අත්‍යවශ්‍ය සේවකයන් කැඳවීම සඳහා සෞඛ්‍ය අමාත්‍යාංශයේ ලේකම් භද්‍රානි ජයතිලකගේ චක‍්‍රලේඛයක් මගින් ලබාදී ඇති නියෝගය රෝහල් ගණනාවක් පිළිපදින්නේ නැති බවත්, සියලූ සේවකයන් සේවයට කැඳවන බවත්, එමගින් රෝහල්වල සෞඛ්‍ය තත්වය අවදානමකට ලක්ව ඇති බවත් රජයේ හෙද නිලධාරීන්ගේ සංගමය සෞඛ්‍ය අමාත්‍යාංශයේ ලේකම්වරිය වෙත ලිපියක් යොමු කරමින් දන්වා ඇත.
අපේ‍්‍රල් 28 වැනිදා එම ලිපිය යවා ඇත. එම ලිපිය මෙසේය.
‘ඔබතුමිය විසින් රටේ පවතින වසංගත තත්වය පිළිබඳව අවධානය යොමුකර, සෞඛ්‍ය සේවකයන්ට ඇති අවදානම අඩු කිරීම පිණිස 2020.04.12 දින අංක 02/03/2020 චක‍්‍රලේඛය මගින් අත්‍යවශ හා අවම සේවක සංඛ්‍යාවක් රාජකාරි සඳහා කැඳවන ලෙසට උපදෙස් දී ඇත.
එමෙන්ම 2020.04.25 වන දින ජනාධිපති මාධ්‍ය අංශය විසින් නිකුත්කර නිවේදන අංක 73 යටතේ කොතරම් අත්‍යවශ්‍යම සේවාවක් වුවද මුළු සේවක සංඛ්‍යාවෙන් 1/3 ක් පමණක් සේවා ස්ථානවලට සේවයට ගෙන්වන ලෙසට උපදෙස් දී ඇත.
නමුත් මේ වන විට හෙද සේවාවලට අදාලව, බොහෝ රෝහල්වල මෙම නියෝගය ක‍්‍රියාත්මක නොකරමින් තිබෙන බවට සංගමයට වාර්තා වී ඇත. එම රෝහල්වල පරිපාලනය සමග සකච්ඡා කළද, ඔවුන් එයට එකඟ නොවී බලපෑම් කරමින් සාමාන්‍ය ආකාරයට රාජකාරි සඳහා සේවයට කැඳවා ඇත.
ලෝකයම වසංගත තත්වය නිසා බරපතළ අවදානමට ලක්වී ඇති බැවින් විවිධ සීමා කිරීම්වලට ලක් කර ඇත. එබැවින් යම් ආයතනයක සේවකයන්ගෙන් 1/3 ගෙන්වීමට රජය ගත් තීරණය කාලෝචිත වන අතර, එය සෞඛ්‍ය කාර්යමණ්ඩල අතරද ක‍්‍රියාත්මක කිරීම සෞඛ්‍ය අමාත්‍යංශයේ වගකීම වේ.
එසේ අදාළ නිර්දේශ ක‍්‍රියාත්මක නොකොට ආයතන හෝ ඒකක ලෙස හෙද නිලධාරීන් ඇතුළු සෞඛ්‍ය කාර්යමණ්ඩල නිරෝධායනයට යොමු කිරීමට සිදු වුවහොත්, සෞඛ්‍ය කාර්යමණ්ඩල හා ජනතාව බරපතළ අවදානමකට මුහුණ දීමට සිදුවනු ඇත.
එවැනි තත්වයක් ඇති වුවහොත් එහි සම්පුර්ණ වගකීම සෞඛ්‍ය බලධාරීන් විසින් භාර ගත යුතුය. නාවික හමුදාවට මුහුණ දීමට සිදුවී ඇති තත්වය උදාහරණයක් ලෙස දැක්විය හැක.
මෙම අවදානම් තත්වය පිළිබඳව සලකා බලා ජනාධිපති මාධ්‍ය අංශය විසින් නිකුත්කර නිවේදනයේ සදහන් පරිදි, දුන් නිර්දේශ හෙද සේවයට හා සියලූ සෞඛ්‍ය කාර්යමණ්ඩලවලට අදාළ කරමින් ක‍්‍රියාත්මක කිරීමට නියෝග නිකුත් කරන ලෙසත්, එම නිර්දේශ නියමිත ලෙස සියලූ ආයතනවල ක‍්‍රියාත්මක වන්නේදැයි සොයා බලන ලෙසත් කාරුණිකව ඉල්ලා සිටිමු.
එසේ නොවුනහොත් රෝහල් තුල නොසන්සුන්කාරී තත්වයක් වර්ධනය වී හෙද කර්යමණ්ඩලය ආරක්ෂාව වෙනුවෙන්, රෝහල් තුළ යම් යම් ක‍්‍රියාමාර්ග ඇති වීමේ ප‍්‍රවණතාවක් උද්ගතවිය හැකි
අතර, එහි වගකීම එම ගැටලූ ඇතිකරන ප‍්‍රාදේශීය සෞඛ්‍ය පරිපාලනය හා සෞඛ්‍ය අමාත්‍යාංශය විසින් භාර ගතයුතු බව අවධාරණය කරමු. මෙම ගැටලූ නිරාකරණය කිරීම සඳහා කඩිනමින් සාකච්ඡාවක් කැඳවන ලෙස කාරුණිකව ඉල්ලා සිටිමු.’
අනුරංග ජයසිංහ
