කොවිඞ්-19 වසංගතය පාලනය කිරීම සඳහා නිසි පියවර ගැනීමට පෙර පාසල් හා විශ්වවිද්‍යාල විවෘත කිරීමට දින නියම කිරීම පිළිබඳව විරෝධය පළ කරමින් අන්තර් විශ්වවිද්‍යාල ශිෂ්‍ය බල මණ්ඩලය උසස් අධ්‍යාපන විෂයභාර අමාත්‍ය බන්දුල ගුණවර්ධන වෙත ලිපියක් යවා ඇත.
අන්තර් විශ්වවිද්‍යාල ශිෂ්‍ය බල මණ්ඩලයේ කැඳවුම්කරු රත්කරව්වේ ජිනරතන හිමිගේ අත්සනින් යුතුව අපේ‍්‍රල් 14 වැනිදා එම ලිපිය යොමුකර ඇත.
රෝගයෙහි අවදානම් සහගත බව පහව යමින් තිබෙන බව රජය හඟවන බවත්, මැයි මස මුල් දෙසතිය දක්වා කාලය අවදානම් බව සෞඛ්‍ය විශේෂඥයන් පවසන බවත් එම කාලසීමාව ගැන අබමල් රේණුවක තැකීමක් නොමැතිව රජය පාසල් හා විශ්වවිද්‍යාල විවෘත කරන්නට උත්සාහ කරන බවත් එම ලිපියෙන් පෙන්වා ඇත. ජනතාව විශ්වාස කළ යුත්තේ ආණ්ඩුවද විශේෂඥයන්ද යන පැනය ජනතාව හමුවේ ඇති බවත් ලිපියෙහි සඳහන්ය.
මැයි මස 11 දින පාසල් හා විශ්වවිද්‍යාල නැවත විවෘත කරන්නේ එම ආයතනවල සිසුන්ගේ මඟහැරුණු අධ්‍යාපන කටයුතු අඛණ්ඩව පවත්වාගෙන යෑම සඳහා නිසි වැඩපිළිවෙළක් සකස් නොකර බව එම ලිපියෙන් පෙන්වාදී ඇත. ඒ සඳහා විශේෂ ජනාධිපති කාර්යසාධක බලකායක් පිහිටුවා ඇතත් එහි සංයුතිය ගැටලූසහත බව එම ලිපියෙන් පෙන්වා තිබේ.
අපේ‍්‍රල් 20 වැනිදා වනවිට කොවිඞ්-19 වසංගතය පහව යනු ඇතැයි ආණ්ඩුව විශ්වාස කරන බව සෞඛ්‍ය ඇමතිවරිය ඇතුළු නායකයන්ගේ ප‍්‍රකාශවලින් පෙනී යන බවද ලිපියෙහි සඳශන්ය. එහෙත් ඒ පිළිබඳව රජයේ නායකයන්ගේ ප‍්‍රකාශ සහ සෞඛ්‍ය ක්ෂේත‍්‍රයේ විශේෂඥයන්ගේ අදහස් අහසට පොළොව සේ පරස්පර බව ලිපියෙහි සඳහන් කර ඇත. වසංගතය ගැන සාපේක්ෂ අදහසකට එළැඹිය හැක්කේ අපේ‍්‍රල් 20 වැනිදායින් පසුව බවත්, සෞඛ්‍ය විශේෂඥයන්ට අනුව මැයි මස මුල් සති කිහිපය ගෙවෙන තුරු අවදානම පහව නොයන බවත් ලිපියෙන් පෙන්වා තිබේ. පාසල් හා විශ්වවිද්‍යාල විවෘත කිරීමට ආණ්ඩුව තීරණය කර ඇත්තේ එවැනි පසුබිමක බව ලිපියෙහි වැඩිදුරටත් සඳහන්ය.
ජනතාව කුසට නිසි අහරක් හෝ නොමැතිව වසංගත තත්වයට මුහුණ දෙමින් සිටියදී ආණ්ඩුව මැතිවරණය පවත්වා බලය තහවුරු කරගැනීම සඳහා ප‍්‍රමුඛස්ථානය දෙමින් කටයුතු කරනවාදැයි සමාජය තුළ සැකයක් මතුව තිබෙන බවද ලිපියෙන් පෙන්වාදී තිබේ. මෙවැනි වගකීම් විරහිත හැසිරීම් නිසා රෝගය සමාජයෙහි ප‍්‍රචාරය වීමට ආණ්ඩුවෙන්ම ඉඩ සලසන බව ලිපියෙන් චෝදනා කර තිබේ.
රටේ කර්මාන්ත, කෘෂි, ධීවර හා සේවා ඇතුළු ආර්ථිකයේ කඩාවැටුණු ක්ෂේත‍්‍ර යළි නැංවීමට පෙර පාසල් හා විශ්වවිද්‍යාල විවෘත කිරීමට ප‍්‍රමුඛස්ථානය ලබාදීම ගැනද එම ලිපියෙන් විරෝධය පළකර තිබේ.
