වැලිසර පිහිටි නාවික හමුදා කඳවුරු සංකීර්ණයේ ශ‍්‍රී ලංකා නාවික හමුදා ප‍්‍රධාන රෝහලේ ප‍්‍රතිකාර ලබමින් සිටියදී ලූතිනන් කමාන්ඩර් දොඩන්වල මියගියේ අපේ‍්‍රල් 26 වැනිදාය.
නාවික හමුදා පාර්ශ්වයෙන් කීවේ ලූතිනන් කමාන්ඩර් දොඩන්වල මියගියේ මී උණ රෝගයෙන් බවය. එමෙන්ම ඔහු වකුගඩු රෝගයෙන් පෙළෙන්නෙකු වූ බවය.
ලූතිනන් කමාන්ඩර් දොඩන්වලගේ මේ මරණය සම්බන්ධයෙන් නාවික හමුදාවේ පැහැදිලි කිරීම මේ රටේ පුරවැසියන් පමණක් නොව යටත්වැසියන් පවා විශ්වාස නොකරන තත්වයකට පත්වී ඇති බව ඒ පිළිබඳව පළවන අදහස්වලින් පෙනේ.
ලූතිනන් කමාන්ඩර් දොඩන්වල ගලෙන්බිඳුණුවැව අක්කර සීය ප‍්‍රදේශයේ පදිංචිකරුවෙකි. වී වගාව ඒ ප‍්‍රදේශයේ තිබුණත් ඔහු වගා කටයුතුවලට සම්බන්ධ වූ බව තවම කිසිදු සාක්ෂියක් නැත. එමෙන්ම මී උණ රෝගය එම ප‍්‍රදේශවලින් මේ වන විට වාර්තා වී ද නැත.
කෙසේ හෝ ලූතිනන් කමාන්ඩර් දොඩන්වලගේ මෘතදේහය පිළිබඳව අවසන් කටයුතු වත්තල හුණුපිටියේ ආදාහනාගාරයකදී අපේ‍්‍රල් 27 වැනිදා සිදුකර ඇත. කොවිඞ්-19 රෝගියෙකුගේ මෘත දේහයක් පිළිබඳ අවසන් කටයුතු කරන ආකාරයට එම මෘත දේහය පිළිබඳවද අවසන් කටයුතු සිදුකරන ලෙසට රාගම රෝහලේ හෙවත් උතුරු කොළඹ මහරෝහලේ අධිකරණ වෛද්‍යවරයා ලබාදුන් නියෝගයට අනුව බව කියමින්ය.
මේ අවමංගල්‍ය කටයුතු සඳහා ලූතිනන් කමාන්ඩර් දොඩන්වලගේ පවුලේ සාමාජිකයන්ද සහභාගි වී ඇති බව අනුමාන කළ හැක්කේ ඔහු ජීවත් වූ ගලෙන්බිඳුණවැව අක්කර සීය ප‍්‍රදේශයේ පිහිටි නිවස මේ වන විට වසා දමා ඇති නිසාය.
ලූතිනන් කමාන්ඩර් දොඩන්වල මියගියේ ඇත්තටම මී උණ රෝගයෙන් නම් ඔහුගේ දේහය ඔහුගේ පවුලේ උදවියට බාරදීමේ කිසිදු ගැටලූවක් නැත. මන්ද ඔහු මියයෑමෙන් පසු පශ්චාත් මරණ පරීක්ෂණයේදී ඒ බව තහවුරු කළායැයි කියන නිසාය. එවන් සැක සහිත නොවන මරණයක් කොවිඞ්-19 මරණයක් ලෙස අවසන් කටයුතු කළ යුතු නැත. එම පුද්ගලයාගේ පවුලේ සාමාජිකයන්ට ඔවුන්ගේ ආගමික විශ්වාසයන්ට අනුව චාරිත‍්‍ර සිදුකර අවසන් කටයුතු සිදුකිරීමට ඉඩ දිය යුතුය. එසේ ඉඩ නොදීම එම පුද්ගලයන්ගේ අයිතිවාසිකම් කඩ කිරීමකි. එම පවුලේ සාමාජිකයන් පසු අවස්ථාවක එම අයිතිවාසිකම් කඩකිරීම පිළිබඳව නීතිමය පිහිට පැතුවහොත් රාගම රෝහලේ අධිකරණ වෛද්‍ය නිලධාරියා ඇතුළු නාවික හමුදා ඉහළ නිලධාරීන් ඊට වගකිව යුතු වනු ඇත.
මේ කොවිඞ් වසංගත කාලයේදී ඕනෑ තරම් රටේ මිනිස්සු මිය ගියෝය. ඒ වෙනත් රෝගාබාධවලිනි. එම මිනිසුන්ගේ අවසන් කටයුතු සිදුකෙරුණේ සාමාන්‍ය පරිදිය. ප‍්‍රභූ මරණයකදී හැර වූ එකම වෙනස වූයේ අවමංගල්‍යයට සහභාගි වන පිරිස් සීමා කිරීමය. මේ වසංගත කාලයේදී මරණයට හේතුව නිශ්චිත නොවූ සැක සහිත රෝගීහු මිය ගියෝය. මේ සැක සහිත බව නිසාම එම ස්වල්පයක් වූ මෘතදේහ කොවිඞ්-19 රෝගියෙකුගේ අවසන් කටයුතු සිදුකරන ආකාරයට සිදුකරන ලෙස නියෝග කරනු ලැබීය. ඒද අදාළ මෘතදේහයේ සාම්පල කොවිඞ්-19 දැයි දැන ගැනීමට යැවීම මගින්ය.
එමගින් මරණයට පත්වූ අයගේ පවුලේ සාමාජිකයන් මෙන්ම අසල්වැසියන්ද කොවිඞ්-19 ආසාදිතයන්දැයි සැක හැර දැනගැනීම සඳහාය.
ලූතිනන් කමාන්ඩර් දොඩන්වලගේ මෘතදේහයෙන් කොවිඞ්-19 පරීක්ෂණ සාම්පල ලබාගත් බවක් ප‍්‍රකාශ කරන්නේ නැත. එසේ වුවද දොඩන්වල මහතාගේ පවුලේ සාමාජිකයන් වැලිසර නාවික හමුදා කඳවුරේ නිවස්නයක නිරෝධායනයට ලක් කර ඇතැයිද දැනගන්නට ලැබේ. එම නිවැසියන් ගලෙන්බිඳුණුවැව අක්කර සීය නිවසට අද හෙටම නොපැමිණියහොත් එය ස්ථීර වශයෙන්ම තහවුරු වේ.
ලූතිනන් කමාන්ඩර් දොඩන්වල කොවිඞ්-19 මර්දන රාජකාරිවල නිරත වී සිටියදී එම කටයුතු නිසා රෝගාතුරව මියගියහොත් ඔහු සැලකිය යුත්තේ එම රාජකාරී හේතුවෙන් මියගිය පුද්ගලයෙකු ලෙසින්ය. ඒ අනුව සාමාන්‍ය මරණයකදී නොවන රාජකාරී කටයුතු මරණයකදී ලැබෙන හිමිකම් හා වරප‍්‍රසාද ඔහුගේ පවුලේ දැන් අසරණභාවයට පත් පවුලේ සාමාජිකයන්ට ලැබිය යුතුය. එහෙත් ඔහු මියගියේ මී උණ නිසා නම් ඔහුගේ පවුලේ සාමාජිකයන්ට එම හිමිකම් ලැබෙන්නේ නැත. අඩුම තරමේ ශ‍්‍රී ලංකා රක්ෂණ සංස්ථාව නොමිලයේ ලබාදෙන බවට ප‍්‍රකාශයට පත්කර ඇති කොවිඞ්-19 මර්දන ක‍්‍රියාවලියේදී මියයන සෞඛ්‍ය, ආරක්ෂක, පොලිස්, මහජන සෞඛ්‍ය හා අනෙකුත් රාජ්‍ය හා පෞද්ගලික අංශයේ සාමාජිකයන්ට හිමි රුපියල් ලක්ෂ 15ක මුදලද මේ මී උණ නිගමනය බොරුවක් නොවේ නම් ඔහුගේ පවුලේ සාමාජිකයන්ට හිමිවන්නේ නැත.
ඇත්තටම එම හිමිකම් ඔහුගේ පවුලේ සාමාජිකයන්ට ලබාදිය යුතු නම් ඒවා ලබාදිය යුත්තේ නීත්‍යනුකූල නොවන ක‍්‍රමයකටය.
