මාගේ සිංගප්පූරු වැසියනි,
සුභ සන්ධ්‍යාවක්
කෝවිඞ් 19 තත්ත්වය පිළිබඳව ඔබ අමතා මා අවසන් වරට කතාකළේ මීට සති තුනකට පෙරයි. එතෙක් මෙතෙක් කාලය තුළ දිනපතා ආසාදනය වන පුද්ගලයන් ප‍්‍රමාණය ඉහළ නැග්මක් දක්නට ඇත. මීට පෙර අප දිනකට අත්දැක්කේ දසදෙනෙකු පමණ ආසාදනය වන අයුරුය. එහෙත් අවසන් සති දෙක කාලය තුළ, අපගේ සියලූ උත්සාහයන් හමුවේ වුවද, දිනකට පනස් දෙනෙකු පමණ ආසාදනය වනු දක්නට ලැබිණ. කලින් බොහෝ ආසාදිතයෝ පිටරටකින් මෙරටට ආ අය වූහ; ඉනුත් බහුතරය මෙරටට පෙරලා පැමිණෙන සිංගප්පුරු වැසියෝ වූහ. එහෙත් පසුගිය සතියේ සිට මෙරටින්ම ආසාදිත අයගේ නැග්මක් පෙනිණ.
අපගේ කාර්යක්ෂම තතු සෙවීමේ යාන්ත‍්‍රණ ක‍්‍රමවේදය හමුවේ වුවද, අපට කාට කොහෙන් වයිරසය අසාදනය වුනා දැයි සොයාගැන්මට අපි අපොහොසත්ව සිටිමු. මින් හැෙඟන්නේ ආසාදනය වූ විශාල පිරිසක් අප අතර සිටින බවත් ඔවුන් තවමත් අපට සොයාගන්නට නොහැකි බවත්ය. එම පිරිස් අනෙක් අයටද වයිරසය තවදුරටත් සම්පේ‍්‍රෂණය කරනු ඇත.
පසුගිය දින කිහිපය තුළ නේවාසිකාගාරවල ජීවත් වන විදේශ සංක‍්‍රමණික පිරිස් හා සාත්තු නිවාසවල සිටින අය අතරද ආසාදිතයන් හඳුනාගෙන ඇත. මෙය ඉතා බරපතළ දෙයක් වන්නේ නේවාසිකාගාර හා සාත්තු නිවාසවල විශාල පිරිස් ජීවත්වන නිසාය. එක අයෙකුගෙන් විශාල පිරිසකට වයිරසය පැතිරිය හැක. අනෙක් කරුණ නම්, සාත්තු නිවාසවල සිටින්නන් බහුතරය මහලූ, දුර්වල හා පහසුවෙන් වයිරසයට ගොදුරුවන්නට හැකි අය වීමය.
තත්ත්වය මෙසේ දිගහැරෙද්දී අපි අපගේ පෙර-සූදානම් ක‍්‍රියාදාමයන් තවත් දැඩිකළෙමු. සිංගප්පූරු වැසියෝ මේ අභියෝගයට මහත් සංයමයකින් හා වගකීමකින් කටයුතු කරමින් තම දෛනික ජීවිතය නම්‍යශීලීව ගතකළහ.
සියලූදෙනා එකමුතුව වැඩ කිරීමෙන් අපි වසංගතය යම් පාලනයකට නතුකරගන්නට සමත්වීමු.
එහෙත් වර්තමාන ප‍්‍රවණතාව මා කම්පාවට හා අසීරුතාවකට පත්කරන අතර යම් තීරණාත්මක පියවර අප මේ අවස්ථාවේ නොගතහොත් තත්ත්වය මීට වඩා බරපතළ අඩියකට යා හැකිය. මේ ගැන මම අන්තර් අමාත්‍යාංශ කාර්යසාධන බලකාය සමග සාකච්ඡුා කළෙමි. සතියෙන් සතිය ඉදිරි සති කිහිපය තුළ ප‍්‍රතික‍්‍රියා කරනු වෙනුවට එක වර තීරණාත්මක පියවර මාලාවක් ගැනීමෙන් අනතුර වළකාගැන්මට අපි තීරණය කළෙමු. එම නිසා අපි අතිශය දැඩි පියවර පනවන්නෙමු. මෙය සර්කිට් බ්‍රේකරයක් හෙවත් පරිපථ ඛණ්ඩනයක් වැනිය. එය වසංගතය පැතිරීමේ අනතුර හා අවදානම අඩුකිරීමට පිටිවහලක් වනු ඇත. ක‍්‍රමානුකූලව එය අපගේ ආසාදිත සංඛ්‍යාවද පහත දැමීමට උදවුවෙනු ඇත. එහි ප‍්‍රතිඵලයක් ලෙස අප ගන්නා දැඩි පියවර අඩු කිරීමට අපට අනුබල දෙනු ඇත. මෙම සර්කිට් බ්‍රේකර ක‍්‍රමය මසකට බලපානු ඇත.
පළමුව, අත්‍යවශ්‍ය සේවා හා ආර්ථික මර්මස්ථාන හැර අනෙකුත් බොහෝ සේවාස්ථාන අපි වසා දමමු. ආහාර වෙළෙඳසැල්, පොළවල්, සුපිරි පොළවල්, සායන, ප‍්‍රවාහන හා අනෙකුත් උපයෝගිතා සේවස්ථාන විවෘතව තැබෙනු ඇත. ඒවා අත්‍යවශ්‍ය සේවාවන්ය. ආර්ථිකයේ උපායමාර්ගික කොටස් හා ගෝලීය සැපයුම් දාමයන් නොකඩවා පවත්වාගෙන යමු. මෙම අංශවල සේවා නියුක්තිකයන්ට තම රාජකාරී ස්ථාන කරා යා හැක. අදාළ දුරස්ථ කොන්දේසි මත තම රාජකාරි කළ හැක. එහෙත් අනෙකුත් බොහෝ සේවාස්ථාන වසා දැමිය යුතුය. යමෙකුට නිවසේ සිට වැඩකළ හැකි නම් එසේ කළ යුතුය. ඉදිකිරීම් හා නැව් අංගණවල සේවය කරන විදේශ සංක‍්‍රමණිකයන්ගේ කාර්ය අත්හිටුවනු ඇත. ඔවුන් තම නේවාසිකාගාරවල නැවතී සිටිය යුතුය. ඔවුන් රැුකබලාගැනීම අප විසින් කෙරෙනු ඇත. මෙම නව පියවර ලබන අඟහරුවාදා සිට ක‍්‍රියාත්මක කරනු ඇත.
අපගේ ශ‍්‍රම බලකාය හැකි තාක් නිවස තුළ සිටිය යුතු අතර භෞතික අන්තර්ක‍්‍රියා ඉතා සුළු පිරිසකට සීමාකළ යුතුය.
දෙවනුව, අපගේ පාසල් හා උසස් අධ්‍යාපන ආයතන නිවසේ සිට අධ්‍යයන කටයුතු කිරීමේ ක‍්‍රමයකට ක‍්‍රියාත්මක විය යුතුය.
මේ ක‍්‍රමය සතියකට වරක් කෙරෙන ආකාරයට මෙම සතියේදී අපි හඳුන්වා දුන්නෙමු. මෙය ඉතා සුමටව ක‍්‍රියාත්මක වී ඇති අතර ඉස්මතුවූ ගැටලූ මේ වන විට නිරාකරණය කර ඇත. අධ්‍යාපන අමාත්‍යාංශය මෙම නව ක‍්‍රමය ලබන බදාදා සිට ක‍්‍රියාත්මක කරනු ඇත. සියලූ පෙරපාසල් හා ළමා සුරැකුම් මධ්‍යස්ථානද වසාදැමෙනු ඇත. දිවා කාලය තුළ බලාකියාගන්නට නොහැකි දෙමාපියන්ගේ දරුවන්ට විකල්ප සුරැකුම් ක‍්‍රමයක් හඳුන්වා දෙනු ඇත.
තෙවනුව, අපගේ ගමන්බිමන් හා රැුස්වීම් සඳහා සීමා පැනවෙනු ඇත. අප හැකිතාක් නිවසේ රැඳීසිටිය යුතුය.
අපගේ සමාජ ආශ‍්‍රය කුටුම්බයට සීමාකළ යුතුය. රැුස්වීම් නිවසේ පමණක් කළ යුතුය. ඥාතීන් හෝ බැහැදැකීමෙන් වැළකිය යුතුය. නිවසෙන් පිටවිය යුත්තේ අත්‍යවශ්‍ය දෙයකට පමණය.
මා දන්නවා මෙය කරන්න අමාරු දෙයක් බව. පොළක් වැනි ජනාධික තැනක සති අන්තයක දුරස්ථව සිටීමේ අපහසුව.
එහෙත් අපගේ සාමාන්‍ය පුරුදු ටිකක් හෝ වෙනස් කරගත යුතුය. උදාහරණයකට සති අන්තයේ පොළට නොයා ජනයා අඩුවෙන් ගැවසෙන සතියේ දිනක යා හැකියි. සමාජ දුරස්ථකරණය අපගේ මානව ගතිලක්ෂණවලට ප‍්‍රතිවිරුද්ධ දෙයක් බව ඇත්තය.
සමාජශීලීබව අපගේ මානව ස්වභාවයයි. මිතුරන් හා පවුලේ අය සමග ඇසුරට අප කැමති එනිසාය. මට මෙය හොඳටම තේරුම්ගත හැකිය. එහෙත් ඔබ අප පනවන සමාජ ඇසුර සීමාකිරීම තේරුම්ගත යුත්තේ අප සියලූදෙනාම මුහුණදී ඇති මේ අසීරු තත්ත්වය සලකා බලාය. වයිරසයෙන් ආසාදනය වන සංඛ්‍යාව එසේ නොමැතිව අපට අඩු කරගත නොහැක. අපගේ පවුල්වල සාමාජිකයන් හා වැඩිහිටියන් අපට බේරාගත හැකි එකම ක‍්‍රමය මෙයය. ඒ නිසා මෙම අසීරු හා අපහසු පියවර කරුණාකර ඉවසා දරාගන්න.
අප එකිනෙකා තමන්ගේ වගකීම ඉටුකළහොත් පමණයි සිංගප්පූරුවට කොවිඞ් 19 තත්ත්වයෙන් ආරක්ෂා විය හැක්කේ. ඒ ගැන ඔබට කෙලින්ම කියන්නයි මා අද ඔබ ඇමතුවේ. එපමණක් නොවේ, තත්ත්වය හොඳ අතට හැරෙන බවට ඔබට සහතික වන්නටයි. අත්‍යව්‍ය කටයුතු සුපුරුදු පරිදි කෙරෙනු ඇත. අපට අවශ්‍ය ප‍්‍රමාණයට මේ කාලයටත් ඉන් ඔබ්බටත් ආහාර තොග ඇත. ඔබගේ ආහාරපාන පොළෙන් හෝ සුපිරි වෙළෙඳසැලෙන් ලබාගත හැක. අනවශ්‍ය ලෙස තොග එක්රැුස් කරගත යුතු නැත.
මේ තත්ත්වයෙන් අපගේ සේවා නියුක්තිකයන් හා ව්‍යාපාරිකයන් කෙතරම් බැටකනවා ද කියා මම දන්නෙමි. මෙය ඔවුනට අතිශය අසීරු කාලයකි. ඔවුන්ට මෙම අසීරුතාවෙන් ගොඩඑන්නට අපි උදවු කරන්නෙමු. ලබන සඳුදා පාර්ලිමේන්තුවේ මීට අදාළ විසඳුම් කුටුම්බ හා ව්‍යාපාරවලට ඉදිරිපත් කෙරෙනු ඇත. කුලී ගෙවීම්, ණය පියවීම් ආදිය ලිහිල් වන නීති පනත් හඳුන්වාදෙනු ඇත.
මීට අමතරව මුහුණු ආවරණයක්ද සෑම කෙනෙකුට අපි ලබාදෙන්නෙමු. ඒ ලෝක සෞඛ්‍ය සංවිධානයේ උපදෙස්වලට අනුකූලවය.
ඉදිරි සති කිහිපය ඉතා තීරණාත්මක වනු ඇත. මේ නව පියවර මැද වුවද ඉදිරි දින කිහිපය තුළ ආසාදිත සංඛ්‍යාව ඉහළ යා හැක. ඒ දැනටමත් ආසාදනයවූවන්ගෙන් පැතිරුණු අයගෙන් හෝ මෙතෙක් වෛද්‍යවරුන් වෙත නොගිය අයගෙන් ය. එහෙත් ඉදිරි සති කිහිපය තුළ අපගේ දැඩි උත්සාහය වනුයේ එම සංඛ්‍යාව පහත හෙළීම හා යම් දරාගත හැකි පාලනයකට නතු කරගත හැකි ප‍්‍රමාණයකට තත්ත්වය ගෙනඒමය. සෑම සිංගප්පූරු වැසියෙකුම කෝවිඞ් 19න් ආරක්ෂා කිරීමට අපගේ උපරිම වෙරදරන්නෙමු. බොහෝ දෙනා වෙහෙස මහන්සිවී මේ වෙනුවෙන් දැනටමත් කටයුතු කර ඇත. වෛද්‍යවරුන්. හෙද-හෙදියන්, අනෙකුත් සේවකයන්ගේ කැපවීම හා සේවයට අපගේ ස්තුතිය පිදේ.
දැන් අප සියලූදෙනාම සටන්බිමේ ඉදිරිපෙළේ සිටිමු. එය දිගු සටනක් වනු ඇත. යම් රටකට මෙම තත්වයෙන් ගොඩඒමට හැකි නම් එය සිංගප්පූරුවයි. අවශ්‍ය සම්පත් අප සතුව ඇත. අවශ්‍ය අධිෂ්ඨානය අප තුළ ඇත. අප එක්සත්ය.
එකිනෙකාට මේ තත්ත්වයෙන් නැගීසිටීමට උරදෙමින් මෙම තත්ත්වයෙන් ගොඩඑනු පමණක් නොව අප පෙරට වඩා ශක්තිමත්ව නැගෙනු ඇත.
(පරිවර්තනය: උදන් ප‍්‍රනාන්දු)
