කොවිඞ් වසංගත තත්වය නිසා දින නියමයක් නොමැතිව වසා දමා ඇති පාසල් අතරින්, උතුරු මැද පළාතේ ඇති සිසුන් 100ට අඩු සංඛ්‍යාවක් සිටින පාසල් නැවත ආරම්භ කිරීම සඳහා සාකච්ඡාවක් පවත්වා ඇති බව වාර්තා වේ.
අපේ‍්‍රල් 28 වන දින උතුරු මැද ආණ්ඩුකාරවරයාගේ ප‍්‍රධානත්වයෙන් අධ්‍යාපන අමාත්‍යංශයේ ලේකම් එම්.එච්.එම් චිත‍්‍රානන්ද සහ උතුරු මැද පළාත් අධ්‍යාපන දෙපාර්තමේන්තුවේ නිලධාරින් පිරිසක් සාකච්ඡාවට සහභාගි වී ඇත.
ශිෂ්‍ය සංඛ්‍යාව 100 ට අඩු වීමට අමතරව විවෘත කිරීමට බලාපොරොත්තු වන පාසල්වලට අදාල නිර්ණායක කිහිපයක් එහිදී සාකච්ඡාවට ලක් කර තිබේ. පොදු ප‍්‍රවාහන පහසුකම් අවශ්‍ය නොවන පාසල් අවට සිසුන් සිටින පාසල් වීම, අවට ගම්වලගුරුවරුන් පදිංචි වී සිටීම, කොවිඞ් ආසාදිත හෝ නිරෝධායනයට ලක් නොවු ප‍්‍රදේශ වීම, සමාජ දූරස්ථකරණයට අදාල උපදෙස් අනුගමනය කරමින් ඉගැන්වීම් සිදු කළ හැකි පාසල් වීම යන නිර්ණායක පිළිබඳව එහිදී සාකච්ඡා කර ඇත.
ඒ අනුව උතුරු මැද පළාතේ පාසල් 14 ක් යළි විවෘත කිරීමට තෝරා ගෙන ඇත. උතුරුමැද පළාත් ආණ්ඩුකාරවරයාගේ ප‍්‍රධානත්වයෙන් මේ පිළිබඳව තවත් සාකච්ඡාවක් තමන්කඩුව ප‍්‍රාදේශීය ලේකම් කාර්යාලයේදී මැයි 5 වන දින පැවැත්වීමට නියමිතව ඇත.
කෙසේ වෙතත් මේ වන විට උතුරුමැද පළාතේ කොවිඞ් ආසාදනය වු රෝගීන් වාර්තා වී ඇති අතර ගම්මාන 10 කට ආසන්න ප‍්‍රමාණයක් වසා දමා ඇත.
හංසි මානවඩු
