අධ්යාපන අමාත්යංශය මගින් කොවිඞ් වසංගතය නිසා පාසල් සිසුන්ට නිවසේ සිට වට්ස්ඇප්, වයිබර් වැනි අන්තර්ජාල වේදිකාවන් හරහා ඉගැන්වීම් කටයුතු සිදු කරන ලෙස උපදෙස් ලබාදී ඇතත් ලංකාවේ ගුරුවරුන් හා සිසුන් විශාල පිරිසකට එම පහසුකම් නොමැති වීමත්, දැනුම් නොමැති වීමත් නිසා දැඩි අපහසුතාවයකට පත්ව ඇති බව ලංකා ගුරු සංගමයේ ලේකම් ජෝසෆ් ස්ටාලින් මහතා පෙන්වාදෙයි.
ඇතැම් විදුහල්පතිවරුන් අන්තර්ජාලයෙන් ඉගැන්වීම් කටයුතු සිදුකරන ලෙස ගුරුවරුන්ට තදින් දැනුම් දී ඇති බවත්, එහෙත් පහසුකම් හා දැනුම නොමැතිකමින් එම නියෝග ඉටු කිරීමට නොහැකි වී ඇති බවත්ය. ඇතැම් ගුරුවරුන්ට අන්තර්ජාල පහසුකම් නොමැති නමුත්, අන්තර්ජාල පහසුකම් ලබාදීමට කිසිදු වැඩපිළිවෙලක් නොමැති බව ඔහු කීය. විශේෂයෙන්ම වීඩියෝ මාධ්යයෙන් අන්තර්ජාල ඉගැන්වීම් කිරීමට විශාල පිරිවැයක් වැය වන බව ඔහු පෙන්වාදුන්නේය.
ඔහු වැඩිදුරටත් පෙන්වාදෙන්නේ මේ නිසා පාසල් තුළ සිටින සිසුන්ව සමාජ මට්ටම් සහ ආදායම් මට්ටම් අනුව බෙදීමකට ලක්වෙන නිසාත් ඇතැම් සිසුන්ව කොන්වීමකට ලක්වෙන නිසාත් සිසුන්ව අපහසුතාවයට පත්වන බවයි. කොළඹ දිස්ත්රික්කයේ පවා සැලකිය යුතු සිසුන් පිරිසකට මෙම පහසුකම් නොමැති බව ඔහු කීය.
