– කිතුනු ක්‍රියාකාරිකයෝ ඉල්ලති
කොවිඞ්-19 වසංගත තත්වයෙන් දේශපාලන වාසි ගැනීම නවතන ලෙසත්, පාර්ලිමේන්තුව කැඳවන ලෙසත් කිතුනු පියවරුන් ඇතුළු කිතුනු ක්‍රියාකාරිකයන් පිරිසක් නිවේදනයක් නිකුත් කරමින් රජයෙන් ඉල්ලීම් කර ඇත.
අප්‍රේල් 21 වැනිදා එම නිවේදනය නිකුත් කර ඇත.
විශාල රාඡ්‍ය සේවයක් පවතින, දූපතක් වන ශ්‍රී ලංකාව වැනි රටක් අභ්‍යන්තරයෙන් එකුදු කොවිඞ්-19 රෝගියෙකුවත් වාර්තා නොවන ආකාරයට රෝගය පාලනය කරගැනීමට පසුබිම තිබුණත් එසේ කරගැනීමට නොහැකි වීම පිළිබඳව රජය අවංකව වරද පිළිගත යුතු බව එම නිවේදනයෙන් පෙන්වාදී තිබේ.
ආපදා කළමනාකරණ දෙපාර්තමේන්තුව වැනි නෛතික ව්‍යුහයන් පසෙක දමා තම අධිකාරි බව තහවුරු කරන ක්‍රියාමාර්ග ගැනීම වැනි මේ රටේ ප්‍රජාතන්ත්‍රවාදී ආයතන ව්‍යුහය හා නෛතික රාමුව හෑල්ලූවකට ලක් කරමින් ක්‍රියා කිරීම නතර කරන ලෙසද එම නිවේදනය මගින් රජයෙන් ඉල්ලීම් කර ඇත.
මේ මොහොතේ මැතිවරණයක් පැවැත්වීම ජන ජීවිතය අනතුරේ හෙළීමක් බවත්, එම මැතිවරණය කල් දමා පෙර පාර්ලිමේන්තුව රැස්කරන ලෙසත් එම නිවේදනයෙන් ඉල්ලීම් කර ඇත.
බලලෝභී දේශපාලන න්‍යායපත්‍ර හකුළා ගන්නා ලෙසද එයින් ඉල්ලා ඇත. තවදුරටත් කාලය තිබියදී ලෝකය කොවිඞ් වසංගතය හිස ඔසවද්දී පාර්ලිමේන්තුව විසුරුවාහැර මැතිවරණයක් කැඳවීම, මැතිවරණ කොමිසමේ ඉල්ලීම නොසලකා හැර ගැටුම්කාරී තත්වයක් පෙන්වීම, අග්‍රාමාත්‍යවරයා මැතිවරණ කොමිසම මොකක්දැයි විමසීම වැනි රජය දැනටමත් මැතිවරණයක් පැවැත්වීම පිළිබඳ ගත් ක්‍රියාමාර්ග හා කළ ප්‍රකාශන ප්‍රජාතන්ත්‍රවාදී රටකට හා මේ සා වසංගත තත්වයකට කිසිසේත් නොගැළපෙන බව එම නිවේදනයෙහි සඳහන් කර ඇත.
රට තුළ ජාතිවාදය හා ආගම්වාදය ව්‍යාප්ත කිරීමට රජයේ ඇමතිවරු පවා මැදිහත්වන තත්වයක් පවතින බවත්, එම තත්වය වහාම නතර කර ජන වර්ගයක් වෙත වෛරය යොමු කිරීම වැළැක්වීමට ක්‍රියා කරන ලෙසත් නිවේදනයෙන් ඉල්ලා ඇත.
වැඩිදුරටත් ඉල්ලා ඇත්තේ කොවිඞ්-19 තත්වය ප්‍රයෝජනයට ගෙන අදහස් ප්‍රකාශ කිරීමේ නිදහසට කරන සීමා කිරීම් වහා නතර කරන ලෙසය.
මෙම ලිපියට පියවරුන් හා සිවිල් ක්‍රියාකාරිකයන් 25 දෙනෙකු අත්සන් තබා ඇත. අත්සන් තැබූ අය මෙසේය.
ෂෙරාඞ් ජයවර්ධන පියනම (කතෝලික), නිශාන්ත ගුණරත්න පියනම (මෙතෝදිස්ත), එම්. සතිවේල් පියනම (ඇන්ග්ලිකන්), ගරු හෙලන් ප්‍රනාන්දු පැවිදි සොයුරිය ශු.ප. (කතෝලික), සෑම් පොන්නයියා පියනම (ඇන්ග්ලිකන්), කිංස්ලි වීරසිංහ පියනම (මෙතෝදිස්ත), කැලිස්ටා ප්‍රනාන්දු පැවිදි සොයුරිය ශු.ප. (කතෝලික), මැක්ස්වල් ඩොස් පියනම (ඇන්ග්ලිකන්), ඇලෝසියස් පීරිස් ජේ.නි. පියනම (කතෝලික), ලෙස්ලි දරිජු පියනම (මෙතෝදිස්ත), එස්.වී.පි. සෙල්වම් පියනම (ඇන්ග්ලිකන්), සරත් ඉද්දමල්ගොඩ පියනම (කතෝලික), ගරු. එස්. පි. නේසකුමාර් පියනම (ඇන්ග්ලිකන්), නාලි ජැන්ස් පැවිදි සොයුරිය ශු.ප. (කතෝලික), ගරු දුෂ්‍යන්ත රුද්‍රිගෝ පියනම (ඇන්ග්ලිකන්), ටෙරන්ස් ප්‍රනාන්දු පියනම (කතෝලික), ඇන්ටන් ජයනන්ද පියනම (කතෝලික), බෙනට් මැල්ලව පියනම (කතෝලික), රීඞ් ෂෙල්ටන් පියනම (කතෝලික), මහින්ද නාමල් මයා, ඞී.අයි.ජි. වීරසිංහ මයා, රැල්ස්ටන් වයිමන් මයා, රුකී ප්‍රනාන්දු මයා, අරුණ ශාන්ත නෝනිස් මයා (කර්තෘ-සචම් වෙබ් අඩවිය), ජූඞ් ප්‍රේමන් මයා.
අනුරංග ජයසිංහ
