මුජිබර් රහුමාන් – සමගි ජන බලවේගයේ මැතිවරණ අපේක්ෂක
කොවිඩ් 19 ආසාදනය වීමෙන් මියගිය මුස්ලිම් ජාතිකයන්ගේ අදාහනය සම්බන්ධයෙන් ගැටලුවක් මතු වුණා. ඒ ගැටලුවට ඔබත් මැදිහත් වුණා නේද?
කොවිඩ් 19 ආසාදනය වෙලා කෙනෙක් මියගියාම ඒ පුද්ගලයාගේ අදාහන කටයුතු කරන්නේ කෙසේද කියලා ලෝක සෞඛ්‍ය සංවිධානය නිර්දේශ දීලා තියෙනවා. ලංකාවේත් සෞඛ්‍ය අමාත්‍යාංශය මගින් නිකුත් කළ නිර්දේශවල ආදාහනය සහ භූමිදානය කියන දෙකම කරන්න පුළුවන් කියලා තමයි නිවේදනය කළේ. සෞඛ්‍ය අධ්‍යක්ෂකවරයාත් මේ ගැන මාධ්‍ය හරහා ප්‍රකාශ කළා.එහෙම තිබෙද්දි මුල්ම මරණය සිද්ධ වුණාම මීගමුවේදී පවුලේ සාමාජිකයන්ට කියන්නේ නැතිව බලහත්කාරයෙන් ආදාහනය කරලා තිබුණා. ඒ වෙලාවේ තමයි මේ ප්‍රශ්ණය මතු වුණේ. ආණ්ඩුවට පක්ෂ මුස්ලිම් නියෝජිතයන් පවා අගමැතිවරයාව සහ ජනාධිපතිවරයාව මේ ගැන දැනවත් කරලා තිබුණා. ඔවුන් ඉල්ලීමක් කරලා තිබුණා මුස්ලිම් ජාතිකයන්ගේ මරණ ආදාහනය කරන්න ඉඩ දෙන්න කියලා. නමුත් ජනාධිපතිවරයා සහ අගමැතිවරයා සෞඛ්‍ය බලධාරීන්ට පවසලා තිබුණේ ඔවුන්ට මේ ගැන තීන්දුවක් ගන්න කියලා.
මේ ගැන සාකච්ඡා පැවැත්වුණා නේද?
සෞඛ්‍ය බලධාරින් එක්ක මේ සාකච්ඡාවලට ආවේ අධිකරණ මරණ පරීක්ෂකවරු. ඒ අය සමඟ මුස්ලිම් සමාජය නියෝජනය කරමින් සාකච්ඡාවට මහාචාර්යවරුන් ඇතුළු විශාල පිරිසක් සහභාගි වුණා. ආණ්ඩුව පැත්තෙන් ඒ සාකච්ඡාවට ආවේ පසුපෙළ කණ්ඩායමක්. නොසැලකිල්ල එතැනින් පෙනුණා. ආණ්ඩුව පාර්ශ්වයෙන් ආ පිරිස එතැනදී කතා කරලා තියෙන්නේ දේශපාලන කරුණු. ඔවුන් එතැනදී කියලා තියෙනවා මුස්ලිම් සමාජය ගැන විශ්වාසයක් නැහැ. ඒ වගේම ඉතාම නරක කතාවක් පවා කියා තිබුණා. මුස්ලිම් අය ජීව අවියක් විදියට කොවිඩ් පැතිරුවාලු. ඒ වගේ කතා හින්දා මේ සාකච්ඡා කඩාකප්පල් වුණා.
විද්වත් කමිටුවකට මේ ප්‍රශ්නය යොමු කරන්න කියලා ඉල්ලීමක් කළා නේද?
මුස්ලිම් සමාජය පැත්තෙන් ආණ්ඩුවට පක්ෂ සහ විපක්ෂ සියලුම දෙනා කිව්වේ මේක විද්වත් කමිටුවකට යොමු කරන්න කියලා. අඩුම තරමේ කොළඔ විශ්වවිද්‍යාලයේ තියෙන මෙඩිකල් එතික්ස් කොමිටි කියන කමිටුවටවත් ඉදිරිපත් කරන්න කියලා අපි ඉල්ලුවා. ආණ්ඩුව ඒ කිසිවක් කළේ නැහැ. මේ අර්බුදය නිර්මාණය කළේත් ආණ්ඩුව. අවසන් කටයුතු දෙආකාරයෙන්ම කරන්න පුළුවන් කියලා මුලින්ම ඔවුන් කීවා. එකක් පමණක් කළ යුතුයි කියලා තීන්දු කළේත් ආණ්ඩුව. ඉන්පස්සේ තමයි මේ විදියට ආදාහනය සම්බන්ධයෙන් අර්බුදයක් ඇතිවෙලා ආණ්ඩුව ඇතුළේ ඉන්න ජාතිවාදී කොටස් මුස්ලිම් පුද්ගලයන් ඉලක්ක කරගනිමින් ප්‍රකාශ කරන්න පටන් ගත්තේ. ලෝකේ රටවල් හැම එකක්ම ලෝක සෞඛ්‍ය සංවිධානයෙන් දීලා තියෙන ගයිඩ්ලයින්ස් අනුගමනය කරනවා. ඒත් අපේ රටේ මේ ප්‍රශ්නය ඇතිවුණා.
කොවිඩ් 19 වසංගතය ආරම්භ වු අවධියේ සිටම මුස්ලිම් අයව ඉලක්ක කරමින් ජාතිවාදි ප්‍රකාශ නිකුත් කළා නේද?
කොවිඩ් 19 රට පුරා ව්‍යාප්ත වෙද්දි ආණ්ඩුවෙන්ම සැලසුම් කරන්න ඇති මුස්ලිම අයව ඉලක්ක කරලා වෛරී අදහස් ජනතාව තුළ පතුරවන්නට. අපිට ඒ බව කියන්න ඕනෑ තරම් සාධක තියෙනවා, පසුගිය මැතිවරණ දිහා බැලුවාම. පසුගිය මැතිවරණය සමයේත් ඔවුන් සුළු ජන කොටස් සම්බන්ධයෙන් මේ විදියට බොරු ප්‍රචාර ගෙන ගියා. මේ වෙලාවෙත් ඔවුන් හැකි හැම ආකාරයෙන්ම උත්සහ කරනවා සුළු ජන කොටස් පීඩාවට පත් කරන්න.
කොවිඩ් 19 මේ තරම් දුරට රටේ ව්‍යාප්ත වෙන්න ආණ්ඩුවේ අඩුපාඩු නිසා. මේ වෙනකොට මාස 3ට ආසන්න කාලයක් රටේ ඇඳිරි නීතීය දාලා තියෙනවා. මුලදී ගතයුතු තීන්දු නොගත් නිසා තමයි ඔවුන් මුස්ලිම් ජනතාව ඉලක්ක කරගනිමින් ප්‍රචාර සිදු කළේ. ඒ නිසා ඔවුන් කළේ කොවිඩ් වසංගතය මුස්ලිම් අය ව්‍යාප්ත කරනවා කියලා රටේ අනෙක් ජනතාව අතරේ මුස්ලිම් ජනයාට අප්‍රසාදයක් ඇති කරලා ඔවුන්ගේ අඩුපාඩුව වහගන්න. ඒක හරිගියේ නැහැ.
ඔබ කොළඔ දිස්ත්‍රික්ක නියෝජනය කරන මහජන නියෝජිතයෙක්. කොවිඩ් 19 වසංගතය කොතරම් දුරට කොළඔ නගරයට බලපාලා තියෙනවාද කියලා ඔබට අවබෝධයක් තියෙනවාද?
කොළඔ නගරයේ ජීවත් වන පුද්ගලයන් 60%කට ආසන්න පිරිසක් දවසේ ජීවිකාව ඉපැයූ අය. ඔවුන් දවසේ ආදායමක් ඉපයුවේ ස්වයං රැකියාවන් සහ සුළු රැකියාවන් කරමින්. නමුත් කොවිඩ් 19 වසංගතය නිසා මේ වෙනකොට ඒ සියලුම ව්‍යාපාර කඩා වැටිලා. ඒ මිනිසුන්ට කිසිදු පිළිසරණක් නැහැ. ආණ්ඩුවෙන් රුපියල් 5000ක් ගෙවන්න පටන් ගත්තෙත් දවස් 42ත් විතර ගියාට පස්සේ.
අද වෙනකොට ඒ මිනිස්සු කිසිදු ආකාරයේ ආදායම් මාර්ගයක් නැතිව තමන්ගේ එදිනෙදා වැඩ කටයුතු පවා කරගන්න බැරිව ඉන්නවා. මම හිතන්නේ මේ මිනිස්සුන්ට නැවත ඔවුන්ට තමන්ගේ ව්‍යාපාර කටයුතු යළි ගොඩනැගීමට ආණ්ඩුවෙන් යම් කිසි සහනාධාරයක් දිය යුතුයි කියලා. මේ මිනිස්සු වෙනුවෙන් වැඩ පිළිවෙළක් ක්‍රියාත්මක නොකළොත් ඉදිරියේදි ඒ අයගේ ආර්ථිකය යළි ගොඩනගා ගන්න බැරිව යනවා.
කොළඔ නගරයේ ලොකු බිල්ඩින් තිබුණාට. ඒ බිල්ඩින්වල රෑට විදුලි බුබුළු දල්වලා කොළඔ නගරය ලස්සනට පෙනුණාට ඒ බිල්ඩින්වලට පහළින් දුප්පත් මිනිස්සු ටිකක් ඉන්නේ. ඒ නිසා ඔවුන්ගේ ජීවන මාර්ග කඩා වැටීම ඉතාමත් අවදානම් සහගතයි.
ආණ්ඩුවෙන් ලබා දුන්න රුපියල් 5000 දීමනාව මිනිස්සුන්ට හරි ආකාරයෙන් ලැබුණාද?
නැහැ, ඒ පිළිබඳව විවිධ ප්‍රශ්න විවිධ තැන්වලින් මතු වුණා.රුපියල් 5000ක් හැම පවුලකටම ලැබුණත් ප්‍රධාන ගැටලුව විධියට අපිට පෙනෙන්නේ රුපියල් 5000ක් එක පවුලට ප්‍රමාණවත්ද කියලා. හතර දෙනෙක් ඉන්න පවුලකට රුපියල් පන්දාහකින් මාසයක් කන්න බැහැ. එක් අයෙකුට දවසකට වෙන් කරන්න වෙන්නේ රුපියල් 160ක් වගේ ගාණක්. රුපියල් 160කින් මොනවා කරන්නද? හොඳ වෙලාවට පන්සල්, පල්ලි සහ දානපතියන් ඉදිරිපත් වෙලා මිනිස්සුන්ට ආධාර ලබා දුන්නා. නැත්නම් මිනිස්සුන්ට කන්න නැති තත්වයක් උදාවෙනවා. ජනතාව ගැන කිසි තැකීමක් ආණ්ඩුවට තිබුණේ නැහැ.
කොවිඩ් 19 අරමුදලට මුදල් එකතු වෙමින් තිබෙනවා. ජනතාව වෙනුවෙන් ඒ මුදල් පාවිච්චි කරන්න තිබුණා නේද?
ඔව්, මේ වන විටත් එම අරමුදලට මුදල් එකතු වෙමින් තිබෙනවා. නමුත් ආණ්ඩුව පාර්ශ්වයෙන් කියන්නේ පිටරටවලින් කිසිදු මුදලක් ලැබුණේ නැහැ කියලා. දේශීය ව්‍යාපාරිකයින් විශාල ප්‍රමාණයක් මේ අරමුදලට මුදල් පරිත්‍යාග කරලා තියෙනවා. මේ වෙන කොට දූරකථන රිගින් ටෝන්වලින් පවා අරමුදලට මුදල් ඉල්ලමින් දැන්වීම් දාලා. මේ එකතු කරන මුදල් වියදම් කරන්නේ කවදාද? කා වෙනුවෙන්ද කියන ප්‍රශ්නය ජනතාව තුළ ඇති වෙමින් තියෙනවා. කොවිඩ් 19 වසංගතය නිසා මේ වන විට ජනතාව ආර්ථික අතින් පහළටම වැටිලා. කොළඔ සහ ගම්පහ දිස්ත්‍රික්ක මේ වන විට මාස 2කට ආසන්න කාලයක් වහලා දාලා. ඒ දිස්ත්‍රික්කවල ජීවත්වල අඩු ආදායම් ලාභීන්ට, ස්වයං රැකියාව කරන අයට කිසිම දෙයක් ආණ්ඩුවෙන් මේ වෙනකම් කරලා නැහැ. ජනතාවට ඕනෑ දෙයක් කරගන්න කියලා ආණ්ඩුව බලාගෙන ඉන්නවා. මේ ආණ්ඩුවේ සිටින දේශපාලනඥයන් පසුගිය කාලයේ සිදුවුණු ව්‍යසනයන්වලින් කොතරම් මුදලක් ගසා කෑවා කියලා රටේ ජනතාව දන්නවා. ඒ වගේම මේ මුදල්වලට මොනවා වෙයිද කියලා ප්‍රශ්නාර්ථයක් අපි හැමෝටම තියෙනවා.
ඇඳිරි නීතිය ගැන ඔබේ අදහස මොකක්ද?
අද වන විටත් කොළඔ දිස්ත්‍රික්කයෙන් ආසාදිතයන් කිසිවෙක් වාර්තා වෙලා නැහැ. කොළඔ සහ ගම්පහ වාණිජමය නගර. පිට පළාත්වලින් විශාල ප්‍රමාණයක් මිනිස්සු මේ නගරවලට එනවා. කොළඹට පිටින් ඇවිත් වැඩකරලා යනවා. කොළඹ අය හිරවෙලා ඒ දිහා බලාගෙන ඉන්නවා. මම කල්පනා කරන්නේ මේකේ විද්‍යාත්මක පදනම මොකක්ද කියලා. ඇඳිරි නීතිය කොළඹ සහ ගම්පහ නගරවල තිබුණත් මේ වන විට විශාල ප්‍රමාණයක් ජනතාව මේ නගරවලට ඇතුල් වෙනවා. මේ වෙනකොට ගොඩක් මිනිසුන්ට අමතක වෙලා වෛරසයක් අපි අතර තියෙනවා කියලා. නගරයේ ඉන්න මිනිස්සු ගෙවල් ඇතුළට වෙලා රූපවාහිනි චැනල්වලින් බලාගෙන ඉන්නවා අනෙක් පැතිවල මිනිස්සු කොළඹ ඇවිත් වැඩ කරගෙන යන විදිය.
රටේම ඇඳිරි නීතිය තිබියදී පාලකයන් හා හිතවතුන් ඒවා කඩකළා නේද?
බොහෝ රටවල නායකයන් ඒ රටේ ජනතාවට ආදර්ශයක් දුන් බව අපි දැක්කා. අපේ රටේ නායකයන් රටේ ජනතාවට සමාජ දුරස්ථභාවය ගැන උපදෙස් ලබා දුන්නාට, රටටම ඇඳිරි නීතිය පනවලා තිබුණාට ඒ කිසිදු දෙයක් මේ දේශපාලකයන්ට අදාළ වුණේ නැහැ. අපි දිනපතා දැක්කා ජනාධිපතිතුමා ආගමික ස්ථානවලට යනවා. ඒ අවස්ථාවල කිසිදු සමාජ දුරස්ථභාවයක් තබා ගෙන නැති බව මාධ්‍යවලට නිකුත් කරපු ඡායාරූප මගින් අපි දැක්කා. රටක සේනාධිනායකයා රටේ ජනතාවට ආදර්ශයක් විය යුතුයි. අපි දැක්කා සමහර ඇමතිවරු ඔවුන්ගේ උපන්දින සාද පැවැත්වුවා, අගමැතිතුමා නුවරඑළියේ ගිහින් ඔහුගේ පවුලේ අයත් සමඟ ජීවත් වුණා. ඒ තැන්වලට ගියාට අපිට කිසිදු ප්‍රශ්නයක් නැහැ. නමුත් රටේ ජනතාව ගෙවල් ඇතුළේ හිර වෙලා විශාල කැප කිරීමක් කරද්දී රටේ පාලකයෝ මෙහෙම හැසීරිම හරිම කනගාටුදායකයි.
රටේ මිනිස්සුන්ට මත්පැන් මිලදී ගන්න ක්‍රමයක් නැති වුණත් එක් ඇමතිවරයෙක් සුපිරි හෝටලයට ගිහින් බියර් බොන ඡායාරූප සමාජ මාධ්‍යවල පළකරලා තිබුණා. මේ අයට කිසිම හැඟීමක් තිබුණේ නැහැ රටේ මිනිස්සු ගෙවල්වලට කොටුවෙලා කොතරම් මානසික පීඩනයකින්ද ඉන්නේ කියලා.
