මේවා පිළිකුල්සහගත වැඩ
කොවිඞ්-19 වසංගතයෙන් සෞඛ්‍යමය, ආර්ථිකමය හා සමාජමය වශයෙන් ඇතිවිය හැකි බලපෑම අනුව වැඩිම අවදානමක් ඇති රටවල් 20ක ලැයිස්තුවක් අපේ‍්‍රල් මාසයේදී ඩීප් නොලේජ් ගෲප් ආයතනය ප‍්‍රසිද්ධ කළේය. ඒ අනුව ලෝකයේ රටවල් 150කට වැඩි ප‍්‍රමාණයක් අතරින් වැඩිම අවදානමක සිටින රටවල් අතර 16 වැනි ස්ථානයේ ශ‍්‍රී ලංකාව සිටී. එනම්, ලෝකයේ නරකම රටවල් 20 අතර ලංකාව සිටී.
එහෙත් ඒ අස්සේ අයිසීඑම්ඒ නම් ආයතනයකින් ප‍්‍රසිද්ධ කළ සමීක්ෂණ වාර්තාවක් අනුව කොවිඞ්-19 පාලනයට ගත් පියවර අනුව ලංකාව ලොව හොඳම රටවල් අතර 09 වැනි ස්ථානයට පත් කර ඇත.
පසුබිම් කතා නොදන්නා, ප‍්‍රවෘත්ති පමණක් දකින අයට මේ මොන විහිළුවක්දැයි සිතනු ඇත. එහෙත් පසුබිම් තොරතුරු සෙවූ අයට මේ වාර්තාවල පසුබිම් කතාව තේරුම් ගොස් හමාරය. මේ ආයතනවල පසුබිම පැත්තකින් තබමු, මෙ වාර්තා දෙකට ලැබී ඇති ගෝලීය පිළිගැනීම කෙබඳුදැයි සලකා බලමු.
ඩීප් නොලේජ් ගෲප් ආයතනය කළ සමීක්ෂණය මාධ්‍යවේදීන් මෙන්ම ලංකාවේ සැලකිය යුතු පිරිසක් හඳුනාගත්තේ ගෝලීය පිළිගැනීමක් ඇති ෆෝබ්ස් සඟරාව එම සමීක්ෂණය පළ කරන ලද නිසාය. ෆෝබ්ස් සඟරාව පවා ගෝලීය වශයෙන් පිළිගැනීමක් ලබන සමීක්ෂණ කරන ආයතනයකි.
ඩීප් නොලේජ් ගෲප් ආයතනයේ සමීක්ෂණ උපුටා දැක්වුවේ ෆෝබ්ස් පමණක් නොවේ. ලොව පිළිගත් රාජ්‍යයන්හි ඉහළ නිලධාරීන් පවා එම සමීක්ෂණ උපුටා දක්වා ඇත. ඊශ‍්‍රායෙල් අගමැතිවරයාගේ නිල ට්විටර් පණිවුඩයකින් එම සමීක්ෂණ උපුටා දැක්වීය. ඒෂියන් රිවීව්, ඩී.එබ්ලිව්., ස්ටෆ්, ආර්.ටී.එල් ආදි මාධ්‍ය ආයතන රැසක් එම සමීක්ෂණය උපුටා තිබුණි. එලෙස උපුටා දැක්වූ රටවල දැවැන්ත ලැයිස්තුවක් ඩීප් නොලේජ් ගෲප් වෙබ් අඩවියේම ඇත.
ඩීප් නොලේජ් ගෲප් ආයතනය ගෝලීය පිළිගැනීමක් ඇති ‘වෙන්චර් කැපිටල්’ ආයතනයකි. සෞඛ්‍ය ක්ෂේත‍්‍රයේ සිට අභ්‍යවකාශ ක්ෂේත‍්‍රය දක්වා විවිධ ක්ෂේත‍්‍රවල නව නිෂ්පාදනවලට මෙම ආයතනය ආයෝජනය කරයි.
එහෙත් එම සමීක්ෂණය පිළිබඳව ලංකාවේ ප‍්‍රධාන ධාරාවේ මාධ්‍ය ආයතන පුවත් වාර්තා කළේ අඩුවෙන්ය. ඇතැම් මාධ්‍ය වාර්තා කළත්, එම සමීක්ෂණයේ සත්‍යතාව හැකි තරම් අවතක්සේරු කරමින් වාර්තා කර තිබුණි.
අනෙක් අතට ඕස්ටේ‍්‍රලියාවේ ගිණුම්කරන නිලධාරීන්ගෙන් සැදුම්ලත් (සෞඛ්‍ය විශේෂඥ ආයතනයක් නොවේ.) ආයතනයක් වන අයිසීඑම්ඒ ආයතනයෙන් කරන ලද සමීක්ෂණය උපුටා දක්වමින් පුවත් පළකර තිබුණේ ශ‍්‍රී ලංකාව පමණි.
අනේ පව්, ‘අයිසීඑම්ඒ කොවිඞ්-19 ශ්‍රේණිගත කිරීම්’ යැයි ගූගල් සෙවුමක් යෙදූ විට ප‍්‍රවෘත්ති වෙබ් අඩවිවල ප‍්‍රතිඵල ලෙස පැමිණෙන්නේ හිරු නිව්ස්, සන්ඬේ මෝනින් ඇතුළු ආණ්ඩු හිතවාදී මාධ්‍ය ආයතනවල වාර්තා පමණි.
එම සමීක්ෂණය අනුව ශ‍්‍රී ලංකාවට වඩා ඉදිරියෙන් සිටින රටවල් පවා එම සමීක්ෂණය උපුටමින් කතාකර තිබුණේ නැත. එහෙත් හිරු ටීවී වැනි ආණ්ඩුවේ හොරණෑ මාධ්‍ය ආයතන ලංකාව ලෝකෙන්ම 09 වැනි තැනට ආ බව වාර්තා කර තිබුණි. තවත් අය වාර්තා කර තිබුණේ ලංකාව ලෝකෙන්ම 09 වූ බව නොවේ. ‘ගෝඨාභය රාජපක්ෂ’ ලෝකෙන්ම 09 වූ බවය.
මාධ්‍යවේදියෙකු ලෙස ලියුම්කරුට නැඟුණු ලොකුම පැනය වුණේ මෙම වාර්තාව ජාත්‍යන්තර වශයෙන් පිළිගත් මාධ්‍ය පවා වාර්තා නොකළ පසුබිමක ලංකාවේ මාධ්‍ය ආයතන කෙළවරක් නැති අන්තර්ජාල තොරතුරු සාගරය පීරා මේ වාර්තාව සොයාගත්තේ කෙසේද කියාය. ඕස්ටේ‍්‍රලියාවේ පිහිටි ‘ජාත්‍යන්තර’ ආයතනයෙන් ලංකාවේ මාධ්‍ය ආයතන වෙත සමීක්ෂණ වාර්තාව ඊමේල් කිරීමක් හෝ වෙනත් ආකාරයකට පෞද්ගලිකව එවන ලද්දක් විය නොහැකිය. එසේ එවා ඇති නම්, එහි තේරුම එම සමීක්ෂණයෙන් නව වැනි ස්ථානය දිනාගත් රටේ මාධ්‍ය ආයතන වෙනුවෙන්ම එම සමීක්ෂණය කර ඇති බවය.
ඒ අතර අයිසීඑම්ඒ ආයතනයේ ශ‍්‍රී ලංකාවේ ශාඛාවක් ඇති බවත්, එම ශාඛාවේ සභාපතිවරයා වන්නේ පොදුජන පෙරමුණෙන් මහමැතිවරණයට ඉදිරිපත් වෙන නාලක ගොඩහේවා බවත් හෙළි විය.
අයිසීඑම්ඒ සමීක්ෂණය වෙනුවෙන් ශ‍්‍රී ලංකාවේ තොරතුරු ලබාගත්තේ ග්ලෝබල් හෙල්ත් රිවීව් නම් වෙබ් අඩවියෙන් බවත් එහි සඳහන්ය. ග්ලෝබල් හෙල්ත් රිවීව් මාර්තු මාසයේ මුල් දිනවල පිහිටුවූ වෙබ් අඩවියකි. ගෝලීය මට්ටමෙන් කරන සමීක්ෂණයකට නොව, ෆේස්බුක් පෝස්ටුවක් දමන්නට පවා මූලාශ‍්‍රයක් ලෙස පාවිච්චි කරන්නට තරම් කිසිදු පදනමක් ඒ වෙබ් අඩවිය බැලූ කල සිතාගත නොහැකිය. ඒ වෙබ් අඩවිය අයත් වන්නේ කුමන සංවිධානයටද, ඒ සංවිධානයේ වෙබ් අඩවිය කුමක්ද වැනි කරුණු පවා වෙබ් අඩවියේ සඳහන් නොවේ. ශ‍්‍රී ලංකාව ගැනත්, ඒ වෙබ් අඩවියේ තොරතුරු වාර්තා කර ඇත්තේ ලංකාවේම ආණ්ඩුවේ වෙබ් අඩවිවල ඇති තොරතුරු මත පදනම්වය.
ග්ලෝබල් හෙල්ත් රිවීව් වෙබ් අඩවියේ තිබුණු ලිපියක් උපුටා දක්වමින් ලංකාවේ කොවිඞ්-19 මර්දන ව්‍යාපෘතිය ගෝලීය පිළිගැනීමට ලක්ව ඇතැයි කී පළවැනි අවස්ථාව මෙය නොවේ. පසුගිය මාර්තු මාසයේ මැද කාලයේ ග්ලෝබල් හෙල්ත් රිවීව් වෙබ් අඩවියේම ලංකාව අගයමින් ලියූ ලිපියක් උපුටා දක්වමින්, ඒ ගැන මහත් ඉහළින් කතාකර තිබුණි. ඒ ඇසුරෙන් ඇතැම් පුද්ගලයන් ෆේස්බුක් පෝස්ට් ලියූ කළ, ලංකාවේ ෆේස්බුක් පරිශීලකයන් පවා ඒ වෙබ් අඩවිය මූලාශ‍්‍රයක් ලෙස පාවිච්චි කළ නොහැකි බව පෙන්වා දී තිබුණි. අයිසීඑම්ඒ ආයතනයට ලංකාවේ ෆේස්බුක් පරිශීලකයන් තරම් වත් දැනුමක් නැතිද?
කෙසේ වෙතත් වඩා වැදගත් වන්නේ අයිසීඑම්ඒ ආයතනයටත් වඩා, එම සමීක්ෂණ වාර්තා උපුටා දක්වන ලංකාවේ මාධ්‍ය ආයතන කරමින් ඉන්නේ කුමක්දැයි තේරුම් ගැනීමය.
මේ සියල්ල කරන්නේ, අසරණ ආණ්ඩුව මහමැතිවරණය පැවැත්වීම වෙනුවෙන් ජනතා අනුමැතිය ලබාගැනීමට බව පැහැදිලිය. දැන් ඡන්දය ඕනෑ වී තිබෙන්නේ ආණ්ඩුවට පමණි. ලියුම්කරු සමඟ අදහස් බෙදාහදාගන්නා ආණ්ඩු හිතවාදීහු පවා, මේ මොහොතේ ඡන්දය පැවැත්වීම ගැන බියක් දක්වති. මේ වසංගතයේ භයානකකම දන්නා කෙනෙකුට ඡන්දය පැවැත්වීම කෙතරම් භයානකදැයි අමුතුවෙන් පැහැදිලි කළ යුතු නැත.
ලියුම්කරු ඇතුළු මේ රටේ බොහෝ දෙනෙකුට කොවිඞ්-19 වසංගතයෙන් ජීවිතය පවා අහිමිවිය හැකි අවදානම් සහගත කාණ්ඩයේ ආදරණීයයෝ් සිටිති.
කොවිඞ්-19 වසංගතය ගෙදරට ආ අමුත්තෙක් නොවේ. ගෙදරින් එළියට දැම්මාට පසුව, ආයේ පැත්ත පළාතේ එන්නේ නැතිව පසුපස නොබලා යන අමුත්තෙක්ද නොවේ.
කොවිඞ්-19 වසංගතය ගෙදරින් එළියට දැම්මත්, එයට විද්‍යාත්මක පිළිගැනීමක් ඇති ප‍්‍රතිශක්තිකරණ ඖෂධ නිපදවන තෙක් අප කොවිඞ්-19 අවදානමෙන් මිදෙන්නේ නැත. දැන් පාලනය කළත්, නොසැලකිලිමත් වුණොත් නැවත වර්ධනය වනු ඇත. අද, ශ‍්‍රී ලංකාව කොවිඞ්-19 පාලනය කරමින් සිටින බව සෞඛ්‍ය අංශවලට ගෞරවය පුද කරමින් අප කිව යුතුය.
රජයේ වෛද්‍ය නිලධාරීන්ගේ සංගමයේ හරිත අලූත්ගේ, නවීන් ද සොයිසා වැනි නිලධාරීන් පවා ආණ්ඩුවේ න්‍යායපත‍්‍රය වෙනුවෙන් ප‍්‍රකාශ නොකර සැබෑ තත්වය ගැන අනතුරු හඟවමින් සිටින බව දැනට පෙනෙන්නට ඇති කාරණයයි.
එසේ තිබියදී ‘ගෝලීය සමීක්ෂණ’ උපුටා දක්වමින්, වෙනත් රටවල පවත්වන මැතිවරණ උපුටා දක්වමින් ආණ්ඩුව නටන නැටුම අපට නොතේරෙනවා නොවේ.
මේවා අසරණ ආණ්ඩුවක් කරන අහිංසක වැඩ ලෙස හැඳින්විය නොහැකිය. ගෝලීය වසංගතයකින් ජනතාව බැට කන අතර පසුව පැවැත්විය හැකි ඡන්දයක් නියමිත කාලයට කලින් පවත්වන්නට කරන මේ දැඟලීම් පිළිකුල් සහගතය.
