දකුණු කොරියාව සහ ලංකාව සමානද?

– දකුණු කොරියාව වගේ ලංකාව රෝගීන් හඳුනාගෙන නැහැ

– දකුණු කොරියාවේ ටෙස්ට් අනුපාතය මිලියනයකට 10,000

– ලංකාවේ ටෙස්ට් අනුපාතය මිලියනයකට 200

– ලංකාව ඉන්නේ දකුණු කොරියාවට මාස දෙකක් පසුපසින්

දකුණු කොරියාව අපේ‍්‍රල් 15 වැනිදා එරට මහමැතිවරණය පැවැත්වූ බව දැන් ලංකාවේ ආණ්ඩු හිතවාදී මාධ්‍ය ආයතන තමන්ගේ ප‍්‍රවෘත්තිවලට රිංගවමින් ඉන්නවා. ලෝකයේ රටවල් 30ක් පමණ ප‍්‍රධාන පෙළේ මැතිවරණ නොපවත්වා කල් දැමීම ප‍්‍රවෘත්තියක් නොවුණාට, කොවිඞ්-19 වසංගත සමයේ පළමු ජාතික මැතිවරණය දකුණු කොරියාව පැවැත්වීම ලංකාවේ මාධ්‍යවලට රසබර ප‍්‍රවෘත්තියක් වී තිබෙනවා. 30කට වඩා ඒ මාධ්‍යවලට එක විශාලයි.

ඒ අතරේ ලංකාවේ මහමැතිවරණය පැවැත්වීමට එරෙහිව අදහස් දක්වන අය ‘තක්කඩින්’ ලෙස අමාත්‍ය විමල් වීරවංශ මාධ්‍ය සාකච්ඡාවකදී හඳුන්වා තිබුණා. අප පුවත්පතද මැතිවරණය පැවැත්විය නුසුදුසු බව කියා ඇති නිසා, අපත් ඔහුගේ ‘තක්කඩි’ කුලකයට ඇතුළත් වෙනවා.

එහෙත් දකුණු කොරියාවත් උපුටා දක්වමින් තමන්ගේ පටු දේශපාලන වුවමනා ඉටු කරගන්නට ‘තක්කඩි’ වැඩක් කරමින් ඉන්නේ ආණ්ඩුව මිසක්, අප නොවෙයි.

දකුණු කොරියාවේ ව්‍යවස්ථාදායකයේ ධුර කාලය අවුරුදු හතරයි. 2016 අපේ‍්‍රල් 13 වැනිදා අවසන් මහමැතිවරණය පැවැත්වූ දකුණු කොරියානු ව්‍යවස්ථාදායකයට 2020 අපේ‍්‍රල් මාසය වනවිට වසර 4ක් පිරෙනවා. ධුර කාලය අවසන් වූ එහි මැතිවරණය පවත්වන්නේ ඒ අනුව.

ඒ අනුව දකුණු කොරියාව ඡන්දය පවත්වන්නේ තම ව්‍යවස්ථාදායකයේ ධුර කාලය අවසන් වෙන්නට මාස හයකට පෙර විසුරුවා, තමන්ට වාසිදායක මොහොතක මැතිවරණය පැවැත්වීමේ අරමුණෙන් නොවන බව අප මුලින්ම සිහිතබාගත යුතුයි.

අනෙක් පැත්තෙන් ආණ්ඩුවට  ඕනෑ දකුණු කොරියාව වගේ ඡන්දය පවත්වන්න නම් දකුණු කොරියාව වගේ රෝගය මර්දනය කළ යුතුයි.

ලංකාව කොවිඞ්-19 මර්දනය කරන්නට කියා ඇඳිරි නීතිය දැම්මා. එහෙත් දකුණු කොරියාව නිල වශයෙන් ලොක්ඩවුන් කළේවත් නැති බව ගාඩියන් පෙන්වනවා. ඔවුන් පෙන්වන්නේ, ඒ වෙනුවට ඔවුන් පාවිච්චි කළේ පරීක්ෂණ පැවැත්වීම.

එනම්, ලංකාව තවමත් හරිහැටි පාවිච්චි නොකරන සාර්ථක සහ එකම විසඳුම වන ‘ටෙස්ට්.. ටෙස්ට්… ටෙස්ට්…’

දකුණු කොරියාව තමන්ගේ රටේ සිටින දහස් ගණනක් වන කොවිඞ්-19 රෝගීන් හඳුනාගැනීම සඳහා දැවැන්ත වැඩපිළිවෙළක් ගෙනගියා. ඔවුන් අපේ‍්‍රල් 14 වනවිට කොවිඞ්-19 රෝගීන් හඳුනාගැනීමේ පරීක්ෂණ 534,552ක් කර තිබෙනවා. ජනගහනයෙන් එක මිලියනයකට පරීක්ෂණ 10,000ක පමණ අනුපාතයට පරීක්ෂණ කර තිබෙනවා. ඒ නිසාම සාමාන්‍ය සමාජයෙහි නිදැල්ලේ සිටින රෝග ලක්ෂණ නොපෙන්වන කොවිඞ්-19 ආසාදිතයන් සංඛ්‍යාව ගැන දකුණු කොරියාවට සාධාරණ අවබෝධයක් ලැබී තිබෙනවා. ඒ අනුව ඔවුන් මැතිවරණයේදී වෙන්කළ හැකියි. රෝගය ව්‍යාප්ත වීම හැකිතාක් අඩු කළ හැකියි.

එහෙත් ශ‍්‍රී ලංකාව ඒ කටයුත්තේදී අන්තිම අසමත් රටක්. අපේ රටේ මිලියනයකට පරීක්ෂණ අනුපාතය 200ක් පමණ. කොවිඞ්-19 රෝග ලක්ෂණ නොපෙන්වන ආසාදිතයන් කී දෙනෙකු එදිනෙදා සමාජයෙහි සිටිනවාදැයි අප හරියටම දන්නේ නැහැ.

දකුණු කොරියාවේ හමුවූ රෝගීන් 10,591ක් අතරින් 7,616ක් සුවය ලබා හමාරයි. එනම්, හමුවූ රෝගීන්ගෙන් බහුතරය සුවය ලබා හමාරයි. එයට සාපේක්ෂව ලංකාවේ රෝගීන් සංඛ්‍යාව අඩුයි. එහෙත් ඉන් බහුතරයක් තවම සුවය ලබා නැහැ. දකුණු කොරියාවේ මුල්ම රෝගියා වාර්තා වුණේ ජනවාරි මාසයේදී. ශ‍්‍රී ලංකාවේ දැන් පවතින තත්වය හෙවත් රෝගීන් දෙසිය ගණනක තත්වයට පෙබරවාරි 24 වැනිදා වනවිට ඔවුන් පැමිණියා. එනම්, පළමු රෝගියාගේ සිට රෝගීන් 200 ඉක්මවන්නට දකුණු කොරියාවට ගතවී තිබුණේත් ලංකාවට ගතවූ තරමේ කාලයක්.

වෙනසකට ඇත්තේ අප දකුණු කොරියාවට වඩා මාස දෙකක් පසුපසින් සිටීම. දකුණු කොරියාවත් ලංකාවත් ඉන්නේ සමාන කාලරාමුවක නොවෙයි.

ඔවුන්ගේ දිනෙක රෝගීන් සංඛ්‍යාව උපරිම තත්වයේ තිබුණේ පෙබරවාරි විසිගණන්වල සහ මාර්තු මාසයේ මුල සතියේ. ඔවුන්ගේ රෝගය වර්ධනය වීමට ප‍්‍රධාන හේතු අතර ආගමික වැඩසටහනක්ද තිබුණා.

ලංකාවේ වසංගතය වර්ධනය වීමට හේතුව මැතිවරණ ප‍්‍රචාරය වීමේ අවදානමක් තියෙනවා.

අනෙක් අතට දකුණු කොරියාව මැතිවරණය පැවැත්වුවේ කෙසේද කියා අප සෙවිය යුතුයි. ඡන්දදායකයන් මුහුණු ආවරණ පැළඳ ඡන්ද පොළට ආ යුතුයි. මීටරයක් ඈතින් සිටගත යුතුයි. ඡන්දය පාවිච්චි කිරීමට පෙර සිරුරේ උෂ්ණත්වය පරීක්ෂා කර බැලිය යුතුයි. ඉන්පසුව සිරුරේ උෂ්ණත්වය වැඩි පුද්ගලයන් වෙනම ඡන්ද කුටියකට ගොස් ඡන්දය ප‍්‍රකාශ කළ යුතුයි. සියලූ ඡන්දදායකයන් ඡන්දයෙන් පසුව දෑත් සේදිය යුතුයි. ජනගහනයෙන් සීයට 26ක් ඡන්ද දිනයට පෙර ඡන්දය පාවිච්චි කළා.

මේ සියල්ල වෙනුවෙන් රාජ්‍ය සේවකයන් ලක්ෂ 5කට වඩා යොදවන්නට සිදුවුණා. ඔවුන්ගේ සෞඛ්‍යාරක්ෂාවට පහසුකම් සපයන්න සිදුවුණා. දකුණු කොරියාව ලංකාවට වඩා ආර්ථික ශක්තියක් ඇති රටක් නිසා ඔවුනට එම පහසුකම් සඳහා වියදම් කිරීමේ හැකියාව ඇති.

ශ‍්‍රී ලංකාවේ සෞඛ්‍ය සේවකයන් පවා අවශ්‍ය සෞඛ්‍යාරක්ෂිත උපකරණ නැති බව මීට පෙර වාර්තා කර තිබුණා. එවැනි රටක් සමස්ත රාජ්‍ය සේවයේ සෞඛ්‍යාරක්ෂාව ගැන බලන්නේ කෙලෙසද? එම තත්වයන් අතින් දකුණු කොරියාව සහ අප සමානද?

ඒ සියලූ කරුණු තිබියදී මේ තරම් පරීක්ෂණ කළ දකුණු කොරියාවේ පවා මැතිවරණය හේතුවෙන් රෝගය නැවත වර්ධනය වීමේ අවදානමක් තියෙනවා. දකුණු කොරියාවේ දෙවැනි කොවිඞ්-19 රැුල්ල ඇතිවීමට ඉඩ නොදීමේ අභියෝගය ඡන්දය පැවැත්වීමෙන් පසුව තිබෙන බව බීබීසී ඇතුළු අන්තර්ජාතික මාධ්‍ය වාර්තා කර තිබුණේ ඒ නිසා.

අනුරංග ජයසිංහ

ඡායාරූපය/ Getty Images