– නිලධාරීන්ට තවම අදහසක් නෑ
– වියදම අනුමාන කරන්න අමාරුයි
– කොරියාවට වඩා සම්පූර්ණයෙන්ම වෙනස් තත්වයක්
– කොරියාවේ ඡන්ද ගණනය ඉලෙක්ට්‍රොනික්, ලංකාවේ අතින්
පාර්ලිමේන්තු මැතිවරණය ජුනි 20 වැනිදා පැවැත්වීමට නියමිත වුණත්, සෞඛ්‍යාරක්ෂිත ක‍්‍රමවේද පාවිච්චි කරමින් මැතිවරණය පවත්වන ආකාරය හා සෞඛ්‍යාරක්ෂිතව මැතිවරණය පවත්වන්නේ කෙසේද යන කාරණා පිළිබඳව මැතිවරණ කොමිෂන් සභාවේ සහ මැතිවරණ දෙපාර්තමේන්තුවේ නිලධාරීන් බරපතළ ගැටලූවකට මුහුණදී ඇතැයි එම ආයතනවල නිලධාරීහු පවසති.
ජුනි 20 වන විට කොවිඞ්-19 වසංගතය සම්පූර්ණයෙන් පහව යනු ඇතැයි විශ්වාස කළ නොහැකි පසුබිමක, සෞඛ්‍යාරක්ෂිතව මැතිවරණය පැවැත්වීම සඳහා කොපමණ වියදමක් වැය වනු ඇතිදැයි අප කළ විමසීමකදී එම නිලධාරී කිහිපදෙනෙක් ඒ බව පැවසූහ.
එම කරුණු පිළිබඳව මැතිවරණ දෙපාර්තමේන්තුවේ නිලධාරීන් සාකච්ඡා කිරීමට පටන්ගෙන ඇතත්, කිසිදු කාරණයක් ගැන තවම නිශ්චිත තක්සේරුවකට පැමිණීමට නොහැකි වී ඇතැයිද එම නිලධාරීහු කීහ. මෙම තත්වය යටතේ මැතිවරණයක් පවත්වා ඇත්තේ දකුණු කොරියාව පමණක් බවත්, දකුණු කොරියාවේ තත්වයට කිසිසේත්ම ශ‍්‍රී ලංකාව සමාන නොවන බවත් එම නිලධාරීහු කියති.
මැතිවරණයට වැය වෙන වියදම ගැන කිසිදු තක්සේරුවක් නැති බවත්, සාමාන්‍ය තත්වයකදී වැය වෙන වියදම මෙන් කිහිපගුණයක් වැය වනු ඇති බවත් ඔවුහු කීහ. මුහුණු ආවරණ, විෂබීජනාශක, ආරක්ෂිත උපකරණ ආදි අමතර වියදම් රැසක් දැරීමට සිදුවනු ඇති නිසා වියදම අතිවිශාල ලෙස වැඩි වනු ඇතැයි ඔවුන්ගේ මතයය. කෙසේ වෙතත් මුහුණු ආවරණ හා විෂබීජනාශකවලින් එකිනෙකා අතර රෝගය බෝ වීම සම්පූර්ණයෙන් නැවැත්විය නොහැකි වීමද සැලකිල්ලට ගෙන ඇති තවත් කාරණයකි.
ශ‍්‍රී ලංකාවේ ඡන්දදායකයන් ඡන්දය පාවිච්චි කිරීමේදී වසංගතය බෝ නොවෙන ආකාරයට ආරක්ෂිතව කටයුතු කරනු ඇතිද යන කාරණය පිළිබඳවත් එම ආයතන සැලකිල්ලට ගෙන ඇත.
මැතිවරණ රාජකාරී සඳහා නිලධාරීන් පැමිණෙනු ඇතිද යන්න සැලකිල්ලට ගෙන ඇති තවත් කාරණයකි.
ඊට අමතරව දකුණු කොරියාවේ ඡන්ද ගණන් කිරීම ඉලෙක්ට්‍රොනිකව කළ නමුත්, ශ‍්‍රී ලංකාවේ ඡන්ද ගණන් කිරීම අතින් සිදු කිරීමට සිදුවන බවත් එකම ඡන්ද පත‍්‍රිකාව කිහිපදෙනෙකුට ස්පර්ශ කිරීමට සිදුවෙන බවත් සාකච්ඡාවට ලක් කර ඇත. ඡන්ද ගණන් කිරීමේදී නිලධාරීන් එක ළඟ රැඳවීමට නොහැකි වීමත්, දූරස්ථභාවය පවත්වාගැනීමට සිදුවීමත් නිසා කෙතරම් ඉඩකඩක් වැය වේදැයි අනුමාන කිරීමද ගැටලූවක් වී ඇත.
