කොවිඞ් 19 වසංගතය චීනයේ වූහාන්වල සිට ලෝකය පුරා සුළි කුණාටුවක් සේ ව්‍යාප්ත වෙමින් යන මේ කාලයේ මෙම වෛරසය මර්දනය සඳහා ඖෂධයක් නිපදවීමට ලෝකය පුරාම විද්‍යාඥයන් සහ ඖෂධ නිෂ්පාදන සමාගම් උනන්දු වෙමින් සිටියි. ශ‍්‍රී ලංකාව තුළත් පසුගිය කාලයේ ජපාන විසින් නිෂ්පාදනය කරන ‘ඇවිගන්‘ සහ මැලේරියාව මර්දනය සඳහා කාලයක් භාවිත කළ ‘ක්ලෝරෝක්වීන්’ යන ඖෂධ පිළිබඳව සෑහෙන්න කතා කළේය. ආණ්ඩුව මෙන්ම විපක්ෂයද ජපානයෙන් වහාම ‘ඇවිගන්‘ නම් ඖෂධය ගෙන්විය යුතු බවය හඬ නැඟුවේය. තවත් මාධ්‍ය කීවේ ආණ්ඩුව වහාම ඇවිගන් ගෙන්වීම පිළිබඳව සිය අවධානය යොමුකර ඇති බවය.
ක්ෂුද්‍ර ජීවී විද්‍යා විශේෂඥයෙකු සහ පර්යේෂකයකු වන හොංකොං විශ්වවිද්‍යාලයේ මහාචාර්ය මලික් පීරිස් මහතා මාධ්‍යවේදිනී ලක්නා අමන්දි සමග ‘ඇවිගන්‘ නම් ඖෂධය පිළිබඳව අදහස් දක්වමින් ප‍්‍රකාශ කරන්නේ වෛරසය මර්දනය සඳහා මෙම බෙහෙත සුදුසු බව රසායනාගාරය තුළ තවම ඔප්පුවී නැති බවය. එහිදී ඔහු ප‍්‍රශ්න කරන්නේ රසායනාගාරය තුළ සාර්ථක නොවූ ඔසුවක් සායනික පරීක්ෂාවට යොමුකරන්නේ කෙසේද? යන්නයි. මෙම ඖෂධය කොඩිඞ් 19 මර්දනය සඳහා ඉවහල් වූ බවට නැගෙන චීන මාධ්‍ය වාර්තා පිළිබඳව අදහස් දක්වමින් හොංකොංහි පර්යේෂණවල නිරත මෙම මහාචාර්යවරයා ප‍්‍රකාශ කරන්නේ එම සාර්ථකත්වය පිළිබඳව නිසි විද්‍යාත්මක වාර්තා ලෝකයම පිළිගත් විද්‍යා සඟරාවකවත් පළකොට නොමැති තත්ත්වයක් තුළ මෙම ප‍්‍රචාරයන් සැකසහිත බවය. මෙම ඔසුවේ භාවිත ඉතිහාසය ගැන එහිදී අදහස් දක්වන මහාචාර්යවරයා කියන්නේ ඉන්ෆ්ලූවෙන්සා සඳහා මුලින්ම ද, ඊළඟට ඉබෝලා සඳහා ද මෙම ඖෂධය යොදා ගත් බවය. නමුත් එහිදී සැලකිය යුතු ප‍්‍රතිඵලයක් නැති බවය. මැලේරියාව මර්දනය සඳහා කාලයක් භාවිත කළ ක්ලෝරෝක්වීන් ඔසුව ගැන ප‍්‍රකාශ කරමින් ඔහු පවසන්නේ, මෙම ඖෂධය පිළිබඳව කර ඇති රසායනාගාර පරීක්ෂණ රැසක් සාර්ථක බවය. එහිදී මෙම ඖෂධය කොවිඞ් මර්දනය සඳහා සාර්ථක ප‍්‍රතිඵල රසායනාගාරය තුළ පෙන්වා ඇති බවද ඔහු ප‍්‍රකාශ කරයි. මෙම බෙහෙත ප‍්‍රංශය තුළ සායනික පරීක්ෂාවකට ලක්කර ඇතැයි ද එයිනුත් සාර්ථක ප‍්‍රතිඵල ඇතැයිද ඔහු ප‍්‍රකාශ කරයි.
මේ අතර දකුණුදිග ප‍්‍රංශයේ Aix-Marseille University මහාචාර්යවරයෙකු වන ක්ෂුද්‍රජීව විද්‍යාඥ Didier Raoult මාර්තු 17 වන දින නිවේදනයක් නිකුත් කරමින් ප‍්‍රකාශ කරන්නේ කෝවිඞ්-19 වෛරසයට හයිඩ්‍රොක්සික්ලෝරෝක්වින් සහ ඇසිත්‍රොමයිසින් යොදා ගනිමින් ඔහු සහ ඔහුගේ පර්යේෂණ කණ්ඩායම විසින් කළ පරීක්ෂණ සාර්ථක වූ බවය. මෙහිදී ඔහු සහ කණ්ඩායම කොවිඞ් ආසාදිතයන් 122කට මෙම ඖෂධය ලබා දී ඇත. මෙනිසා කොවිඞ් ආසාදිතයන්ට මෙම ඖෂධය මුලින්ම ලබාදුන් පිරිස් අතර ඔහු ප‍්‍රමුඛයෙකි. ඔහුගේ මෙම පර්යේෂණ සඳහා පදනම සකසා ඇත්තේ වසර 70ක් තිස්සේ මැලේරියා විරෝධී ප‍්‍රතිකාරයක් වශයෙන් භාවිත කළ ක්ලෝරෝක්වීන් (Chloroquine) භාවිතකිරීමෙන් චීනයේ කොවිඞ් 19 ආසාදිත රෝගීන් සුව වීම වේගවත් වූ බවට චීනයෙන් වාර්තා පළවීමය. මෙම සායනික පර්යේෂණ නිසා ඔහු අද ප‍්‍රංශය තුළ තරුවක් වී ඇති බව paris match සුප‍්‍රකට සඟරාවේ කවරය ඔහුගේ ඡdයාරූපයකින් සැරසීම උපුටමින් ෆිනෑෂියල් ටයිම්ස් වෙබ් අඩවිය වාර්තා කරයි.
මේ වනවිට කොවිඞ් 19 ආසාදනය වී අසාධ්‍ය තත්වයේ පසුවන රෝගීන්ට හයිඩ්‍රොක්සික්ලෝරෝක්වින් සහ ඇසිත්‍රොමයිසින් ලබා දීම ප‍්‍රංශ රජය විසින් අනුමත කර ඇති නමුත් මහාචාර්යවරයාගේ යෝජනාව අනුව කොවිඞ් 19 ආසාදිත සියලූම දෙනාට හයිඩ්‍රොක්සික්ලෝරෝක්වින් සහ ඇසිත්‍රොමයිසින් ලබාදීමට තවමත් ප‍්‍රංශ රජය නිර්දේශ කර නොමැත. සමහර විවේචකයන් ප‍්‍රකාශ කරන්නේ සීමිත රෝගීන් පිරිසක් අරබයා කළ සායනික පර්යේෂණයක් මත පදනම්ව මහාචාර්යවරයා ඇතුළු සමහර පර්යේෂකයන් මෙම ඖෂධය ජනප‍්‍රිය කරවමින් ඇති බවය. කෙසේවුණත් තවත් බොහෝ පර්යේෂකයන් ප‍්‍රකාශ කරන්නේ මෙම ඖෂධය ලබාදීම මගින් කොවිඞ් ආසාදිත මරණ ප‍්‍රමාණය අඩු කරගන්නට පුළුවන් වනු ඇති බවය.
තත්ත්වය මෙය උනත් කොවිඞ් මර්දනය සඳහා තවමත් නිසි ඖෂධයක් සොයාගෙන නැත. දැනට කෙරෙන්නේ මෙවැනි ඖෂධ ගොන්නක් මෙම රෝගය මර්දනය සඳහා යොදාගන්නට පුලූවන් දැයි පරීක්ෂා කිරීමය. බොහෝ පර්යේෂකයන් ප‍්‍රකාශ කරන්නේ මෙම රෝගකාරක වෛරසය මර්දනයට බෙහෙතක් සොයාගැනීම සඳහා අවුරුද්දකට වඩා වැඩි කාලයක් ද එවැනිම කාලයක් එය සංවර්ධනය කර නිශ්පාදනය සඳහා ද වැයවෙනු ඇති බවය.
