– අතුරුදන් තැනැත්තන් පිළිබඳ කාර්යාලය
කොවිඩ්-19 වසංගතය නිසා අවතැන්වූ පවුල් සඳහා ලබාදෙන ආධාර මුදල අතුරුදන් වූ තැනැත්තන්ගේ පවුල්වල සාමාජිකයන්ටද ලබාදෙන ලෙස අතුරුදන්වූ තැනැත්තන් පිළිබඳ කාර්යාලය ජනාධිපති ගෝඨාභය රාජපක්ෂගෙන් හා අග්‍රාමාත්‍ය මහින්ද රාජපක්ෂගෙන් ලිඛිතව ඉල්ලා ඇත.
අතුරුදන් වූ තැනැත්තන් පිළිබඳ කාර්යාලයේ සභාපති ජනාධිපති නීතිඥ සාලිය පීරිස්ගේ අත්සනින් යුතුව ජනාධිපතිවරයා සහ අගමැතිවරයා වෙත අප්‍රේල් 07 වැනිදා එම ඉල්ලීම ඇතුළත් ලිපියක් යවා ඇත.
කොවිඩ්-19 ව්‍යාප්තිය පාලනය කිරීම සඳහා පනවා ඇති ඇඳිරි නීතිය නිසා සමාජයේ අවදානම් සහගත සමාජ කොටස් පීඩා විඳින බවත්, අතුරුදන් වූ තැනැත්තන්ගේ පවුල් එලෙස දැඩි පීඩාවට ලක්වන කොටසක් බවත් ජනාධිපති ගෝඨාභය රාජපක්ෂ වෙත යවන ලද ලිපියෙන් පෙන්වාදී ඇත. ඒ අනුව සහනාධාර වැඩසටහන්වලට ඔවුන්ද ඇතුළත් කළ යුතු බව ඉල්ලා ඇත.
මාර්තු 06 වැනිදා ප්‍රකාශයට පත් කළ අත්‍යවශ්‍ය සේවා සැපයීම සඳහා ජනාධිපති කොමිෂන් සභාව පිහිටුවීම සඳහා වන ගැසට් පත්‍රයෙහි 11 වැනි වගන්තියෙන් කාන්තාවන් ගෘහමූලිකයන් වන සහ අඩු ආදායම්ලාභී පවුල්වලට වැඩි අවධානයක් යොමුකරන ලෙස සඳහන්ව ඇතැයි එම ලිපියෙන් පෙන්වාදෙයි.
අතුරුදන්වීම්වලට ශ්‍රී ලංකාවේ සියලු ප්‍රදේශවලට හා සියලු ජනවර්ගවලට අයත් පුද්ගලයන් මුහුණදී ඇති බවත් පොලිස් හා හමුදා සාමාජිකයන්ද මෙහෙයුම්වලදී අතුරුදන්ව ඇති බවත් එම පවුල්ද අසීරුවට මුහුණදී ඇති බවත් එම පවුල්වල සාමාජිකයන් මානසික, සමාජීය හා ආර්ථික අසීරුතාවන්ට මුහුණදෙන බවත් බිරින්දෑවරුන්, වැඩිහිටි මාපියන් හා දරුවන් අසරණ වී සිටින බවත් පෙන්වාදෙයි. ඇතැම් පවුල් බරපතළ දරිද්‍රතාවකට මුහුණදෙන බවද සඳහන්ය.
2019 අයවැයෙන් අතුරුදන්වූවන්ගේ පවුල්වල සාමාජිකයන්ට රුපියල් 6000 බැගින් මාසික දීමනාවක් ලබාදීම සඳහා රුපියල් මිලියන 500ක මුදලක් වෙන්කළ බවත්, 2019 නොවැම්බර් දක්වා 153 දෙනෙකුට එම මුදල ගෙවා ඇති බවත් එම ලිපියෙන් පෙන්වාදෙයි.
මෙම පවුල්වල සාමාජිකයන්ට කොවිඩ්-19වසංගතය හමුවේ තමන්ගේ ආදායම් මාර්ග ඇහිරී ඇති නිසා ඒ ඒ ප්‍රදේශවල ග්‍රාම නිලධාරීවරුන් ලවා රජයේ වෙනත් ආධාර ලබාදීමේ වැඩසටහන්වලට අයත් නොවන අතුරුදන්වූ පවුල්වල සාමාජිකයන් හඳුනාගෙන ඔවුන්ටද ආධාර ලබාදීමට කටයුතු කරන ලෙස එම ලිපියෙන් වැඩිදුරටත් ඉල්ලා ඇත.
අනුරංග ජයසිංහ
