‘බන්දුල ගුණවර්ධන ඇමතිතුමා විසින් ලබාදුන් වැරදි තොරතුරක් මත පදනම් වී නව ක්‍රිකට් පිටිය සඳහා ජාත්‍යන්තර ක්‍රිකට් සභාව විසින් ප්‍රදානයක් ලබාදීමට ඇති බව මා විසින් වැරදි ප්‍රකාශයක් කිරීම පිළිබඳව කණගාටුව පළ කරමි.’ හිටපු පාර්ලිමේන්තු මන්ත්‍රී ට්විටර් වෙබ් අඩවියේ පළ කරන ලද ඉහත සටහන ගෙවුණු සතියේ නාට්‍යමය ලෙසින් මඟහැරුණු මාතෘකාවක අපූරු අවස්ථාවක් විය.
මාතෘකාව වුණේ බන්දුල ගුණවර්ධන අමාත්‍යවරයා ලංකාවේ ලොකුම ක්‍රිකට් ක්‍රීඩාංගනය හෝමාගම ඉදිකරන බව ප්‍රකාශ කිරීමෙන් පසුවය. එම ඉදිකිරීම නාස්තියක් බවට සංවාදයක් ඇතිවිය. ඉන්පසුව එහි වියදම් දරන්නේ අයිසීසීය හෙවත් ජාත්‍යන්තර ක්‍රිකට් කවුන්සිලයෙන් බව උදය ගම්මන්පිල හිටපු මන්ත්‍රීවරයා කියා තිබුණි.
මේ සිදුවීමට පෙර උදය ගම්මන්පිළ මන්ත්‍රීවරයා ගෙවුණු සතියේ වෙරිටේ රිසර්ච් ආයතනය මගින් සිදුකරන ‘ෆැක්ට් චෙක්’ නම් ව්‍යාපෘතිය දැඩිව විවේචනය කරමින් අදහස් පළ කිරීමක් කර තිබුණි. පූර්වාපර සම්බන්ධතා ගලපමින් ඔහු වක්‍රව කියා තිබුණේ ෆැක්ට් චෙක් ව්‍යාපෘතිය සීඅයිඒ ආයතනයෙන් මුදල් ලබා, වත්මන් ආණ්ඩුව බොරු කියන බව ජනතාවට ඒත්තු ගන්වන්නට සිදුකරන එකක් බවයි. 2019 ජනාධිපතිවරණයට පෙර තම කණ්ඩායමේ අය සිදුකරන එකදු ප්‍රකාශයක්වත් සත්‍ය බවට ෆැක්ට් චෙක් ආයතනයෙන් පළ කර නැතැයි ඔහු කියා තිබේ.
ෆැක්ට් චෙක් ආයතනය සිදු කරන්නේ යම් දේශපාලඥයෙකු රටේ යම්කිසි ප්‍රශ්නයක් පිළිබඳව ‘ෆැක්ට් එකක්’ හෙවත් කරුණක් ප්‍රකාශ කළ විට එම කරුණෙහි සත්‍ය අසත්‍යතාවය නිල දත්ත, නිල ප්‍රකාශන, සමීක්ෂණ මත සොයා බලා, ඒ ගැන ප්‍රකාශ කිරීමයි. ලොව දියුණු ප්‍රජාතන්ත්‍රවාදයක් ඇති රටවල දේශපාලඥයන් ප්‍රසිද්ධියේ සිදුකරන තීරණාත්මක ප්‍රකාශවල සත්‍ය අසත්‍යතාවය ‘ෆැක්ට් චෙක්’ ආයතන වලින් සොයා බැලීම දශක ගණනක් තිස්සේ සිදුවිය. වැරදි කරුණක් කීවොත් හෙළි කරනු ලබයි. ලංකාවටද ඒ දියුණු සම්ප්‍රදාය පැමිණීම ගැන ප්‍රජාතන්ත්‍රවාදයට ගරු කරන උදවිය සතුටු විය යුතුය.
වෙරිටේ රිසර්ච් ආයතනය ගම්මන්පිළ මහතාගේ ප්‍රකාශයට සම්පූර්ණ පිළිතුරක් ලබාදී ඇත. ගම්මන්පිළ හිටපු මන්ත්‍රීවරයා ෆැක්ට් චෙක් ආයතනය ගැන කළ කතාවද සාවද්‍ය බව ඔවුන් පෙන්වාදී තිබේ.
ෆැක්ට් චෙක් ආයතනය ගැන අදහස් පළකිරීම සහ ගම්මන්පිළ මන්ත්‍රීවරයාගේ ට්විටර් පණිවුඩය අපූරුවට එකිනෙක ගැලපෙයි.
හෝමාගම ක්‍රිකට් ක්‍රීඩාංගණය තමන්ගේ වියදමින් ඉදි නොකරන බවට අයිසීසීය නිවේදනයක් නොදැම්මානම්, ෆැක්ට් චෙක් ආයතනයකින් ඒ ගැන සොයා බැලීමකුත් නොකළානම් රූපවාහිනියෙන් දේශපාලඥයන්ගේ කට දෙස බලා සිටින සාමාන්‍ය දැනුමක් ඇති පුරවැසියන් වැරදි අවබෝධයක් ලබනු ඇත. රටට අනවශ්‍ය ක්‍රිකට් ක්‍රීඩාංගණයක් හෝමාගම ඉදිකිරීම වෙනුවෙන් වනසන්නේ තමන්ගේ බදු මුදල් බව අර කට දෙස බලා සිටි ජනතාවට නොවැටහෙනු ඇත.
ඒ නිසා ගම්මන්පිළ හිටපු මන්ත්‍රීවරයා හෝමාගම ඉදිවෙන ක්‍රිකට් ක්‍රීඩාංගණය ගැන කී කතාවෙන්ම ෆැක්ට් චෙක් ආයතන තිබිය යුත්තේ ඇයිදැයි තේරුම් ගත හැකිය. දේශපාලඥයන් ජනතාව ගොනාට ඇන්දවීම නැවැත්වීමට ෆැක්ට් චෙක් ආයතන අවැසි වේ.
ගම්මන්පිළ මන්ත්‍රීවරයා තමන් කළ ප්‍රකාශයක් වැරදි බව ප්‍රසිද්ධියේ පවසමින්, එයට කණගාටුව ප්‍රකාශ කිරීම යහපත් දෙයකි. එම ට්විටර් පණිවුඩයන් ඔහු කියා ඇති ආකාරයට ඔහුට වැරදි කරුණු සපයා ඇත්තේ කැබිනට් මාධ්‍ය ප්‍රකාශක බන්දුල ගුණවර්ධනය. කැබිනට් මාධ්‍ය ප්‍රකාශකවරයා එවැන්නක් තමා සමඟ කීවා නම්, එය ප්‍රසිද්ධියේ කීම ගම්මන්පිළ මන්ත්‍රීවරයාගේ වරදක් නොවේ.
මෙම කතාබහට මුල් වූ හෝමාගම ඉදිකරන්නට සූදානම් වන බව කියන, ලංකාවේ ලොකුම ක්‍රිකට් ක්‍රීඩාංගණය යැයි කියන ඉදිකිරීම නම් මහජන මුදල් මහා පරිමාණයෙන් නාස්ති කිරීමට සූදානම් වීමක් බව අමුතුවෙන් කිව යුතු නැත.
මෙවැනි ක්‍රීඩාවක් අපට අවැසි නොවන බව අප මෙහි ලියන්නට ඕනෑ නැත. හිටපු ක්‍රිකට් නායක මහේල ජයවර්ධන ඒ බව ප්‍රසිද්ධියේ කියා හමාරය. මෙම ක්‍රිකට් ක්‍රීඩාංගණය ඉදිකරන්නේ ශ්‍රී ලංකාවේ ලෝක කුසලානයක් පැවැත්වීම සඳහා යැයි ශ්‍රී ලංකා ක්‍රිකට් ආයතනය කියා තිබුණි. එයටද මහේල ජයවර්ධන පිළිතුරු දී තිබේ. ඔහු පෙන්වාදී තිබෙන්නේ මීට පෙර ලංකාවේ සම්පූර්ණයෙන්ම විස්සයි විස්ස ක්‍රිකට් ලෝක කුසලානයක් පවත්වා ඇති බවත්, එයට අළුත් ක්‍රීඩාංගණයක් ඕනෑ නැති බවත්ය. මහේල ජයවර්ධනට අමතරව හිටපු ක්‍රිකට් නායක රොෂාන් මහානාමද මෙම ක්‍රිකට් ක්‍රීඩාංගණය ඉදිකිරීම තේරුමක් නැති බව කියා ඇත.
ඒ අයට අමතරව රටේ සාමාන්‍ය පුරවැසියන්ද සමාජ මාධ්‍ය වලින් ක්‍රිකට් ක්‍රීඩාංගණයට එරෙහිව පොදුවේ අදහස් දක්වා තිබේ. ඒ සියල්ල අහගත්තාට පසුව, ක්‍රිකට් ක්‍රීඩාංගණය ඉදිකිරීමේ වුවමනාවක් තිබෙනවා නම්, ක්‍රිකට් ක්‍රීඩාංගණ ගැන ලංකාවට අවසන් වරට ඇති අත්දැකීමෙන් කරුණක් දෙකක් අපට ඉදිරිපත් කළ හැකිය.
2019 ජනාධිපතිවරණයට ඔන්න මෙන්න කියා ඔක්තෝබර් 23 වැනිදා කෝප් කමිටුව තවත් වාර්තාවක් ඉදිරිපත් කර තිබුණි. එහිදී ශ්‍රී ලංකා වරාය අධිකාරිය 2018 වර්ෂයේදී කෝප් කමිටුව ඉදිරියට ගෙනැවිත් ප්‍රශ්න කිරීම් සිදුකර තිබුණි. එහිදී සූරියවැව ක්‍රිකට් ක්‍රීඩාංගණයට වැය වී ඇති මුදල් පිළිබඳ කරුණු මතු වී තිබුණි.
වරායෙන් ක්‍රිකට් ක්‍රීඩාංගණ ගැන විමසන්නේ ඇයිදැයි කෙනෙකු විමසිය හැකිය. ඒ ආණ්ඩුවේ හැටි එහෙමය. වරායෙන් ක්‍රිකට් ක්‍රීඩාංගණ ඉදි කළේය.
කෝප් කමිටු වාර්තාව අනුව සූරිවැව ක්‍රිකට් ක්‍රීඩාංගණය ඉදිකිරිමේ ව්‍යාපෘතිය සඳහා ශ්‍රී ලංකා වරාය අධිකාරිය මුදල් ගෙවිය යුතුව තිබුණි. එහෙත් එම මුදල් ගෙවීම ප්‍රමාද වී තිබේ. රුපියල් මිලියන 993.8ක් හා ගෙවීම් පමා කිරීමේ පොලියද ඇතුළුව රුපියල් මිලියන 3950.8ක් හෙවත් කෝටි 395ක් කොන්ත්‍රාත්කරුට ගෙවීමට අවසාන එකඟතාවයට පැමිණ ඇත. ඒ බව වරාය අධිකාරියේ කළමණාකරණය කෝප් කමිටුවට දන්වා තිබුණි.
එම මුදල සමාගම වෙත ලැබී ඇත. එහෙත්, 2017 දෙසැම්බර් 31 වනවිට වරාය අධිකාරියේ ගිණුම් පොත්වලින් එම ගෙවීම් ඉවත් කර තිබේ. මේ පිළිබඳව කරුණු දක්වමින් වරාය අධිකාරියේ සභාපතිවරයා කියා ඇත්තේ මෙම ගෙවීම ඉතා විශාල බැවින් එය කිරීමට වරාය අධිකාරිය එකඟ නොවූ බවයි. මෙම මුදල් භාණ්ඩාගාරයෙන් ගෙවා නිමකරන බව ලිඛිතව දැනුවත් කර ඇති බැවින් එය වරාය අධිකාරියේ ගිණුම්වලින් ඉවත් කළ බව ඔහු කියා තිබුණි.
සිදුවී තිබුණේ මෙම මුදල ගෙවීම සඳහා වරාය අධිකාරිය 2018 දී මහජන බැංකුවෙන් ණය මුදලක් ලබාගැනීමයි. සමාගමට මුදල් ගෙවා තිබුණේ ඒ ණය අනුවය. කවුරුන් හෝ නිල වශයෙන් ණය ඉල්ලා සිටිය යුතු නිසා වරාය අධිකාරිය මහජන බැංකුවෙන් ණය ඉල්ලුම් කළත්, ඇත්තටම ඒ ණය මහා භාණ්ඩාගාරයෙන් ගත් එකක් ලෙස සැලකිය යුතු බව වරාය අධිකාරිය කියා තිබේ. සියළු ගෙවීම් මහා භාණ්ඩාගාරයෙන් සිදුකරන බව කොන්දේසියක්ද එම ණය ගිවිසුමේ තීබී ඇතැයි වරාය අධිකාරිය කියා තිබේ.
කරුණු කෙසේ වෙතත් මෙතැන විශාල ගැටළුවක් ඇත. 2017 ගිණුම් පොත්වලින්ම ඉහත කී බිලියන ගණනක ගෙවීම ඉවත් කර ඇත. ඉන්පසුව ඒ වෙනුවෙන් 2018 දී ණයක් ලබාගෙන ඇත. ඉන්පසුව ණය ගෙවන්නේ මහා භාණ්ඩාගාරයෙනි. මෙම ක්‍්‍රියාවලියෙහි ගැටළුවක් ඇති බව කෝප් කමිටුව නිර්දේශ කර ඇත. සමස්ථයක් වශයෙන් ගත් කළ මේ ගෙවන්නට සිදුව ඇත්තේ රාජපක්ෂ ආණ්ඩුව කාලයේ හම්බන්තොට ඉදිකිරීම් කරමින් මහජනතාවට විනෝදය සපයන්නට කළ කි කටයුතුවල ප්‍රතිඵලයන්ය. එහෙත් යහපාලන ආණ්ඩුව බලයට පත්වූ පසු එම ගැටළු ගිණුම් පොත්වල හිස්තැන් තබමින් ආවරණය කොට පළක් නැත. ඒවා සඳහා විනිවිදභාවයෙන් යුතු ක්‍රියාවලියක් අනුගමනය කිරීම වැදගත්ය.
ඉහත පටලැවිලි ගැනත් කියන්නට ඇත්තේ පෙර කතාවමය. මේ ලංකාවේ ඉදිකිරීම් සිදුවන ආකාරයය. මුදල් එන්නේ කොහෙන්ද, ඒවා වියදම් කරන්නේ කොහෙන්ද කියා ආණ්ඩුවේ ලොක්කන්වත් දන්නේ නැත. හා ගුල් අවුස්සනවා මෙන් මේවායේ මුල් සොයා යමින් අවුස්සන්නට පාර්ලිමේන්තුවේ කෝප් කමිටුව වැනි ආයතනවලට සිදුවෙයි. (අතුරු කතාවක් සිහිපත් කළ යුතුය. පාර්ලිමේන්තුව වසා දමන්නට දැන් ආණ්ඩුවේ හිතවතුන්ට ඕනෑ වී තිබෙන්නේ මෙවැනි හා ගුල් අවුස්සන නිසා විය යුතුය.)
අප අවසානයේ සිහිපත් කළ යුත්තේ මෙවැනි ව්‍යාපෘති රටටත්, ක්‍රීඩාවටත්, පුරවැසියන්ටත් යහපතක් නොකළාට, ඇතැම්විට ආණ්ඩුවේ ලොක්කන්ට යහපතක් කරනු ඇති බවය.
