ජුනි 20 වැනිදා පාර්ලිමේන්තු මහමැතිවරණය පැවැත්වීමට තීරණය කිරීමෙන් තම මූලික අයිතිවාසිකම් කඩවිණැයි, විකල්ප ප‍්‍රතිපත්ති කේන්ද්‍රය, එහි අධ්‍යක්‍ෂ පාක්‍යසෝති සරවනමුත්තු හා මාධ්‍යවේදී වික්ටර් අයිවන් ඇතුළු සත්දෙනෙකු ශ්‍රේෂ්ඨාධිකරණය ඉදිරියේ පෙත්සම් ගොනුකර තිබේ.
විකල්ප ප‍්‍රතිපත්ති කේන්ද්‍රය, එහි අධ්‍යක්‍ෂ පාක්‍යසෝති සරවනමුත්තු ගොනුකර ඇති පෙත්සමෙන්, මාර්තු 2 වැනිදා ජනාධිපති ගෝඨාභය රාජපක්‍ෂ විසින් පාර්ලිමේන්තුව විසුරුවා හැරීමට කරන ලද තීරණය මෙන්ම මැතිවරණ කොමිසම විසින් ජුනි 20 වැනිදා මැතිවරණය පැවැත්වීමට ගෙන ඇති තීරණයද අභියෝගයට ලක්කර තිබේ.
ජනාධිපතිවරයා ආණ්ඩුක‍්‍රම ව්‍යවස්ථාවේ 70 සහ 33(2) (සී) වගන්ති යටතේ අවුරුදු පහක පාර්ලිමේන්තු ධුර කාලයට පෙර අවුරුදු හතරහමාරක් ගතවුණාට පසු මාර්තු 2වැනි දින 2165/8 දරන අතිවිහේෂ ගැසට් පත‍්‍රයෙන් 8වැනි පාර්ලිමේන්තුව විසුරුවා හැර අපේ‍්‍රල් 25 වැනිදා 9 වැනි පාර්ලිමේනතුව තෝරාගැනීම සඳහා මැතිවරණය නියම කර තිබේ. මේ ගැසට් පත‍්‍රය නිකුත් කෙරුණේ, ලෝකය පුරාම කෝවිඩ් 19 වසංගතය පැතිරෙන අතර සහ ලංකාවද ඊට එරෙහිව කටයුතු කරමින් තිබුණු අවස්ථාවකය.
කෝවිඩ් 19 වසංගතයක් ලෙස ප‍්‍රකාශයට පත්වීමත්, එහි වේගවත් පැතිරීමත් මහමැතිවරණය කල්දැමීම සඳහා මැතිවරණ කොමිසම තීරණයට කිරීමට හේතුවිය. ඉන්පසු අපේ‍්‍රල් 20 වැනිදා මැතිවරණ කොමිසම අතිවිශේෂ ගැසට් පත‍්‍රයක් මගින් මැතිවරණය ජුනි 20ට නියම කරන ලදි. එහෙත් 9වැනි පාර්ලිමේනතුව රැස්වීම සඳහා ජුනි 2ට පසු දිනයක් නියම කළ නොහැකිය.
පෙත්සම කියන්නේ, කෝවිඩ් 19 වසංගත තත්වය මත ජුනි 20වැනිදා නිදහස් හා සාධාරණ මැතිවරණයක් පැවැත්වීමට නොහැකි බවයි. මැතිවරණ නිලධාරින්ට මෙන්ම ඡන්දදායකයන්ටද සමාජ දුරස්ථකරණය පවත්වාගෙන මැතිවරණය පැවැත්වීමට සූදානම් වීමට හෝ පැවැත්වීමට නොහැකිය. එයින් වසංගතය වර්ධනය වන තත්ත්වයක් ඇති වෙයි. මේ නිසා ජුනි 20වැනිදායින් පසුවද මහමැතිවරණය කල්යැවෙන තත්වයක් තිබේ.
මාස තුනකට වඩා පාර්ලිමේන්තුවේ කටයුතු නොපැවැත්වීම නිසා මහජනතාවගේ පරමාධිපත්‍යය මෙන්ම නීතියේ ආධිපත්‍යයද උල්ලංඝනය කෙරෙයි. ඒ නිසා පෙත්සම්කරුවන්ගේ අයිතිවාසිකම් උල්ලංඝනය වී ඇතැයි ප‍්‍රකාශ කරන ලෙස පෙත්සමෙන් ඉල්ලා සිටියි.
වික්ටර් අයිවන් මහතා ඇතුළු හත්දෙනකු ඉදිරිපත් කර ඇති පෙත්සමෙන් කියැවෙන්නේ, මෙවැනි ජාතික ව්‍යසනකාරී අවස්ථාවක පාර්ලිමේන්තුව පවත්වාගෙන යෑම ඉතා වැදගත්වන බවයි.
අරුණ ජයවර්ධන
