ශ්රී ලංකාවට ඩොලර් මිලියන 4.5ක ආධාරයක් ලබාදෙන බව ශ්රී ලංකාවේ ඇමෙරිකා එක්සත් ජනපද තානාපති කාර්යාලය නිවේදනයකින් ප්රකාශ කර ඇත. ඒ අනුව ශ්රී ලංකාවට ලබාදෙන සමස්ත ආදායම ඩොලර් මිලියන 5.8ක් බව එම නිවේදනයෙහි සඳහන්ය. ඒ අපේ්රල් 9 වැනිදා ලබාදුන් ඩොලර් මිලියන 1.3ක ආධාරයත් සමඟය. එම නිවේදනය අනුව ශ්රී ලංකාවට මීට පෙරද ඇමෙරිකානු ආධාර ලැබී ඇති බව පැහැදිළි වෙයි.
මැයි 06 වැනිදා ආධාර මුදල ලබාදී ඇත්තේ ජාත්යන්තර සංවර්ධනය සඳහා වන එක්සත් ජනපද නියෝජිතායතනය හෙවත් යූඒඒඞ් ආයතනයෙනි. අර්බුදයෙන් බලපෑමට ලක්වූ ප්රදේශ සහ ජන කොටස්වලට සමාජ සේවා වර්ධනය කිරීමත්, සමාජ ඒකාබද්ධතාවය ගොඩනැංවීම සඳහාත් ඉන් මිලියන 2ක් වෙන්කළ යුතුය. තවත් ඩොලර් මිලියන 2ක් කුඩා හා මධ්ය පරිමාණ ව්යාපාර ශක්තිමත් කිරීමට සහ ආර්ථිකයට කාන්තාවන්ගේ සහභාගීත්වය වර්ධනය කිරීමට යොදවනු ඇත. ඉතිරි ඩොලර් ලක්ෂ 6කට ආසන්න මුදල මානුෂීය ආධාර වශයෙන් ලබාදී ඇත. කොටින්ම කීවොත් රුපියල් පන්දහසේ ආධාර බෙදීම වැනි ව්යාපෘතිවලට එය යෙදවිය හැකිය.
අපේ්රල් 09 වැනිදා ලබාදී තිබුණු ආධාර මුදල් විද්යාගාර පද්ධති සූදානම් කිරීමටත් සිද්ධි සොයාගැනීම සක්රීය කිරීමට හා සිදුවීම් පාදක ආවේක්ෂණයටත්, ප්රතිචාර හා පෙරසූදානම සඳහා තාක්ෂණික විශේෂඥයන්ට සහය ලබාදීමටත් උපකාරී වී ඇති අතර ඒ මත පදනම් වෙමින් මැයි 06 වැනිදා නව ආධාර මුදල ලබාදෙනු ලබන බව එම නිවේදනයෙහි සඳහන් කර ඇත.
කෙටියෙන් කීවොත් කලින් ලැබුණු ආධාරය ඇසුරෙන් ව්යාපෘති ක්රියාත්මක කොට, ඒ පිළිබඳව තොරතුරු ඇමෙරිකානු රජයට ලබාදී එයින් සෑහීමට පත්වීමෙන් පසුව තවත් මුදල් ලබාදීම සිදුවී ඇත. අපූරු කාරණය වන්නේ මේ සියල්ල සිදුව ඇත්තේ ශ්රී ලංකාවට පිටරටින් ඩොලර් එකක්වත් ලැබුණේ නැති බව කියන අතරේය.
පසුගිය සතියේ ආණ්ඩුව පාර්ශ්වයෙන් කළ ප්රකාශයක් වුණේ ශ්රී ලංකාවට විදේශාධාර ඩොලර් එකක්වත් ලැබී නොමැති බවයි. ලෝක බැංකුවෙන් මුදල් දීමට පොරොන්දු වුණත්, ඒ මුදලත් ලැබී නැති බවයි. අපේ ආණ්ඩුව එසේ කීවත්, ලෝක බැංකුව, යුනිසෙෆ් ආයතනය, කැනඩා රජය, යුරෝපා සංගමය, ඇමෙරිකා එක්සත් ජනපද රජය ඇතුළු ලෝකයේ පිළිගත් රාජ්යයන් හා ආයතනයන්හි නිල වෙබ් අඩවි අනුව ශ්රී ලංකාවට ඩොලර් මිලියන ගණනක ආධාර දීමට තීරණය කර ඇත. එම ආධාර මුදල් අතරින් ඇතැම් ඒවා ශ්රී ලංකාවට සම්පේ්රෂණය කිරීම හෝ ඒවාට අදාල ගිවිසුම් අත්සන් කිරීම් සිදුවී නොමැති විය හැකිය. එහෙත් ඇමෙරිකානු තානාපති කාර්යාලයේ නිවේදනයෙන් පැහැදිළි වෙන්නේ සමහර ආධාර ලැබී තිබෙන බවයි.
ආණ්ඩුව කළ යුත්තේ ඩොලර් එකක්වත් නොලැබුණු බව කීම නොවේ. තමන්ට ලැබුණු හා ලැබීමට නියමිත ආධාර ගැන නොසඟවා කරුණු කීමය.
ලැබුනු හෝ ලැබීමට නියමිත ආධාර ගැන ශ්රී ලංකාවේ නිල ප්රවෘත්ති වෙබ් අඩවියෙහිද සඳහන්ය. එක්කෝ එම නිල වෙබ් අඩවිවල ඇත්තේ බොරුය. නැත්නම් ආණ්ඩුවේ නායකයන් බොරු කියයි.
කොවිඞ්-19 නිසා මේ වන විට ලෝකයම විශාල ආර්ථික අර්බුදයකට මුහුණදෙමින් සිටී. ද ඉකොනොමිස්ට් සඟරාවද පෙන්වාදී තිබුණු අන්දමට මෙම ආර්ථික බලපෑම දරුණු ලෙසම බලපාන ලොව රටවල් අතර ශ්රී ලංකාවද සිටී. මහා ආර්ථික විග්රහයන් නැතත් සරලවම තත්වය තේරුම්ගත හැකිය. අප විදේශ ශ්රමිකයන්, ඇඟලූම් හා තේ අපනයනය හා සංචාරක කර්මාන්තය යන ප්රධාන ක්ෂේත්ර තුනක් මත විශ්වාසය තබාගෙන සිටි රටකි. මේ ක්ෂේත්ර තුනම කොවිඞ්-19 වසංගතය නිසා කඩාවැටීමකට ලක්ව ඇත.
ඒ අනුව ශ්රී ලංකාවට වෙනත් විකල්ප නැත. ජාත්යන්තර ආධාර සඳහා හැකි තරම් අයදුම් කොට ඒවා ලබාගැනීම, ලංකා රජය ගෙවිය යුතු ණය සඳහා සහන කාලයක් ලබාගැනීම, සහන කොන්දේසි සමඟ ණය ලබාගැනීම ආදී ක්රියාමාර්ග ගැනීමට සිදුවෙයි.
ආණ්ඩුවේ නායකයන් දැනටමත් ප්රකාශ කර ඇති පරිදි ශ්රී ලංකාව එවැනි සහන සඳහා ජාත්යන්තර ආයතන කිහිපයකින්ම ඉල්ලූම් කර ඇත. ජාත්යන්තර මූල්ය අරමුදලෙන්ද සහන ඉල්ලා ඇත. ලෝක සෞඛ්ය සංවිධානයේ අධ්යක්ෂ ජෙනරාල්වරයාගෙන් ජනාධිපතිවරයා ඉල්ලීමක් කර ඇත්තේ ආධාර ලබාදෙන්නැයි බලවත් රටවල්වලට කියන ලෙසය.
හිටපු මුදල් රාජ්ය අමාත්ය ඉරාන් වික්රමරත්න අනිද්දා සමඟ සම්මුඛ සාකච්ඡාවකදී යෝජනා කර තිබුණේ ශ්රී ලංකාව ජාත්යන්තර මූල්ය අරමුදල සමඟ ගිවිසුමකට ශ්රී ලංකාව යා යුතු බවත්, වසර කිහිපයක් සැලසුමක් සමඟ රටේ ආර්ථිකය යළි ගොඩගැනීමට කටයුතු කළ යුතු බවත්ය.
තමන්ට ලැබෙන විදේශ ආධාර ගැන විවෘතව කතාකිරීම වත්මන් ආණ්ඩුව ජනතාව ඉදිරියේ රඟපාන චරිතයට එතරම් නොගැලපෙන බව ආණ්ඩුව කල්පනා කරනවා විය හැකිය. ලෝකයම තමන්ට එරෙහිව කුමන්ත්රණය කරන බවත්, තමන්ට එරෙහිව ලංකාව වෙත මුදල් එවන බවත් විමල් වීරවංශ වැනි ආණ්ඩුවේ කථිකයන් ලංකාවේ පුරවැසියන් වෙත කියන කතාවය. මහමැතිවරණයක් අත ලඟය. විශේෂයෙන්ම ඇමෙරිකාවේ යූඑස්ඒඞ් ආයතනය ලංකාව ‘වනසන්නට’ මුදල් දෙන බව වත්මන් ආණ්ඩුවේ හිතවාදීන් චෝදනා කරන අවස්ථා ඕනෑතරම් අප දැක ඇත. එවැනි ආයතන වලින් මේ මොහොතේ පීඩා විඳින ලංකාවේ ජනතාව වෙත ආධාර ලැබෙන බව කියන්නට ආණ්ඩුවේ දිව නැවෙන්නේ නැතිවා විය හැකිය.
ලෝකයෙන් ලැබෙන දේවල් ගැන නොකියා සිටීම ‘අහිංසක’ කරුණු වසන් කිරීමක් නොවේ. ලංකාවේ පුරවැසියන් අතර ජාතික හැඟීම් වර්ධනය කිරීම වෙනුවෙන් බාහිර බලවේග (බටහිර බලවේග, ඉස්ලාම් ත්රස්තවාදය) ගැන බිය ඇවිස්සීම මේ ආණ්ඩුවේ දේශපාලන න්යායපත්රයේ කොටසකි. අතිථිභීතිකාව හෙවත් සෙනෆෝබියාව (xenophobia) ලෙස මේ බිය හඳුන්වයි. ‘ජාතිය විනාශ කරන්නට වළිකන’ බාහිර බලවේග වලින් ආධාර ලැබෙන බව කීම ආණ්ඩුවේ පැත්තෙන් කළ නොහැක්කකි.
පිළිගත් වෙබ් අඩවිවල සඳහන් ආකාරයට ශ්රී ලංකාවට ජාත්යන්තර ආයතන හා රාජ්යයන් ලබාදීමට නියමිතව ඇති ආධාර මෙසේය.
අපේ්රල් 02 වැනිදා ලෝක බැංකුවේ වෙබ් අඩවියෙහි පළවී තිබුණු ආකාරයට ඩොලර් මිලියන 128 ක ආධාරයක් ශ්රී ලංකාවට ලබාදීමට ලෝක බැංකු විධායක අධ්යක්ෂවරුන් අනුමැතිය ලබාදී තිබුණි. මෙය ‘ෆාස්ට් ට්රැක් සපෝර්ට්’ නම් ක්රමවේදය හරහා ලබාදිය යුතු ක්ෂණික ආධාරයකි. කෙසේ වෙතත් මෙම මුදල ලබාගැනීමට අදාල ගිවිසුමට තවම අත්සන් තබා නැතැයි මැයි 04 වැනිදා අරලියගහ මන්දිරයේ පැවති රැුස්වීමකදී මුදල් අමාත්යාංශයේ ලේකම් එස්.ආර්. ආටිගල මහතා කියා තිබුණි.
යුරෝපා සංගමයේ නිල වෙබ් අඩවිය අනුව යුරෝ මිලියන 22ක ආධාර මුදලක් ශ්රී ලංකාවට ලබාදී ඇත. ඒ බව සඳහන්ව ඇත්තේ අපේ්රල් 09 වැනිදා එම වෙබ් අඩවියෙහි සඳහන්ව ඇති නිවේදනයකින් වන අතර එම ආධාර මුදල ලබාදීමේ අරමුණු එම නිවේදනයෙහි විස්තර කර ඇත.
ශ්රී ලංකා රජයේ නිල ප්රවෘත්ති වෙබ් අඩවියේ අපේ්රල් 22 වැනිදා පළවූ පුවතක් අනුව ජපානය ශ්රී ලංකාවට ඇමෙරිකන් ඩොලර් මිලියන 1.2ක ආධාර මුදලක් ලබාදී ඇත. එම පුවතෙහි සඳහන්ව ඇත්තේ එය ආසන්න වශයෙන් රුපියල් මිලියන 230ක පමණ මුදලක් වන බවයි. එම පුවත ලංකාවේ රජයේ ප්රවෘත්ති දෙපාර්තමේන්තුවේ නිල වෙබ් අඩවියෙහි සඳහන් වන නිසා එම මුදල දැනටමත් ලැබී හමාර බව විශ්වාස කළ හැකිය.
අපේ්රල් 23 වැනිදා කැනඩා රජයේ නිල වෙබ් අඩවියක සඳහන්ව තිබුණේ එරටින් ශ්රී ලංකා රුපියල් මිලියන 7.5ක ආධාරයක් ලබාදෙන බවය.
ඊට අමතරව ලන්ඩන් ස්ටොක් එක්ස්චේන්ජ් ගෲප් නම් ආයතනය ලංකාවේ රුපියල් මිලියන 5ක ආධාරයක් ලබාදී ඇති බව යුනිසෙෆ් නිල වෙබ් අඩවියෙහි සඳහන්ය. එම ආධාර මුදල යුනිසෙෆ් ආයතනය හරහා ලබාදී ඇත.
අප මුලින්ම සඳහන් කළ ඇමෙරිකානු ආධාර මුදලත් ඇතුළත්ව, ඉහත අප සඳහන් කළ සියළු ආධාර මුදල් ශ්රී ලංකා රුපියල් වලින් ගණනය කළහොත් ආසන්න වශයෙන් රුපියල් මිලියන 29,740ක පමණ සම්පූර්ණ මුදලක් ශ්රී ලංකාවට ආධාර ලෙස ලබාදීමට තීරණය කර ඇත. මේ මුදල් විවිධ කටයුතු සඳහා ලබාදී ඇති මුදල්ය.
මෙම පිළිගත් වෙබ් අඩවිවල ඇත්තේ වැරදි කරුණු නම් එම වෙබ් අඩවි අයත් වන ආයතනවලට (ශ්රී ලංකා රජයේ ප්රවෘත්ති දෙපාර්තමේන්තුවද ඇතුළුව) ඒ පිළිබඳව නිල වශයෙන් දැනුම්දීමේ හැකියාව අපේ රජයට ඇත.
ඉහතින් සඳහන් කර ඇත්තේ මුදල් ආධාර ගැන පමණි. විවිධ උපකරණ ආදී භාණ්ඩමය ආධාර විශාල වශයෙන් ශ්රී ලංකාවට ලැබී ඇත. ණය සහන ලැබී ඇත. සරලව කිවහොත් ලොවපුරා පිළිගත් ආයතන බොහොමයක් ශ්රී ලංකාව වැනි රාජ්යයන්ට විවිධාකාරයෙන් සහයෝගය දක්වමින් සිටී.
මෙය ලෝකයේ රාජ්යයන් ගණනාවක් එකට එක්ව සිටින මොහොතකි. එකිනෙකා කෙරෙහි වෛරය, බිය වෙනුවට සියල්ලන් එකට සිටින බව සමාජගත කළ යුතු මොහොතකි. එවැනි මොහොතක සත්යය වසන් කරමින් හෝ අර්ධ සත්යයන් ප්රකාශ කිරීම සුදුසු නොවේ.
