කොවිඩ්-19 වසංගතය පාලනය කර ජන ජීවිතය සාමාන්‍ය තත්වයට පත්කිරීමට තවමත් සමත්ව නැති ආණ්ඩුව මහා පරිමාණ සංවර්ධන ව්‍යාපෘතිවලට සූදානම් වීම දක්නට ලැබේ.
මේ මහා පරිමාණ ව්‍යාපෘති සංදර්ශන ගැන මහජනයාගේ පැත්තෙන් ඇත්තේ දැඩි විවේචනයකි. ඊට හේතුව සිය ජීවන පැවැත්ම බිඳ වැටී එය යළි සකස් වන්නේ කවදාදැයි නිනව් නැති කලෙක ආණ්ඩුව කරන විගඩම් නිසාය.
එහි අලුත්ම විගඩම මැයි 17 වැනිදා ප්‍රදර්ශනය කරනු ලැබුයේ කැබිනට් ප්‍රකාශක අමාත්‍ය බන්දුල ගුණවර්ධනය. ඔහු හෝමාගම දියගම ප්‍රදේශයේ නිරීක්ෂණ චාරිකාවක නිරත වෙමින් ප්‍රකාශ කළේ ශ්‍රී ලංකාවේ විශාලතම ජාත්‍යන්තර ක්‍රිකට් ක්‍රීඩාංගණය එහි ඉදිකරන බවය. වසර තුනක කාලයකින් එහි කටයුතු අවසන් කරන බවය.
අක්කර 26ක භූමිභාගයකින් සමන්විත එහි දිවා රාත්‍රී තරග පවා ක්‍රීඩා කළ හැකි බවත් එහිදී අමාත්‍යවරයා කියා ඇත. මෙම සංචාරයට නාගරික සංවර්ධන අමාත්‍යාංශයේ ලේකම් ප්‍රියත් බන්දු වික්‍රම, ශ්‍රී ලංකා ක්‍රිකට් ආයතනයේ සභාපති ෂම්මි සිල්වා ආදින්ද සහභාගි වී ඇත.
කොවිඩ් සමයේ මේ විගඩමට ප්‍රසිද්ධම ප්‍රතිචාරය දක්වා තිබුණේ හිටපු ශ්‍රී ලංකා ක්‍රිකට් නායක මහේල ජයවර්ධනය. ඔහු ට්විටර් පණිවිඩයක් තබමින් සඳහන් කර ඇත්තේ ශ්‍රී ලංකාවට තවත් ජාත්‍යන්තර ක්‍රිකට් ක්‍රීඩාංගණ කුමකටද යන්නය.
එය ඇත්තකි. ඛෙත්තාරාම හෙවත් ආර්. ප්‍රේමදාස, එස්.එස්.සී., පී. සරවනමුත්තු, එන්.සී.සී., වැනි ජාත්‍යන්තර ක්‍රිකට් තරග පැවැත්වූ ක්‍රීඩාංගණ කොළඹ තිබේ. රන්ගිරි දඹුලු ක්‍රීඩාංගණය, අස්ගිරි ක්‍රීඩාංගණය, පල්ලෙකැලේ ක්‍රීඩාංගණය, ගාල්ල ක්‍රීඩාංගණය, සූරියවැව ක්‍රීඩාංගණය ආදි ක්‍රිඩාංගණ කොළඹින් පිට තිබේ.
යථාර්ථය වන්නේ විදේශීය ක්‍රිකට් කණ්ඩායමක් ශ්‍රී ලංකාවේ සංචාරය කිරීමේදී පවත්වන තරග ගණන අනුවත් ප්‍රේක්ෂක සංඛ්‍යාව, දිවා රාත්‍රී යන අනෙකුත් හේතු නිසා, මේ සෑම ක්‍රීඩාංගණයකටම තරග ලැබෙන්නේ නැති බවය.
සමහර ජාත්‍යන්තර ක්‍රීඩාංගණවලට ඇත්තේ දේශීය තරග පමණය. දේශීය තරග පවා නැති සූරියවැව වැනි ජාත්‍යන්තර ක්‍රිකට් ක්‍රීඩාංගණද තිබේ.
බන්දුල ගුණවර්ධන ඇමතිවරයාද තමන් නියෝජනය කරන ප්‍රදේශයේ සියලුම දේවල් ඉදිකළ යුතු යැයි සිතන රාජපක්ෂවරුන්ගේ ළමා මානසිකත්වයෙන් යුතුව මේ ක්‍රිකට් ක්‍රීඩාංගණ සිහිනයට බැස ඇති බව පැහැදිලිය.
හම්බන්තොට සූරියවැව ක්‍රීඩාංගණයට තරග ලැබෙන්නේ දේශපාලන හයිය හත්තිය ඇතිවිට පමණය. නැතහොත් එහි නිදහස් සැරිසරන්නෝ, හරක් හා මීහරක්ය. හම්බන්තොට ජාත්‍යන්තර සම්මන්ත්‍රණ ශාලාවද හම්බන්තොට වරායද, මත්තල ජාත්‍යන්තර ගුවන් තොටුපලද දේශපාලන හයිය ඇති විට බලහත්කාරයෙන් ක්‍රියාත්මක කරනු ලබන අතිවිශාල ජාතික නාස්තිකාර වියදම්ය. හෝමාගම දියගම ඉදිකරන්නට නියමිත ජාත්‍යන්තර ක්‍රීඩාංගණයද ඊට වඩා වෙනසක් පෙන්නුම් නොකරනු ඇත.
හෝමාගම දියගම දැනටමත් මීටර් 400ක කෘත්‍රිම ධාවන පථයකින් යුත් ක්‍රීඩාංගණයක් ඇත. ඊට යාබදව ඉදිකළ පාපැදි කෘත්‍රිම ධාවන පථය ප්‍රමිතියෙන් තොර වීම නිසා පසුව ගලවා දමනු ලැබීය. ඉන්පසු එහි දිස්වූයේ රගර් ක්‍රීඩාංගණයක්ය.
මීටර් 400 ක පථයකින් යුත් කෘත්‍රිම ධාවන පථ ලංකාවේම ඇත්තේ දෙකකි. එකක් දියගමය. අනෙක සුප්‍රසිද්ධ සුගතදාස ක්‍රීඩාංගණයේය. සුගතදාස ක්‍රිඩාංගණය අලුත්වැඩියා කරන අවස්ථාවල ජාතික මට්ටමේ හා පාසල් මට්ටමේ බොහෝ ධාවන තරග පවත්වන්නේ දියගම ක්‍රීඩාංගණයේය. කොට්ටාවේ සිට හෝ හෝමාගම සිට එම ක්‍රීඩංගණයට යෑමට පොදු ප්‍රවාහන සේවාවක් නැත. ක්‍රීඩක ක්‍රීඩිකාවන්ගෙන් කෑම බීම අවශ්‍යතා සපුරාගන්නට ක්‍රීඩාංගණය අවට හොඳ කෑම සපයන ස්ථාන නැත.
ප්‍රධානතම අඩුපාඩුව දියගම ක්‍රීඩාංගණයේ ප්‍රධාන ක්‍රීඩා මණ්ඩපය හැරුණුකොට ක්‍රීඩාංගණයේ ප්‍රේක්ෂාගාර ආවරණය වන පරිදි වහලක් නොමැති වීමය. අව්වෙන් වේලෙන්නටත්, වැස්සෙන් තෙමෙන්නටත් ක්‍රීඩක ක්‍රීඩිකාවන්ට, පුහුණුකරුවන්ට හා අනෙකුත් නරඹන්නන්ට සිදුවීම ඛේදජනකය. එම ඉරණම ප්‍රධාන ක්‍රීඩා මණ්ඩපයටද අදාළය. එහි වහල ඉදිකර ඇති ආකාරය අනුව අව්වෙන් බේරීමටත්, වැස්සෙන් බේරීමටත් බැරිය. සත්‍යය එයය.
ශ්‍රී ලංකාව වැනි රටක මලල ක්‍රීඩා තරග පවත්වන ක්‍රිඩාංගණයක ප්‍රේක්ෂාගාරවලට වහලක් තිබිය යුතුය. ඒ දවස් කිහිපයක් තිස්සේ දැඩි අව් රශ්මිය විඳගනිමින් ක්‍රීඩක ක්‍රිඩිකාවන්ටවත්, නරඹන්නන්ටවත් එවැනි ක්‍රීඩාංගණයක ගත කළ නොහැකි නිසාය. හෝමාගම ආසනයේ ආණ්ඩු පක්ෂයේ දේශපාලන සංවිධායකවරයා වශයෙන් බන්දුල ගුණවර්ධන අමාත්‍යවරයා මුලින්ම අවධානය යොමුකළ යුත්තේ අනවශ්‍ය ජාත්‍යන්තර ක්‍රීඩාංගණයක් ගැන නොව, ශ්‍රී ලංකාවේ දෙවන මලල ක්‍රීඩා කෘත්‍රිම ධාවන පථය හිමි දියගම ක්‍රීඩාංගණයේ පහසුකම් නංවාලීම සඳහාය
