සුළුතර ජනවර්ගවල අයිතිවාසිකම් කඩවෙන අන්දමට කොවිඞ්-19 රෝගීන්ගේ අවසන් කටයුතු පිළිබඳ චක‍්‍රලේඛයක් නිකුත් කිරීම සහ සුළුතර ජනකොටස්වලට එරෙහි වෛරී ප‍්‍රකාශ නැවැත්වීමට කටයුතු නොකිරීම පිළිබඳව කරුණු විමසමින් එක්සත් ජාතීන්ගේ සංවිධානය ජනාධිපති ගෝඨාභය රාජපක්ෂගෙන් කරුණු විමසා තිබේ.
ආගම් සහ විශ්වාසයන් දැරීමේ නිදහස පිළිබඳව එක්සත් ජාතීන්ගේ විශේෂ නියෝජිත අහ්මඞ් ෂහීඞ්ගේ අත්සනින් යුතුව එවන ලද ලිපියකින් එම කරුණු විමසීම කර තිබේ.
එම ලිපිය මගින් ජනාධිපතිවරයාගෙන් කරුණු කිහිපයක් පිළිබඳ පැහැදිලි කරන ලෙස ඉල්ලා ඇත.
වසංගතය නිසා මරණයට පත්වූ පුද්ගලයන්ගේ අවසන් කටයුතු ආදාහනයට පමණක් සීමා කිරීමට තර්කානුකූල හේතු ඉදිරිපත් කරන ලෙස ඒ අනුව ඉල්ලා ඇත. ඒ සඳහා සෞඛ්‍ය විශේෂඥයන්ගෙන්, සිවිල් සමාජ නියෝජිතයන්ගෙන් සහ ජනකොටස්වල නියෝජිතයන්ගෙන් අදහස් ලබාගත්තාද යන්න පැහැදිලි කරන ලෙසද ඉල්ලා තිබේ.
ඊට අමතරව අවසන් කටයුතු කිරීමට පෙර මියගිය රෝගියාගේ පවුලේ සාමාජිකයන්ට එම රෝගියාගේ සිරුර දැකගැනීම සඳහා අවස්ථාව සැලසීමට එම අවසන් කටයුතු සිදුකරන නිලධාරීන් වෙත උපදෙස් ලබාදී තිබෙනවාද නැද්ද යන්න, සෞඛ්‍ය අමාත්‍යාංශයේ මාර්ගෝපදේශ සකස් කරන විට සුළුතර ජනකොටස් පීඩාවට ලක් නොවන බව සහතික කරගැනීම සඳහා අවශ්‍ය ක‍්‍රියාමාර්ග ගනු ලැබුවාද නැද්ද යන්න, මුස්ලිම් ජනතාව ඇතුළු සුළුතර ජනවර්ගවලට එරෙහි වෛරී ප‍්‍රකාශ වර්ධනය වීමත් රෝගීන්ගේ පෞද්ගලික තොරතුරු හෙළිදරව් වීමත් වැළැක්වීම සඳහා ගනු ලැබූ පියවර පිළිබඳ මොනවාද යන්න පැහැදිලි කරන ලෙස එම ලිපියෙන් ඉල්ලා ඇත.
ලෝක සෞඛ්‍ය සංවිධානයේ මාර්ගෝපදේශ සැලකිල්ලට ගනිමින් කොවිඞ්-19 රෝගයෙන් මියගිය පුද්ගලයන්ගේ අවසන් කටයුතු කිරීමට අදාළව ශ‍්‍රී ලංකාවේ සෞඛ්‍ය අමාත්‍යාංශය නිකුත් කර ඇති මාර්ගෝපදේශ නැවත වෙනස් කරන ලෙස එම ලිපියෙන් යෝජනා කර ඇත. ලෝක සෞඛ්‍ය සංවිධානයේ නිර්දේශ අනුව කොවිඞ්-19 රෝගියෙන් මියගිය පුද්ගලයෙකුගේ අවසන් කටයුතු කිරීමේදී ආරක්ෂා සහිතව භූමිදානය සිදුකළ හැකි නමුත්, ශ‍්‍රී ලංකාවේ සෞඛ්‍ය අමාත්‍යාංශය මාර්තු 31 වැනිදා නිකුත් කර ඇති මාර්ගෝපදේශවලින් ආදාහනය පමණක් කරන ලෙස නිර්දේශ කර ඇතැයි එම ලිපියෙහි පෙන්වා ඇත.
ඒ අතර මාර්තු 31 වැනිදා මීගමුව ප‍්‍රදේශයේ මුස්ලිම් ජාතික රෝගියෙකු, එම රෝගියාගේ පවුලේ සාමාජිකයන්ගේ කැමැත්තට විරුද්ධව ආදාහනය කිරීම පිළිබඳවද එම ලිපියෙන් කරුණු සඳහන් කර ඇත.
ශ‍්‍රී ලංකාවේ මාර්ගෝපදේශ සුළුතර ජනවර්ග පිළිබඳව සංවේදී නොවී සංශෝධනය කර ඇති බව පෙන්වාදී තිබේ.
වත්මන් ගෝලීය වසංගත තත්වයෙන් ඇතිකර තිබෙන අභියෝග අතර ජාතීන් අතර පීඩනය වර්ධනය විය හැකි සහ මූලික අයිතිවාසිකම් කඩවිය හැකි අන්දමේ අනවශ්‍ය පියවර නොගැනීම යහපත් බවද එමගින් යෝජනා කර තිබේ.
අවසන් කටයුතු කිරීමට අදාළව අත්තනෝමතික තීරණ ගැනීම නිසා තමන්ගේ ආදරණීයයන්ට සුදුසු අන්දමට අවසන් කටයුතු සිදුකිරීමට නොහැකි වනු ඇතැයි කොවිඞ්-19 රෝගයෙන් පීඩා විඳින්නන්ගේ පවුල්වල සාමාජිකයන් බියට පත්විය හැකි බවද එමගින් පෙන්වාදී තිබේ. මෙවැනි කාරණා පිළිබඳව තීන්දු ගැනීමේදී උනන්දුවක් දක්වන ජන කණ්ඩායම් සහ සුදුසුකම් ඇති විශේෂඥයන්ගේ උපදෙස් ලබාගැනීම යහපත් බවද පෙන්වාදී ඇත.
පවතින අසීරු වාතාවරණය යටතේ වුව සුළුතර කණ්ඩායම්වල ආගමික නිදහස රැුකගැනීමේ වැදගත්කම සිහිපත් කර දෙන බවද එම ලිපියෙහි සඳහන්ය. මේ අතර ආසාදිතයන්ගේ පෞද්ගලිකත්වය සහ අනන්‍යතාව රැුකගැනීමත්, ඔවුන්ගේ ආගමික හෝ ජනවාර්ගික අනන්‍යතා පොදුජනතාව වෙත හෙළි නොකිරීමෙහි වැදගත්කමත් එම ලිපියෙන් පෙන්වා ඇත.
සිවිල් හා දේශපාලන අයිතිවාසිකම් පිළිබඳ ජාත්‍යන්තර සම්මුතියට ශ‍්‍රී ලංකාව අත්සන් තබා ඇති බවත් එහි 18 වැනි වගන්තිය අනුව සිතීමේ, හෘදය සාක්ෂියේ සහ ආගම් ඇදහීමේ නිදහස තහවුරු කළ යුතු බවද පෙන්වාදී තිබේ.
