– ආධාර දෙන්න රුපියල් මිලියන 16,346ක් පමණ වැයවේවි
– ග‍්‍රාම නිලධාරීවරුන්ට ලැයිස්තු හදන්න බැරිද
කොවිඩ්-19 වසංගතය හේතුවෙන් අවතැන්වූ අඩු ආදායම්ලාභී පවුල්වලට රුපියල් 5000ක දීමනාවක් ලබාදීම ඇතුළු සහනාධාර ලබාදීමේ වැඩසටහන්වලට පොදුජන පෙරමුණේ ප්රාදේශීය දේශපාලනඥයන්ගේ බලපෑම් එල්ලවීම නිසා එම සහනාධාර මැතිවරණයට අනිසි බලපෑම් එල්ලකරන ක‍්‍රියාවලියක් බවට පත්ව ඇත.
අප කළ සොයා බැලීම්වලදී එම ආධාර බෙදාදීමේ කටයුතුවලට සම්බන්ධ නිලධාරීන් කිහිපදෙනෙකුම නිර්නාමිකව කළ අදහස් දැක්වීම් අනුව වාර්තා වන්නේ දේශපාලනඥයන් තමන්ගේ පාක්ෂිකයන්ට හා හිතවතුන්ට දීමනාව ලබාදීම සඳහා බලපෑම් කරන බවත් සැබෑ ලෙසම ආධාර ලැබිය යුතු පුද්ගලයන්ට ආධාර නොලැබීමේ ඉඩක් ඇති බවත්ය.
අප සමඟ අදහස් දැක්වූ නිලධාරීන් හා ප්රාදේශීය මට්ටමේ දේශපාලනඥයන් අදහස් දැක්වූයේ නිර්නාමිකව සිටිනු කැමැත්තෙනි. කෙසේ වෙතත් ආධාර බෙදාදීමේ යාන්ත‍්‍රණය දෙසට බැල්මක් හෙලූ කල කතාවෙහි දිග පළල තේරුම් ගත හැකිය.
කොටින්ම කීවොත් ආධාර බෙදාදීමට දේශපාලන බලපෑම් එල්ලවීම පුදුමයක් නොවේ. ආධාර බෙදාදීමට සකසා ඇති යාන්ත‍්‍රණය දේශපාලන බලපෑම්වලට ඉඩ සලසා ඇත.
ජනාධිපති ලේකම් කාර්යාලය හා අග‍්‍රාමාත්‍ය කාර්යාලය දීමනා ලබාදීමට අදාළව නිකුත් කර ඇති චක‍්‍රලේඛ අනුව ඉහත කී සහනාධාර වැඩසටහන් සඳහා ප්රාදේශීය මට්ටමේ දේශපාලනඥයන් මැදිහත් කරගෙන ඇත.
සහනාධාර ලබාදිය යුත්තේ කාටදැයි තීරණය කිරීම සඳහා එම චක‍්‍රලේඛ අනුව පළාත් පාලන කොට්ඨාස මට්ටමෙන් හෝ ග‍්‍රාම නිලධාරී වසම් මට්ටමෙන් කමිටු පිහිටුවා ඇත. අපේ‍්‍රල් 07 වැනිදා එම කමිටු රැස්වී තිබුණි. එම කමිටුවලට පළාත් පාලන ආයතනවල දේශපාලන නියෝජිතයන්ද ඇතුළත් කර ඇත.
එම ග‍්‍රාමීය මට්ටමේ කමිටු රැස්වීම්වලට සහභාගි වූ පළාත් පාලන මට්ටමේ දේශපාලන නියෝජිතයන් කිහිපදෙනෙකු අනිද්දා සමඟ අදහස් දක්වමින් ප‍්‍රකාශ කළේ ග‍්‍රාම නිලධාරී, සමෘද්ධි සංවර්ධන නිලධාරී ඇතුළු රජයේ නිලධාරීන්ට තීරණ ගැනීමට නොහැකි වන ලෙස පොදුජන පෙරමුණේ දේශපාලන නායකයන්ගේ බලපෑම් එම ආධාර ලබාදීමේ කටයුතුවලට එල්ලවී ඇති බවය.
මීට පෙර සමාජ ප‍්‍රතිලාභ වැඩසටහන් හෙවත් සමෘද්ධි සහනාධාරය, වැඩිහිටි දීමනාව, ආබාධිත දීමනාව, වකුගඩු ආධාර, ගොවි විශ‍්‍රාම වැටුප් දීමනාව, ධීවර විශ‍්‍රාම වැටුප් දීමනාව යනාදි දීමනා ලැබූ පුද්ගලයන්ට හා එම දීමනා නොලබන පුද්ගලයන්ට රුපියල් 5000ක දීමනාව ලබාදීමට තීරණය කර ඇත. ඒ පිළිබඳව ජනාධිපති ලේකම් කාර්යාලය පීඑස්/සීඑස්ඒ/චක‍්‍රලේඛ/1920/20 යන අංකය යටතේ චක‍්‍රලේඛයක් මාර්තු 30 වැනිදා නිකුත් කළේය.
ඉහත චක‍්‍රලේඛය යටතේ සඳහන් ආධාර ලබාදිය යුත්තේ කෙසේද යන්න පැහැදිලිඑ කරමින් අග‍්‍රාමාත්‍ය කාර්යාලය පීටීඑෆ්/03/2020 අංකය යටතේ චක‍්‍රලේඛයක් මාර්තු 31 වැනිදා නිකුත් කර ඇත. එම චක‍්‍රලේඛය සියලූම දිස්ත‍්‍රික් ලේකම්වරුන් හා ප්රාදේශීය ලේකම්වරුන් වෙත යොමුකර ඇත.
ඒ අනුව සමාජ ප‍්‍රතිලාභ යටතේ ප‍්‍රතිලාභීන් නිරවුල්ව හඳුනාගැනීම සඳහා රටේ ඇති පළාත් පාලන කොට්ඨාස 4917 සඳහා එක බැගින් හෝ ග‍්‍රාම නිලධාරී වසම් 14,022 සඳහා එක බැගින් ග‍්‍රාමීය කමිටු පිහිටුවාගන්නා ලෙස උපදෙස් දී ඇත. එක් කමිටුවක් අවම වශයෙන් සාමාජිකයන් පස්දෙනෙකු සිටිය යුතු බව සඳහන් කර ඇත.
එම සාමාජිකයන් යැයි චක‍්‍රලේඛයේ පිළිවෙළින් සඳහන්ව ඇත්තේ මෙසේය. පළාත් පාලන කොට්ඨාස නියෝජිත, ග‍්‍රාම නිලධාරි, කෘෂිකර්ම පර්යේෂණ නිලධාරී, සමෘද්ධි සංවර්ධන නිලධාරී, පවුල් සෞඛ්‍ය සේවා නිලධාරී, ආර්ථික සංවර්ධන නිලධාරී යන නියෝජිතයන් පස්දෙනා අවම වශයෙන් එම කමිටුවල සාමාජිකයන් විය යුතු බව සඳහන්ය. ගැටලුව ඇත්තේ එම කමිටුවලට පළාත් පාලන නියෝජිතයන් කුමකටද යන්නය. අනෙක පළාත් පාලන නියෝජිතයා යන්න ඉහත කී නම් අතරින් ඉහළින්ම සඳහන් කළේ කුමකටද යන්නය. ප්රාදේශීය දේශපාලනඥයන් මැදිහත් වූ ග‍්‍රාමීය කමිටුවකදී ග‍්‍රාම නිලධාරී ඇතුළු අනෙකුත් රජයේ නිලධාරීන්ට ඇති තීරණ ගැනීමේ බලය ගැන මෙහි අමුතුවෙන් සටහන් කළ යුතු නොවේ.
2018 පළාත් පාලන මැතිවරණයේදී රටේ මැතිවරණ කොට්ඨාස අතරින් අතිබහුතරය ජයගත්තේ ශ‍්‍රී ලංකා පොදුජන පෙරමුණය. ඒ අනුව රටේ සිටින පළාත් පාලන කොට්ඨාස නියෝජිතයන් අතරින් බහුතරය පොදුජන පෙරමුණේය.
එම ග‍්‍රාමීය කමිටු රැස්වී ප්රාදේශීය ලේකම්වරුන් සකස් කර ඇති පොරොත්තු ලේඛනය අනුමත කළ යුතු බව චක‍්‍රලේඛයේ සඳහන්ය. එහි වැඩිදුරටත් සඳහන්ව ඇත්තේ එම කමිටුවට ලැයිස්තුව සංශෝධනය කළ හැකි බවය. ඒ අනුව අපේ‍්‍රල් 06 සිට 09 දක්වා එම කමිටුවල මැදිහත්වීමෙන් 5000 දීමනාව ලබාදිය යුතු බව සඳහන්ය.
ඉන්පසුව තවත් චක‍්‍රලේඛයක් අග‍්‍රාමාත්‍ය කාර්යාලය නිකුත් කර ඇත. එහි සඳහන්ව ඇත්තේ ඉහත කී ආධාරය වසංගතය නිසා ජීවනෝපාය අහිමි වී ඇති පවුල්වලට හා වක‍්‍රාකාරයෙන් ජීවනෝපාය අහිමි පවුල්වලටද ලබාදිය යුතු බවය.
එලෙස ජීවනෝපාය අහිමිවෙන පවුල් මොනවාදැයි නිශ්චිත නිර්වචනයක් ලබාදී නැත. ඒ අනුව අප ඉහත කී දේශපාලන බලපෑම් ඇති ග‍්‍රාමීය කමිටුවලට රිසිසේ වසංගතය නිසා ආදායම් අහිමි පවුල් ලෙස සඳහන් කරමින්, රුපියල් 5000 ආධාර ලබාදීම සඳහා නම් ඇතුළත් කළ හැකිය.
දේශපාලනඥයන්ගේ මැදිහත්වීමෙන් එම කටයුතු සිදුවීම නිසා එම දීමනා අත්‍යවශ්‍ය නොවන විශාල පිරිසකට 5000 බැගින් දීමනා ලබාදීම සිදුවනු ඇත. ඒ අනුව ආර්ථික වශයෙන් රට දුර්වල වී ඇති මොහොතක විශාල මුදල් නාස්තියක්ද සිදුවනු ඇත. අප මේ ව්‍යාපෘතිය සඳහා කෙතරම් මුදලක් වැයවනු ඇතිදැයි අනුමාන කර බලමු.
ඉහත කී ජනාධිපති ලේකම් කාර්යාලයේ චක‍්‍රලේඛය අනුව මෙතෙක් සහනාධාර නොලබන, එහෙත් පොරොත්තු ලේඛනවල සිටින පුද්ගලයන්ටද සහනාධාර ලබාදෙන ලෙස සඳහන් කර ඇත. එම චක‍්‍රලේඛයට අනුව පොරොත්තු ලේඛනවල සිටින පුද්ගලයන් සංඛ්‍යාව 795,763කි. එම පිරිසට රුපියල් 5000 බැගින් ලබාදීමට වැයවෙන මුදල පමණක් රුපියල් මිලියන 3958කි.
වැඩිහිටි දීමනාව ලබන පිරිස 416,764ක් බව සඳහන්ය. ඔවුන් සඳහා 5000 බැගින් ලබාදීමට වැයවෙන මුදල රුපියල් මිලියන 2083 කි.
එම චක‍්‍රලේඛයට අනුව දැනටමත් සමෘද්ධි ප‍්‍රතිලාභ ලබන 1,798,655 දෙනෙකු සිටින බව සඳහන්ය. ඔවුන්ට 5000 බැගින් දීමනාවක් ලබාදීමට වැයවෙන පිරිවැය මිලියන 8993 කි.
ආබාධිත දීමනාව ලබන 72,000ක් සිටිති. ගොවි විශ‍්‍රාම වැටුප් ලබන ගොවීහු 160,675ක් සිටිති, ධීවර විශ‍්‍රාම වැටුප් ලබන ධීවරයෝ 4,600ක් සිටිති, වකුගඩු රෝගීන් වශයෙන් දීමනාව ලබන 25,320ක් සිටිති. එම පිරිසට රුපියල් 5000 බැගින් ලබාදීමට රුපියල් මිලියන 1312ක් වැය වේ.
ඒ අනුව ඉහත කී වියදම්වල සම්පූර්ණ එකතුව රුපියල් මිලියන 16,346ක් පමණ වනු ඇතැයි අනුමාන කළ හැකිය.
ඉහත කී විවිධ ලැයිස්තු අතරින් එකකට වැඩි සංඛ්‍යාවක තමාගේ නම සඳහන් වන පුද්ගලයන්ද සිටිය හැකිය. සමෘද්ධි ආධාර ලබන පුද්ගලයෙකු වකුගඩු රෝගියෙකු ලෙස ආධාර ලබනවා විය හැකිය. ඒ අනුව සැබෑ ලෙසම ඉහත කී මුදලට වඩා අඩු මුදලක් වියදම් වීමේ ඉඩක් ඇත.
අප ඉහත කී පරිදි ඉහත ආධාර නොලබන අයගේ නම්ද ඉහත ලැයිස්තුවලට ඇතුළත් කිරීමේ බලය ලැබී ඇත. ඒ අනුව ඇතැම් විට ඉහත අප ඇස්තමේන්තු කළ මුදලට වඩා වැඩි මුදලක් වියදම් වීමේ ඉඩක්ද ඇත.
කෙසේ වෙතත් ඉහත කී දීමනා ලබාදීමේ ව්‍යාපෘතිය විශාල මුදලක් වැයකරන ලද ව්‍යාපෘතියක් බව ඉහත ගණනය කිරීම්වලින් පැහැදිලි වෙයි. ආර්ථිකය දුර්වල මොහොතක මෙතරම් විශාල මුදලක් වැය කිරීමේදී සැබෑ සුදුස්සන් අතට දීමනාව ලැබෙන බවටත්, එය අනිසි දේශපාලන බලපෑම්වලට ලක් නොවන බවටත් සහතික වීම වැදගත්ය.
ප‍්‍රදේශයේ ග‍්‍රාම නිලධාරී, සමෘද්ධි සංවර්ධන නිලධාරී, පවුල් සෞඛ්‍ය සේවා නිලධාරී යනාදි ගම්වැසියන් හා ගනුදෙනු කරන දේශපාලන පක්ෂවල ඍජු නියෝජිතයන් නොවන නිලධාරීන්ට ආධාර බෙදාදීම කළ නොහැක්කේ ඇයි? එයට දේශපාලනඥයන් මැදිහත් කරගන්නේ ඇයි? ඇතැම් විට ප‍්‍රශ්නයට පිළිතුර ඉදිරි මහ මැතිවරණය විය හැකිය.
මැතිවරණ සමයක් වන මෙම කාලසීමාවේදී ප්රාදේශීය නියෝජිතයන් මෙම කටයුතුවලට මැදිහත් වීමත් රජයේ භාණ්ඩාගාරයෙන් ආධාර ලබාදෙන ආධාර දේශපාලන ක‍්‍රියාවලියක් වීම ප‍්‍රජාතන්ත‍්‍රවාදයට අහිතකර බව අමුතුවෙන් සටහන් කළ යුතු නැත.
