වෛද්‍ය සුදත් සමරවීර
කොළඹ කෙසෙල්වත්ත බණ්ඩාරනායක මාවතෙන් හමුවූ කොවිඞ්-19 ආසාදිතයන් සමාජීය වශයෙන් ක‍්‍රියාශීලී පුද්ගලයන් වන නිසා ඔවුන්ගෙන් කෙතරම් දුරට රෝගය පැතිර ඇතිදැයි කල්තබා කිව නොහැකි බව සෞඛ්‍ය අමාත්‍යාංශයේ වසංගත රෝග විද්‍යා ඒකකයේ ප‍්‍රධාන වසංගත රෝග විද්‍යාඥ වෛද්‍ය සුදත් සමරවීර පැවසීය.
අපේ‍්‍රල් 20 වැනිදා කළ විමසීමකදී පිළිතුරු දෙමින් ඔහු පැවසුවේ බණ්ඩාරනායක මාවතෙන් හමුවූ රෝගීන්ගේ සමාජ තත්වය සහ ඔවුන්ගේ රැකියා නිසා ඔවුන් සමාජීය වශයෙන් ක‍්‍රියාශීලී පුද්ගලයන් ලෙස සලකන්නට සිදුවන බවය. ඔවුන්ගේ සමාජ හැසිරීම් අනුව කෙතරම් දුරට රෝගය පැතිර යා ඇතිදැයි කල් තියා නිගමනය කළ නොහැකි බව ඔහු කීය.
දැනට හමුවී ඇති රෝගීන් සියලුදෙනාම එකම දාමයකට හෝ දාම කිහිපයකට අයත් කණ්ඩායම් ලෙස නිශ්චිතව හඳුනාගත හැකිදැයි විමසූ විට ඔහු ප‍්‍රකාශ කළේ අතරින් පතර එසේ නොවන ආසාදිතයන් හමුවී ඇති බවය. හමුවන රෝගීන් අතරින් සැලකිය යුතු වැඩි පිරිසක් රෝගීන් සමඟ සම්බන්ධතා පවත්වා ඇතැයි හඳුනාගෙන ඇතත්, කලාතුරකින් එසේ නොවන අයද හමුවන බව ඔහු කීය.
මේ වන විට හමුවන ආසාදිතයන් වැඩි පිරිසක් නිරෝධායනයට යොමු කර ඇති බවද ඔහු පැවසීය. පරීක්ෂණයට යොමු කළ යුතු බව හඳුනාගෙන සිටින පිරිස කොපමණදැයි විමසූ විට ඔහු ප‍්‍රකාශ කළේ එම සංඛ්‍යාව නව රෝගීන් හමුවන ආකාරය අනුව දිනෙන් දින වෙනස් වෙමින් පවතින බවය.
