ශ‍්‍රී ලංකා පොදුජන පෙරමුණේ ජාතික සංවිධායක ඇමෙරිකා ශ‍්‍රී ලංකා ද්විත්ව පුරවැසි බැසිල් රාජපක්ෂගේ ප‍්‍රධානත්වයෙන් කාර්යසාධක බලකායක් පිහිටවනු ලැබුයේ කොවිඞ්-19 වසංගත තත්වය හමුවේ ජන ජීවිතය බිඳ නොවැටී අත්‍යවශ්‍ය ආහාර ද්‍රව්‍ය ඇතුළු භාණ්ඩ ජනතාවට ලබාදීම සම්බන්ධීකරණය සඳහාය.
එහෙත් එම කාර්යසාධක බලකායෙන් සිදු නොවූ දෙයද එයම විය හැකිය. සිදුවූ දෙය නම් ජීවනෝපාය අහිමිවූ ජනයාට රුපියල් 5000ක දීමනාවක් ලබාදීම සඳහා වූ කටයුත්ත දේශපාලනීකරණයට ලක් කිරීමය.
එම කටයුත්ත දේශපාලනීකරණයට ලක් කිරීමේ ප‍්‍රතිඵලය වශයෙන් අදටත් අසන්නට ලැබෙන්නේ එම මූල්‍යමය සහනය ලබාගැනීමට සුදුසුකම් තිබූ එහෙත් නොලැබූ අයගේ දුක් අදෝනාය.
එමෙන්ම මූල්‍යමය නොවන ආහාර ද්‍රව්‍ය ඇතුළු අනෙකුත් අත්‍යවශ්‍ය භාණ්ඩ සහන නොලැබූ ජනයාගේ දුක් අඳෝනාය. අමතරව මූල්‍යමය හැකියාවක් තිබුණද ආහාර ද්‍රව්‍ය ඇතුළු අත්‍යවශ්‍ය ද්‍රව්‍ය සිය පෙදෙස් වෙත ළඟ නොවූ ජනයාගේ කතාය.
මේවා මෙසේ වන්නේ ඇයි? එම කටයුතු නිසියාකාරව සිදුකිරීම සඳහා රජය සතුව ජනතාවගේ තොරතුරු නැති නිසාද? එය එසේ නොවන බව පැහැදිලිය. ග‍්‍රාම නිලධාරීවරයා සතුව ඔහු හෝ ඇයගේ වසමේ ජීවත්වන ජනයාගේ තොරතුරු පවතී. තොරතුරක අඩුපාඩුවක් ඇතොත් එසේ විය හැක්කේ තාවකාලික පදිංචිකරුවන් සම්බන්ධයෙන් හා අලූතෙන් පදිංචියට ආ පදිංචිකරුවන් සම්බන්ධයෙන් පමණක් විය හැකිය.
සමෘද්ධි නියාමකයා සතුවද ඔහු හෝ ඇය අයත් ග‍්‍රාමසේවා කොට්ඨාසයක සමෘද්ධි ප‍්‍රතිලාභ ලබන ජනයාගේ තොරතුරු පවතී. කෘෂි නිලධාරියා සතුව කෘෂිකර්මය ජීවනෝපාය කරගත් පිරිසගේ තොරතුරු මෙන්ම ගොවි විශ‍්‍රාම වැටුප්ලාභීන් පිළිබඳ තොරතුරු පවතී. ධීවර පරීක්ෂකවරයා සතුව ඔහුට අයත් ප‍්‍රදේශයේ කරදිය හෝ මිරිදිය ධීවර කර්මාන්තයේ යෙදෙන පිරිස් හා ධීවර විශ‍්‍රාම වැටුප ලබන පිරිස්වල තොරතුරු තිබේ.
එමෙන්ම ඒ ඒ ප‍්‍රාදේශීය ලේකම් කොට්ඨාසයේ සිටින සමාජ සේවා නිලධාරීන් සතුව ඔවුන්ට අයත් කොට්ඨාසවල ආබාධිත, වැඩිහිටි ආදි දීමනා ලබන පිරිස්වල තොරතුරු තිබේ.
මීටත් අමතරව ජනලේඛන හා සංඛ්‍යාලේඛන දෙපාර්තමේන්තුව සතුව වසර කිහිපයකට වරක් සිදුකරන ජන සංගණනයේ තොරතුරු තිබේ. රටේ ගොඩනැඟිලි ගණන, නිවාස ගණන පවුල් ඒකක ගණන, රැකියාලාභීන් ගණන, ශ‍්‍රම බලකායේ අනෙකුත් පිරිස් ගණන ආදි බොහෝ තොරතුරු එම දෙපාර්තමේන්තුව සතුව පවතී. ආසන්න වර්ෂයක තොරතුරු නැතත් එම දෙපාර්තමේන්තුව සතු තොරතුරුවලින්ද වෙනසක් විය හැක්කේ සීමිත ප‍්‍රතිශතයක තොරතුරු පමණි.
එහෙත් මේ තොරතුරු කිසිවක් නිවැරදි සම්බන්ධීකරණයකින් යුතුව රට තුළ පවතින ආපදා තත්වයකදී ප‍්‍රයෝජනයට ගන්නා අයුරක් මේ කොවිඞ් වසංගත තත්වයේදීත් දකින්නට නොවීය. සුනාමි ව්‍යසනයේදීත් එය එසේම සිදුවූ අතර ඉන්පසු ඇතිවූ මහා ගංවතුර අවස්ථාවලදීත් තත්වයේ වෙනසක් නොවීය.
ජනමාධ්‍ය ආයතනද, විවිධ සංවිධානද, පුද්ගලයන්ද පීඩාවට පත් ජනතාවට බෙදාදීමට යැයි කියා හිතූ හිතූ ආකාරයට ආධාර එකතු කිරීමත්, හිතූ හිතූ ආකාරයට ආධාර බෙදාදීමත් සිදුකරනු ලැබීය. ඒ මගින් අවශ්‍ය අයටත් අනවශ්‍ය අයටත් ආධාර බෙදී ගියේය. සමහරුන්ට කිසිදු ආධාරයක් නොලැබෙන විට සමහරුන්ට වැඩිපුර ආධාර ලැබුණේය. සමහරුන්ට අනවශ්‍ය ආධාරද ලැබුණේය. (උදාහරණයකට ළදරු කිරිපිටි හෝ ළදරු බිස්කට් වැනි කෑම අනවශ්‍ය පවුලකට එම ද්‍රව්‍ය ලැබිය හැකිය.)
මේ ආකාරයට ජනමාධ්‍ය ආයතනවලට විවිධ සංවිධානවලට හෝ විවිධ පුද්ගලයන්ට ආපදා අවස්ථාවකදී හෝ වසංගත අවස්ථාවකදී ඔවුන්ගේ හිතු මනාපයට ආධාර බෙදන්නට දුනහොත් සිදුවන්නේ එම ආධාර අවශ්‍යම අයට නොලැබීමත්, අනවශ්‍ය අයට ලැබීමත් හා යම් අයට අනවශ්‍ය ද්‍රව්‍ය ලැබීමත්ය. සද්භාවයෙන් කරනවා යැයි කියනු ලබන මෙවැනි ආධාර බෙදීම්වල අවසන් ප‍්‍රතිඵලය නාස්තිය හා අසමානතාව තීව‍්‍ර කිරීමය.
මේ සද්භාවය ගැනද වචනයක් කිව යුතුය. ජනමාධ්‍ය ආයතනද, විවිධ සංවිධානද, ව්‍යාපාරික ආයතනද බෙදන ආධාර තුළ ඇත්තේ සද්භාවයටත් වඩා බෙදන ආධාර තුළින් යළි ප‍්‍රචාරයක් ලබාගැනීමේ වක‍්‍ර ප‍්‍රතිලාභයය. බෙදන හැම ආධාරයක්ම පෙන්න පෙන්නා ලබාදීමත් ජනමාධ්‍ය ආයතන මෙන්ම ව්‍යාපාරික ආයතනත් කරන්නේ ඒ නිසාය. ඉනුත් ඔබ්බට යමින් ආධාර බෙදීමේ වාහනවල ආයතනික නම් ප‍්‍රදර්ශනය කරමින් ආධාර බෙදන්නේද ඒ නිසාය.
ඒ නිසා ආපදා අවස්ථාවකදී හෝ වසංගත අවස්ථාවකදී රජයක් කළ යුතු එක් කාර්යයක් වන්නේ ඒ ඒ ප‍්‍රදේශවලට අදාල තොරතුරු සතු රාජ්‍ය යාන්ත‍්‍රණය සම්බන්ධීකරණය කර එම තොරතුරු මත ආධාර ලබාදීමට හැකි මාර්ගෝපදේශක හෝ යාන්ත‍්‍රණ සකස් කිරීමය. ආණ්ඩු හෙවත් දේශපාලන නායකත්වය අවශ්‍ය වන්නේ එම කටයුතු වෙනුවෙන් තීන්දු තීරණ ගැනීමටය.
කොවිඞ්-19 වසංගත තත්වය හමුවේ ජනතාව ‘ලොක්ඩවුන්’ වී සිටියදී සිදු නොවුණේත් එම දේය.
