වැලිසර නාවික හමුදා කඳවුරෙහි සේවය කළ කොවිඞ්-19 ආසාදනය වී ඇතැයි තහවුරු වූ නිලධාරිනියකගේ සැමියා සීදුව විශේෂ බලකා කඳවුරෙහි සේවය කර ඇති නිසා සීදුව විශේෂ බලකා කඳවුර නිරෝධායනයට ලක් කර ඇතැයි යුද හමුදාවේ ඉහළ නිලධාරීහු කිහිපදෙනෙක් පැවසූහ.
මේ පිළිබඳව තහවුරු කරගැනීම සඳහා යුද හමුදා මාධ්‍ය ප‍්‍රකාශකගේ ජංගම දූරකථනයෙන් ඔහු සම්බන්ධ කරගැනීමට ගත් උත්සාහය අසාර්ථක වූ නමුත් අප කළ විමසීමකදී යුද හමුදා මාධ්‍ය ප‍්‍රකාශක කාර්යාලයේ නිලධාරියෙක් ඒ බව තහවුරු කළේය.
මේ වන විට සිදුකර ඇති පරීක්ෂණවලින් වැලිසර නාවික හමුදා කඳවුරේ සිටි නිලධාරීන් 60කට වැඩි පිරිසකට රෝගය ආසාදනය වී ඇතැයි තහවුරු වී තිබේ.
මේ වන විට 4000කට ආසන්න පිරිසක් නිරෝධායනයට ලක් කර සිටින අතර වැලිසර කඳවුරේ සිට නිවාඩු ලබා ගිය දිස්ත‍්‍රික්ක කිහිපයක පිරිස්වලට රෝගය ඇතැයි තහවුරු වී තිබේ. එලෙස නිවාඩු ලබා ගිය පුද්ගලයන්ගේ පවුල්වල සාමාජිකයන්ද නිරෝධායනයට ලක් කර ඇත.
