කොළඹ වරාය පරිශ‍්‍රයෙහි ශ‍්‍රී ලංකා නාවික හමුදාවේ රංගල නම් කඳවුර පිහිටා ඇත. වැලිසර නාවික හමුදා කඳවුරේ සෙබළුන්ට හා නාවික හමුදා සාමාජිකයන්ට කොවිඞ්-19 වැළඳී ඇතැයි තහවුරු වීමට පටන්ගත් පසුව කොළඹ වරායේ රංගල නාවික හමුදා කඳවුරේ සෙබළුන්ද පීසීආර් පරීක්ෂණයට ලක් කිරීම සඳහා යැයි කඳවුරෙන් පිටට ගෙන ගොස් තිබුණි. කෙසේ වෙතත් ඉන්පසුව රංගල කඳවුරෙහි සේවය කළ එකදු සෙබළෙකුට හෝ නිලධාරියෙකුට කොවිඞ්-19 ඇතිදැයි තහවුරු වුණාද නැතිද යන කාරණය නිල වශයෙන් වාර්තා කර තිබුණේ නැත.
රංගල කඳවුරෙහි සේවය කරන එකදු නිලධාරියෙකුට හෝ සෙබළෙකුට රෝගය තිබුණේදැයි දැනගැනීමට නාවික හමුදාවේ මාධ්‍ය ප‍්‍රකාශක ඉසුරු සූරියබණ්ඩාරව දූරකථනයෙන් සම්බන්ධ කරගැනීමට අපි කිහිපවතාවක් උත්සාහ කළෙමු. ඔහු දූරකථනයට ප‍්‍රතිචාර නොදැක්වීය.
මේ අතර කොළඹ වරායෙහි ඉතා විශ්වාසදායක ආරංචිමාර්ග අනුව වාර්තා වන්නේ දැනට රංගල කඳවුරට ඇතුළුවීම හා පිටවීම සීමා කර ඇති බවය. රංගල කඳවුරේ සිදුවන්නේ කුමක්දැයි එයට පිටින් සේවය කරන වරායේ සේවකයන් දන්නේ නැත.
ඒ අතර කොළඹ වරායේ ආරක්ෂක රාජකාරියේ යෙදෙන නාවික හමුදා සෙබළුන්ට රංගල කඳවුරෙන් ආහාරපාන ලබාදීමත් නවත්වා ඇත. එම සෙබළුන් රංගල කඳවුරට අනුයුක්තව සේවය කරන සෙබළුන් නොවන අතර වරායේ ආරක්ෂාව සඳහා නාවික හමුදාවෙන් යොදවන ලද සෙබළුන්ය. එම සෙබළුන්ට ආහාරපාන ලබාදුන්නේ රංගල කඳවුරෙනි. මේ වන විට එය නවත්වා, එම සෙබළුන්ට කොළඹ වරායෙන් ආහාරපාන ලබාදෙයි.
මේ තත්වය නිසා කොළඹ වරායේ සේවකයෝ තරමක සැකයෙන් පසුවෙති. මේ තත්වය එතරම් යහපත් තත්වයක් නොවෙයි. මෙවැනි මොහොතක බිය හා සැකය ඇතිවීම යහපත් නොවේ.
කොළඹ වරායේ නාවික හමුදා කඳවුරෙන් කොවිඞ්-19 රෝගියෙකු හමු වුණානම්, එය ඉතාම සංවේදී පුවතකි. කොළඹ වරාය යනු ඉතා සංවේදී කලාපයකි. කොළඹ වරායේ සේවකයන්, රේගුවේ සේවකයන් ඇතුළු විශාල පිරිසක් එහි සේවය කරයි. එපමණක් නොවේ, කොළඹ වරායෙන් රට තුළට භාණ්ඩ විශාල ප‍්‍රමාණයක් ඇතුළු වෙයි.
කෙසේ වෙතත් අපි කොවිඞ්-19 ආසාදිතයන් හමුවීම පිළිබඳ අනවශ්‍ය සැකයක් ඇති කරගත යුතු නැත. රංගල කඳවුරට අදාල සීමා කිරීම්, වැඩි ආරක්ෂාව සඳහා ගත් පියවර විය හැකිය. වැඩි යහපත වෙනුවෙන් ගත් පියවර විය හැකිය. අනවශ්‍ය බියක් ඇති කරගැනීමට කිසිම හේතුවක් නැති විය හැකිය.
එහෙත් මීට පෙර නාවික හමුදා නිලධාරියෙකු මියගිය පසුව ඔහු මී උණෙන් මියගිය බව ප‍්‍රකාශයට පත්කරනු ලැබීය. එහෙත් ඔහුගේ අවසන් කටයුතු සිදුකළේ කොවිඞ්-19 රෝගියෙකුගේ අවසන් කටයුතු සිදුකරන ලෙසය. ඔහුගේ පවුලේ උදවියව නිවසෙන් පිටට ගෙනගොස් තිබුණි. මේවා අසාමාන්‍ය හැසිරීම්ය.
මෙවැනි සිදුවීම්වලට වෙනත් හේතු තිබිය හැකිය. ආරක්ෂාවට සිටින සෙබළුන්ට වරායෙන් ආහාර ලබා දෙන්නේ වෙනත් හේතුවක් නිසා විය හැකිය.
කෙසේ වෙතත් මෙවැනි කරුණු ගැන විවෘතව කටයුතු කිරීම යහපත්ය. රංගල කඳවුරෙන් එකදු රෝගියෙක්වත් වාර්තා වී නැතිනම් ඒ බව කිව හැකිය. රෝගීන් හමුවී ඇතිනම් ඒ බවත් කිව හැකිය. අඩු තරමේ වරායේ සේවකයන්ට සැබෑ තත්වය පැහැදිළි කිරීමෙන් ඔවුන් අතර බිය හා සැකය පැතිරීම නවතිනු ඇත.
තත්වය යහපත් වුණත්, අයහපත් වුණත් කරුණු නොසඟවා සිටීම වඩා යහපත්ය. මේ වසංගතය ගැන කරුණු සැඟවීමෙන් ලෝකයේ රටවල් ගණනාවක්ම වඩා අසීරු තත්වයන්ට මුහුණදුන් බව සිහිපත් කිරීම වටී. කරුණු සැඟවීම, සාමාන්‍ය ක‍්‍රියාවලියක අසාමාන්‍ය වෙනස්කම් දකින්නට ලැබීම මෙවැනි මොහොතක වැරදි පුවත් සහ ප‍්‍රචාරයන් සමාජගත වීමට හේතු විය හැකිය.
