කොරෝනා වෛරසය නිසා හටගන්නා රෝග ලක්ෂණ උත්සන්න වීම හේතුවෙන් බි‍්‍රතාන්‍යයේ අග‍්‍රාමාත්‍ය බොරිස් ජොන්සන් ලන්ඩනයේ ශාන්ත තෝමස් රෝහලේ දැඩි සත්කාර ඒකකයට ඇතුල් කර ඇති බව අන්තර්ජාතික මාධ්‍ය වාර්තා කරයි.
55 වැනි වියේ පසුවන බොරිස් ජොන්සන් පසුගිය අපේ‍්‍රල් 5 දා ලන්ඩනයේ ශාන්ත තෝමස් රෝහලට ඇතුළත්කර වෛද්‍ය අධීක්ෂණය යටතට පත්කර ඇත. ඊට ප‍්‍රථම ඔහු සිය නිවසේ ස්වයංනිරෝධායනයට යොමුවී සිටියේය. බීබීසී දේශපාලන වාර්තාකරු චාල්ස් මෙන්ෂන් ප‍්‍රකාශ කරන්නේ පසුගිය 6වැනි සඳුදා දිනයේදී අග‍්‍රාමාත්‍යවරයා දැඩි සත්කාර ඒකකයට ඇතුල් කරන්නට ප‍්‍රථම ඔහුට ඔක්සිජන් ලබාදුන් බවය. අග‍්‍රාමාත්‍යවරයාගේ අසනීප තත්ත්වය පිළිබඳව බි‍්‍රතාන්‍යයේ රැජින ද දැනුවත් කර ඇතැයි එම මාධ්‍ය වාර්තා වැඩිදුරටත් ප‍්‍රකාශ කරයි.
මේ අතර බීබීසීය වාර්තා කරන්නේ අවශ්‍ය අවස්ථාවක තමා වෙනුවෙන් වැඩ බලන ලෙස අගමතිවරයා විදේශ ලේකම් ඩොමිනික් රාබ්ගෙන් ඉල්ලීමක් කර ඇති බවයි. මේ අතර ශාන්ත තෝමස් රෝහල උපුටා දක්වමින් එම මාධ්‍ය වාර්තා ප‍්‍රකාශ කරන්නේ 6 වැනි සඳුදා දින දහවල් වන විට බොරිස් ජොන්සන් මහතාගේ තත්ත්වය වඩාත් නරක අතට හැරුණ බවය. මේ වනවිට බි‍්‍රතාන්‍යයේ දෛනික කොවිඞ් මර්දන වැඩපිළිවෙළ මෙහෙයවනු ලබන්නේ විදේශ කටයුතු ලේකම් ඩොමිනික් රාබ්ය.
තවමත් ව්‍යාප්තියේ අඩුවක් නොපෙන්වන මෙම වෛරසය නිසා අපේ‍්‍රල් 7 වැනිදා උදෑසන 1 පමණ වන විට ලෝකය පුරා කොරෝනා ආසාදිතයන් 74,692ක් මරණයට පත්වී ඇත. ලොව පුරා ආසාදිතයන්ගේ ප‍්‍රමාණය 1,346,428 දක්වා ඉහළ ගොස් ඇත. බි‍්‍රතාන්‍යයේ කොරෝනා ආසාදිත මරණ 5,373ක් ලෙස වාර්තා වෙයි. ආසාදිතයන් සංඛ්‍යාව 51,608කි. බි‍්‍රතාන්‍යයේ බොහෝ පුරවැසියන් චෝදනා කරන්නේ කොවිඞ් මර්දනය සඳහා අග‍්‍රාමාත්‍යවරයා ප‍්‍රමුඛ රජය ඉක්මන් ක‍්‍රියාමාර්ග නොගත් බවය. එනිසා එහි විපාක බි‍්‍රතාන්‍යයේ අග‍්‍රාමාත්‍යවරයාටද විඳින්නට සිදුවී ඇති බවය.
