මාර්තු 20 වැනිදා සිට බස්නාහිර පළාතේ සිරවී සිටින, ගම්බිම් බලා යෑම සඳහා ලියාපදිංචි වී සිටින 51,868ක පිරිසක් අතරින් 40,000ක පමණ පිරිසක් තවමත් බස්නාහිර පළාතේ සිරවී සිටින බවත් එම පුද්ගලයන් ගම්බිම් බලා පිටත් කිරීමට තවත් සති කිහිපයක් ගතවිය හැකි බවත් වාර්තා වේ.
එම පුද්ගලයන්ව ගම්බිම් බලා යැවීමේ වැඩසටහන බස්නාහිර පළාත බාර ජ්‍යෙෂ්ඨ නියෝජ්‍ය පොලිස්පති දේශබන්දු තෙන්නකෝන්ට පැවරී ඇති අතර එම ක‍්‍රියාවලිය මන්දගාමීව සිදුකෙරෙන බව ඒ පිළිබඳව විමසීමකදී අදහස් දැක්වූ ඉහළ පොලිස් නිලධාරියෙක් කීය.
මැයි 13 වැනිදා ගම්බිම් බලා පිටත් වූ 2000ක පිරිසත් ඇතුළත්ව මෙතෙක් 10,000ක පමණ පිරිසක් ගම්බිම් බලා පිටත් කර ඇති බව ඔහු කීය. ඒ අනුව මාස දෙකක පමණ කාලයක් තිස්සේ සිරවී සිටි අය අතරින් වැඩි පිරිසක් තවමත් සිරවී සිටින බවද ඔහු වැඩිදුරටත් කීය.
බහුතර පිරිසක් තවම සිරවී සිටින නිසා, දැනට ක‍්‍රියාත්මක වන වැඩපිළිවෙළට වඩා කාර්යක්ෂම වැඩපිළිවෙළක් පුද්ගලයන් ගම්බිම් බලා ගෙනයෑම සඳහා ක‍්‍රියාත්මක කළ යුතු බව ඔහු පැවසීය. මේ වන විට බස්නාහිර පළාතේ සිරවී සිටින පුද්ගලයන් අතරින් සැලකිය යුතු පිරිසක් ආහාර ඇතුළු අනෙකුත් පහසුකම් නොමැතිකමින් අසීරුවෙන් පසුවෙන බව ඔහු පැවසීය.x
