ඩීප් නොලේජ් ගෲප් නම් සමීක්ෂණ ආයතනයෙන් සිදුකරන ලද සමීක්ෂණයක් අනුව කොවිඞ්-19 නිසා සෞඛ්‍යමය, ආර්ථිකමය සහ සමාජමය වශයෙන් ලෝකයේ වැඩිම අවදානමක් සහිත රටවල් 20 අතර 16 වැනි ස්ථානයට ශ්‍රී ලංකාව ඇතුළත් කර ඇත.
ඊට අමතරව ආසියානු පැසිෆික් කලාපයේ රටවල් අතරින් ආරක්ෂාව අඩුම රටවල් අතරට ශ්‍රී ලංකාව එකතු කර තිබේ.
අප්‍රේල් 12 වැනිදා එම ශ්‍රේණිගතකිරීම් ප්‍රසිද්ධ කර තිබේ. ෆෝබ්ස් ඇතුළු ජාත්‍යන්තර පිළිගැනීමක් ඇති මාධ්‍ය ආයතන එම වාර්තාව උපුටා දක්වමින් පුවත් පළකර ඇත.
මෙම සමීක්ෂණය අනුව අවදානම් සහගත රටවල් තෝරාගැනීමේදී සෞඛ්‍යමය, ආර්ථිකමය සහ දේශපාලනික හේතු රැසක් පාදක කරගෙන තිබේ. මූලික වශයෙන් ක්ෂේත්‍ර 24ක කරුණු සැලකිල්ලට ගෙන ඇති අතර ප්‍රධාන කොටස් හතරකට එම ක්ෂේත්‍ර බෙදා ඇත.
රෝගය පැතිරීමේ අවදානම, ආණ්ඩුවේ කළමනාකරණ හැකියාව, සෞඛ්‍ය පහසුකම් හා කලාපයට ආවේණික අවදානම් සහගත ලක්ෂණ යන ක්ෂේත්‍ර හතර යටතේ එම කරුණු සොයාබැලීම් කර තිබේ.
යම් රටක පැතිරීම වර්ධනය වීමට තිබෙන ඉඩ, රෝහල් පහසුකම්, මරණ හා සෞඛ්‍ය පහසුකම් කොපමණ කාලයක් පවතින්නේද යන කරුණු පිළිබඳව එම සමීක්ෂණයේදී විශේෂයෙන් සොයාබලා ඇත.
ඊට අමතරව ආර්ථික වශයෙන් සිදුවිය හැකි ඍණාත්මක බලපෑම, ජීවන තත්වය සහ භූදේශපාලනික සිදුවීම් පිළිබඳව එහිදී කරුණු සොයා ඇත.
ඒ අනුව මෙම සමීක්ෂණයෙන් සොයාබලා ඇත්තේ රෝගීන් සංඛ්‍යාව වර්ධනය වීම හෝ මරණ සංඛ්‍යාව පිළිබඳව පමණක් නොවන අතර වසංගතය හේතුවෙන් ඇතිවිය හැකි සෞඛ්‍යමය බලපෑම, ආර්ථිකමය බලපෑම හා ජීවන තත්වයට එල්ලවෙන බලපෑම පිළිබඳවද සොයාබැලීමක් කර තිබේ.
මෙම අවදානම්සහගත රටවල් ලැයිස්තුවෙහි ශ්‍රී ලංකාවට ඉහළින් මුල් ස්ථානයේ සිට පිළිවෙළින් ඉතාලිය, ඇමෙරිකා එක්සත් ජනපදය, එක්සත් රාජධානිය, ස්පාඤ්ඤය, ප්‍රංශය, ස්වීඩනය, ඉරානය, ඉක්වදෝර්, පිලිපීනය, රුමේනියා, නයිජීරියාව, රුසියාව, බංග්ලාදේශය, මෙක්සිකෝව, ඉන්දියාව යන රටවල් නම් කර ඇත.
ඩීප් නොලේජ් ගෲප් ආයතනය හොංකොංහි ප්‍රධාන කාර්යාලය ඇති අතර එය සෞඛ්‍ය, කෘත්‍රිම බුද්ධිය, අභ්‍යවකාශ තාක්ෂණය ඇතුළු ක්ෂේත්‍ර ගණනාවක කටයුතු කරන ආයතනයකි.
අනුරංග ජයසිංහ
