කටුනායක ගුවන් තොටුපළෙන් ශ්‍රී ලංකාවට ඇතුළුවෙන සියලු පුද්ගලයන් ගුවන් තොටුපළේදීම කොවිඩ්-19 තිබේදැයි පරීක්ෂාවට ලක් කළ යුතු බවත්, සියලුදෙනාටම පීසීආර් පරීක්ෂණ කළ නොහැකි නම් වෙනත් පරීක්ෂණයක් ක්‍රමවේදයක් පාවිච්චි කළ යුතු බවත් වෛද්‍ය රසායනාගාර වෘත්තිකයන්ගේ විද්වත් ආයතනයේ සභාපති රවී කුමුදේශ් පවසයි.
ලංකාවට පැමිණීමට බලාපොරොත්තු වන විදේශගත ශ්‍රමිකයන් ගුවන් තොටුපළේදීම සාම්පල් ලබාගෙන පරීක්ෂාවට ලක් කළ යුතු බව ඔහු ප්‍රකාශ කළේය. වෛද්‍ය රසායානාගාර විද්‍යාඥ වෘත්තිකයන් එලෙස පරීක්ෂා කිරීමේ වගකීම බාරගැනීමට සූදානම් බවද ඔහු කීය.
කොවිඩ්-19 රට තුළ පැතිරීම වැළැක්වීම සඳහා ශ්‍රී ලංකාවට ඇති වාසිදායකම තත්වය වන්නේ එක් ක්‍රියාකාරී ගුවන්තොටුපොළක් පමණක් තිබීම බව ඔහු පෙන්වාදුන්නේය.
විදේශගතව සිට ලංකාවට පැමිණෙන ඕනෑ පුද්ගලයෙකු කොවිඩ්-19 රෝගියෙකු වීමේ අවදානමක් තිබෙන නිසා, සියලුදෙනාම පරීක්ෂාවට ලක් කළ යුතු බව කියයි. ගුවන් තොටුපළේදී පරීක්ෂා නොකර පසුව රට තුළදී පරීක්ෂාවට ලක් කිරීම සුදුසු නොවන බවත්, කොවිඩ්-19 තිබේදැයි පරීක්ෂා කිරීම යම් කෙනෙකුගේ ගුවන් බලපත්‍රය තිබේදැයි පරීක්ෂා කිරීමට සමාන වැදගත්කමක් ඇති, ගුවන් තොටුපළේදීම කළයුතු කටයුත්තක් බවත් ඔහු පැවසීය.
කෙසේ වෙතත් විදේශගතව සිට ලංකාවට පැමිණෙන අය පරීක්ෂාවට ලක් කිරීම නිසා රට තුළ සිටින පුද්ගලයන් පරීක්ෂාවට කිරීම අඩු නොකළ යුතු බවත් ඔහු කීය. ඔහු එහිදී පෙන්වාදුන්නේ මේ වන විට ලංකාවේ සෞඛ්‍ය අමාත්‍යාංශය දිනකට කිරීමට හැකි පරීක්ෂණ සංඛ්‍යාව පමණක් කිරීම මිස පරීක්ෂණ ධාරිතාව වැඩි කිරීම ගැන සිතා නැති බවය.
ඒ අනුව දිනකට කරන පරීක්ෂණ සංඛ්‍යාව වැඩි නොකර, සාමාන්‍යයෙන් දිනකට පීසීආර් පරීක්ෂණ 2000කට අඩු ප්‍රමාණයක් සිදු කරමින් සිටින බව ඔහු කීය. මේ වන විට විදේශ රටවල සිට පැමිණෙන පුද්ගලයන් හා නාවික හමුදා සෙබළුන් පීසීආර් පරීක්ෂණවලට ලක්කිරීමට ප්‍රමුඛතාව ලබාදෙන නිසා, සමාජගත පුද්ගලයන් පරීක්ෂාවට ලක් කිරීමට අවස්ථාවක් නොලැබෙන බවය. දිනකට සිදුකරන පරීක්ෂණ සංඛ්‍යාව සීමා කරගෙන, එම සීමාවට ගැළපෙන ලෙස නියැදි ලබාගැනීම වෙනුවට වසංගතය මර්දනයට අවශ්‍ය වන පරීක්ෂණ සංඛ්‍යාව කරමින්, ඒ සඳහා පහසුකම් සපයාගැනීම කළ යුතු බව ඔහු ප්‍රකාශ කළේය.
පසුගිය සති දෙකක කාලසීමාව තුළ දිනකට කර ඇති පරීක්ෂණ සංඛ්‍යාව 1000- 2000 අතර වේ. මැයි 27 වැනිදා කර තිබුණු පීසීආර් පරීක්ෂණ සංඛ්‍යාව 1838ක්ද, මැයි 26 වැනිදා සිදුකළ පරීක්ෂණ සංඛ්‍යාව 1146ක්ද, මැයි 25 වැනිදා සිදුකළ පරීක්ෂණ සංඛ්‍යාව 1347ක්ද වේ.
