– විහාරාධිපති, සංඝනායක හිමිවරු ඉල්ලති
වසංගත තත්වය නිසා උපසම්පදා උත්සව, කඨින පිංකම් සහ වෙසක් පෝදා පිංකම් නැවැත්වීමට ශ‍්‍රී ලංකාවේ බෞද්ධාගමික සමාජය තීරණය කර ඇති බවත් මේ මොහොතේ මැතිවරණය පැවැත්වීමද සුදුසු නොවන බවත් සඳහන් කරමින් සාධාරණ සමාජයක් උදෙසා ජාතික ව්‍යාපාරයේ භික්ෂු සංසදය මැතිවරණ කොමිෂන් සභාව වෙත ලිපියක් යොමුකර ඇත.
අපේ‍්‍රල් 18 වැනිදා එම ලිපිය යොමුකර ඇත්තේ සාධාරණ සමාජයක් උදෙසා ජාතික ව්‍යාපාරයේ භික්ෂු සංසදය නියෝජනය කරන විහාරාධිපති සහ සංඝනායක හිමිවරුන් 25 දෙනෙකුගේ අත්සනින් යුතුවය. එම ලිපියෙහි මෙසේ සඳහන්ය.
‘රටේ ප‍්‍රජාතන්ත‍්‍රවාදයේ යහපැවැත්ව කෙරෙහි අතිශය තීරණාත්මක කාර්යභාරයක් ඉටුකරන මැතිවරණ කොමිෂන් සභාවේ ක‍්‍රියාකාරීත්වය කෙරෙහි සමස්ත ශ‍්‍රී ලාංකීය ජනතාව මේ මොහොතේ සුවිශේෂ අවධානයකින් පසුවන බව අප දනිමු. එමෙන්ම එහි කීර්තිමත් අතීතයට කිසිදු අගතියක් සිදු නොකරන ඔබතුමන්ලා මහත් වගකීමකින් හා කැපවීමකින් කටයුතු කරමින් සිටීම පිළිබඳවද අපගේ ප‍්‍රශංසාව හිමිවන බවද දන්වා සිටිමු.
රටක යහපැවැත්ම උදෙසා ප‍්‍රජාතන්ත‍්‍රවාදී පාලන සම්ප‍්‍රදායන් නිසිපරිදි යාවත්කාලීන කිරීම තීරණාත්මක වැදගත්කමක් ගන්නා අතරම, විශේෂයෙන්ම එවැනි තීරණ ක‍්‍රියාත්මක කිරීම සඳහා සුදුසු පරිසරය නිර්ණය කිරීමද අතිශය වැදගත්ය. සමස්ත ලෝකවාසී ජනතාව මැනවින් අවබෝධ කරගෙන ඇති ආකාරයට අද වන විට අප මුහුණදෙමින් සිටින්නේ සුවිශේෂී තත්වයකටය. එය අප රටටද බෙහෙවින් අදාලය. එබැවින් අද රට මුහුණදී ඇති කොවිඞ්-19 වසංගත රෝග තත්වය හමුවේ රටත්, සමස්ත ජනතාවත් මුහුණදී ඇති බරපතල අවදානම් තත්වය හමුවේ සමස්ත ජනතාවම කල් ගෙවන්නේ සිය නිවාසවලට සීමා වූ තත්වයකය. මහජන ඒකරාශී වීම්, කුමන හෝ අරමුණක් උදෙසා මහජනතාව කැඳවීම් මෙවැනි අවස්ථාවක සිදු නොවිය යුතු බව සෞඛ්‍ය බලධාරීන්ද ඉතා පැහැදිළි ලෙස අවධාරණය කර තිබේ.
බෞද්ධ ශාසනික සම්ප‍්‍රදායෙහි අතිශය වැදගත්කමක් ගන්නා වූ තීරණාත්මක කටයුත්තක් ලෙස සැලකෙන උපසම්පදා විනය කර්ම පවා මේ මොහොතේ කල් දමා තිබේ. අස්ගිරි, මල්වතු උභය මහා විහාරික අතිපූජ්‍ය මහානායක ස්වාමීන් වහන්සේලා ප‍්‍රමුඛ කාරක සංඝ සභාවන් එකී තීරණයට එළඹ ඇත්තේ සමස්ත රටවැසියන්ගේ සෞඛ්‍ය ආරක්ෂාව තහවුරු කිරීම සඳහාය. එය මේ මොහොතේ ඇති ප‍්‍රමුඛතම හා වැදගත්ම වගකීමකි.
මේ තත්වය උපසම්පදා විනය කර්මයට පමණක් සීමා නොකරමින් වාර්ෂික වෙසක් පිංකම්, වස් වැසීම, කඨින පූජා ආදී සම්ප‍්‍රදායික වත් පිළිවෙත් පවා රටේ තත්වය යහපත් අතට පරිවර්තනය වනතුරු කල් දැමීමට වුවද සම්ප‍්‍රදායන් කෙරෙහි අතිශයින් වැදගත්කමක් ලබාදෙන්නා වූ බෞද්ධ පැවිදි සමාජයද තීරණය කර තිබේ.
ඒ අනුව සැලකීමේදී රටේ ප‍්‍රධානම මැතිවරණයක් සඳහා මෙම කාලවකවානුව සුදුසු නොවන්නේය යන්න අපගේ හැඟීමයි. ශ‍්‍රී ලංකාවේ කතෝලික සභාවේ නියමුවා වන අගදගුරු කාදිනල්තුමා විසින් සිදුකර ඇති ප‍්‍රකාශයකින් ඒ බව තහවුරු වෙයි.
එබැවින් අපගේ ඒකායන විශ්වාසය වන්නේ රටේ සමස්ත ජනතාවටම අවම වශයෙන් බියකින් හා සැකයකින් තොරව කටයුතු කළ හැකි තත්වයක් උදාවන තුරු මැතිවරණ වැනි සාමූහික ක‍්‍රියාදාමයන් සිදුකිරීම අනුචිත වන බවයි.
මේ පිළිබඳව ඔබතුමාගේ කාරුණික අවධානය යොමුකරනු ඇතැයි විශ්වාස කරන අතරම රටේ සෞඛ්‍ය බලධාරීන්ගෙන් පැහැදිළි සහතිකයක් ලබාගෙන, මැතිවරණ කොමිසමේ සාමාජික භවතුන් විසින් සිදුකරන නිසි තක්සේරුවකින් පසුව ඉදිරි මහමැතිවරණය සඳහා දින නියම කරනු ඇතැයි අපේක්ෂා කරන්නෙමු.’
අනුරංග ජයසිංහ
