපාලන පළිගැනීම් පිළිබඳ ජනාධිපති කොමිෂන් සභාව සමගි ජන බලවේගයේ නායකයන් කිහිපදෙනෙක්වම කැඳෙව්වා නේද?
ඔවුන් කරන්නේ විශේෂ කොමිෂන් සභා වලින් දේශපාලන සංදර්ශන පෙන්වන එක. ඒ කොමිසමට අපේ අයව ගෙනල්ලා, එතැන දේශපාලන ව්‍යාපෘතියක් කරනවා. ප්‍රවෘත්ති වලට ප්‍රවෘත්ති දෙන්නේ මිනිහෙක් වැරදිකාරයෙක් වෙන්නත් කලින්. ප්‍රවෘත්ති සංදර්ශන කරමින් එතැන මැතිවරණයට බලපාන දේශපාලන ව්‍යාපාරයක් කරනවා. මාවත් කැඳවලා තිබුණා. අපි ඒ ගැන ඉදිරියේදී පියවරක් ගන්නවා.
මැතිවරණය කල් දැමීමේ යෝජනාව ගැන සමගි ජන බලවේගයේ අදහස මොකක්ද?
අපි බලය ලබාගැනීමට වඩා ජනතාවගේ ජීවිත ගැන කල්පනා කරන්න ඕනෑ. දැනටමත් අපේ නායකයා ප්‍රකාශයක් කරලා තියෙනවා. අපි දැන් කල්පනා කරන්න ඕනෑ මැතිවරණය පැවැත්වීමට ගත්ත තීන්දුව නිවැරදිද කියලා. අපි කියන්නේ ආණ්ඩුවේ කාලය මාස හයක් තිබියදී තමයි ජනාධිපතිවරයා ආණ්ඩුව විසිරෙව්වේ. දැනට මාස පහක් පාර්ලිමේන්තුව නැතිව රට යනවා. ජනාධිපතිට ආණ්ඩුක්‍රම ව්‍යවස්ථාව අනුව ඉන්න පුළුවන් මාස තුනයි. ජනාධිපතිවරයා පාර්ලිමේන්තුව කැඳවන්නත් බයයි. මැතිවරණය පවත්වන්නත් අසීරුයි. ඒ නිසා ජනතාව අතරමං වෙලා.■
