ක්‍රීඩාංගණවලට ප්‍රේක්ෂකයන් හා ක්‍රීඩකයන් පිරවීමට නොහැකි මේ යුගයේ, ප්‍රේක්ෂකයන්ට නැරඹිය හැකි තරගාවලි කිහිපයක්ද තිබෙනවා. මේ සටහන එවැනි අවස්ථා කිහිපයක් ගැන.
ඊ ක්‍රීඩා
ඊඑස්පීඑන් වැනි ක්‍රීඩාව මත යැපුණු රූපවාහිනී නාළිකා විශාල ගැටලුවකට මුහුණදී තිබෙනවා. බොහෝ විට පැරණි තරග විකාශය කිරීමත්, බේස්බෝල් හා බාස්කට්බෝල් ආදි වීඩියෝ ක්‍රීඩා විකාශය කිරීමත් සිදු කරනවා. ඇත්තෙන්ම මෙම කාලසීමාවෙහි ක්‍රීඩා රසිකයන් වැඩි වශයෙන් යොමුවී ඇත්තේ ඊ ස්පෝටින් හෙවත්, පරිගණකමය ක්‍රීඩා වෙතට. ජාත්‍යන්තර වශයෙන් බොහෝ ආයතන විකාශය කරන්නේ එවැනි ඊ ක්‍රීඩා තරගාවලි. ඊ ක්‍රීඩා සැබෑ ක්‍රීඩාවක් නොවන බව අතීතයේ කී උදවිය, මේ වන විට එය ක්‍රීඩාවක් ලෙස පිළිගනිමින් ඉන්නවා.
ලංකාවේ පවා ‘පබ් ජී’ තරගාවලි සංවිධානය කර තිබෙනවා. පපරේ ආයතනය දිනපතා මැක්සිමම් ලැඩර් පබ් ජී මොබයිල් ටූනමන්ට් නමින් තරගාවලියක් විකාශය කරනවා.
මාබල් වන්
‘යෙල’ස් මාබල් වන්’ යනු නෙදර්ලන්ත ආයතනයක් මගින් පවත්වන මාබල් බෝල අතර පවත්වන ධාවන තරගාවලියක්. එම තරගාවලිය වසර කිහිපයක සිට පවත්වා තිබුණා. මේ වන විට එය අන්තර්ජාලයෙහි අතිශය ජනප්‍රිය වී තිබෙනවා.
තරගාවලිය පවත්වන ක්‍රමය සරලයි. මෙම ධාවන තරගාවලියට සහභාගී වෙන්නේ මිනිසුන් නොවෙයි. විවිධ වර්ණවලින් යුත් මාබල් බෝල. බෝලවලට පෙරළී යෑමට හැකි ආකාරයට බෑවුමක් සහිතව විවිධ ධාවන පථ සකස් කර තිබෙනවා. බෝල සියල්ල එකවර නිදහස් කරනවා. ධාවන පථයෙහි ඇති විවිධ කාණු දිගේ පෙරළී යන බෝල අතරින් මුලින්ම අවසානයට ළඟා වන බෝලය ජයග්‍රාහකයා බවට පත්වෙනවා.
මාබල් බෝල තරගයට පෙරළෙන විට විස්තර විචාරකයන් විස්තර විචාරයට එක්වෙනවා. පසුගිය තරගවාරයේදී අසමත් වූ කණ්ඩායම් සහ ක්‍රීඩකයන් (මාබල් බෝල) ගැන කතාකරනවා.
මෙම මාබල් බෝල කණ්ඩායම් පවා තිබෙනවා. මිඞ්නයිට් විස්ප්ස්, රාස්ප්බරි රේසර්ස්, ග්‍රීන් ඩක්ස්, හේසර්ස් හා (ගියවර තරඟවාරයේදී අසාර්ථක වූ) ඕෂියැනික්ස් වැනි නම්වලින් ඒ කණ්ඩායම් හඳුන්වනවා. ඒ ඒ කණ්ඩායම්වලට පමණක් නොව, ක්‍රීඩකයන්ට පවා රසිකයන් ඉන්නවා. කණ්ඩායම්වලට සජීවී ක්‍රීඩකයන් මෙන් සලකනවා. යමෙක් අසාර්ථක වුණොත්, ට්විටර්හි ඔවුන්ට විරෝධය දක්වා පෝස්ට් පළවෙනවා.
එහෙත් 2020 තරගවාරය වන විට මෙම තරගාවලිය සංවිධානය කළ පුද්ගලයන්ට මූල්‍යමය ගැටලු නිසා ඔවුන් අනුග්‍රාහකයෙක් සොයමින් සිටියා.
අපූරුම කාරණය වන්නේ ඇමෙරිකාවේ එච්බීඕ නාළිකාවේ අතිශය ජනප්‍රිය රූපවාහිනී වැඩසටහනක් වන ලාස්ට් වීක් ටුනයිට් වැඩසටහනේ ජෝන් ඔලිවර් එම තරගාවලියට අනුග්‍රහය ලබාදෙන බව ප්‍රකාශ කිරීම. ඒ අනුව ඇමෙරිකාවේ සහ ලෝකය පුරා මිලියන ගණනක ප්‍රේක්ෂකයන් සිටින ලාස්ට් වීක් ටුනයිට් වැඩසටහනේ අනුග්‍රහයෙන් තවත් ප්‍රේක්ෂක අවධානය ඇතිව මාබල් වන් ධාවන තරගාවලිය පවත්වනු ඇති.
‘මෙය නිකන්ම යූටියුබ් නාලිකාවක් නොවෙයි. මෙය සුන්දර තරගකාරී වැඩසටහනක්. මෙය ලෝකයට මෙවැනි වැඩසටහන් අවශ්‍යම යුගයක්.’ තරගාවලිය මිලදී ගත් බව ප්‍රකාශයට පත් කරමින් ජෝන් ඔලිවර් එසේ කියා තිබුණා.
සිනමාත්මක රෙස්ලින්
ප්‍රොෆෙෂනල් රෙස්ලින් ක්‍රීඩාමය ලක්ෂණ ඇති, නිර්මාණාත්මක කලාවක්. රෙස්ලින් පිටපත් අනුව නිර්මාණය කෙරෙන ක්‍රීඩාමය සටන් කලාවක්. ඇත්තෙන්ම ප්‍රොෆෙෂනල් රෙස්ලින් යන වචනය හැරුණාම එය හඳුන්වන්නට වෙනත් ක්‍රමයක් නැහැ.
ෆ්ලොරීඩා ප්‍රාන්තය කොවිඩ්-19 වසංගතයෙහි ලොක්ඩවුන් මැද ක්‍රියාත්මක කළ යුතු අත්‍යවශ්‍ය සේවා ලැයිස්තුවට ‘ප්‍රොෆෙෂනල් ස්පෝට් ඇන්ඞ් මීඩියා ප්‍රඩක්ෂන්’ එකතු කර තිබෙනවා. මෙම හැඳින්වීම නිශ්චිතව අයත් වන්නේ රෙස්ලින්වලට නොවුණත් මෙම යෙදුම එකතු කර ඇත්තේ රෙස්ලින් අත්‍යවශ්‍ය සේවාවක් ලෙස නම්කිරීම සඳහා.
එලෙස අත්‍යවශ්‍ය සේවා ලැයිස්තුවට රෙස්ලින් එකතු කිරීම ඇමෙරිකානු ජනාධිපති ඩොනල්ඞ් ට්‍රම්ප්ගේ ළඟම මිතුරෙක් හා ට්‍රම්ප්ගේ කාර්ය මණ්ඩලයේ සාමාජිකා ලින්ඩා මික්මෑන්ගේ සැමියා වන ඩබ්ලිව්.ඩබ්ලිව්.ඊ. හිමිකරු වින්සන්ට් මික්මෑන්ගේ දේශපාලන ගැටයක්යැයි ඇතැමුන් තර්ක කරනවා. කෙසේ වෙතත්, නිවෙස්වල සිරවී ආතතියෙන් පෙළුණු මිලියන ගණනක ප්‍රේක්ෂක ප්‍රජාවට සතිපතා රෙස්ලින් වැඩසටහන් මහා සහනයක්. ලෝකයේ ප්‍රශ්නවලින් මිදී, මොහොතකට බොළඳ රසයක් විඳින්නට එවැනි වැඩසටහන් උදව්වක්.
ඇමෙරිකාවේ දැවැන්තම රෙස්ලින් ආයතන දෙක වන ඩබ්ලිව්.ඩබ්ලිව්.ඊ. සහ ඒ.ඊ.ඩබ්ලිව්. ඒ අනුව ෆ්ලොරීඩා සිට නොකඩවා තමන්ගේ සතිපතා රෙස්ලින් රූපවාහිනී වැඩසටහන් නිෂ්පාදනය කරමින් සිටියා. වසංගතය ආරම්භයේදීම වැඩසටහන් පටිගත කොට, මුල් සති කිහිපයේ ඒවා විකාශය කළ ඔවුන්, අප මේ සටහන ලියන මොහොත වන විට සජීවීව වැඩසටහන් නිෂ්පාදනය කරනවා.
වෙනසකට ඇත්තේ ප්‍රේක්ෂකයන් නොමැති වීම. රූපවාහිනියෙන් ක්‍රීඩා නැරඹූ ඕනෑ කෙනෙකුට ප්‍රේක්ෂකයන්ගේ ඔල්වරසන් හඬ ක්‍රීඩාවට කෙතරම් වැදගත් දැයි හොඳින්ම හැඟෙන්නේ මෙවැනි යුගයක ප්‍රේක්ෂකයන් නොමැති ක්‍රීඩා තරග නරඹද්දීයි.
එහෙත් ප්‍රේක්ෂකයන් නැති සමයක, රෙස්ලින් වැඩසටහන් නිෂ්පාදකයන්ට අපූරු වෙනස්කම් කිරීමේ අවස්ථාවක් ලැබෙනවා. වෙනදා සජීවී ප්‍රේක්ෂකයන් දහස් ගණනක් මැද සජීවී විකාශයක් ලෙස නිෂ්පාදනය කළ වැඩසටහන්, මාසයක් තිස්සේ හිස් ඇරීනාවක පූර්ව පටිගත කිරීමක් ලෙස නිෂ්පාදනය කිරීම රෙස්ලින් වැඩසටහන් ඉදිරිපත් කරන ආකාරයෙහි වෙනස්කම් සඳහාත් මුල පිරුවා.
ඩබ්ලිව්.ඩබ්ලිව්.ඊ. ආයතනය ඔවුන්ගේ රෙස්ලින් වළල්ලෙන් පිට බෝන්යාඩ් මැච්, ෆයර්ෆ්ලයි ෆන්හවුස් මැච්, කෝපරේට් ලැඩර් මනී ඉන් ද බෑන්ක් මැච් ආදි නම්වලින් හැඳින්වූ විවිධ සිනමාත්මක නිෂ්පාදන කළා. වළල්ලෙහි පැවැත්වූ තරගවලට පවා ක්‍රීඩකයන්ගේ කෑගැසීම් ආදි වෙනත් අංග එකතු වුණා.
බෝන්යාඞ් මැච් නමින් හැඳින්වුවේ අන්ඩර්ටේකර් සහ ඒජේ ස්ටයිල්ස් අතර පැවති තරගයක්. සජීවී ඇරීනාවක් වෙනුවට රාත්‍රියක, කනත්තක ඒ තරගය පැවතුණා. වියපත් අන්ඩර්ටේකර්ට නැවත රූගත කිරීම් සමඟ ඉහළ ප්‍රේක්ෂක ප්‍රතිචාර ලැබුණු තරගයක් පටිගත කරන්නට එමගින් අවස්ථාව ලැබුණා.
ෆයර්ෆ්ලයි ෆන්හවුස් මැච් නමින් හැඳින්වුවේ බ්‍රේ වයිට් සහ ජෝන් සීනා අතර පැවති තරගයක්. ජෝන් සීනා කිහිප වතාවක්ම ඇඳුම් මාරු කිරීම පවා ඒ පෙර පටිගත කළ තරගයේදී සිද්ධවුණා.
කෝපරේට් ලැඩර් මැච් නම් තරගයේදී තට්ටු ගණනක් උස ඩබ්ලිව්.ඩබ්ලිව්.ඊ. ප්‍රධාන කාර්යාල ගොඩනැගිල්ල මුදුනේ සිට පහළට රේ මිස්ටීරියෝ සහ ඇලෙස්ටර් බ්ලැක් නම් ක්‍රීඩකයන් තල්ලු කිරීමත් සිද්ධවුණා.
පූර්ව පටිගත යුගයේ ඒ.ඊ.ඩබ්ලිව්. ආයතනයත් අපූරු විජ්ජා පෙන්වුවා. එම ආයතනයේ සිටි මැට් හාර්ඩිට එක් තැනකින් අතුරුදන්ව තවත් තැනකින් මතු වීමේ බලය පවා ලබාදුන්නා. ඊට අමතරව විවිධ රසවත් සිනමාත්මක කොටස් සතිපතා වැඩසටහනට ඔවුන් එකතු කළා.
ඒ සියල්ල සිනමාවේ මෙන්, කැමරා උපක්‍රම පාවිච්චි කරමින් කළ නිෂ්පාදන.
මේ හිස් ඇරීනා යුගයෙහි රෙස්ලින් කර්මාන්තයට නිෂ්පාදනය කළ රසවත්ම තරගය වුණේ ඒ.ඊ.ඩබ්ලිව්. ආයතනයේ ක්‍රිස් ජෙරිකෝ සහ සැමී ගෙවාරාට එරෙහිව කෙනී ඔමේගා සහ මැට් හාර්ඩි සහභාගි වූ ‘ස්ට්‍රීට් ෆයිට්’ තරගය. ගොල්ෆ් කරත්තයකින් සැමී ගෙවාරා හැප්පීම, මැට් හාඩි අධිශීතකරණයක් ඇතුළට දැමීම, කෙනි උසැති ඉනිමඟකින් පැනීම ආදි අවස්ථා නිෂ්පාදනය කරන්නට එහිදී සමත් වුණා. එම තරගයේදීත් කිහිප වතාවක් මැට් හාඩි ඇඳුම් මාරු කළා.
මෙවැනි නිර්මාණවලින් බොළඳ රසයක් හා තරගකාරී වැඩසටහන් සෙවූ ප්‍රේක්ෂකයන්ට ඒ රසය ලැබෙමින් පවතිනවා. හිස් ඇරීනා යුගයෙහි බොහෝ සීමා කිරීම් තිබුණත්, සියල්ලට ඉදිරියෙන් නිර්මාණශීලීත්වය ගෙන නිවෙස්වල සිරවී සිටි ක්‍රීඩා රසිකයන් වෙනුවෙන් රසවත් නිර්මාණ කරන්නට ඉහත සමාගම් දෙක සමත්ව සිටිනවා.
අනුරංග ජයසිංහ
